10 декабря

Канон преподобнаго Палладия Александрийского

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Палладие, дух твой.

Кано́н Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Преподобне отче Палладие, моли Бога о нас.

Боже́ственными светлостьми́ озаря́емь, преподо́бне, о́блак разжени́ помышле́ния моего́, я́ко да узрю́ твое́ житие́ светоно́сное и исправле́ние жи́тельства твоего́.

Припев: Преподобне отче Палладие, моли Бога о нас.

Утреневав к Бо́гу, пра́вды Со́лнцу, от младе́нства, всебога́те, тмы́ избе́гл еси́ теле́сных страсте́й воздержа́нием и да́ром чуде́с обогати́лся еси́, преподо́бне.

Сла́ва Отцу́ и Сы́ну и Свято́му Ду́ху:

Умную чистоту́ безстра́стием стяжа́в, Ду́ха бы́л еси́ вмести́лище, досточу́дне Палла́дие всеблаже́нне, отце́в украше́ние, свети́льниче всеми́рный.

И ны́не и при́сно и во ве́ки веко́в. Ами́нь.

Богоро́дичен: Ты́ еди́на, Богоневе́сто, в вы́шних Седя́шаго рука́ми носи́ла еси́, пло́ть бы́вшаго, Ты́ бо еси́ прия́телище досто́йно все́х веко́в Вседержи́теля.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Преподобне отче Палладие, моли Бога о нас.

Всено́щное, о́тче, моле́ние, бо́дренным принося́ по́мыслом Бо́гу Вседержи́телю, стра́сти плотски́я успи́л еси́, те́мже предста́тель неусы́пный все́х на́с бы́л еси́.

Припев: Преподобне отче Палладие, моли Бога о нас.

Умертви́в у́ды воздержа́нием, оживи́л еси́, о́тче, ду́шу Боже́ственными возраще́нии, доброде́тельми вжиля́емь Вседе́тельными си́лами, отце́в о́тче Палла́дие.

Сла́ва Отцу́ и Сы́ну и Свято́му Ду́ху:

Вкуси́в до́браго Бо́жия глаго́ла и ра́зума Боже́ственнаго прича́щся, молчали́во соверши́в твое́ житие́, прилепля́яся невозвра́тно, преподо́бне, Светода́телю Бо́гу на́шему.

И ны́не и при́сно и во ве́ки веко́в. Ами́нь.

Богоро́дичен: Ми́лостивыми Твои́ми, Отрокови́це, ка́плями у́глие угаси́ страсте́й, Мари́е Неискусобра́чная, и угаше́нный возжзи́ свети́льник се́рдца моего́, златы́й Свети́льниче, Всенепоро́чная.

Пе́снь 4.

Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Припев: Преподобне отче Палладие, моли Бога о нас.

Си́лою же и благода́тию Вседе́тельною все́х Царя́, Бо́га на́шего, лука́вствия безпло́тных вра́г отню́д избе́гл еси́, о́тче Палла́дие богодухнове́нне.

Припев: Преподобне отче Палладие, моли Бога о нас.

Да возра́дуемся духо́вне, па́мять соверша́юще пра́зднственную знамено́сца и честна́го отца́ на́шего, свяще́нными того́ мольба́ми неудо́бных избавля́еми.

Припев: Преподобне отче Палладие, моли Бога о нас.

Целе́ние приснотеку́щее твоя́ ра́ка то́чит, о Палла́дие сла́вне! Приходя́щих очища́ет скве́рны плотски́я вку́пе и душе́вныя, о́тче отце́в богоприя́тне.

Сла́ва Отцу́ и Сы́ну и Свято́му Ду́ху:

Изба́ви ны́, преподо́бне, твои́ми моли́твами все́х собла́зн змии́ных сете́й, и исцели́ на́ша лю́тыя неду́ги ко Влады́це мольба́ми твои́ми.

И ны́не и при́сно и во ве́ки веко́в. Ами́нь.

Богоро́дичен: Яви́ся Боговмести́мая вои́стинну Це́рковь все́х Царя́, Пренепоро́чная Богороди́тельнице. Те́мже благоче́стно Гаврии́лово, е́же — ра́дуйся, — ве́рнии, несумне́нно прино́сим.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Преподобне отче Палладие, моли Бога о нас.

