Шрифт

10 декабря

Канон преподобному Феодосию Терновскому, иже на Кефаларстей горе постившагося

Преподобнаго и богоноснаго отца нашего Феодосия Терновскаго, иже на Кефаларстей горе
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3.

В блаже́ннем безмо́лвии пусты́ннем / и на собо́рех, любо́вию к Бо́гу горя́, / посрами́л еси́ лука́вых бесо́в и ерети́к злочести́вых. / На моли́тве же стоя́, огня́ све́тлостию просия́л еси́ / и преставле́нием твои́м Ангелов пою́щих обвесели́л еси́, / Феодо́сие, о́тче на́ш, / сего́ ра́ди мо́лим тя́: / моли́ся о душа́х на́ших.

Кано́н гла́с 8.

Пе́снь 1.

Ирмос: Посе́ченный несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль, пе́снь же воспева́шеся: Го́сподеви пои́м, сла́вно бо просла́вися.

Припе́в: Преподо́бне о́тче Феодо́сие, моли́ Бо́га о на́с.

Бо́жий Агнче и Сло́ве, светозаре́нием Свята́го Твоего́ Ду́ха помраче́нному уму́ моему́ светоно́сную лучу́ ниспосли́ и сло́во ми́ вдохни́ восхвали́ти, его́же избра́л и прия́л еси́, ве́рх преподо́бных — Феодо́сия.

Припе́в: Преподо́бне о́тче Феодо́сие, моли́ Бо́га о на́с.

Озари́ благода́тию Боже́ственною раба́ твоего́ и разуме́ния ду́шу мою́ испо́лни, Феодо́сие о́тче, во е́же восхвали́ти житие́ твое́, и́мже вся́ удиви́л еси́, подвиза́яся и Го́сподеви поя́: сла́вно бо просла́вися.

Сла́ва Отцу́ и Сы́ну и Свято́му Ду́ху:

Гра́ду вели́ких доброде́телей твои́х, верху́ горы́ стоя́щему, преподо́бне, удиви́шася лю́дие, его́же светозаре́нием наказу́я, все́х ко спасе́нию путеводи́л еси́, Го́сподеви поя́: сла́вно бо просла́вися.

И ны́не и при́сно и во ве́ки веко́в. Ами́нь.

Богоро́дичен: Отроча́ Мла́до роди́вши ми́ра всего́ на спасе́ние, Ада́ма дре́вняго старе́йшее и Роди́телю Предве́чному Сопресто́льное, глаго́лы богогла́сных проро́ков о Тебе́ испо́лнила еси́, Богоро́дице, и на́с истле́ния измени́ла еси́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припе́в: Преподо́бне о́тче Феодо́сие, моли́ Бо́га о на́с.

Доброде́телей на го́ру восте́к и во мра́к виде́ния вше́д, позна́л еси́, ели́ко вмести́тельно Непостижи́маго естество́м; просвеще́ния же испо́лнен бы́в, восприя́л еси́ бога́тно благода́ть Боже́ственную.

Припе́в: Преподо́бне о́тче Феодо́сие, моли́ Бо́га о на́с.

Алка́я добро́ты Еди́наго Бо́га и жа́ждая сла́вы Его́, блаже́нне, сла́ву земна́го пребыва́ния преходя́щую оста́вил еси́ и я́ко уго́дник Влады́ки все́х Христа́ просия́л еси́.

Сла́ва Отцу́ и Сы́ну и Свято́му Ду́ху:

Непреста́нным жела́нием ду́ха пло́ти жела́ние увяди́л еси́ и себе́, блаже́нне, обручи́л еси́ сожи́тельницу — чистоту́, от нея́же ча́да тебе́ роди́шася — доброде́тели, ча́до тя́ соде́лавшия Невеще́ственнаго Све́та.

И ны́не и при́сно и во ве́ки веко́в. Ами́нь.

