10 декабря

Канон благоверному князю Всеволоду Псковскому (в крещении Гавриилу) на обретение мощей

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Наста́ днесь всечестны́й но́вый пра́здник,/ обре́тение честны́х моще́й/ блаже́ннаго кня́зя Гаврии́ла,/ веселя́щи изря́дно всех благочести́вых мно́жества,/ те́мже, вси ве́рнии,/ соше́дшеся во святы́й храм Живонача́льныя Тро́ицы, возопие́м:/ блаже́нне кня́же Гаврии́ле,/ име́я дерзнове́ние ко Христу́ Бо́гу,/ моли́ спасти́ся пра́зднующим любо́вию па́мять твою́.

Канон Гла́с 8.

Пе́снь 1.

Ирмос: Во́ду проше́д, я́ко су́шу,/ и еги́петскаго зла́ избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Припев: Благоверне княже Гаврииле, моли́ Бо́га о нас.

Мрак грехо́вный отжени́, Светода́вче Христе́,/ и свы́ше просвети́ окая́нную мою́ ду́шу/ пе́ти Твоего́ уго́дника обре́тение, блаже́ннаго кня́зя Гаврии́ла.

Припев: Благоверне княже Гаврииле, моли́ Бо́га о нас.

Храм Святы́я Тро́ицы па́че со́лнечных луч просвети́ся,/ явле́ны име́я в себе́ твоя́ мо́щи, блаже́нне,/ созыва́ет правосла́вных мно́жества пра́здновати но́вый пра́здник све́тел твоего́ обре́тения.

Сла́ва Отцу́ и Сы́ну и Свято́му Ду́ху:

Вели́ких князе́й ру́сских ко́рене/ Бо́гом изра́стшую ветвь, блаже́ннаго Гаврии́ла,/ благочести́вых мно́жества, соше́дшеся, похва́лим/ и па́мять его́ све́тло пра́зднуем,/ да моли́твами его́ прии́мем грехо́в проще́ние.

И ны́не и при́сно и во ве́ки веко́в. Ами́нь.

Богоро́дичен: Засту́пница скорбя́щим/ и спасе́ние ненаде́ющимся Ты еси́, Богоро́дице всепе́тая,/ моли́ся приле́жно Сы́ну Своему́ от бед изба́витися нам.

Пе́снь 3.

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Припев: Благоверне княже Гаврииле, моли́ Бо́га о нас.

Лице́м к лицу́ зерца́лом разреше́нным зри́ши Святу́ю Тро́ицу,/ Ей же предстоя́ со святы́ми,/ и о нас ны́не моли́ся, Гаврии́ле блаже́нне,/ и́же ве́рою тя сла́вящих.

Припев: Благоверне княже Гаврииле, моли́ Бо́га о нас.

Испо́лнен ра́дости день обре́тением телесе́ твоего́, блаже́нне,/ всех к торжеству́ воздвиза́еши Христо́ви с весе́лием вопи́ти:/ несть свят, па́че Тебе́, Человеколю́бче.

Сла́ва Отцу́ и Сы́ну и Свято́му Ду́ху:

Па́ки нас честны́м ти явле́нием,/ благове́рный кня́же Гаврии́ле, весели́ши/ и па́ки ко своему́ телеси́ прикоснове́нием всех освяща́еши/ и учи́ши Христо́ви вопи́ти:/ несть свят, па́че Тебе́, Человеколю́бче.

И ны́не и при́сно и во ве́ки веко́в. Ами́нь.

Богоро́дичен: Живота́ нетле́ннаго Бо́жия ски́ния бысть,/ еди́на от ве́ка я́вльшися Де́ва и Ма́ти Чистая,/ в се́ни мя су́ща сме́ртней к животу́ наста́ви моли́твами Твои́ми.

Седа́лен, гла́с 4:

Моли́твам и ми́лостыням при́сно прилежа́, блаже́нне Гаврии́ле,/ ми́лостив к тре́бующим был еси́ и незави́стный пода́тель,/ тем же тя почита́ющих от сопроти́вных зол изба́ви,/ да вси твое́ обре́тение любо́вию почита́ем.

