9 августа.

Канон блаженному Николаю Кочанову, Христа ради юродивому, Новгородскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Терпе́нием свои́м и му́жеством/ Христа́ ра́ди во юро́дство претвори́вся, блаже́нне Нико́лае,/ ху́дость ри́зную име́я,/ тя́гость ва́ра дневна́го поне́сл еси́/ и мра́зы зи́мныя терпе́л еси́./ И ны́не, в Вы́шних Тро́ице предстоя́,/ нам, приходя́щим с ве́рою к ра́це моще́й твои́х,/ исцеле́ние подае́ши, твое́ успе́ние че́стно сла́вящим,/ и мо́лиши Христа́ Бо́га спасти́ся душа́м на́шим.

Ин тропа́рь, глас 8:

Го́рняя му́дрствуя,/ свя́то жи́тельствуя и сла́вы ми́ра отбега́я,/ юро́дство Христа́ ра́ди избра́л еси́, блаже́нне Нико́лае,/ и ны́не, в Вы́шних Тро́ице предстоя́,/ нам, честну́ю па́мять твою́ сла́вящим/ и с ве́рою к ра́це моще́й твои́х приходя́щим,/ исцеле́ние подае́ши/ и мо́лиши Христа́ Бо́га спасти́ся душа́м на́шим.

Кано́н, глас 4.

Пе́снь 1.

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Припев: Блаже́нне о́тче Нико́лае, моли́ Бо́га о нас.

Отве́рзи мои́ устне́, подви́гни мой язык/ и испра́ви мой смысл, вся умудря́яй, Бо́же,/ да похвалю́ уго́дника Твоего́ Никола́я,/ юро́да бы́вшаго на земли́ Тебе́ ра́ди.

Припев: Блаже́нне о́тче Нико́лае, моли́ Бо́га о нас.

Нико́лае блаже́нне, ты измла́да Христа́ возлюби́л еси́/ и к Нему́ единоду́шно возжеле́л еси́;/ ка́ко же тя по достоя́нию похва́лим,/ на диа́вола вооружи́вшася и сего́ ко́зни победи́вша си́лою Христо́вою?

Сла́ва Отцу́ и Сы́ну и Свято́му Ду́ху:

Юро́д яви́лся еси́ изволе́нием, о́тче,/ и о́ному ди́вному Андре́ю после́довал еси́,/ и я́коже той ви́де духо́вныма очи́ма Богоро́дицу, на возду́се моля́щуюся,/ ты же ны́не зри́ши Святу́ю Тро́ицу,/ моля́ся непреста́нно о душа́х на́ших.

И ны́не и при́сно и во ве́ки веко́в. Ами́нь.

Богоро́дичен: Красну́, и избра́нную, и всечестну́ю/ разуме́в Тя, Сын Бо́жий, Пренепоро́чная, Сын Твой бысть,/ сы́ны сотвори́ благода́ти чту́щия Тя.

Пе́снь 3.

Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Припев: Блаже́нне о́тче Нико́лае, моли́ Бо́га о нас.

С Фео́дором блаже́нным, юро́дствуя, враждова́л еси́,/ показу́я новгоро́дцем нече́стие и вразумля́я их./ Ны́не же с ним лику́еши в Ца́рствии Небе́снем.

Припев: Блаже́нне о́тче Нико́лае, моли́ Бо́га о нас.

Доброде́тели твоя́, Богому́дре Нико́лае, уясни́ша ве́рных сердца́,/ всегда́ бо явля́л еси́ смире́ние, и терпе́ние, и ко всем кро́тость и беззло́бие,/ и ны́не, неувяда́емым венце́м венча́яся от руки́ Вседержи́теля Бо́га,/ моли́ спасти́ся душа́м на́шим.

Сла́ва Отцу́ и Сы́ну и Свято́му Ду́ху:

Христа́ послу́шал еси́,/ повеле́вшаго тебе́ юро́ду бы́ти и Ца́рство Небе́сное обеща́вша;/ Тому́ после́довав, неизрече́нная блага́я Его́ восприя́л еси́, Нико́лае досточу́дне.

И ны́не и при́сно и во ве́ки веко́в. Ами́нь.

