11 декабря

Канон святых пятнадесяти священномучеников, при Иулиане Отступнице пострадавших в Тивериуполи (простоглаголемом Струмница)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́м, гла́с 4:

Поще́нием пло́ть умертви́вше, благоче́стия сло́во пропове́давше, презре́вше земна́я и Христа́ жела́юще, му́дрии страда́льцы, мучи́телем доблему́дренно воспроти́вистеся и венцы́ страда́льческими увенча́стеся, исцеле́ния приступа́ющим источа́ете.

Ин тропа́рь, гла́с 3.

Ве́лию похвалу́ гра́д Тивери́йский и укрепле́ние, иера́рхи, свяще́нники же и леви́ты име́я, и́дольскую бо ле́сть обличи́вше, нече́ствующих победи́тели показа́шася. Си́и де́монов отгоня́юще полки́, здра́вие да́руют ве́рным пятна́десяте.

Кано́н Гла́с 8.

Пе́снь 1.

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Святии священномученицы, молите Бога о нас.

Отве́рзи моя́ уста́, Сло́ве Бо́жий, и сло́во ми́ вдохни́ благопохвали́ти досто́йно честны́я Твоя́ свяще́нники и му́ченики.

Припев: Святии священномученицы, молите Бога о нас.

Оба отсту́пника, Иулиа́на же и Ария, о Фео́доре блаже́нне, во своя́ времена́ низложи́л еси́.

Сла́ва Отцу́ и Сы́ну и Свято́му Ду́ху:

Тимофе́я страда́ния священнопропове́дника почти́м, Евсе́виевы боле́зни благоче́стно, ве́рнии, и благопохва́лим.

И ны́не и при́сно и во ве́ки веко́в. Ами́нь.

Богоро́дичен: Чи́стая Богоро́дице, Яже воплоще́нное присносу́щное и пребоже́ственное Сло́во па́че естества́ ро́ждшая, пое́м Тя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Святии священномученицы, молите Бога о нас.

Ма́ния спаси́тельная Блага́го, му́дрии, Ду́ха, я́коже ре́ки Петра́ вно́сите и двоена́десятицу богому́друю.

Припев: Святии священномученицы, молите Бога о нас.

Собра́ние богоизбра́нное иера́рхов му́дрых дне́сь, и мона́шествующих ны́не, и иере́ев, и бельце́в воспои́м.

Сла́ва Отцу́ и Сы́ну и Свято́му Ду́ху:

Обличи́ беззако́нныя старе́йшина Твоя́, Го́споди, свяще́нная де́лом, вражде́бнейшаго князе́й по́двиги.

И ны́не и при́сно и во ве́ки веко́в. Ами́нь.

Богоро́дичен: Евы прама́тере Ты́ исправле́ние была́ еси́, Нача́льника жи́зни ми́рови, Богоро́дице, ро́ждшая.

Седа́лен, гла́с 1. Подо́бен: Гро́б Тво́й, Спа́се.

Му́ченики Христо́вы и тве́рдыя градохрани́тели, сни́демся, ве́рнии, по достоя́нию почести́, я́ко же́ртвы, и я́ко жрецы́ Христо́вы: си́и Ария и Отсту́пника в коне́ц победи́ша, муче́ния венце́м све́тло обле́кшеся.

Сла́ва. Ин [седа́лен]. Подо́бен то́йже:

Зве́зды све́тлыя Христо́вы Це́ркве показа́стеся, му́дрии, уче́ний луча́ми ту́ озаря́юще и страда́ний све́тлостию, чуде́с же преславодея́ньми, те́мже дне́сь свяще́нную ва́шу па́мять ве́рно пра́зднуем.

И ны́не, Богоро́дичен:

Облак Тя́ све́та Бо́жия присносу́щнаго, Де́во, и ковче́г, и све́щник, и ста́мну, и го́ру несеко́мую проро́цы пропове́даху, Отрокови́це Пречи́стая: из Тебе́ бо про́йде без се́мене в после́дняя Христо́с Бо́г, я́коже Отецъ́ благоволи́.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святии священномученицы, молите Бога о нас.

Руга́тися тща́хуся льсти́вии про́поведи честно́й, но те́х обузда́ша неи́стовный язы́к, всечестни́и.

Припев: Святии священномученицы, молите Бога о нас.

Идольскую обличи́сте, му́ченицы, ле́сть и злоче́стие, Христа́ же пропове́дасте, Победи́теля сме́рти, свяще́ннейшии.

Припев: Святии священномученицы, молите Бога о нас.

Не лжи́вым, — взыва́ху, — прино́сим же́ртву, но телеса́ на́ша я́ко же́ртву ны́не благоуго́дну все́х Бо́гу приноша́ем.

