9 августа.

Канон равноапостольным седмочисленным славяноболгарским просветителям Мефодию и Кириллу, Клименту и Науму, Савве, Горазду и Ангеларию

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Венцы́ хвале́ния увенча́им седмочи́сленники сла́вныя, / Кири́лла со Мефо́дием, Кли́мента, Нау́ма со Са́ввою / и Гора́зда со Ангела́рием, / я́ко свети́ла возсия́вшия / и Триеди́наго Бо́га на́м благовести́вшия, / столпы́ незы́блемыя Це́ркве Бо́лгарския / и богодухнове́нныя побо́рники сло́ва на́шего, / бесо́вское и́долом поклоне́ние упраздни́вшия / и Христу́ Бо́гу моля́щияся, / Це́рковь на́шу утверди́ти / и душа́м на́шим дарова́ти / ми́р и ве́лию ми́лость.

Кано́н. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припе́в: Святи́и седмочи́сленницы, моли́те Бо́га о на́с.

Свети́ла боже́ственная мы́сленныя тве́рди, седмочи́сленницы пресве́тлии, богоразу́мия све́том озари́те омраче́нный мо́й у́м, я́ко да пе́сни ва́м воспою́, ра́дуяся.

Припе́в: Святи́и седмочи́сленницы, моли́те Бо́га о на́с.

Еже Твои́м стопа́м после́довати седмочи́сленницы вожделе́вше, на́с ра́ди кре́ст и сме́рть претерпе́вшаго Христа́, Твоего́ ра́ди раче́ния пло́ть умертви́ша со страстьми́ и похотьми́.

Сла́ва Отцу́ и Сы́ну и Свято́му Ду́ху:

До́ждь седмода́рнаго Уте́шителева благоволе́ния в вы́шних седя́й Оте́ц ва́м свы́ше ороси́, я́коже Иса́ия глаго́лаше дре́вле, воспочива́ющу в ва́с Христу́, седмочи́сленницы блаже́ннии.

И ны́не и при́сно и во ве́ки веко́в. Ами́нь.

Богоро́дичен: Ма́тере кроме́ пре́жде ве́к Ражда́ющагося зача́ла еси́, Пречи́стая, и родила́ еси́ без Отца́ кроме́ преложе́ния или́ смеше́ния, и ста́ла еси́ све́тло укра́шена, я́ко Неве́ста Непоро́чная Вседержи́телю.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припе́в: Святи́и седмочи́сленницы, моли́те Бо́га о на́с.

Огненная кре́пость ересе́й и триязы́чества угасе́, бо́лгарскую бо всю́ зе́млю погрузи́ша в ба́ню креще́ния седмочи́сленницы святи́и.

Припе́в: Святи́и седмочи́сленницы, моли́те Бо́га о на́с.

Чинонача́лие церко́вное почита́юще, седмочи́сленницы в Ри́м достиго́ша, кни́ги слове́нския утверди́ша и про́поведию зако́на Бо́жия ро́ды бо́лгарския к Правосла́вней ве́ре приведо́ша.

Сла́ва Отцу́ и Сы́ну и Свято́му Ду́ху:

Истинно благохва́лим равноапо́столы Твоя́, Христе́: Мефо́дия и Кири́лла, Кли́мента и Нау́ма, Са́вву, Гора́зда и Ангела́рия, Ангелов совсе́льники.

И ны́не и при́сно и во ве́ки веко́в. Ами́нь.

Богоро́дичен: Свя́то во святы́х Почива́ющаго, безсме́ртия Хода́тая, родила́ еси́, Богоро́дице, я́коже ви́дена была́ еси́ ни́ва неора́нная, все́м причаща́ющимся кла́с живо́тный прозя́бшая.

Седа́лен седмочи́сленников, гла́с 4.

Да пра́зднует дне́сь / Це́рковь Бо́лгарская / честно́е торжество́ / седмочи́сленников честны́х и равноапо́стольных, / и́бо ти́и утверди́ша Болга́рию / боже́ственными свои́ми догма́ты.

Слава И ны́не, богоро́дичен, гла́с и подо́бен то́йже:

Предста́тельство необори́мое скорбя́щих / и те́плое заступле́ние на Тя́ упова́ющих, / от бе́д мя́ изба́ви, / Ты́ бо еси́ все́х / покро́в и по́мощь.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припе́в: Святи́и седмочи́сленницы, моли́те Бо́га о на́с.

