10 декабря
Канон святителю Иакову, епископу Ростовскому
![святителя Иакова, епископа Ростовскаго святителя Иакова, епископа Ростовскаго](img_i/035.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Избра́н от ю́ности Бо́гови бы́в, святи́телю Иа́кове, сего́ ра́ди архиере́йства са́ном почте́н, упа́сл еси́ лю́ди, я́же тебе́ Бо́гом вруче́нныя. Те́мже и по преставле́нии чуде́с дарова́ния от Бо́га прия́л еси́ исцеля́ти разли́чныя неду́ги. Моли́ о на́с, соверша́ющих честну́ю па́мять твою́, да тебе́ непреста́нно велича́ем.
Кано́н свята́го, гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Святителю отче Иакове, моли Бога о нас.
Боже́ственными заря́ми и свяще́нными светосия́нии при́сно мою́ ду́шу озари́, тво́й, иера́рше, пра́здник, о́тче, сла́вяща.
Припев: Святителю отче Иакове, моли Бога о нас.
Всесве́тлую тя́ звезду́ мы́сленное показа́ Со́лнце, све́тлость твои́х доброде́телей просвети́ зе́млю, святи́телю Христо́в, му́дре Иа́кове.
Сла́ва Отцу́ и Сы́ну и Свято́му Ду́ху:
Житие́ при́сно очище́но и чи́сто и скве́рне несме́шено яви́в, Христо́в свяще́н сосу́д, прему́дре, показа́лся еси́ на земли́, Иа́кове блаже́нне.
И ны́не и при́сно и во ве́ки веко́в. Ами́нь.
Богоро́дичен: Со Отце́м Сы́й Единоро́дный, земны́я обожи́в, Чи́стая, за мно́гия щедро́ты я́ко Бо́г Преблаги́й.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Святителю отче Иакове, моли Бога о нас.
Сы́н дне́ све́та, ты́, святи́телю, труды́ твои́ми яви́лся еси́ и я́сно во све́тлостех ны́не святы́х сия́еши благода́тию.
Припев: Святителю отче Иакове, моли Бога о нас.
Пропове́дая ны́не благочести́вно Тро́ицы Еди́но Божество́, многобо́жную ле́сть искорени́л еси́ от земли́, я́ко честны́й святи́тель и я́ко Сло́ва и́стинный служи́тель.
Сла́ва Отцу́ и Сы́ну и Свято́му Ду́ху:
Пу́ть обличи́л еси́, му́дре, все́м прельще́нным нечести́ваго искуше́ния и приве́л еси́ к Сло́ву Пастыренача́льнику, я́ко па́стырь слове́сный и спаси́тельный.
И ны́не и при́сно и во ве́ки веко́в. Ами́нь.
Богоро́дичен: Приста́нище бу́ди ми́ и окормле́ние, бе́дствующу страстьми́ неосла́бно и погиба́ющу, приста́нище су́щи в мо́ри жите́йстем, еди́на Чи́стая Присноде́во.
Седа́лен, гла́с 8. Подо́бен: Прему́дрости.
Украша́яся прему́дростию ра́зума, горды́ню низложи́л еси́ плотски́я тя́гости и бы́л еси́ оби́тель Ду́ха Пресвята́го, непреме́нно простира́яся ра́зумом к Лю́бящему тя́. Те́м ре́вностию Боже́ственною разгара́яся, сла́вне, сирота́м и убо́гим утвержде́ние яви́лся еси́, Ангелов собесе́дник Иа́кове, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.
Сла́ва, и́н седа́лен, гла́с 4. Подо́бен: Яви́лся еси́ дне́сь.
Правове́рно, преподо́бне, Це́рковь Христо́ву упа́сл еси́, ерети́ческия отгна́л еси́ пле́велы и в вы́шних се́лех водворя́ешися, преблаже́нне.
И ны́не, Богоро́дичен:
Яко Всенепоро́чная Неве́сто Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Святителю отче Иакове, моли Бога о нас.