Сла́ва Отцу́ и Сы́ну и Свято́му Ду́ху:

На ка́мень водрузи́сте хра́мину ва́шу, свяще́ннейшии, сего́ ра́ди непревра́тни прило́ги бесо́вскими показа́стеся.

И ны́не и при́сно и во ве́ки веко́в. Ами́нь.

Богоро́дичен: Богоро́дицу Тя́, Всечи́стая, просвеще́ннии вси́ пропове́дуем, Со́лнце бо родила́ еси́ пра́вды, Присноде́во.

Пе́снь 5

Ирмо́с: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Святии священномученицы, молите Бога о нас.

Петра́ теплоту́ нося́ апо́стола, Пе́тр блаже́нный беззако́ннующия изобличи́.

Припев: Святии священномученицы, молите Бога о нас.

Обличе́ние не терпя́ще язы́ка и́стиннейшаго, ру́це отсеко́ша о́бе Петро́ве беззако́ннии.

Сла́ва Отцу́ и Сы́ну и Свято́му Ду́ху:

Еди́ну от ру́к пове́рженную похи́тивши, све́т восприя́ пре́жде неви́дящая.

И ны́не и при́сно и во ве́ки веко́в. Ами́нь.

Богоро́дичен: Де́ву по рождестве́ пое́м Тя́, Богоро́дице: Ты́ бо Бо́га Сло́ва пло́тию ми́рови родила́ еси́.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святии священномученицы, молите Бога о нас.

Не поже́рше изва́янным и́долом, блаже́ннейшии, во главы́ благодерзнове́нно усе́чени бы́сте, я́же Небе́сный Ца́рь досто́йно, свяще́ннейшии, увенча́.

Припев: Святии священномученицы, молите Бога о нас.

Тивери́йский гра́д, му́дрии, и того́ всю́ окре́стность от пре́лести и́дольския к све́ту наста́висте Боже́ственнаго позна́ния, чудесы́ и словесы́ пре́лесть отгна́вше.

Сла́ва Отцу́ и Сы́ну и Свято́му Ду́ху:

Заколе́ния и Бо́га же́ртвы Боже́ственнии бы́сте: пре́жде бо Ему́ Же́ртву Безкро́вную принося́ще, святи́и, свою́ кро́вь Поже́ршемуся пожро́сте.

И ны́не и при́сно и во ве́ки веко́в. Ами́нь.

Богоро́дичен: Да изба́вимся от лю́тых прегреше́ний Твои́ми моле́ньми, Богороди́тельнице Чи́стая, и да улучи́м, Всечи́стая, Боже́ственнаго осия́ния, Иже из Тебе́ неизрече́нно вопло́щшагося Сы́на Бо́жия.

Конда́к, гла́с 4. Подо́бен: Вознесы́йся на Кре́ст.

Пятнадесяточи́сленнии Христо́вы страстоте́рпцы, Тивериопо́ля тве́рдии градохрани́тели, я́ко зве́зды дне́сь явля́ются све́тлыя: Тимофе́й, Фео́дор, сла́внии иера́рси, Евсе́вий, Кома́сий, и боже́ственный Сокра́т, с десяти́цею сострада́льцев все́м чуде́с зари́ облистава́юще.

Икос:

Иера́рхи честны́я и боже́ственныя проро́ки стра́нных та́инств Христо́ва прише́ствия, хотя́ воспе́ти де́рзостно, помраче́нный лю́тыми прегреше́ньми, душе́ю же и мы́слию, вы́шнюю прошу́ по́мощь, я́ко да похвала́ми увенча́ю святы́я, и́хже свы́ше увенча́ Зижди́тель: о́ба бо мучи́тели му́жески низложи́ша, Ария же пре́жде, и (Иулиа́на) Отсту́пника, от него́же бо свяще́нныя главы́ посе́чени бы́ша, все́м чуде́с зари́ облистава́юще.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святии священномученицы, молите Бога о нас.

Тимофе́я, Се́ргия, Фому́, Сокра́та, Петра́, Васи́лия, Дании́ла, Ники́фора, Кома́сия же и Евсе́вия, с двема́ Фео́дорома, Иоа́нна воспои́м, Харито́на же, ве́рнии, и Иерофе́я.

Припев: Святии священномученицы, молите Бога о нас.

Чуде́с де́йство, и по кончи́не достожела́тельной, святы́х пра́х подае́т, целу́ем, песнопою́ще непреста́нно и глаго́люще: благослове́н Бо́г оте́ц на́ших.

Припев: Святии священномученицы, молите Бога о нас.

Пятери́цу разлучи́ от десяти́цы страстоте́рпцев Христо́вых, и́хже ду́хи содержи́т го́рний гра́д при́сно неразде́льны, бо́лгарский ца́рь приснопа́мятный: благослове́н Бо́г оте́ц на́ших.