Богоро́дичен: Избавля́ющаго челове́ки от преслуша́ния и лю́таго паде́ния,/ и́же всем благи́м Вино́внаго,/ Чи́стая и Всенепоро́чная, родила́ еси́.

Седа́лен, глас 5:

Согла́сием Боже́ственным озаря́емь,/ в пути́, веду́щия к жи́зни, Боже́ственным сия́нием ходи́в ве́рно,/ вра́жиих отбе́г прило́г,/ сын све́та и дне яви́лся еси́, Нико́лае Богоблаже́нне.

Сла́ва: И ны́не, Богоро́дичен: Недомы́сленно и непостижи́мо есть, Влады́чице Богоблагода́тная,/ соде́янное на Тебе́ стра́шное Бо́жие та́инство,/ и́бо, Необъе́млемаго заче́нши, родила́ еси́,/ пло́тию обложе́на от чи́стых крове́й Твои́х./ Его́же всегда́, Чи́стая, я́ко Сы́на Своего́, моли́ спасти́ся душа́м на́шим.

Пе́снь 4.

Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Припев: Блаже́нне о́тче Нико́лае, моли́ Бо́га о нас.

Зимо́ю томи́м, свя́те, небре́гл еси́ о те́ле пе́рстнем,/ и ны́не наслажда́ешися ра́йския добро́ты,/ и нам проси́ оставле́ние, озло́бленным прило́ги чужда́го,/ да тебе́ ублажа́ем, о́тче Богому́дре.

Припев: Блаже́нне о́тче Нико́лае, моли́ Бо́га о нас.

Я́коже тве́рдый адама́нт душе́ю показа́лся еси́,/ непоколеби́м вра́жиими прило́ги, о́тче,/ и нам тве́рдое забра́ло бу́ди, блаже́нне,/ моли́твами твои́ми от нахожде́ний проти́вных.

Сла́ва Отцу́ и Сы́ну и Свято́му Ду́ху:

От виде́ния ра́зумов уве́рившагося Никола́я похва́лим, ве́рнии,/ на земли́ бы́вша юро́да Христа́ ра́ди,/ на Небесе́х же ны́не прему́дра духо́вною благода́тию,/ со А́нгелы предстоя́ща всех Бо́гу.

И ны́не и при́сно и во ве́ки веко́в. Ами́нь.

Богоро́дичен: Седя́й на Престо́ле превознесе́не херуви́мстем,/ я́ко престо́л Тя име́,/ на руку́ Твое́ю почи́в, Мари́е Богоневе́сто,/ Препросла́вленный Бог наш.

Пе́снь 5

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Припев: Блаже́нне о́тче Нико́лае, моли́ Бо́га о нас.

Удивле́ние бысть всем ви́дящим Нико́лино житие́:/ на сме́тищи лега́ние, и посреде́ гра́да обнаже́ние, и ло́жная вражда́ со Фео́дором,/ но сия́ вся бысть ему́ пути́ правле́ние в Небе́сное Ца́рствие.

Припев: Блаже́нне о́тче Нико́лае, моли́ Бо́га о нас.

Удиви́шася вси, ви́дящии терпе́ние твое́:/ му́ченицы бо во еди́но вре́мя страсть претерпе́ша,/ ты же вся дни живота́ твоего́ злы́я му́ки терпе́л еси́,/ в Небе́сное Ца́рство жела́я всели́тися,/ е́же получи́в ны́не, ра́дуешися безконе́чною ра́достию.

Сла́ва Отцу́ и Сы́ну и Свято́му Ду́ху:

Сокрове́нная бы́вша тебе́ открове́на/ и вся Безпло́тныя, а́ки плотски́я, ви́дел еси́:/ ничто́же бо земны́х возлюби́л еси́./ Те́мже и Небе́сная врата́ отверзо́шася тебе́,/ в неизглаго́ланную ра́дость Го́спода твоего́, блаже́нне, вшел еси́.

И ны́не и при́сно и во ве́ки веко́в. Ами́нь.

Богоро́дичен: Тече́ние преста́ тле́нное,/ Де́ва бо роди́ Бо́га Сло́ва нетле́нно,/ вы́ше естества́ и сло́ва, Де́вою пребы́вши.

Пе́снь 6.

Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Припев: Блаже́нне о́тче Нико́лае, моли́ Бо́га о нас.