Сла́ва, и ны́не, Богоро́дичен:

Свет ро́ждшая пречи́стый,/ И́же от Отца́ пре́жде век воссия́вый,/ просвети́, Отрокови́це, ду́шу мою́ и ум,/ дале́че от Мене́ отгоня́щи тьму страсте́й,/ да Тя ублажа́ю, Присноблаже́нную,/ всех ве́рных упова́ние.

Пе́снь 4.

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Припев: Благоверне княже Гаврииле, моли́ Бо́га о нас.

Благода́рная пе́ния принося́щая ти лю́ди не пре́зри, блаже́нне Гаврии́ле,/ но приими́ сия́ и доноша́й твоему́ Творцу́ и Бо́гу на́шему,/ да вси твое́ обре́тение любо́вию почита́ем.

Припев: Благоверне княже Гаврииле, моли́ Бо́га о нас.

Дарова́ся нам дар от Бо́га – твоя́ мо́щи, блаже́нне./ От них же незави́стныя да́ры исцеле́ния почерпа́юще,/ Христа́ во хвале́нии воспева́ем,/ И́же тебе́ нам дарова́вшаго.

Сла́ва Отцу́ и Сы́ну и Свято́му Ду́ху:

Ру́це твои́ к Бо́гу воздежи́, кня́же Гаврии́ле,/ и помоли́ся о гра́де твое́м Пско́ве, изба́витися от вся́каго зла,/ я́ко да вси твое́ обре́тение че́стно почита́ем.

И ны́не и при́сно и во ве́ки веко́в. Ами́нь.

Богоро́дичен: С Бо́гом Тя Засту́пницу стяжа́хом,/ Ты бо Ма́ти Бо́жия бысть,/ Творца́ и Соде́теля на́шего во утро́бе прии́мши, Всенепоро́чная,/ всех от сме́рти и тли спасла́ еси́.

Пе́снь 5

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам, Человеколю́бче.

Припев: Благоверне княже Гаврииле, моли́ Бо́га о нас.

Рыда́ют попремно́гу го́рцыи бе́сове,/ моли́твами твои́ми от челове́к отгоня́еми/ и стра́сти неисце́льныя ви́дяще уврачу́еми./ Мы же, лю́дие твои ́ , ви́дяще мо́щи твоя́, ра́дующеся, пра́зднуем.

Припев: Благоверне княже Гаврииле, моли́ Бо́га о нас.

Боже́ственную благода́ть в честне́м ти обре́тении/ попремно́гу зря́ще лю́дие твои́,/ но я́ко чадолюби́вый оте́ц, моли́твами твои́ми ми́рно житие́ дарова́ти мо́лимся./ Укрепи́ благове́рныя лю́ди на супоста́ты,/ да тобо́ю от злых избавля́еми,/ почита́ем честно́е твое́ обре́тение.

Сла́ва Отцу́ и Сы́ну и Свято́му Ду́ху:

Смире́ния нрав высо́к и по Бо́зе житие́ стяжа́в, блаже́нне Гаврии́ле,/ те́мже Всеви́дящее о́ко, ви́дев до́брое твое́ произволе́ние, сла́вна тя явля́ет всем,/ Христо́с и Спас душа́м на́шим.

И ны́не и при́сно и во ве́ки веко́в. Ами́нь.

Богоро́дичен: Еди́ну Тебе́, Всенепоро́чную, от родо́в избра́в Чи́стую,/ всели́ся в Тя Госпо́дь и челове́ки обожи́./ Те́мже, я́ко ма́терне дерзнове́ние к Нему́ иму́щи,/ моли́ о и́же Тя Богоро́дицу имену́ющих.

Пе́снь 6.

Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Припев: Благоверне княже Гаврииле, моли́ Бо́га о нас.