Предве́дый Бо́г, блаже́нне, твоея́ души́ красоту́ и ра́зума чистоту́, священнопропове́дника му́дра и учи́теля показа́ тя.
Припев: Святителю отче Иакове, моли Бога о нас.
Ду́хом просвеще́н сы́й, су́щия во тме́ пре́лести просвеща́еши и креще́нием сы́ны дне́ соверша́еши, святи́телю преслову́щий.
Сла́ва Отцу́ и Сы́ну и Свято́му Ду́ху:
От тмы́ звере́й изба́вил еси́ ста́до твое́, растерза́ти и́щущих и отступи́ти ве́ры непоро́чныя, святи́телем добро́то и па́стырем старе́йшинство.
И ны́не и при́сно и во ве́ки веко́в. Ами́нь.
Богоро́дичен: Разу́мно в купине́ Тя́ огнепа́льней Моисе́й ви́дев, я́вственно образу́ющей Бо́га, хотя́ща из Тебе́ роди́тися неизрече́нно, Богоро́дице Присноде́во.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Святителю отче Иакове, моли Бога о нас.
Святи́тельскую твою́ оде́жду свя́щенную носи́в свяще́нно, нечести́выя просвети́л еси́, честны́й святи́телю, Еди́нство Несозда́нно в Тре́х Ли́цех, Иа́кове пре́мудре, пропове́дал еси́.
Припев: Святителю отче Иакове, моли Бога о нас.
От у́ст во́лка мы́сленнаго восхи́тил еси́ лю́ди уче́нием, богогла́се, уста́ ерети́ческая веле́речивая, твои́ми богосло́вии загради́л еси́, о́тче.
Сла́ва Отцу́ и Сы́ну и Свято́му Ду́ху:
Ме́рзский низложе́н бы́сть твои́ми свяще́нными словесы́ Маркиа́н, и изгна́н бы́сть ра́ди вся́каго безме́стия отрыга́яй скве́рны смра́дныя, Иа́кове пресла́вный.
И ны́не и при́сно и во ве́ки веко́в. Ами́нь.
Богоро́дичен: Зако́ны естества́ Пресу́щный Бо́г обновля́ет, Непоро́чная, из Твоея́ утро́бы ражда́ется, Еди́н усво́ив вся́ческая во́лею.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Святителю отче Иакове, моли Бога о нас.
Возвы́шено смире́ние чистото́ю ума́ и любо́вь нелицеме́рну, ве́ру и наде́жду име́я и́стинну, Иа́кове всесла́вный, Тро́ицы яви́лся еси́ жили́ще.
Припев: Святителю отче Иакове, моли Бога о нас.
Ны́не от созна́ния твоего́ Ду́хом, прему́дре, и́же по тебе́ благода́тию слове́сных ове́ц наста́вника приво́диши к же́ртвеннику, доброде́тели писа́нием облиста́ема.
Сла́ва Отцу́ и Сы́ну и Свято́му Ду́ху:
Вельми́ украси́вшася Росто́вскаго свяще́ния, седа́лищу тя́ учи́т, прехва́льне, Ду́х Святы́й, и тебе́ па́стыря руко́ю святи́тельскою, Иа́кове, соверша́ет.
И ны́не и при́сно и во ве́ки веко́в. Ами́нь.
Богоро́дичен: Две́рь Богоблагода́тная, отве́рзши две́ри небе́сныя, две́ри све́та отве́рзи ми́, Влады́чице, и от вра́т сме́ртных свободи́ мя, Чи́стая.
Конда́к, гла́с 8:
Яко архиере́ев сопресто́льник и святи́телем изря́дный побо́рник бы́л еси́, святи́телю Иа́кове, непреста́нно сохраня́й оте́чество твое́, гра́д же и лю́ди, тебе́ ве́рою почита́ющия и честны́м моще́м твои́м покланя́ющияся, да велегла́сно тебе́ вопие́м: ра́дуйся, Иа́кове богому́дре.
