11 декабря

Канон святаго мученика Иринарха Севастийского

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченик Твой, Го́споди, Ирина́рх,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н. Глас 6.

Пе́снь 1.

Ирмо́с: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святый мучениче Иринарше, моли Бога о нас.

От собла́зн жите́йских и страсте́й, сту́жающих ми́, умири́ мо́й у́м, страда́льче Ирина́рхе, твою́ похвали́ти па́мять ти́хо сподо́би.

Припев: Святый мучениче Иринарше, моли Бога о нас.

Струя́ми крове́й твои́х пла́мень гони́телей угаси́в, напои́л еси́ помышле́ния ве́рных возрасти́ти жела́ние живота́ ве́чнаго благоче́стно, му́чениче Ирина́рхе.

Сла́ва Отцу́ и Сы́ну и Свято́му Ду́ху:

Священнопобе́дныя венцы́ я́ко страда́лец прие́м, Ирина́рхе, преложи́лся еси́ от земли́ к ми́ру нера́тному, и све́ту, и животу́ и́стинному, блаже́ннейше.

И ны́не и при́сно и во ве́ки веко́в. Ами́нь.

Богоро́дичен: Невмести́мое Сло́во, во Твое́м чре́ве вмеще́но, ро́ждши, Боговмести́мая ски́ния, утесня́ющаго мя́ лю́тых треволне́ния злы́х, Чи́стая, изба́ви.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святый мучениче Иринарше, моли Бога о нас.

Вжиля́ешися кре́постию боже́ственною и гряде́ши к подвиго́м усе́рдно, всеблаже́нне, терпя́ ра́ны и растерза́ния гоня́щих, страстоте́рпче му́чениче до́блественнейше.

Припев: Святый мучениче Иринарше, моли Бога о нас.

Кре́пость ти́ дае́т Христо́с, вели́кий Страстополо́жник, погуби́ти пре́лесть и посрами́ти врага́, хва́лящася безсту́дно и су́етно, му́чениче, свире́пеющаго.

Сла́ва Отцу́ и Сы́ну и Свято́му Ду́ху:

Низложи́ боле́зньми му́жественными злонача́льнаго зми́я ли́к святы́х, пострада́в кре́пко и ра́ны и у́зы претерпе́в си́лою Боже́ственнаго Ду́ха.

И ны́не и при́сно и во ве́ки веко́в. Ами́нь.

Богоро́дичен: Юже ви́де дре́вле Иа́ков от земли́ дося́жущу к небе́сней высоте́ Боже́ственную ле́ствицу, я́ве Мари́ю Чи́стую, Влады́чню воспои́м пала́ту.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святый мучениче Иринарше, моли Бога о нас.

Зако́нно поте́кл еси́, зако́нно пострада́л еси́ и зако́нно венча́лся еси́, Бо́жиим зако́ном укрепля́емь, и непревре́дна тебе́ сама́го соблюда́я, блаже́ннейше.

Припев: Святый мучениче Иринарше, моли Бога о нас.

Не терпя́, сла́вне, в пре́лести ходи́ти, к богорожде́нию я́ко смы́слен, ра́дуяся устреми́лся еси́, Све́т разу́мный прие́м и свети́льник показу́яся.

Припев: Святый мучениче Иринарше, моли Бога о нас.

Отню́д не покры́ глубина́, прие́мши тя́, всеблаже́нне му́чениче, позна́вши тя́ Боже́ственных страсте́й всеи́стиннейшаго Христа́ боже́ственнаго свиде́теля, Ирина́рхе.

Сла́ва Отцу́ и Сы́ну и Свято́му Ду́ху:

Священноде́йствуемы, и предзакала́емы, и стру́жемы ку́пно, и огне́м отвсю́ду пали́мы, не отверго́стеся Христа́, страстоте́рпицы досточу́дныя.

И ны́не и при́сно и во ве́ки веко́в. Ами́нь.

Богоро́дичен: Де́ва пребыла́ еси́ по Рождестве́, я́коже была́ еси́ пре́жде Рождества́, я́ко Бо́га Сло́ва родила́ еси́, изба́вльшаго ны́ хода́тайством Твои́м, Всенепоро́чная.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святый мучениче Иринарше, моли Бога о нас.

Копие́м уязви́ся вра́г терпе́ния кре́пкаго доблему́дреннаго му́ченика и того́ пята́м покори́ся, и сме́х ви́дится и посрамля́ется.

Припев: Святый мучениче Иринарше, моли Бога о нас.

Нога́ твоя́ ста́ проро́чески, му́чениче, на пра́вости я́ве, непревра́тным мудрова́нием подпина́ющи многоко́зненнаго и стезя́ми муче́ния удобря́ема.

Сла́ва Отцу́ и Сы́ну и Свято́му Ду́ху:

Ты́ зло́бу гоня́щих, незло́бив и про́ст яви́ся, му́чениче, отри́нул еси́, Ирина́рхе, и конча́нием твоея́ кро́ве венцы́ нетле́ния венча́лся еси́.

И ны́не и при́сно и во ве́ки веко́в. Ами́нь.

Богоро́дичен: Уразуме́в издале́ча та́инственно проро́ков богосве́тлый ли́к, Де́во Богоневе́стная, Боже́ственнаго Рождества́ Твоего́ глубину́ неизрече́нную, о́бразы свяще́нными Тя́ проначерта́.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святый мучениче Иринарше, моли Бога о нас.

Возше́д на во́ды, окормля́емь руко́ю живонача́льною, Ирина́рхе, и спа́слся еси́ си́ми, гони́телей погрузи́в злоче́стия, моли́твою приле́жною, свяще́ннейше.

