11 декабря

Канон преподобномученику Стефану Новому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

По́стнически предподвиза́вся на горе́, у́мная враго́в ополче́ния всеору́жием Креста́ погуби́л еси́, всеблаже́нне, па́ки же ко страда́льчеству му́жески вооружи́лся еси́, уби́в Копрони́ма мече́м ве́ры, и обои́х ра́ди венча́лся еси́ от Бо́га, преподобному́чениче Стефа́не приснопа́мятне.

Канон Гла́с 6.

Пе́снь 1.

Ирмо́с: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобномучениче Стефане, моли Бога о нас.

Ра́достно ты́ проше́д те́сную стезю́ поста́, муче́ния широто́ю вра́жия попали́л еси́ стремле́ния и простра́нную жи́знь, блаже́нне, насле́довал еси́.

Припев: Преподобномучениче Стефане, моли Бога о нас.

Ко́рень тя́, непло́дный пре́жде, пло́дствует Анны тезоимени́тый, я́ко дре́вле Самуи́ла, и да́вшему тя́ дае́т Бо́гу, жития́ твоего́, му́дре, благода́ть зна́менающи.

Припев: Преподобномучениче Стефане, моли Бога о нас.

В свяще́ннейший боже́ственный мона́хов прише́д чи́н, я́ко светле́йшая звезда́, доброде́тельми возсия́л еси́, ве́рныя озаря́я та́инственно, преподо́бне Стефа́не.

Сла́ва Отцу́ и Сы́ну и Свято́му Ду́ху:

Стесни́в те́ло заключе́нием те́снаго до́му, впери́л еси́ у́м к небе́сным, му́дре, восхожде́нии до́бре распространя́яся.

И ны́не и при́сно и во ве́ки веко́в. Ами́нь.

Богоро́дичен: Непрохо́дную две́рь, чи́стый чистоты́ хра́м, до́брую в жена́х, Святу́ю Влады́чицу гла́сы свяще́нными, свяще́ннии лю́дие, просла́вим.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобномучениче Стефане, моли Бога о нас.

Ум тво́й, зре́нием к Бо́гу удобря́емь, о́тче, красне́йший яви́ся, и благода́ти вся́кия испо́лнен вои́стинну, и Боже́ственныя све́тлости прича́стник.

Припев: Преподобномучениче Стефане, моли Бога о нас.

Честне́й ико́не Христо́ве и Того́ Ро́ждшия покланя́яся, блаже́нне, царя́ злочести́ваго повеле́ние ме́рзское возненави́де си́лою Боже́ственнаго Ду́ха.

Припев: Преподобномучениче Стефане, моли Бога о нас.

Желе́зы тебе́, желе́зно иму́ща се́рдце, пребезу́мный, связа́в, отсыла́ет в темни́цу я́ко храни́теля Христо́вых догма́т, Стефа́не всеблаже́нне.

Сла́ва Отцу́ и Сы́ну и Свято́му Ду́ху:

Твоя́ кра́сныя я́вственно име́л еси́, преподо́бне, но́ги, муче́ния к стезя́м ступа́ющия све́тло и главы́ вра́жия сокруша́ющия, Стефа́не многострада́льне.

И ны́не и при́сно и во ве́ки веко́в. Ами́нь.

Богоро́дичен: Из Тебе́, еди́ныя Чи́стыя, Пребоже́ственное Сло́во воплоти́ся, я́ко ве́сть, и спасе́ ны от тли́, покланя́ющияся за милосе́рдие Боже́ственному Его́ снизхожде́нию.

Конда́к, гла́с 8. Подо́бен: Взбра́нной.

Тро́ицы рачи́теля и боже́ственнаго Стефа́на восхва́лим ве́рно пе́сньми, празднолю́бцы, от се́рдца, я́ко почествова́вша начерта́ние кра́сное Влады́ки и Ма́тере Его́, и согла́сно ны́не от любве́ возопии́м ему́, ра́дующеся: ра́дуйся, о́тче присносла́вне.

Та́же седа́лен, гла́с 1. Подо́бен: Гро́б Тво́й, Спа́се.