Икос:
Из чре́ва ма́терня освяще́ннаго святи́теля Госпо́дня хва́лит ны́не вся́ страна́ Росси́йская, преподо́бнаго Иа́кова, Росто́ву гра́ду утвержде́ние, благода́тныя да́ры прие́мшаго Боже́ственныя сла́вы, к нему́же притека́юще, вси́ ве́рою те́плою ра́ку моще́й его́ любе́зно целу́ем. Те́м и а́з, недосто́йный и гре́шный, наде́яся на моли́твы твоя́, святи́телю, я́же ко Влады́це и Пречи́стей Его́ Ма́тери, жела́ю, а́ки пси́ от крупи́ц, па́дающих от трапе́зы госпо́дий свои́х, насыще́ние прия́ти, е́же в де́нь су́дный соде́янных мно́ю зо́л, моли́твами твои́ми, свя́те, проще́ние улучи́ти, да велегла́сно тебе́ вопию́: ра́дуйся, Иа́кове богому́дре.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Святителю отче Иакове, моли Бога о нас.
Вразумля́л еси́ неразу́мныя, обраща́л еси́ прельще́нныя, совраща́ющияся же, о́тче, спа́сл еси́ и Бо́гу приве́л еси́ чи́сты, Тому́ пою́щия благоче́стно: благослове́н еси́, Го́споди Бо́же оте́ц на́ших.
Припев: Святителю отче Иакове, моли Бога о нас.
Украси́шася боже́ственнии твои́ по́двиги, воплоще́ние пропове́дающе неизрече́нным милосе́рдием Возсия́вшаго на́м, Ему́же вопие́м приле́жно: благослове́н Бо́г оте́ц на́ших.
Сла́ва Отцу́ и Сы́ну и Свято́му Ду́ху:
Облада́в страстьми́ теле́сными, поще́нием, сла́вне, необлада́емь жите́йскими напа́стьми яви́лся еси́. Ны́не пое́ши при́сно: благослове́н Бо́г оте́ц на́ших.
И ны́не и при́сно и во ве́ки веко́в. Ами́нь.
Богоро́дичен: Избавля́еши дре́вняго преступле́ния Рождество́м Твои́м, Пречи́стая, хва́лим Тя́, спасе́ннии Тобо́ю, Де́во, и, пою́ще, вопие́м Ти́: благослове́н Бо́г оте́ц на́ших.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Святителю отче Иакове, моли Бога о нас.
Процве́л еси́, я́ко фи́никс, во дворе́х Бо́жиих и до́лжным сно́м преподо́бным усну́л еси́, при́сно же наслажде́ние пребоже́ственный гро́б тво́й и чу́до ви́дящим, Иа́кове пропове́дниче, показу́еши.
Припев: Святителю отче Иакове, моли Бога о нас.
Бо́жие бо Сло́во суще́ственное, свяще́нно тя́ и святи́теля возставля́ет, пома́зающа лю́ди, священносвяти́телю и престо́льниче Росто́вский и свети́льниче вселе́нныя.
Сла́ва Отцу́ и Сы́ну и Свято́му Ду́ху:
Вопло́щшагося Сло́ва богосло́вил еси́, многобезслове́сия бо лю́ди изба́вив, боже́ствен бы́л еси́ учени́к Возсия́вшаго, Иа́кове богогла́се.
И ны́не и при́сно и во ве́ки веко́в. Ами́нь.
Богоро́дичен: Священнонаучи́вся Твои́м та́йнам, проро́чески боже́ственный ли́к, Богоро́дице, издале́ча уви́дев и я́ко положи́в богопропове́дно боже́ственнаго пропове́дания Рождества́ Твоего́.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Святителю отче Иакове, моли Бога о нас.
Яко све́т, я́ко све́щник, я́ко вели́кое со́лнце, я́ко мо́лния Христо́ве Це́ркви возсия́л еси́, и ве́рных ра́зумы просвети́л еси́, и в невече́рняя места́ всели́лся еси́, поя́ трисвяты́ми гла́сы Тро́ицу Несозда́нную.
Припев: Святителю отче Иакове, моли Бога о нас.