Припев: Святый мучениче Иринарше, моли Бога о нас.

Ма́лыми искупи́вше вели́кая, на вели́ка себе́ са́мыя преда́ша муче́ния свяще́нныя жены́, лестца́ Евина ду́хом умертви́вше, зми́я началозло́бнаго.

Сла́ва Отцу́ и Сы́ну и Свято́му Ду́ху:

Отроцы святи́и, а́гнцы чи́стии и приноше́ния соверше́нная, на́с ра́ди Пожре́нному я́ко же́ртва Истинному Агнцу приведе́ни бы́ша, в воню́ благово́ния веселя́щеся.

И ны́не и при́сно и во ве́ки веко́в. Ами́нь.

Богоро́дичен: Се́ ны́не воплоти́ся от крове́й Твои́х чи́стых, Девома́ти, Госпо́дь, и челове́ком соединя́ется кроме́ враще́ния, за неизглаго́ланную ми́лость на́ше спасе́ние соде́ловая.

Го́споди поми́луй, три́жды. Сла́ва, и ны́не.

Седа́лен, гла́с 2. Подо́бен: Гро́б Тво́й.

Ми́р тебе́ мно́г прибы́сть, му́чениче, пости́гшу врага́ и победи́вшу пре́лести ра́ть Боже́ственною благода́тию, кре́пко пострада́вшу ти́. Те́мже ве́рою тя́ мо́лим: вся́каго вре́да изба́ви святу́ю твою́ па́мять чту́щих, Ирина́рхе.

Пе́снь 7.

Ирмо́с: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святый мучениче Иринарше, моли Бога о нас.

Любве́ е́же к пло́ти распря́г тво́й у́м, блаже́ннейше, пали́мь и огне́м жго́мь, му́дре, о́троческую вопия́л еси́ пе́снь: благослове́н еси́, Го́споди Бо́же оте́ц на́ших.

Припев: Святый мучениче Иринарше, моли Бога о нас.

Ублаже́н бы́сть отроко́в боже́ственный собо́р и же́н седмочи́сленный ли́к святы́й, строга́ния, о́гнь и ра́ны кре́пко претерпе́вше ку́пно, и небе́сных бла́г сподобля́еми.

Сла́ва Отцу́ и Сы́ну и Свято́му Ду́ху:

Отгоня́ются от еди́наго твоего́ призыва́ния лука́вии ду́си, уве́девше тя́, страда́льца непобе́дна Христо́ва, Ирина́рхе, пою́ща те́пле: благослове́н еси́, Го́споди Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Уны́нием мя́ обдержи́ма воздви́гни к де́йству, Пречи́стая, Боже́ственных дея́ний, укрепля́ющи мя́ на враги́, при́сно борю́щия мя́ лю́те и проти́вными помышле́нии льстя́щия мя́.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святый мучениче Иринарше, моли Бога о нас.

Кро́вными тече́нии еще́ ка́пля и ра́н добро́тою удобря́емь, Победотво́рцу яви́лся еси́, Ирина́рхе, побе́ды по́чести от Него́ прие́мля.

Припев: Святый мучениче Иринарше, моли Бога о нас.

Возвы́сився любо́вию Вседержи́телевою, гони́телей вознесе́нную горды́ню низложи́л еси́ и и́дольское смири́л еси́ киче́ние, му́чениче страстоте́рпче Ирина́рхе всеблаже́нне.

Сла́ва Отцу́ и Сы́ну и Свято́му Ду́ху:

Милосе́рдия мя́ Боже́ственнаго, му́чениче, сподо́би, искуше́ний и бе́д избавля́я ве́рою тя́ те́плою чту́щаго, Ирина́рхе, и под покро́в тво́й прибега́ющаго.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, свята́я горо́ и богопрохо́дная неизрече́нных веще́й; ра́дуйся, явле́ние и слы́шание стра́шное, неудобови́димое виде́ние; ра́дуйся, па́дших воззва́ние, Де́во.

Песнь 9

Ирмо́с: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святый мучениче Иринарше, моли Бога о нас.

Са́мое после́днее и кра́йнейшее жела́ний пости́гл еси́, богому́дре Ирина́рхе, и прича́стием бо́г бы́л еси́, поя́ с безтеле́сными: Свя́т, Свя́т, Свя́т, Тро́ице Вседе́тельная и Всеси́льная.

Припев: Святый мучениче Иринарше, моли Бога о нас.

Избе́г се́тей ловя́щих тя́, ко гнезду́ небе́сному воспочи́л еси́, сла́вне, и му́чеников совокупи́лся еси́ во́инством, с тобо́ю сострада́вшими. Те́мже чти́м па́мять ва́шу, прера́достно торжеству́юще.

Сла́ва Отцу́ и Сы́ну и Свято́му Ду́ху:

Кре́пость и си́лу Христа́ полага́я, лю́тую му́к преплы́в пучи́ну, и вы́шняго приста́нища дости́гл еси́, ве́сь укра́шен, ве́сь Ду́ха светоли́тии оби́льно облива́емь.

И ны́не и при́сно и во ве́ки веко́в. Ами́нь.

Богоро́дичен: Разуме́ти чу́до непости́жное Рождества́ Твоего́, Девома́ти, не могу́ще, молча́нием сие́ па́че сла́вим и Тебе́ славосло́вим, Всеблаже́нную еди́ну и до́брую в жена́х, о Всенепоро́чная.

Молитва

О святы́й уго́дниче Бо́жий, му́чениче Иринарше! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.