10 декабря

Канон святаго великомученика Иакова Персянина

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь му́ченика Иа́кова, гла́с 4:

Му́ченик Тво́й, Го́споди, Иа́ков во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Или́ се́й, гла́с то́йже:

Муче́нии странноужа́сными и до́блестию терпе́ния все́х преудиви́л еси́, многострада́льне, над ко́имждо соста́вом удеси́ ре́зания, благода́рны мольбы́ преди́вне изре́кл еси́ Го́споду. Те́м, во страда́нии твое́м вене́ц прие́м, к престо́лу возше́л еси́ небе́снаго Царя́ Христа́ Бо́га, Иа́кове, Того́ моли́ спасти́ ду́ши на́ша.

Канон Гла́с 2.

Пе́снь 1.

Ирмос: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святый великомучениче Иакове, моли Бога о нас.

Христо́ву престо́лу ны́не предстоя́, венцено́сец, сла́вне му́чениче Иа́кове, светоно́сную мне́ зарю́ и благода́ть с небесе́ да́ждь моли́твами твои́ми.

Припев: Святый великомучениче Иакове, моли Бога о нас.

Якоже у́тро на́м возсия́л еси́ многосве́тлое, от восто́ка исходя́, и просвети́л еси́ Христо́ву Це́рковь све́тлостию страда́ний, му́чениче Иа́кове.

Сла́ва Отцу́ и Сы́ну и Свято́му Ду́ху:

Юношеское сопротивле́ние показа́в, я́ко победи́тель сподо́бился еси́ по́чести, и соверше́ннаго натрижне́ния, и сла́вы ве́чныя, му́чениче Иа́кове.

И ны́не и при́сно и во ве́ки веко́в. Ами́нь.

Богоро́дичен: Проро́ческия Тя́ трубы́ провозвести́ша, е́же о Тебе́ та́инство пропове́дающе, Богоро́дице Де́во, издале́ча зря́ще Твоя́ чудеса́.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Святый великомучениче Иакове, моли Бога о нас.

Бы́л еси́, я́ко избра́нна Христо́ва лоза́, серпо́м муче́ний очища́ема и мно́г пло́д нося́щая, в точи́лех Спа́совых приноси́мый.

Припев: Святый великомучениче Иакове, моли Бога о нас.

Теку́щих тле́нное и удоборазре́шное презре́л еси́ смы́сленно, венцено́сче, я́ко остроу́мный же предъизбра́л еси́ приснопребыва́ющих незы́бленное.

Сла́ва Отцу́ и Сы́ну и Свято́му Ду́ху:

Венцы́ тебе́ све́тлы, раздробля́емое те́ло, суровство́м мучи́телей исхода́тайствова, Иа́кове, и пи́щи ра́йския наслажде́ние.

И ны́не и при́сно и во ве́ки веко́в. Ами́нь.

Богоро́дичен: Поми́ловано бы́сть я́ве Рождество́м Твои́м Боже́ственным, Де́во, челове́чество, соедини́вшееся по Ипоста́си Влады́це все́х, Богоневе́сто.

Седа́лен, гла́с 8. Подо́бен: Прему́дрости.

Из Перси́ды звезду́ новоявле́нную Христо́с возсия́ земны́м боже́ственнаго Иа́кова и приснопа́мятнаго му́ченика, того́ ра́ди пре́лести мра́к отгна́, и ве́рным благода́ть Ду́ха возсия́. Те́мже па́мять его́ соверша́юще, ве́рно пра́зднуим и возопии́м, глаго́люще: страстоте́рпче многострада́льне, моли́ Христа́ Бо́га грехо́в оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богоро́дичен:

В ти́ну впа́д грехо́в, и не́сть мне́ постоя́ния, лю́те потопи́ мя бу́ря прегреше́ний, но я́ко ро́ждши Сло́во, еди́наго Человеколю́бца, на мя́, раба́ Твоего́, при́зри и изба́ви мя́ вся́каго греха́, и страсте́й душетле́нных, и вся́каго озлобле́ния лука́ваго уби́йцы, Богоро́дице Неискусому́жная, моли́ Христа́ Бо́га грехо́в оставле́ние да́ти ми́, Тебе́ бо наде́жду и́мам, ра́б Тво́й.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Святый великомучениче Иакове, моли Бога о нас.

Вжиля́емь, сла́вне, от Бо́га да́нным тебе́ всеору́жием, огнеслужи́телей ле́сть всю́ попали́л еси́.

Припев: Святый великомучениче Иакове, моли Бога о нас.

Очище́ние на́м испроси́, честну́ю твою́ па́мять соверша́ющим, дерзнове́ние име́я, му́чениче Иа́кове.

Сла́ва Отцу́ и Сы́ну и Свято́му Ду́ху:

Теку́щия кро́ве то́ки от твои́х уде́с, треблаже́нне, пре́лести пла́мень ве́сь погаси́ша.

И ны́не и при́сно и во ве́ки веко́в. Ами́нь.