Апо́стола Па́вла испо́лнися глас на тебе́, о́тче,/ сло́во Кре́стное погиба́ющим у́бо юро́дство вмени́ся,/ тебе́ же, спаса́ющемуся, си́ла Бо́жия бысть, Нико́лае всехва́льне.

Припев: Блаже́нне о́тче Нико́лае, моли́ Бо́га о нас.

Христо́в глас испо́лнися на тебе́, рече́нный:/ блаже́ни ни́щии ду́хом, я́ко тех есть Ца́рство Небе́сное./ Ты бо обнища́л еси́ ду́хом/ и Ца́рство Небе́сное восприя́л еси́.

Сла́ва Отцу́ и Сы́ну и Свято́му Ду́ху:

Ум свой весь к Бо́гу простира́я непреста́нными поуче́нии,/ плотску́ю любо́вь не пощади́л еси́,/ благи́х себе́ хода́тайствуя, Нико́лае, присвое́ние.

И ны́не и при́сно и во ве́ки веко́в. Ами́нь.

Богоро́дичен: Усты́ и се́рдцем, Пречи́стая, Тя Богоро́дицу пропове́дуем,/ Тобо́ю бо Бо́гови примири́хомся,/ отринове́ннии пе́рвее преступле́нием пра́отца.

Конда́к, гла́с 4:

Я́ко Андре́я блаже́ннаго учени́к и насле́дник был еси́,/ того́ же стопа́м после́дуя, юро́диве Нико́лае Коча́нов,/ и па́ки от мирски́я ча́ди107 уничиже́ние и пха́ние прие́мля,/ о и́хже согреше́ниих Христу́ Бо́гу моля́ся./ По честне́м же твое́м успе́нии Вели́кий Но́вград и́мать мо́щи твоя́ в себе́,/ я́ко неистощи́мое сокро́вище,/ подае́ши бо исцеле́ние/ ве́рою к ра́це моще́й твои́х приходя́щим/ и успе́ние твое́ че́стно сла́вящим.

Икос:

И́же юро́дство прии́м Христа́ ра́ди,/ безсме́ртную жизнь пресла́вно насле́довал еси́,/ с пло́тию бо на земли́ безпло́тных житие́ проше́д,/ был еси́ страстьми́ неприя́тен./ Те́мже тя хва́лим, о́тче:/ ра́дуйся, све́тлая юро́дивым сла́во;/ ра́дуйся, я́сный целому́дрия сто́лпе./ Ра́дуйся, мно́гое терпе́ние я́ве показа́вый;/ ра́дуйся, прему́драго ра́зума явле́ние./ Ра́дуйся, пра́вило пра́вде изве́стное;/ ра́дуйся, сло́вом соверши́вшу ти и дея́нием стремле́ние./ Ра́дуйся, у́ме, наслажда́яся мы́слей неизрече́нных;/ ра́дуйся, и́же весь Но́вград, блаже́нне, благоче́стно удиви́л еси́./ Ра́дуйся, и́мже вся́ка страсть умертви́ся;/ ра́дуйся, исто́чниче животочи́вых вод./ Ра́дуйся, помо́щниче и спаси́телю и́же ве́рно вопию́щим ти;/ ра́дуйся, и́же к тебе́ прибега́ющим те́плый засту́пниче, преблаже́нне Нико́лае,/ и ве́рою к ра́це моще́й твои́х приходя́щим,/ и успе́ние твое́ че́стно сла́вящим.

Пе́снь 7.

Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Припев: Блаже́нне о́тче Нико́лае, моли́ Бо́га о нас.

Ничто́же изво́лив люби́ти на земли́ па́че Зижди́теля,/ но посреде́ хра́мов скита́яся, блаже́нне Нико́лае, ра́довался еси́, поя́:/ препе́тый отце́в Госпо́дь и Бог, благослове́н еси́.

Припев: Блаже́нне о́тче Нико́лае, моли́ Бо́га о нас.

Не пощаде́ пло́ти своея́,/ но предаде́ ю́ на по́двиги, и труды́, и ну́ждное пребыва́ние./ Тем ко́зни де́монския му́жески попра́, блаже́нне Нико́лае, поя́:/ препе́тый отце́в Госпо́дь и Бог, благослове́н еси́.

