12 декабря

Канон святаго мученика Парамона Вифинского

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь мученику Парамону Вифинскому, глас 4

Му́ченик Твой, Го́споди, Парамо́н/ во страда́нии свое́м вене́ц прия́т нетле́нный от Тебе́, Бо́га на́шего;/ име́яй бо кре́пость Твою́, мучи́телей низложи́,/ сокруши́ и де́монов немощны́я де́рзости.// Того́ моли́твами спаси́ ду́ши на́ша.

Кондак мученику Парамону Вифинскому, глас 2

Звезда́ све́тлая яви́лся еси́,/ непреле́стная ми́рови,/ Со́лнца Христа́ возвеща́ющи,/ зарями твои́ми, страстоте́рпче Парамо́не,/ и пре́лесть погаси́л еси́ всю,// нам же подае́ши свет, моля́ся непреста́нно о всех нас.

Канон Гла́с 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святый мучениче Парамоне, моли Бога о нас.

Пою́ща светоно́сную твою́ па́мять, му́чениче Парамо́не, свеща́тельными Ду́ха заря́ми се́рдце мое́ просвети́ и пребыва́ти ми́ Боже́ственными законоположе́ньми укрепи́.

Припев: Святый мучениче Парамоне, моли Бога о нас.

Му́ченическим пресве́тло благосла́вием, блаже́нне, обогати́лся еси́, му́ченическими просия́в добро́тами и кра́сными ра́нами украси́вся, Парамо́не. Те́мже тя́ ве́рно ублажа́ем.

Сла́ва Отцу́ и Сы́ну и Свято́му Ду́ху:

Во́д животво́рных Ду́ха сы́й испо́лнен, безбо́жия зно́ем лю́те иста́явшия ороси́л еси́ и к воде́, сла́вне, воспокое́ния путеводи́л еси́.

И ны́не и при́сно и во ве́ки веко́в. Ами́нь.

Богоро́дичен: В ле́то Безле́тнаго родила́ еси́, Челове́ка бы́вша, Его́же приле́жно моли́, Чи́стая, я́ко Сы́на Твоего́ и Го́спода, души́ моея́ ле́тныя стра́сти уврачи́ти, Всенепоро́чная.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святый мучениче Парамоне, моли Бога о нас.

Возноше́ние вра́жие, смири́вся Христа́ ра́ди, разруши́л еси́ и того́ полки́ мече́м терпе́ния ссе́кл еси́.

Припев: Святый мучениче Парамоне, моли Бога о нас.

Разруши́л еси́ лука́вый сове́т и́же на ве́ру на́шу и кре́пко пострада́л еси́, му́чениче страстоте́рпче Парамо́не.

Сла́ва Отцу́ и Сы́ну и Свято́му Ду́ху:

Укрепи́лся еси́ Боже́ственною благода́тию, я́ко во́ин си́лен, и лю́тыя му́ки, му́чениче, я́коже со́н, вмени́л еси́.

И ны́не и при́сно и во ве́ки веко́в. Ами́нь.

Богоро́дичен: Укрепи́ мо́й у́м, совраща́емь мно́гими страстьми́, Ма́ти Бо́жия Пречи́стая, я́ко да по до́лгу сла́влю Тя́.

Седа́лен, гла́с 4. Подо́бен: Вознесы́йся.

Терпе́нием Боже́ственных повеле́ний очи́стил еси́ ду́шу от скве́рны и к страда́льческому пости́гл еси́ соверше́нию, жре́ти бо куми́ром отре́клся еси́ преле́стным, подража́я Христа́, копие́м закла́н бы́л еси́, но приле́жно моли́ Его́ о ми́ре, всебла́женне Парамо́не.

Сла́ва, и ны́не, Богоро́дичен:

По Бо́зе в Тво́й, Богоро́дице, прибега́ю смире́нный покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу. Моле́ние сотвори́, Чи́стая, к Сы́ну Твоему́, от си́х изба́вити мя́.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святый мучениче Парамоне, моли Бога о нас.

Се́рдце твое́, му́жеством огражда́емо и дерзнове́нием, сла́вне, разжига́емо, му́ки многоплете́нныя младе́нец стреля́ния, му́чениче доблему́дренне, вмени́л еси́.