А́ще и преста́вися от земны́х, блаже́нне,/ но в Вы́шних жив, со А́нгелы Бо́гу предстои́ши,/ помина́й нас, и́же честно́е твое́ обре́тение пра́зднующих.

Припев: Благоверне княже Гаврииле, моли́ Бо́га о нас.

Блаже́ни роди́телие, и́же тебе́ роди́вшии,/ блаже́но же и ме́сто, тебе́ воспита́вшее./ Свята́ же и пресвята́ це́рковь и град Псков,/ и́же тебе́, таково́е сокро́вище, стяжа́вши.

Сла́ва Отцу́ и Сы́ну и Свято́му Ду́ху:

На смире́ние на́ше свы́ше при́зри/ и ми́лостивно назира́й,/ и́же ве́рно тебе́ при́сно сла́вящих,/ моли́ся от вся́кия ско́рби изба́витися,/ я́ко тебе́ те́пла предста́теля к Бо́гу, Гаврии́ле, стяжа́хом.

И ны́не и при́сно и во ве́ки веко́в. Ами́нь.

Богоро́дичен: Пое́м, Ма́ти Де́во, па́че естества́ Рождество́/ и Твою́ нетле́нную чистоту́,/ и́же в Тебе́ ди́вно сочта́ся де́вство и рождество́ нетле́нне, Богоневе́сто.

Конда́к, глас 8.

Возвесели́ся, Христо́ва це́рковь,/ иму́щи в себе́ исто́чника чудесе́м оби́льна./ Днесь, любо́вию соше́дшеся в тя, лю́дие твои́,/ во обре́тение честны́х моще́й блаже́ннаго кня́зя Гаврии́ла,/ воспое́м песнь еди́ному Бо́гу в Тро́ице, ра́дующеся,/ сподо́бльшаго нас ви́дети пречестно́е сокро́вище, мо́щи его́,/ от мног лет сокрове́нны, напосле́док же нам явле́ны./ Я́ко да моли́твами его́ к Бо́гу от всех находя́щих зол изба́вимся/ и ра́достною душе́ю и весе́лием се́рдца/ благода́рная воспое́м, глаго́люще:/ ра́дуйся, утвержде́ние гра́ду на́шему.

Икос:

От ю́ности свое́ житие́ Спа́су испра́вль,/ внима́тельным о́ком всегда́ к Вы́шнему зря,/ отню́дуже вели́кия доброде́тели му́дрость стяжа́в,/ и вруче́ние держа́вы княже́ния от Бо́га при́ят,/ и до́бре жив в житии́ сем,/ мно́ги святы́я це́ркви созда́в/ и честны́ми би́серы украси́в, иере́я учреди́в,/ и ни́щия а́лчущия напита́в,/ печа́льныя и вдови́цы и сироты́ уте́шив./ Те́мже тече́ние благоче́стно соверши́в,/ к Бо́гу пресла́вно ду́хом преше́л еси́/ и нам в па́мять честны́я мо́щи твоя́ оста́вил еси́./ Их же ны́не честно́е обре́тение ра́достно пра́зднующе, мо́лим тя/ побе́ду на враги́ ве́рным дарова́ти,/ я́ко да и мы, в тишине́ благоуго́дно житие́ пожи́вше,/ ра́достною душе́ю тебе́ благода́рственно воспое́м:/ ра́дуйся, Все́володе, прозва́нный блаже́нный, именова́нный Гаврии́ле,/ ты бо еси́ утвержде́ние гра́ду на́шему.

Пе́снь 7.

Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Припев: Благоверне княже Гаврииле, моли́ Бо́га о нас.

И́же обре́тение твое́ чту́щих, блаже́нне,/ свяще́нный собо́р и христолюби́вых наро́д мно́жества/ мо́лят изба́вити нас, Христо́ви вопию́щих:/ благослове́н Бог оте́ц на́ших.

Припев: Благоверне княже Гаврииле, моли́ Бо́га о нас.