Кро́вь твоя́, му́дре, та́йно зове́т от земли́ к Бо́гу, я́коже Авелева, богому́дре, я́сно бо пропове́да Христо́во вочелове́чение. Те́мже посрами́л еси́ иконора́тных пре́лесть и преше́л еси́ в небе́сныя черто́ги, моли́ спасти́ на́с.

Сла́ва, подо́бен то́йже:

Поще́нием просвети́вся, я́ко зла́то в горни́ле, облиста́л еси́, му́дре, зако́нным страда́нием и вене́ц прия́л еси́, твоему́ зва́нию подо́бен. Те́м, ра́дующеся, всесвяту́ю твою́ па́мять пра́зднуем, твоя́ по́двиги почита́юще, приснопа́мятне Стефа́не.

И ны́не, Богоро́дичен:

Безневе́стная Чи́стая Богоро́дице Де́во, еди́на ве́рных предста́тельнице и покро́ве, бе́д, и скорбе́й, и лю́тых обстоя́ний вся́ изба́ви, на Тя́ упова́ние, Отрокови́це, иму́щия, и ду́ши на́ша спаси́ боже́ственными моли́твами Твои́ми.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобномучениче Стефане, моли Бога о нас.

Све́том Ду́ха просвеща́емь, мольба́ми Боже́ственными слепы́м све́т, о́тче, по́дал еси́, твоего́ Влады́ку и Бо́га подража́в, богодохнове́нне.

Припев: Преподобномучениче Стефане, моли Бога о нас.

Ви́ден бы́л еси́ издале́ча пла́вающими в мо́ри, окормля́я ты́я, блаже́нне, к ти́хому приста́нищу Боже́ственною благода́тию, призыва́ющия твое́ ве́рно, о́тче Стефа́не, и́мя.

Припев: Преподобномучениче Стефане, моли Бога о нас.

Священноде́йствуемь, я́коже заколе́ние свяще́нное прине́слся еси́ тебе́ ра́ди Пожре́нному, Стефа́не, и перворожде́нных во оби́телех воспочи́л еси́, ра́дуяся.

Сла́ва Отцу́ и Сы́ну и Свято́му Ду́ху:

Честны́м твои́м глаго́лом пре́жде на по́лы сухи́й здра́в яви́ся ве́сь, удиви́вся, му́чениче, да́нной ти́ благода́ти с высоты́ оби́льно челове́ков на исправле́ние.

И ны́не и при́сно и во ве́ки веко́в. Ами́нь.

Богоро́дичен: На Тя́, Пренепоро́чная, спасе́ния моего́ наде́жды возложи́х, к Твоему́ покро́ву прибего́х, бу́ди ми́, Отрокови́це, помо́щница, лю́тых избавля́ющи мя́.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобномучениче Стефане, моли Бога о нас.

Му́ченическими венча́ почестьми́ по́стническия твоя́ труды́ и́стинно, преподо́бне Стефа́не, Подвигополо́жник еди́н Бо́г на́ш, на уби́йцы укрепи́вый тя́.

Припев: Преподобномучениче Стефане, моли Бога о нас.

Подвиза́яся благосла́вно, со мно́жеством му́ченик в темни́цах приобща́яся, му́чениче, обре́лся еси́, тя́ бо, я́ко зве́зды незаходи́мое со́лнце, обстоя́ще, пребо́льше просвеща́хуся.

Припев: Преподобномучениче Стефане, моли Бога о нас.

Глаго́лы Боже́ственными свяще́нныя испове́дники и подража́тели Боже́ственных страсте́й ублажа́ем, три́ ста́ и четы́редесять и два́, безбо́жных пора́товавшия.

Сла́ва Отцу́ и Сы́ну и Свято́му Ду́ху:

Власо́в отъя́тие руга́тельно, уше́с отре́зание и ру́к, уде́с же боже́ственных пожже́ние по ико́не Христо́ве подъя́ше мно́жество преподо́бных благосла́внейшее.

И ны́не и при́сно и во ве́ки веко́в. Ами́нь.

Богоро́дичен: Пресвята́я, Яже Бо́га еди́на на земли́ я́ко и́стинно Пресвята́го ро́ждшая, Тя́, Богоро́дицу, при́сно пропове́дающия освяти́ и спаси́ хода́тайством Твои́м.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобномучениче Стефане, моли Бога о нас.