Припев: Святый мучениче Парамоне, моли Бога о нас.

Умерщвля́еми повеле́нием мучи́теля, страда́льцы ви́дев, я́коже они́, боже́ственную ре́вность прия́ше му́ченик Парамо́н и к страда́нию прии́де.

Припев: Святый мучениче Парамоне, моли Бога о нас.

Кре́пко тя́ растяга́ема и ко́пии неми́лостивно бодо́ма, и ко́зни вра́жия побежда́юща, Христо́с венча́ тя подвигополо́жник, блаже́нне Парамо́не.

Сла́ва Отцу́ и Сы́ну и Свято́му Ду́ху:

Терпе́нию удивля́яся му́чеников и те́х соверше́нию дивя́ся, сла́вне, те́х приобщи́лся еси́ ре́вности ве́ры и пречестно́му страда́нию.

И ны́не и при́сно и во ве́ки веко́в. Ами́нь.

Богоро́дичен: Умерщвле́ны челове́ки преступле́нием, живоно́сным Твои́м Рождество́м, Де́во Мари́е, все́х оживи́ла еси́. Те́м Тя́ сла́вим и боголе́пно ублажа́ем.

Пе́снь 5

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святый мучениче Парамоне, моли Бога о нас.

Да́р многоце́нный, тебе́ сама́го, прине́сл еси́ Творцу́ твоему́, пострада́в и пре́лесть победи́в, му́чеников удобре́ние.

Припев: Святый мучениче Парамоне, моли Бога о нас.

Куми́ры, му́дре, и де́монская ка́пища сокруши́л еси́, утвержде́но помышле́ние стяжа́в на ка́мени Боже́ственныя ве́ры, Парамо́не.

Сла́ва Отцу́ и Сы́ну и Свято́му Ду́ху:

Де́монов мно́жество му́жественно острупи́л еси́, острупле́нием пло́ти твоея́, страда́льче доблему́дренный, те́мже тя́ ублажа́ем.

И ны́не и при́сно и во ве́ки веко́в. Ами́нь.

Богоро́дичен: Равноче́стен Отцу́ Сы́й и Ду́ху Госпо́дь от чи́стых Твои́х крове́й воплоти́ся, Чи́стая, Челове́к бы́в.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святый мучениче Парамоне, моли Бога о нас.

Не бы́л еси́ во вре́мя подвиго́в лени́в, встанли́в же па́че и боже́ственному страда́нию до́блествен. Сего́ ра́ди вене́ц сла́вы получи́л еси́.

Припев: Святый мучениче Парамоне, моли Бога о нас.

Му́чеников собо́ру себе́ сочета́л еси́, сконча́вшихся усе́рдно пре́жде твоего́ страда́ния, приснопа́мятне, и с ни́ми небе́сному черто́гу сподо́бился еси́.

Сла́ва Отцу́ и Сы́ну и Свято́му Ду́ху:

Ко́пия подража́теля тя́ Христо́ва соде́лаша, и́миже пробода́емь, му́чениче, к Нему́ восте́кл еси́, венцено́сец, умертви́в терпе́ния ору́жием несмы́сленныя.

И ны́не и при́сно и во ве́ки веко́в. Ами́нь.

Богоро́дичен: Изба́ви мя́ собла́знов жите́йских, Пренепоро́чная, в нощи́ неве́дения безме́стными помышле́нии одержи́маго и зло́бою вра́жиею при́сно омрача́емаго.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святый мучениче Парамоне, моли Бога о нас.

Враче́вств и чуде́с благода́тию, му́дре му́чениче, от Бо́га обога́щся све́тло, врачу́еши зову́щия: благослове́н еси́ в хра́ме сла́вы Твоея́, Го́споди.

Припев: Святый мучениче Парамоне, моли Бога о нас.

Простира́емых му́к небре́гл еси́, все́ попече́ние име́я на небесе́х и зовы́й, достосла́вне: благослове́н еси́ в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Ты́ крове́й, страда́льче, огне́м всю́ попали́л еси́ ве́щь безбо́жия, сла́вне, лука́вую; росо́ю же чуде́с твои́х су́щия в зно́и лю́тых ороша́еши, Парамо́не, зовы́й: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, еди́на ра́дость ро́ждшая челове́ком, ра́дуйся, не́бо и престо́ле херуви́мский, и пресла́вная пала́то Ца́рствующаго все́х веко́в, всенепоро́чная Влады́чице.