Стра́сти пренебре́гл еси́ плотски́я, богоблаже́нне, премно́гим воздержа́нием, те́м тебе́ благода́ть Боже́ственная дарова́ся стра́сти исцеля́ти ве́рных, о́тче, приходя́щих ти́, о Палла́дие пресла́вне!

Припев: Преподобне отче Палладие, моли Бога о нас.

Свя́то твое́ житие́, всеблаже́нне, соверши́в, те́мже и ко святы́м причта́лся еси́, от ве́ка Бо́гу рабо́тавшим, все́х освяща́еши ду́ши, хва́лящих твоя́ честна́я чудодея́ния.

Сла́ва Отцу́ и Сы́ну и Свято́му Ду́ху:

Блаже́н бы́л еси́ и́стинно, достосла́вне, ты́ бо в пу́ть оправда́ний Всеви́дца Бо́га ходи́л еси́, незло́бив и кро́ток бы́в и восхожде́нии до́брыми украша́емь.

И ны́не и при́сно и во ве́ки веко́в. Ами́нь.

Богоро́дичен: Дале́че челове́чество Бо́га, Де́во, бы́сть, Тебе́ же, заче́ншей Спа́са несказа́нно, Богора́дованная, па́ки в ра́й вхо́дит, ве́рою ублажа́я Тя́, Всепе́тая.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Преподобне отче Палладие, моли Бога о нас.

Чи́сто житие́ восприе́м воздержа́ния, я́ко безпло́тен, испра́вил еси́ стоя́ние всено́щное, моли́тву, му́дре, неоску́дну, ве́ру и́стинную, боже́ственное смире́ние.

Припев: Преподобне отче Палладие, моли Бога о нас.

До́брых виде́нии украша́емь, я́ко Ангел ви́ден бы́л еси́, в пло́ти жи́тельствуя, и, преше́д, всели́лся еси́ со Ангелы, о́тче богоблаже́нне Палла́дие.

Сла́ва Отцу́ и Сы́ну и Свято́му Ду́ху:

Ангелы име́я спомо́щники, де́монская отрази́л еси́ мечта́ния и вся́ лука́вствия, и без преткнове́ния проше́л еси́, о богоблаже́нне, стезю́, к жи́зни вводя́щую.

И ны́не и при́сно и во ве́ки веко́в. Ами́нь.

Богоро́дичен: Глаго́лы, Отрокови́це Всенепоро́чная, боже́ственнаго Гаврии́ла я́ко услы́шала еси́, Сло́во зачала́ еси́ в безсе́меннем чре́ве Твое́м и па́че сло́ва Сего́ родила́ еси́.

Го́споди поми́луй, три́жды. Сла́ва, и ны́не.

Седа́лен, гла́с 1. Подо́бен: Ка́мени запеча́тану.

Мона́шествовав богоуго́дно, богоно́сне о́тче на́ш, моли́твою и посто́м Бо́га взыска́л еси́ и бы́л еси́ прия́телище чи́сто Ду́ха, блиста́я ве́рным доброде́тельныя зари́, и́миже просвеща́еши вся́ чту́щия тя́. Сла́ва Просла́вльшему тя́ Христу́, сла́ва Укре́пльшему тя́, сла́ва Де́йствующему тобо́ю все́м исцеле́ние.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Преподобне отче Палладие, моли Бога о нас.

Пресла́вными указа́нии, всебога́те, чуде́с все́х ду́ши, притека́ющих к тебе́, просвеща́еши благода́тию Вседержи́телевою, просвети́вшаго твою́ ду́шу и показа́вшаго ю́, со́лнца светле́йшую.

Припев: Преподобне отче Палладие, моли Бога о нас.

Возлюби́в соверше́ннейше Го́спода ума́ пра́востию и от Него́, всему́дре, соверше́нне возлюби́ся, благода́ть прия́л еси́ лука́выя отгоня́ти ду́хи и исцеля́ти вся́ неду́ги.