Слове́с твои́х си́лы зло́бы обрета́тель претерпе́ти не возмо́же, те́мже ю́зам тя́, Стефа́не, и ра́нам, сме́рти же ну́ждней су́рово льсте́ц предаде́.

Припев: Преподобномучениче Стефане, моли Бога о нас.

Яко хле́б, пеко́мь огне́м и за но́зе неми́лостивно пове́шаемь, всесоже́глся еси́, Па́вле, и Бо́гу же́ртва прине́слся еси́, соводворе́ния му́ченик сподобля́емь.

Припев: Преподобномучениче Стефане, моли Бога о нас.

Зако́нно пострада́вше заключе́ни и удавле́нием житие́ оста́вльше во Ефе́се преподо́бнии мона́си, о́смь к три́десятим, я́же ве́рою и любо́вию ублажа́ем.

Сла́ва Отцу́ и Сы́ну и Свято́му Ду́ху:

Кре́пко судя́щему проти́вился еси́, и ра́нами ра́ниму твоему́ те́лу, умре́ти изво́лил еси́ за Христа́ еди́наго Безсме́ртнаго, достосла́вне Пе́тре великоимени́тый.

И ны́не и при́сно и во ве́ки веко́в. Ами́нь.

Богоро́дичен: Еди́ну Всепе́тую и до́брую в жена́х Богороди́тельницу, христиа́н сте́ну необори́мую, Пречи́стую Влады́чицу несомне́нным се́рдцем ублажа́ем.

Конда́к, гла́с 3. Подо́бен: Де́ва дне́сь.

Из непло́дна, преподо́бне, ко́рене возрасте́ ве́твь первострада́льцу тезоимени́те, мона́хов наста́вник вели́к, о́тче, яви́лся еси́ и, я́рости не убоя́вся царя́, не хотя́ща Христо́в чествова́ти о́браз, сего́ ра́ди сконча́вся, му́ченический вене́ц прия́л еси́, Стефа́не.

Икос:

Иже за́висти оте́ц и Бо́га чу́ждь, искуше́ния тебе́ мно́га и треволне́ния воздви́же, не терпя́ зре́ти твоего́ Боже́ственнаго жития́ и пра́ваго твоего́ непреткнове́ннаго ше́ствия. Ме́рзский лука́вствия на тя́ сшива́ет, мне́вся бы́ти учени́к, я́коже Иу́да пре́жде, и тебе́ в ру́ки беззако́нных, о́тче, потща́ся вложи́ти, Христа́ пропове́дающа све́тло и Того́ о́бразу любо́вию кла́няющася, Того́ ра́ди му́ченический вене́ц прия́л еси́, Стефа́не.

Пе́снь 7.

Ирмо́с: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподобномучениче Стефане, моли Бога о нас.

Возвести́ся тебе́ коне́ц, блаже́нне, вседе́тельным хоте́нием, те́мже бо́льшему посту́ вда́л еси́ себе́ и от сла́вы в сла́ву прехо́диши, убие́н за Христа́, су́щаго над все́ми Бо́га.

Припев: Преподобномучениче Стефане, моли Бога о нас.

Тезоиме́нно первострада́льцу спросла́вился еси́, и́бо камену́емь неми́лостивно, и влачи́мь, и бие́мь, кровьми́ испо́лнил еси́ зе́млю и ду́шу твою́ Го́споду, ра́дуяся, преда́л еси́.

Сла́ва Отцу́ и Сы́ну и Свято́му Ду́ху:

На сто́гнах, му́чениче Стефа́не, гра́дских неми́лостивно влачи́мь, угла́дил еси́ муче́ния стезю́ ве́рным, на ню́же наступа́ющии кре́пко к небе́сному гра́ду я́ве доидо́ша.

И ны́не и при́сно и во ве́ки веко́в. Ами́нь.

Богоро́дичен: Свяще́ннейшии проро́цы провозвести́ша, Чи́стая, явле́ннейше та́инство честна́го Твоего́ Рождества́, и ны́не мы́, сбытие́ све́тло разуме́юще, благоче́стно Тя́ ублажа́ем.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподобномучениче Стефане, моли Бога о нас.