Богоро́дичен: Неизрече́нно Бо́гу из Твои́х ложе́сн проше́дшу, на́с от тле́ния свободи́, Де́во Чи́стая, и зми́я мы́сленнаго умертви́, умертви́вшаго Ада́ма в раи́ иногда́ и Еве прама́тери печа́ль соде́лавшаго.

Седа́лен, гла́с 4. Подо́бен: Ско́ро предвари́.

Пре́лесть попали́л еси́ злосла́вных / и ве́ру до́бре уясни́л еси́ правосла́вных, / му́дре Феодо́сие, / и оте́чество твое́ просвети́л еси́, / отону́дуже победоно́сный победи́тель показа́лся еси́, / сто́лп Це́ркве и па́стырь и́стинный. / Не преста́й у́бо моля́ся Христу́ / спасти́ся на́м.

Сла́ва, и ны́не, Богоро́дичен:

Ско́ро приими́, Влады́чице, / моле́ния на́ша / и сия́ принеси́ Сы́ну Твоему́ и Бо́гу, / Госпоже́ Всенепоро́чная. / Побори́ обстоя́ния злосла́вных, / разори́ ко́зни языковре́дных / и низложи́ де́рзость нечести́вых, / вооружа́ющихся на рабы́ Твоя́, / Пречи́стая.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припе́в: Преподо́бне о́тче Феодо́сие, моли́ Бо́га о на́с.

Образ се́ни зако́на, Моисе́ом да́ннаго, зако́н благода́ти показа́л еси́ бы́ти, му́дре Феодо́сие, и Ева́нгелие — та́инство и́стиннаго богоявле́ния, Христу́ взыва́я: сла́ва си́ле Твое́й, Го́споди.

Припе́в: Преподо́бне о́тче Феодо́сие, моли́ Бо́га о на́с.

Многотру́дныя по́двиги испо́лнив, блаже́нне, досто́йно сподо́бился еси́ безсме́ртия, иде́же, ра́дуяся, вене́ц побе́ды прия́л еси́, вопия́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Удали́вся в пусты́ню, Крести́теля житию́ поревнова́л еси́ и, чи́сте та́мо пожи́в, благода́ти Христо́вы причаща́лся еси́, непреста́нно взыва́я: сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богоро́дичен: Враго́в кре́пость низложи́, Ма́ти Бо́жия, оскорбля́ющих воспева́ющия Тя́, я́ко ро́ждшая Го́спода сла́вы, и невреди́мо ста́до Твое́ соблюда́й от злы́х прираже́ний, я́ко да по до́лгу Тя́ ублажа́ем.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припе́в: Преподо́бне о́тче Феодо́сие, моли́ Бо́га о на́с.

Отпадо́х ле́ностию, окая́нный, и к сме́рти усну́х, но, я́ко па́стырь до́брый, воздви́гни мя́, о́тче, и стра́сти моя́ мучи́тельныя успи́, я́ко да чи́сте воспою́ твое́ светоно́сное преставле́ние.

Припе́в: Преподо́бне о́тче Феодо́сие, моли́ Бо́га о на́с.

Сохраня́й оте́чества твоего́ христолюби́вых люде́й моли́твами твои́ми, богоно́се о́тче, избавля́я враго́в наше́ствия и па́губы вся́кия, я́ко да вси́ усе́рдно засту́пника тя́ ко Христу́, Бо́гу на́шему, почита́ем.

Сла́ва Отцу́ и Сы́ну и Свято́му Ду́ху:

Подража́тель яви́лся еси́ Илии́ ре́вностию, не зна́меньми стра́шными ужаса́я, но Боже́ственных слове́с уче́ньми наставля́я и к Правосла́вию христоимени́таго Изра́иля от пре́лести врага́ мно́гажды изводя́.

И ны́не и при́сно и во ве́ки веко́в. Ами́нь.

Богоро́дичен: Еди́ну Тя́ о́блак разу́мный имену́ем, из Тебе́ бо Христо́с возсия́, неискусому́жно вопло́щся, Всенепоро́чная, и простра́ннейшу Тя́ небе́с показа́ за милосе́рдие неисповеди́мое.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припе́в: Преподо́бне о́тче Феодо́сие, моли́ Бо́га о на́с.