Сла́ва Отцу́ и Сы́ну и Свято́му Ду́ху:

Одержи́м христоподо́бною, о́тче, Боже́ственною любо́вию, преблаже́нне Нико́лае,/ вся бо я́ко уме́ты вмени́л еси́, вопия́:/ препе́тый отце́в Госпо́дь и Бог, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ Благослове́нна Ты в жена́х еси́, Всенепоро́чная Влады́чице.

Пе́снь 8.

Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Припев: Блаже́нне о́тче Нико́лае, моли́ Бо́га о нас.

Всесве́тлая еси́ звезда́, су́щия в ти́не страсте́й приводя́ к животу́ нетле́ющему,/ твори́ши бо нечи́стыя целому́дренно жи́ти/ и отго́ниши ду́хи лука́выя и неду́ги лю́тыя, вопия́:/ благослови́те, вся дела́ Госпо́дня, Го́спода.

Припев: Блаже́нне о́тче Нико́лае, моли́ Бо́га о нас.

Сый цел умо́м, в скро́ве му́дрых чуде́с, преподо́бне,/ мно́гия улови́л еси́ юро́дствовати Го́спода ра́ди,/ ве́дый наруга́нным бы́ти, вопия́ чисте́йшею душе́ю:/ благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Соверше́н еди́н, И́же Свои́х по достоя́нию сла́вяй, Госпо́дь/ износи́ма, преподо́бне, и гро́бу посыла́ема/ а́нгельскими светлослове́нии почита́ет, вопию́щаго:/ благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Избавля́яй нас, возсия́ из Тебе́ Госпо́дь, Де́во Чи́стая./ Его́же моли́, Влады́чице,/ просвети́ти пою́щия Тя/ и обстоя́ния нас изба́вити, вопию́щих:/ благослови́те, вся дела́ Госпо́дня, Го́спода.

Песнь 9

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.

Припев: Блаже́нне о́тче Нико́лае, моли́ Бо́га о нас.

По Христо́ву словеси́ за бию́щия тя моли́лся еси́, свя́те,/ те́мже Небе́сная врата́ отве́рста/ и ду́ши пра́ведных, во о́бразе ла́стовиц лета́ющия, ви́дел еси́,/ с ни́миже ны́не водворя́ешися, Нико́лае блаже́нне.

Припев: Блаже́нне о́тче Нико́лае, моли́ Бо́га о нас.

Христа́ Бо́га и́стинно возлюби́в, тебе́ сама́го отве́рглся еси́/ и Тому́ после́довал еси́, я́коже Он рече́:/ любя́й ду́шу свою́ спасти́, погуби́т ю́./ Те́мже ду́шу твою́ в Жизнь ве́чную соблю́л еси́, достохва́льне свя́те Нико́лае.

Сла́ва Отцу́ и Сы́ну и Свято́му Ду́ху:

Вели́кая и пресла́вная ны́не сбы́шася тебе́ в Небе́снем Ца́рствии,/ а́ще и юро́д был еси́ ми́ру,/ но Христу́ мудр яви́лся еси́, достохва́льне;/ призира́й с Небе́снаго кру́га на ны, почита́ющия па́мять твою́.

И ны́не и при́сно и во ве́ки веко́в. Ами́нь.

Богоро́дичен: Спаси́ мя, всех ро́ждшая Изба́вителя и Благода́теля,/ разори́ души́ моея́ о́блаки,/ све́ту о́блаче, Свята́я Влады́чице,/ и си́льна соде́лай на стра́сти, борю́щия мя.

Свети́лен.

И́же в после́дняя времена́ возсия́л еси́ те́мным, сый светоно́сен,/ мра́чныя и стра́нныя, о́тче Нико́лае, твои́х доброде́телей све́тлостию просвети́л еси́,/ но не преста́й моля́ся о ми́ре Го́сподеви.

Сла́ва, и ны́не:

Дании́л преднапису́ет Тя несеко́мую го́ру,/ из нея́же честны́й Ка́мень отсече́ся,/ истнева́я и́дольския хра́мы, Богороди́тельнице Мари́е.

Молитва

О, святы́й уго́дниче Бо́жий блаже́нне о́тче Нико́лае, по́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал еси́ Госпо́дь всем лю́бящим Его́; те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.