Пе́снь 8.

Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святый мучениче Парамоне, моли Бога о нас.

Бо́драго тя́ храни́теля душа́м стяжа́вше, обогати́хомся, успову́юща де́монская мечта́ния всегда́, и пло́ти свире́пыя во́лны, и бу́рю помышле́ний, му́чениче многострада́льне, вопию́щих: благослови́те, вся́ дела́ Госпо́дня,Го́спода.

Припев: Святый мучениче Парамоне, моли Бога о нас.

Струя́ми твои́х, свяще́нных крове́й багряни́цу очервлени́л еси́ себе́, обветша́ние весьма́ прия́ти не иму́щу, и, све́тло украша́емь, на небесе́х обита́еши, вопия́, блаже́нне: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Якоже овча́ чи́стое, и же́ртва непоро́чная, и приноше́ние, всесожега́емо у́гльми свяще́ннаго, му́чениче, страда́ния, страстополо́жнику твоему́ Христу́ прине́слся еси́, му́дре, поя́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Зако́на Тя́ се́ни и проро́ков проначерта́ша, Чи́стая, пропове́дания, неизрече́нно хотя́щу бы́ти Бо́га на́шего роди́тельницу, Богоблагода́тная Чи́стая. Ему́же вси́ пое́м: благослови́те, вся́ дела́ Госпо́дня, Го́спода.

Песнь 9

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святый мучениче Парамоне, моли Бога о нас.

Се́ светоза́рнаго страстоте́рпца светоявле́нная осия́ па́мять, все́х ве́рных сердца́ просвеща́ющи Боже́ственным Ду́хом, ра́достно ликовству́ющих и ве́рою блажа́щих.

Припев: Святый мучениче Парамоне, моли Бога о нас.

Яко седмокру́жною десяти́цею и трегу́бною со́тницею непобеди́мых му́чеников совокупля́емь, с ни́миже те́ло твое́, му́чениче Христо́в, лежи́т, и с ни́ми моли́ спасти́ся на́м.

Припев: Святый мучениче Парамоне, моли Бога о нас.

По́прище проше́дше боле́зненное, многови́дных му́к испо́лнено, и со Христо́м, ми́р победи́вшим, све́тло победи́вше, венцено́сцы му́ченицы, на небесе́х жи́тельствуете.

Сла́ва Отцу́ и Сы́ну и Свято́му Ду́ху:

Взя́т бы́л еси́ от земли́ и по́чести твои́х по́двиг прия́л еси́, ны́не же ре́ки источа́еши на́м чуде́с, тебе́ чту́щим и благоче́стно па́мять твою́ торжеству́ющим, Парамо́не.

И ны́не и при́сно и во ве́ки веко́в. Ами́нь.

Богоро́дичен: Просвети́ души́ моея́ зе́ницы, омраче́нныя невиде́нием тлетво́рнаго греха́, Богороди́тельнице Пречи́стая, Влады́чице, Ты́ бо ве́рных еси́ по́мощь и просвеще́ние, Чи́стая.

Свети́лен. Подо́бен: Жены́, услы́шите.

Мно́жество непобеди́мое во́инства, сосло́вие боже́ственно непобеди́мое му́чеников, благочестному́дренно воспои́м, иму́ще чинонача́льника Парамо́на чу́днаго, обличи́вшаго мучи́теля, и́же со все́ми му́ченики вене́ц получи́ сла́вы.

Сла́ва, и ны́не, Богоро́дичен:

Ра́дуйся, Бо́жия пала́то; ра́дуйся, горо́ осене́нная; ра́дуйся, купино́ неопали́мая; ра́дуйся, престо́ле сла́вы; ра́дуйся, боже́ственная трапе́зо; ра́дуйся, ста́мно всезлата́я; ра́дуйся, све́щниче всесве́тлый; ра́дуйся, ле́гкий о́блаче, Де́во Ма́ти Мари́е.

Молитва

О святы́й уго́дниче Бо́жий, му́чениче Парамо́не! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.