Свире́пейше, я́коже зве́рие, восхи́тиша Христо́ва а́гнца бию́щии, убива́юще и с му́жи беззако́нными спогреба́юще, пребеззако́нием живу́щии.

Припев: Преподобномучениче Стефане, моли Бога о нас.

Неми́лостивно твою́ главу́ вра́г сокруши́, ю́же Бо́г в высоча́йших венце́м венча́ победи́тельным, вене́чниче многострада́льне, сла́ва му́чеников и все́х преподо́бных.

Припев: Преподобномучениче Стефане, моли Бога о нас.

Терпели́вно мучи́телю противля́яся, богому́дрый Андре́й ра́нами раздробля́ется, и неми́лостивно умерщвля́ется пра́ведный, поя́ Влады́це Христу́ во ве́ки.

Сла́ва Отцу́ и Сы́ну и Свято́му Ду́ху:

Святе́йший до́м уже́ бы́в, Иже над все́ми святы́ми Воспочива́ющаго, во твое́м име́л еси́ се́рдце живу́ща, многострада́льне Стефа́не, во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Кропле́нием Боже́ственныя Кро́ве, Богоблагода́тная, из ре́бр истоще́нныя Сы́на Твоего́ и Бо́га, лука́вым грехо́м прибы́вшую мне́ скве́рну, — молю́ся Тебе́, — омы́й, Де́во.

Песнь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподобномучениче Стефане, моли Бога о нас.

Ви́дев, ра́дуяся, Ангелов чи́ны, патриа́рхов, преподо́бных, проро́ков, страда́льцев, апо́столов же и пра́ведных все́х, богодохнове́нне, с ни́миже совокупля́яся, помяни́, заступи́ на земли́ чи́сте ублажа́ющих тя́.

Припев: Преподобномучениче Стефане, моли Бога о нас.

Яко све́т, я́ко у́тро, я́ко вели́кое со́лнце, я́ко не́бо, назве́зденное чу́дес светлостьми́ и я́звами святы́ми бы́л еси́, все́х помышле́ния, благохва́лящих тя́, Стефа́не, украша́я и́стинно, му́чениче многострада́льне.

Припев: Преподобномучениче Стефане, моли Бога о нас.

Тве́рдыми по́стничества по́двиги низложи́в тмы́ нача́ла, о́тче, пре́жде и в после́дняя пострада́в кре́пко, всеконе́чней па́губе сия́ преда́в, Стефа́не, му́чеников добро́то и преподо́бных похвало́.

Сла́ва Отцу́ и Сы́ну и Свято́му Ду́ху:

Твоя́ пресла́вная па́мять дне́сь пресве́тлыми заря́ми даро́в Ду́ха озаря́ет земна́я исполне́ния, ю́же ра́достно ны́не пра́зднующия просвети́ и освяти́ ны, богоблаже́нне Стефа́не.

И ны́не и при́сно и во ве́ки веко́в. Ами́нь.

Богоро́дичен: Све́та прия́телище, Богора́дованная, священному́чеников и́стинно утвержде́ние и преподо́бных все́х похвало́, спаси́ ны от бе́д и обстоя́ний, и враго́в наше́ствия, воспева́ющия Тя́.

Свети́лен. Подо́бен: Ду́хом во святи́лищи.

Боле́зньми по́стническими началозло́бнаго зми́я до конца́ умертви́л еси́, на конце́х же вене́ц муче́ния взе́м, Стефа́не всехва́льне, поклоне́ние подая́ честны́м образо́м, я́ко ве́дый на первообра́зное я́ве преходи́ти, всеблаже́нне.

Сла́ва, и ны́не, Богоро́дичен:

Неизрече́ннаго Рождества́ была́ еси́ Всенепоро́чная Неве́ста, я́ко су́щи чисте́йший хра́м, Богоро́дице, Све́та бо преве́чнаго, в Тя́ все́льшагося, родила́ еси́ — Бо́га Сло́ва, пою́ще Твое́ у́бо Рождество́, велича́ем досто́йно Тебе́, всенепоро́чная Отрокови́це.

Молитва

О свяще́нная главо́, преподо́бне о́тче, преблаже́нне а́вво Стефа́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.