Припев: Святии священномученицы, молите Бога о нас.

Яже единоду́шие ве́ры во еди́но совокупи́, си́х разлучи́ христолюби́вый бо́лгарский ца́рь, от ни́хже прие́мь еди́ну пятери́цу, ра́дуяся поя́ше: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Не еди́н от градо́в во жре́бий име́ богопропове́дники, но Бо́жиим про́мыслом и ве́си раздели́ша себе́, световодя́щих ве́рою взыва́ющия: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Тро́ичен: Все́х у́бо Го́спода, еди́наго же то́кмо Единоро́днаго Сы́на Отца́ правосла́вно богосло́вяще, Тя́ возвеща́ем; и еди́наго ве́дуще от Тебе́ исходя́щаго Ду́ха пра́ваго, сра́сленна и соприсносу́щна.

Пе́снь 8.

Ирмо́с: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии священномученицы, молите Бога о нас.

Опрове́ржен бы́в пе́рвее хра́м от нечести́вых, засы́па мо́щи му́чеников, но прославля́емый во святы́х Госпо́дь, благочести́выми откры́ сия́, во здра́вие немощству́ющих и ду́ш спасе́ние, ве́рою благословя́щих Христа́ во ве́ки.

Припев: Святии священномученицы, молите Бога о нас.

Разсла́бленному подаю́т удо́в исправле́ние, я́коже пре́жде благогла́сие немо́му, прокаже́нному же очище́ние, и бесну́ющимся исцеле́ние, и ослепле́нным прозре́ние па́ки: вра́чеве бо боже́ственнии, от Бо́га дарова́нны, яви́шася па́стве Христо́ве во ве́ки.

Сла́ва Отцу́ и Сы́ну и Свято́му Ду́ху:

Вступа́яй де́рзостно во оби́тели вса́дник, внеза́пу с ко́нем неви́димь бы́сть, и сего́ неизбе́жную я́ко ви́деша поги́бель, во́ини и злоде́йственнии стра́хом отбего́ша, благода́ть возвеща́юще все́м от Го́спода да́нную святы́м.

И ны́не и при́сно и во ве́ки веко́в. Ами́нь.

Тро́ичен: Трисве́тлое Божество́ еди́нственное облистава́юще сия́ние Еди́наго Триипоста́снаго естества́: Роди́теля Безнача́льна, Соесте́ственна же Сло́ва Отцу́, и Сца́рствующа Единосу́щнаго Ду́ха: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Песнь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святии священномученицы, молите Бога о нас.

Тимофе́я, Кома́сия и Фому́, Евсе́вия боже́ственнаго, и Се́ргия, и Дании́ла, Сокра́та, и Харито́на му́драго, Васи́лия и Петра́ же со Иерофе́ем чу́дным, двема́ Фео́дорома, Ники́фора, во и́стинне победоно́сца су́щаго, со Иоа́нном ублажи́м.

Припев: Святии священномученицы, молите Бога о нас.

Непоро́чно сохра́ньше Христу́, утро́бы и сердца́ испыту́ющему, свяще́нницы, свяще́нство и чи́сто, по́стницы, умерщвле́ние, е́же пре́жде умерщвле́ния тли́, к концу́ и злату́ю печа́ть му́ченичества, боже́ственную кончи́ну восприя́сте.

Сла́ва Отцу́ и Сы́ну и Свято́му Ду́ху:

Восприя́сте боле́зней возме́здие, пятна́десять му́ченицы сла́внии, боготворя́щую ви́дяще непосре́дственно добро́ту Христо́ву, от нея́же насыща́ющеся, возсия́йте бога́тно зари́ на́м, благохва́лящим ва́шу боже́ственную па́мять, страсте́й о́блаки отгоня́юще.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́, о Де́во Ма́терь Бо́жия, па́че естества́ ро́ждшая пло́тию благо́е Сло́во, Его́же Оте́ц от се́рдца Своего́, я́ко Бла́г, отры́гну пре́жде все́х ве́к. Его́же ны́не и теле́с превы́шша разуме́ем, а́ще и в те́ло облече́ся.

Свети́лен. Подо́бен: Не́бо звезда́ми.

Све́та прия́телища светолу́чныя мо́лнии, Тимофе́я вели́каго со двема́ Феодо́рома и с про́чею двоена́десятицею, восхва́лим вси́.

Сла́ва, и ны́не, Богоро́дичен:

Златоплете́нный сто́лпе и двоенадесятосте́нный гра́де, солнцека́плющий престо́ле, седа́лище Царе́во, неве́домое чу́до, ка́ко дои́ши Влады́ку?

Молитва

Святи́и пятнадесять священномучеников! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.