Свы́ше от Бо́га дар тезоимени́т гра́ду и всей земли́ дан бысть, блаже́нне Гаврии́ле,/ удивля́я всех чудесы́, Христо́ви вопию́щих:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Во всем жити́и свое́м, блаже́нне, о́браз быв всем благове́рным кня́зем,/ ка́ко незло́биво и прекро́ткое е́же к челове́ком/ и ка́ко к ни́щим ми́лостивное,/ свети́льник многосве́тлый был еси́, Христо́ви поя́:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Зачала́ еси́, Пречи́стая, над все́ми Бо́га,/ благоволи́вшаго спасти́ род челове́ческий от сме́рти и тли./ Его́ же, пою́ще, зове́м:/ благослове́н Бог оте́ц на́ших.

Пе́снь 8.

Ирмос: Царя́ Небе́снаго,/ Его́ же пою́т во́и А́нгельстии,/ хвали́те и превозноси́те во вся ве́ки.

Припев: Благоверне княже Гаврииле, моли́ Бо́га о нас.

Влады́ку всех за ны моли́, блаже́нне Гаврии́ле,/ Ему́же в житии́ свое́м благоугоди́л еси́,/ ве́мы бо, я́ко и́маши к Нему́ дерзнове́ние,/ тебе́ бо и́мамы к Нему́ хода́тая и неусыпа́юща моли́твенника, прехва́льне.

Припев: Благоверне княже Гаврииле, моли́ Бо́га о нас.

Пресла́вным явле́нием твои́х моще́й, блаже́нне,/ вско́ре сумне́ние о тебе́ от душ на́ших и от серде́ц отжени́/ и несумне́нну ве́ру да́руй Го́споду вопи́ти:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

По Боже́ственнем ти преставле́нии/ взя́ти восхоте́ша лю́дие Вели́каго Нова́гра́да святы́я мо́щи твоя́ к себе́,/ а́бие ра́ка твоя́ ста неподви́жима,/ благоволи́л бо еси́ пребыва́ти, иде́же преста́вися./ Тогда́ же и весь Боголюби́вый наро́д вопия́ху Творцу́:/ де́ти, благослови́те, свяще́нницы, по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Сло́вом проро́ческим после́дующе, Де́во,/ Богоро́дицу Тя имену́ем,/ роди́ бо Отроча́, всех дре́внейше, Емману́ил нарица́емо./ Ему́ же ны́не зове́м:/ Го́спода по́йте и превозноси́те Его́ во ве́ки.

Песнь 9

Ирмос: Вои́стинну Богоро́дицу/ Тя испове́дуем/ спасе́нии Тобо́ю, Де́во Чи́стая,/ с Беспло́тными ли́ки Тя велича́юще.

Припев: Благоверне княже Гаврииле, моли́ Бо́га о нас.

Све́тлый и честны́й пра́здник преставле́ния твоего́, блаже́нне кня́же Гаврии́ле,/ светле́йши же и честне́йши ны́не обре́тение твое́,/ е́же сла́вяще, тебе́ велича́ем.

Припев: Благоверне княже Гаврииле, моли́ Бо́га о нас.

Исто́чник благоче́стия яви́лся еси́ и о́браз кро́тости,/ исцеле́нием незави́стный пода́тель,/ те́мже соше́дшеся благоче́стно,/ твоего́ обре́тения пра́здник любо́вию почита́ем.

Сла́ва Отцу́ и Сы́ну и Свято́му Ду́ху:

Певце́м, и́же тебе́, блаже́нне Гаврии́ле, во хвале́нии пою́щим,/ свы́ше ниспосли́ по́мощь и грехо́м оставле́ние испроси́ от Влады́ки Христа́,/ да тебе́ всегда́ в пе́снех велича́ем.

И ны́не и при́сно и во ве́ки веко́в. Ами́нь.

Богоро́дичен: Ми́ро та́йно имену́ем Тя, Пречи́стая,/ я́ко ро́ждши Бо́га пло́тию,/ благоуха́ния источа́юща дарова́ния.

Свети́лен.