Пло́тию ми́ра кроме́ бы́в, святи́телю, в прекра́сных чи́не обита́я, ро́да на́шего обогаща́еши творе́нием све́тлым. Те́мже па́мять твою́ ве́рою соверша́ем на земли́, Иа́кове прему́дре.
Сла́ва Отцу́ и Сы́ну и Свято́му Ду́ху:
Земля́ те́ло твое́ блаже́нное скрыва́ет, я́ко исцеле́ния точа́щи ве́рным, не́бо же ду́х со избра́нными от ве́ка но́сит, Боже́ственными сия́нии озаре́н еси́ вои́стинну, я́ко всесла́вный.
И ны́не и при́сно и во ве́ки веко́в. Ами́нь.
Богоро́дичен: Гла́с арха́нгела Гаврии́ла прие́мши, вели́каго Сове́та, Чи́стая, Христа́ Емману́ила родила́ еси́, со Ангелы земны́я вся́ сочета́вшаго, еди́на вино́вна на́шего, Де́во, блаже́нства.
Свети́лен. Подо́бен: Ученико́м.
Чу́днаго и сла́внаго святи́теля Иа́кова вели́каго, прииди́те, пе́сньми боже́ственными и свяще́нными похва́лим, я́ко Росто́ву председа́льника и Ангельским чино́м сослуже́бника бы́вша.
Сла́ва, други́й свети́лен. Подо́бен: Посети́л ны́ е́сть.
Сла́вно кра́сится дне́сь светоза́рное торжество́, и́же во све́те сла́вы Бо́жия предстоя́, святи́телю, помяни́ на́с, хва́лящих твою́ па́мять.
И ны́не, Богоро́дичен:
С Бо́гом упова́ние на Тя́ возложи́хом, Пречи́стая, Иже из Тебе́ проше́дшему сраспина́емся Христу́, Твои́ми же к Нему́ моли́твами невреди́ми да́же до конца́ сохрани́.
Молитва святителю Иакову, епископу Ростовскому
О, пречу́дне и преблаже́нне о́тче, святи́телю Христо́в Иа́кове! С ве́рою и любо́вию к тебе́ припа́дающе, мо́лим тя: огради́ нас святы́ми твои́ми моли́твами от вся́кия беды́, ско́рби и боле́зни, и от вся́каго пра́ведно дви́жимаго на нас гне́ва Бо́жия. Испроси́ нам ти́хое и безмяте́жное житие́, во вся́ком благоче́стии и чистоте́, и помози́ нам спасе́ние улучи́ти и Ца́рствия Небе́снаго дости́гнути. Ей, уго́дниче Бо́жий и засту́пниче наш! Не пре́зри усе́рднаго моле́ния сего́ на́шего, но при́зри на ны ми́лостивно и умоли́ о нас всеще́драго Человеколю́бца Бо́га, да не поги́бнем лю́те в беззако́ниих на́ших, но да сподо́бимся с тобо́ю и все́ми святы́ми сла́вити и воспева́ти всесвято́е и́мя Его́, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Молитва 2-я святителю Иакову, епископу Ростовскому
О, святи́телю Христо́в Иа́кове, усе́рдно мо́лим тя: огради́ нас, раб Бо́жиих (имена), святы́ми твои́ми моли́твами от вся́кия беды́, ско́рби и боле́зни и от вся́каго гне́ва Бо́жия, пра́ведно на ны дви́жимаго; испроси́ нам ти́хое и безмяте́жное житие́, во вся́ком благоче́стии и чистоте́; помози́ нам спасе́ние получи́ти и Ца́рствия Небе́снаго дости́гнути. Ей, уго́дниче Бо́жий! Не пре́зри усе́рднаго моле́ния сего́ на́шего и умоли́ о нас Всеще́драго Человеколю́бца Бо́га, да не поги́бнем лю́те со беззако́нии на́шими, но да сподо́бимся с тобо́ю и со все́ми святы́ми сла́вити и воспева́ти всесвято́е и́мя Его́ во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![святителя Иакова, епископа Ростовскаго святителя Иакова, епископа Ростовскаго](img_b/035.jpg)