Богоро́дичен: Упра́ви моя́ помышле́ния, Пречи́стая, к благоти́хому приста́нищу Твоего́ безстра́стия и чистоты́.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Святый великомучениче Иакове, моли Бога о нас.

Якоже не́кая земля́ блага́я и добропло́дная, и́стинно бы́л еси́, ра́лом го́рьких му́к раздробля́емь, му́дре, многокла́сное Зижди́телю принося́ земледе́лание.

Припев: Святый великомучениче Иакове, моли Бога о нас.

Стре́лы, всеизя́щне, разжже́нныя вра́жия угаси́л еси́, кро́вию отсе́ченых твои́х уде́с теле́сных, треблаже́нне, наде́ждею бо яви́лся еси́ и ве́рою огражда́емь.

Припев: Святый великомучениче Иакове, моли Бога о нас.

Всепло́дно, я́ко овча́, Христу́, прему́дре, твои́м удесе́м, ре́жемым лю́те, побе́дную пе́снь и досто́йную хвалу́ на ки́йждо приноси́л еси́.

Сла́ва Отцу́ и Сы́ну и Свято́му Ду́ху:

Дае́ши очище́ние душе́вных мои́х скве́рн, сла́вне му́чениче Христо́в, твоя́ боле́зни, избавле́ние подава́я крове́й твоя́ то́ки, всехва́льне.

И ны́не и при́сно и во ве́ки веко́в. Ами́нь.

Богоро́дичен: Истинствующий честно́му и стра́шному рождеству́ Твоему́ гла́с се́рдцем и язы́ком принося́ще я́сно, Тя́ ны́не Богоро́дицу чи́стую имену́ем.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Святый великомучениче Иакове, моли Бога о нас.

Поуче́ние смы́сленно прие́м бли́жних твои́х, ра́дуяся, устреми́лся еси́ к подвиго́м, сла́вне, и венцы́ побе́ды прия́л еси́.

Припев: Святый великомучениче Иакове, моли Бога о нас.

Якоже в чужде́м телеси́ стражда́, терпе́л еси́, му́чениче Иа́кове, и, на у́ды раздробля́емь, Влады́це пе́снь возсыла́л еси́.

Припев: Святый великомучениче Иакове, моли Бога о нас.

Спасе́ния в ри́зу я́вственно и весе́лия оде́жду, кро́вию твое́ю обагри́вшуюся, прему́дре, победоно́сец, я́ко му́ченик, обле́клся еси́.

Сла́ва Отцу́ и Сы́ну и Свято́му Ду́ху:

Муче́ния преплы́тие соверши́в, те́мже священнопобе́дный вене́ц прия́л еси́ и ны́не с му́ченическими чи́нми сликовству́еши досто́йно, Иа́кове сла́вне.

И ны́не и при́сно и во ве́ки веко́в. Ами́нь.

Богоро́дичен: Неискусому́жно, Де́во, родила́ еси́ и ве́чнуеши Де́ва, явля́ющи и́стиннаго Божества́, Сы́на и Бо́га Твоего́, зна́мения.

Конда́к, гла́с 2. Подо́бен: Вы́шних ища́.

Уве́рився до́брою сопру́жницею, терпеливоду́шне, и стра́шнаго суди́ща убоя́вся, пе́рсское повеле́ние и стра́х, Иа́кове, поплева́л еси́ и яви́лся еси́ му́ченик честны́й, те́лом, я́ко розга́, ре́жемь.

Икос:

От души́ возстене́м вси́, сле́зы пролива́юще, зря́ще му́ченика, го́рько раздробля́ема, подо́бно псо́м рыка́ющим, соше́дшеся, у́ды растерза́ют чу́днаго и до́бляго в свиде́телех му́ченика, что́ у́бо е́сть да приреку́? а́ще хо́щете, ма́ло пожди́те, и реку́ вся́ со тща́нием: ка́ко во еди́н де́нь бы́сть сме́рть, те́лом Иа́ков, я́ко розга́, ре́жемь.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Святый великомучениче Иакове, моли Бога о нас.

Кре́постию у́мною, терпе́нием же душе́вным, раздробля́ему, му́чениче, твоему́ те́лу, непрело́жен и непрекло́нен бы́л еси́, ве́рою укрепля́емь Боже́ственною и зовы́й, Иа́кове: благослове́н еси́, Го́споди Бо́же оте́ц на́ших.

Припев: Святый великомучениче Иакове, моли Бога о нас.

Испра́вив твоя́ помышле́ния к смотре́нию вы́шняго зва́ния и му́ками облива́емь, не потопи́лся еси́, но, терпя́ удо́бно я́звы беззако́нных и разсека́емь, пе́л еси́: благослове́н еси́, Го́споди Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Блаже́н еси́, и добро́ тебе́ е́сть ны́не, блаже́ннейше, победи́вшу ти́ неукроти́мое лука́ваго свире́пство и мучи́телеву я́рость, усе́рдно зову́щу ти́: благослове́н еси́, Го́споди Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Незаходи́маго Све́та и свещи́ Боже́ственнаго сия́ния яви́лася еси́ све́щник златосия́ющь и ми́р ве́сь озаря́ющь заре́ю честна́го де́вства и пою́щия спаса́еши: Благослове́нная, Яже Бо́га пло́тию ро́ждшая.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Святый великомучениче Иакове, моли Бога о нас.