Ско́ро предвари́, благове́рный кня́же Гаврии́ле,/ ве́рным помо́щниче и Христо́в уго́дниче,/ и покори́ враги́ на́ша, иноплеме́нныя язы́ки,/ да навы́кнут сла́вити Святу́ю Тро́ицу./ Нас же, чту́щих твою́ па́мять, спаса́й от вся́каго гне́ва.

Сла́ва, и ны́не, Богоро́дичен:

С Бо́гом упова́ние на Тя, Богоро́дице, возло́жше,/ И́же из тебе́ проше́дшему сраспина́еми Христу́,/ к Нему́ же, Пречи́стая, моли́ся невреди́мы нас до конца́ сохрани́ти.

Молитва благоверному князю Всеволоду, в Крещении Гавриилу, Псковскому

О, вели́кий уго́дниче Бо́жий и пресла́вный чудотво́рче, святы́й благове́рный кня́же Все́володе-Гаврии́ле, гра́да Пско́ва и всея́ держа́вы Росси́йския небе́сный засту́пниче и покрови́телю, и всех нас усе́рдный пред Бо́гом предста́телю и защи́тителю! Предстоя́ Престо́лу Вели́каго Царя́ и Бо́га на́шего, в Тро́ице Святе́й сла́вимаго и покланя́емаго, ве́лие дерзнове́ние к Нему́ и́мати, я́ко ве́рный раб Его́ и уго́дник. К тебе́ у́бо, я́ко сро́дному нам и многомо́щному пред Го́сподем хода́таю, прибега́ем мы гре́шнии и недосто́йнии, и умиле́нно про́сим тя: моли́ Всеблага́го Бо́га, да отврати́т от нас гнев Свой, пра́ведно по дела́м на́шим на ны дви́жимый, и презре́в безчи́сленная прегреше́ния на́ша, обрати́т нас на путь покая́ния и спасе́ния. Огради́ моли́твами твои́ми в мире жизнь на́шу, и ко всем благо́е поспеше́ние и вся к животу́ и благоче́стию потре́бная нам дарова́ти испроси́, и я́коже дре́вле град твой Псков от плене́ния и разоре́ния ра́тнаго изба́вил еси́, та́ко и ны́не и нас и вся гра́ды и ве́си страны́ на́шея от вся́ких напа́стей и бед и внеза́пныя сме́рти предста́тельством твои́м изба́ви, и от всех враг ви́димых и неви́димых покро́вом твои́м защити́. Сохрани́ моли́твами твои́ми в ми́ре держа́ву на́шу и будь всей стране́ Росси́йстей кре́пкое огражде́ние; да ти́хое и безмо́лвное житие́ поживе́м во вся́ком благоче́стии и чистоте́, и та́ко в ми́ре вре́менное сие́ житие́ преше́дшии, в ве́чный дости́гнем поко́й, и сподо́бимся Небе́снаго Ца́рствия, сла́вяще Отца́ и Сы́на и Свята́го Ду́ха, и твое́ свято́е заступле́ние, во ве́ки веко́в. Ами́нь.

Молитва 2-я

О, святы́й кня́же Все́володе-Гаврии́ле! К тебе́ у́бо прибега́ем мы, гре́шнии раби́ Бо́жии (имена), и умиле́нно про́сим тя: моли́ Всеблага́го Бо́га, да отврати́т от нас гнев Свой, пра́ведно, по дело́м на́шим, на ны дви́жимый, и, презре́в безчи́сленная прегреше́ния на́ша, обрати́т нас на путь покая́ния и спасе́ния. Огради́ молит́вами твои́ми в ми́ре жизнь на́шу и во всем благо́е поспеше́ние и вся к животу́ и благоче́стию потре́бная нам дарова́ти испроси́, да ти́хое и безмо́лвное житие́ поживе́м во вся́ком благоче́стии и чистоте́ и сподо́бимся Небе́снаго Ца́рствия, сла́вяще Отца́ и Сы́на и Свята́го Ду́ха и твое́ заступле́ние, во ве́ки веко́в. Ами́нь.