В ве́ре Правосла́вней еди́но бы́ти, при́сным твои́м о́бщее промышле́ние творя́ се́рдцем и душе́ю, сла́вне Феодо́сие, ерети́ческих отрева́л еси́ заблужде́ний и разделе́ний бежа́ти все́х учи́л еси́.

Припе́в: Преподо́бне о́тче Феодо́сие, моли́ Бо́га о на́с.

Ангелов оби́телище и ра́й и́стинный соде́лав пусты́ню, в не́йже преизя́ществовал еси́ во вся́кой доброде́тели, по преставле́нии же рая́ сла́дости сподо́бился еси́.

Сла́ва Отцу́ и Сы́ну и Свято́му Ду́ху:

Единоро́днаго Сы́на Бо́жия, сла́дость весе́лия, — Христа́ Бо́га на́шего, мироно́сиц сле́зы в ра́дость обрати́вшаго, непреста́нными то́ки сле́з твои́х иска́пал еси́.

И ны́не и при́сно и во ве́ки веко́в. Ами́нь.

Богоро́дичен: Тя́ иногда́ написа́ скрижа́ль богообра́зне во проро́цех вели́кий Моисе́й, све́щник же све́та и же́зл процве́тший, Всенепоро́чная, и ле́ствицу, е́юже вознесо́хомся от земли́ на не́бо.

Конда́к, гла́с 8. Подо́бен: Взбра́нной Воево́де.

Пропове́дник велегла́сный Боже́ственных догма́т / на собо́рех святы́х бы́л еси́, о́тче му́дре, / цари́ умудря́я и в ве́ре утвержда́я; / благода́тию же Боже́ственною осиява́емь, / загради́л еси́ уста́ злосла́вных, Феодо́сие. / Сего́ ра́ди вопие́м ти́: / ра́дуйся, Бо́лгарская похвало́ / и Правосла́вия све́тлое ра́дование.

Икос:

По́стническое обуче́ние усе́рдно проше́д, преподо́бне Феодо́сие, и страсте́й прило́ги тече́нием сле́з твои́х вся́ притупи́в и благоче́стие на земли́ Бо́лгарстей но́во утверди́в, ле́ствица боже́ственная, на не́бо возводя́щая, все́м показа́ся богоприя́тное житие́ твое́, е́юже са́м, возше́д в го́рния оби́тели, и на́м, уны́лым, путесотвори́л еси́ вхо́д, моли́твами твои́ми вы́спрь всегда́ на́с вперя́я. Сего́ ра́ди вопие́м ти́: ра́дуйся, Бо́лгарская похвало́ и Правосла́вия све́тлое ра́дование.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: оте́ц на́ших Бо́же, благослове́н еси́.

Припе́в: Преподо́бне о́тче Феодо́сие, моли́ Бо́га о на́с.

Ди́вным воздержа́нием умертви́в плотски́я стра́сти, сосу́д чи́ст и боговсе́льный бы́л еси́; те́мже соверша́ющия светоно́сную твою́ па́мять при́сно помина́й, пою́щия: оте́ц на́ших Бо́же, благослове́н еси́.

Припе́в: Преподо́бне о́тче Феодо́сие, моли́ Бо́га о на́с.

Еже на на́с вра́жияго ополче́ния избе́г, легко́ преше́л еси́ к го́рним оби́телем, иде́же ны́не водворя́яся и по́честь сла́вы восприе́мля, со все́ми святы́ми воспева́еши: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Возлюби́л еси́ ху́дость ри́зную, преподо́бне, и отве́рглся еси́ мя́гких, сла́вящих те́ло, ве́сть бо душа́ сообразова́ти вну́тренняя вне́шнему устрое́нию, смиря́ющися и зову́щи: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Имя превожделе́нное, Влады́чице, пресве́тлаго Со́лнца о́блаче и две́ре небе́сная, все́х христиа́н мольбу́ приими́, Тя́ ублажа́ющих и Сы́ну Твоему́ зову́щих: оте́ц на́ших Бо́же, благослове́н еси́.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припе́в: Преподо́бне о́тче Феодо́сие, моли́ Бо́га о на́с.