Сла́ва Отцу́ и Сы́ну и Свято́му Ду́ху:

Сле́з твои́х тече́ния прии́м, Всеви́дец Бо́г утеше́ния Ангельскаго прича́стна тя́ соде́ла, е́же получи́ша Бо́гу служи́вшии пра́востию се́рдца.

И ны́не и при́сно и во ве́ки веко́в. Ами́нь.

Богоро́дичен: Ми́лостиваго ро́ждши Го́спода, еди́на Богоблагода́тная, десни́цею Его́, Чи́стая, поми́ловати мо́й у́м моли́ся, всегда́ лю́те совраща́емый жите́йскими печа́льми.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Преподобне отче Палладие, моли Бога о нас.

Си́лою Боже́ственною ополче́ния де́монская па́губная потреби́л еси́, благода́ть же прия́л еси́ уста́вити не́мощи и отгони́ти ду́хи нечи́стыя, вопия́: Го́спода по́йте дела́ и превозноси́те Его́ во вся́ ве́ки.

Припев: Преподобне отче Палладие, моли Бога о нас.

Пожи́в, всеблаже́нне, богоуго́дно, пра́ведным я́ве до́лжным сно́м ны́не усну́л еси́ и к неконча́емому приве́лся еси́ наслажде́нию, преподо́бне, вопия́: Го́спода по́йте дела́ и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Цельбы́ источа́ет пресла́вно ра́ка твоя́, о́тче, прири́щущим уставля́ющи неду́ги, стра́сти же изсуша́ющи, е́йже покланя́ющеся, пое́м житие́ твое́, боле́зни и боже́ственныя по́двиги, Палла́дие блаже́нне, свети́льниче мона́шествующих.

И ны́не и при́сно и во ве́ки веко́в. Ами́нь.

Богоро́дичен: Во́д мя́ испо́лни, Де́во, Боже́ственных, Яже Исто́чник ро́ждшая, изба́ви мя́ зно́я грехо́внаго и к жи́зни путево́дстви, две́ре Боже́ственныя жи́зни, вопию́ща: Го́спода по́йте дела́ и превозноси́те Его́ во ве́ки.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Преподобне отче Палладие, моли Бога о нас.

Возмо́г Бо́жиею си́лою и благода́тию, о́тче, победи́ти зми́я, хва́лящася безу́мием, и па́губную главу́ его́ сокруши́ти, и попра́в нога́ми твои́ми. Те́мже, соше́дшеся, уми́льною душе́ю тебе́ ублажа́ем.

Припев: Преподобне отче Палладие, моли Бога о нас.

Яви́лся еси́ не́бо высото́ю жи́тельства Твоего́, чудесы́ удобря́емь, всебога́те, я́ко Боже́ственными звезда́ми, и просвеща́еши ду́ши благоче́стно всегда́ приходя́щих тебе́ и чту́щих ве́рою по́двиги твоя́, богоно́сне, свети́ло светле́йшее.

Припев: Преподобне отче Палладие, моли Бога о нас.

Уста́вил еси́ страсте́й тече́ния, преподо́бне, ту́чами сле́з твои́х, струи́ притека́ющим чуде́с то́чиши, богоблаже́нне. Отрева́еши зно́й страсте́й всегда́, Палла́дие сла́вне, Це́ркве честно́е удобре́ние.

Сла́ва Отцу́ и Сы́ну и Свято́му Ду́ху:

Процве́л еси́ я́ве, я́ко ши́пок благово́нный, во Це́ркви Христо́ве и облагоуха́л еси́ чуде́сными воня́ми ми́ра концы́. Те́мже боже́ственную твою́ па́мять торжеству́ем, в не́йже все́м испроси́ оставле́ние, богоно́сне, мно́гих согреше́ний.

И ны́не и при́сно и во ве́ки веко́в. Ами́нь.

Богоро́дичен: Све́т, Иже из Све́та, возсия́ из чре́ва Твоего́, Ма́ти Присноде́во, и пре́лести тму́ отгна́ и земны́я концы́ вся́ просвети́. Те́мже ве́рою, — ра́дуйся, — зове́м Тебе́, Богоро́дице, преподо́бных похвало́.

Молитва

О свяще́нная главо́, преподо́бне о́тче, преблаже́нне а́вво Палладие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.