Си́лою Бо́жиею укрепи́вся, лука́вых собо́рища и ополче́ния разори́л еси́, блаже́нне, и, держа́вно отгна́в, побе́ды вене́ц прия́л еси́, зовы́й: благослови́те, вся́ дела́ Госпо́дня, Го́спода, по́йте и превозноси́те Его́ во ве́ки.

Припев: Святый великомучениче Иакове, моли Бога о нас.

Отъя́тия уде́с, я́ко приложе́ния благи́х, му́чениче, зре́л еси́, не ны́нешния ви́дя боле́зни, но бу́дущее смотря́я му́чеников кра́сное венча́ние, от Пра́веднаго Судии́ угото́ванное.

Припев: Святый великомучениче Иакове, моли Бога о нас.

Терпе́ние преесте́ственное стяжа́в тве́рдо, я́коже сто́лп, пребы́л еси́, блаже́нне, вра́жия стремле́ния безстра́шно и стре́лы прие́мля, зовы́й: благослови́те Христа́ во ве́ки.

Сла́ва Отцу́ и Сы́ну и Свято́му Ду́ху:

Устремле́нием мно́гим тебе́ приложи́вся началозло́бный вра́г и душетле́нный, и мучи́тели подви́гнув низложи́ти души́ твоея́ кре́пость, и не возмо́же, сла́вне: во всеору́жие бо Христо́во оде́ял еси́ себе́.

И ны́не и при́сно и во ве́ки веко́в. Ами́нь.

Богоро́дичен: Безсме́ртия проза́рный ве́мы Тя́ исто́чник, Богоро́дице, я́ко ро́ждшую Сло́во безсме́ртнаго Отца́, вся́ сме́рти изба́вльшаго превознося́щия Его́ во ве́ки.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Святый великомучениче Иакове, моли Бога о нас.

С му́ченики я́ко му́ченик сликовству́я, треблаже́нне, и престо́лу предстоя́ Христо́ву, соверша́ющия па́мять твою́ и тво́й светоно́сный с весе́лием дне́сь чту́щия пра́здник лю́тых бе́д твои́ми моли́твами изба́ви.

Припев: Святый великомучениче Иакове, моли Бога о нас.

Иде́же му́чеников собо́ри, иде́же все́х святы́х свято́е упоко́ися мно́жество, иде́же пра́ведных ду́си, иде́же Це́рковь перворожде́нных, ны́не на небесе́х всели́лся еси́ вои́стинну я́ко му́ченик, о Иа́кове!

Припев: Святый великомучениче Иакове, моли Бога о нас.

Свещено́сец предста́л еси́ Спа́су все́х, за Него́же те́ла твоего́ уде́с отсече́ние претерпе́л еси́ и огня́, и ра́н искуше́ния неради́л еси́ кре́пко. Те́мже тя́ вси́ ве́рою и любо́вию ублажа́ем, Иа́кове.

Сла́ва Отцу́ и Сы́ну и Свято́му Ду́ху:

Испещре́нною багряни́цею, кровьми́ твои́ми очервлене́вшеюся, ны́не оде́ян, со Христо́м ца́рствуеши, Иа́кове, страстьми́ бо безстра́стия обре́л еси́ исто́чник, его́же наслажда́тися ве́чно, всеблаже́нне, сподо́бился еси́.

И ны́не и при́сно и во ве́ки веко́в. Ами́нь.

Богоро́дичен: Яко Бо́га заче́ншую и Бо́жию Ма́терь бы́вшую и́стинно чи́стую, Тя́, Богоро́дицу, сла́вим, веще́й естеству́, зва́ние прили́чествующе я́сно, и подо́бно боже́ственный Тебе́ гла́с принося́ще.

Свети́лен. Подо́бен: Ду́хом во святи́лищи.

Яко ло́зу, обре́заему мно́гими му́ками, просла́ви Госпо́дь, я́ко виногра́д честны́й, вино́ источа́ющь от исто́чник крове́й твои́х, Иа́кове страстоте́рпче и покрови́телю, любо́вию всесвяще́нную твою́ па́мять досто́йно творя́щих.

Богоро́дичен:

Не́сть отню́д во мне́ спасе́ния, Де́во, я́ко зле́ впадо́х во глубину́ грехо́вную и ожида́ю преще́ния, и стра́шнаго муче́ния, и ко́злищь ча́сти, уще́дри мя́ пре́жде суда́, я́ко су́щи те́плое заступле́ние, Богоро́дице.

Молитва

О святы́й уго́дниче Бо́жий, священному́чениче Иа́кове! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.