Истинное целому́дрие стяжа́в попремно́гу и чистоту́ теле́сную, я́коже подоба́ет святы́м, смире́ние и сокруше́ние се́рдца вельми́ преумно́жил еси́ и ско́рбных нанесе́ние, ра́дуяся, приима́л еси́, Бо́гу воспева́я: благослови́те, вся́ дела́ Госпо́дня, Го́спода.

Припе́в: Преподо́бне о́тче Феодо́сие, моли́ Бо́га о на́с.

Пожи́л еси́ на земли́, я́ко безпло́тен; челове́к у́бо бы́в естество́м, яви́лся еси́ сограждани́н Ангелом, о́тче му́дре, с ни́миже ны́не пое́ши, зовы́й: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Обличи́л еси́ ху́льных евре́й и свире́пеющия на ста́до Бо́жие во́лки ерети́ческия, па́лицею же моли́тв твои́х и уче́ний дале́че от Це́ркве Бо́лгарския отгна́л еси́, я́же доны́не ку́пно с тобо́ю воспева́ет, зову́щи: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Хра́м Тво́й святы́й щито́м ве́ры сохрани́, Богоро́дице Де́во, и в не́м славосло́вящия Тя́ ку́пно сла́вы Твоея́ сподо́би, нахожде́ния ва́рварскаго избавля́ющи и ума́ на́шего во́лны свире́пыя укроща́ющи моли́твою Твое́ю, Всепе́тая.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припе́в: Преподо́бне о́тче Феодо́сие, моли́ Бо́га о на́с.

Во Еди́но естество́ Тро́ицы ве́ровав правосла́вно, су́етная поуча́ющих обличи́л еси́ дерзнове́нно и боже́ственными наказа́нии твои́ми ве́рных, му́дре увеща́в, укрепи́л еси́, Ангелов сослужи́телю, преподо́бне о́тче, па́мять твою́ пра́зднующих в ми́ре соблюди́.

Припе́в: Преподо́бне о́тче Феодо́сие, моли́ Бо́га о на́с.

Аще у́бо и слеза́ми го́рькими ни́ву се́рдца твоего́ напои́ти до́лженствовал еси́, о́тче богоно́се, но ны́не в ра́дости рукоя́тия собира́еши, подвиго́в твои́х по́чести; те́мже тя́ вси́ ублажа́ем.

Сла́ва Отцу́ и Сы́ну и Свято́му Ду́ху:

Лука́вых духо́в кова́рства спасе́ся душа́ твоя́ свята́я, блаже́нне, и, де́монов стреля́ния избежа́вши, насле́дия небе́снаго сподо́бися; помина́й у́бо пою́щия тя́.

И ны́не и при́сно и во ве́ки веко́в. Ами́нь.

Богоро́дичен: Услы́ши моли́тву убо́гих на́с, Богома́ти, все́х тва́рей Творца́ поро́ждшая и всю́ тва́рь боже́ственною сла́вою превозше́дшая, и изба́ви на́с от вра́жиих все́х напа́дений, Тя́ велича́ющия.

Свети́лен гла́с 3. Подо́бен: Посети́л ны́ е́сть.

Иноков учи́телю / и правосла́вных утвержде́ние, / де́монов победи́телю / и злочести́вых обличе́ние, / Феодо́сие, о́тче на́ш, / моли́твами твои́ми / сро́дных твои́х при́сно огражда́й.

Молитва

О свяще́нная главо́, преподо́бне о́тче, преблаже́нне а́вво Феодо́сие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобнаго и богоноснаго отца нашего Феодосия Терновскаго, иже на Кефаларстей горе