Лю́дем слове́нским в Тро́ице пропове́дасте Бо́га, Испусти́теля Ду́ха и Роди́теля Сы́на Соверше́ннаго, рече́нием после́дующе проро́ческим и стопа́м апо́стольским, богому́дрии.

Сла́ва Отцу́ и Сы́ну и Свято́му Ду́ху:

Ева́нгельски сла́ву Бо́жию ви́дети жела́юще, чистоту́ се́рдца соблюдо́сте, та́же ско́рби претерпе́сте мно́гия, гонения же и ра́ны мужему́дренно и поноше́ния зла́я за ве́ру Христо́ву, укрепля́еми Ду́хом.

И ны́не и при́сно и во ве́ки веко́в. Ами́нь.

Богоро́дичен: Непреста́нно о на́с Бо́гу предстоя́щую Мари́ю Пречи́стую, прииди́те, вси́ ве́рнии, пе́сньми благопохва́лим, я́ко без сравне́ния превы́шши серафи́м и челове́к су́щи Хода́таица Непосты́дная.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припе́в: Святи́и седмочи́сленницы, моли́те Бо́га о на́с.

Немо́лчное веща́ние ва́ше во всю́ зе́млю протече́, седмочи́сленницы, и глаго́ли богому́дрии про́поведи ва́шея в концы́ се́вера, и́миже и спасо́шася ве́ровавшии в Тро́ицу Несозда́нную.

Припе́в: Святи́и седмочи́сленницы, моли́те Бо́га о на́с.

Иже Авраа́му обеща́ да́ти его́ в благослове́ние язы́ком, То́йже Госпо́дь ро́ду бо́лгарскому ва́с даде́ во благослове́ние; те́мже возме́здие прия́сте и в ра́дость внидо́сте Го́спода ва́шего.

Сла́ва Отцу́ и Сы́ну и Свято́му Ду́ху:

К бо́лгаром по́слани бы́вше, возвести́сте и́м Тро́ицу Несозда́нную Божества́, Отца́ и Сы́на и Ду́ха Свята́го, е́реси же вся́ всеконе́чно упраздни́сте и волко́в и́х дале́че прогна́сте.

И ны́не и при́сно и во ве́ки веко́в. Ами́нь.

Богоро́дичен: Иже в вы́шних влады́чествующаго Богочелове́ка, Сы́на Твоего́, Пречи́стая, на земли́ воспева́ет естество́ челове́ческое, свы́ше же арха́нгели и Ангели сла́вят рождество́ Твое́ неизрече́нное.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припе́в: Святи́и седмочи́сленницы, моли́те Бо́га о на́с.

Гобзу́ющая благода́ть святы́х седмочи́сленников да кропи́т свы́ше дне́сь чудеса́, я́ко да насы́тятся всего́ ми́ра собра́ния, воспева́ющая любо́вию си́х пе́сньми.

Припе́в: Святи́и седмочи́сленницы, моли́те Бо́га о на́с.

Равноапо́стольски вмени́ли есте́ вся́ мимотеку́щая я́ко уме́ты, ли́че седмочи́сленников, и возлюби́ли есте́ нетле́нная Боже́ственная; ве́чнаго же Христа́ просла́вивше, ве́чную сла́ву улучи́ли есте́.

Сла́ва Отцу́ и Сы́ну и Свято́му Ду́ху:

Изве́стно позна́в Госпо́дь по́ты ва́ша за ве́ру, богому́дрии, перворожде́нных селе́ние ны́не дарова́ ва́м, просла́вленным.

И ны́не и при́сно и во ве́ки веко́в. Ами́нь.

Богоро́дичен: Греха́ идолобе́сия спасе́ ро́д челове́ческий Бо́жие Сло́во, Богоро́дице, и́же на Тя́ с высоты́ прини́че рождество́м Свои́м, Всенепоро́чная.

Конда́к, гла́с 4.

Непобеди́ми в по́стничестве я́вльшеся, / ко́зни неви́димых враго́в Боже́ственною си́лою победи́сте; / мно́жества же научи́вше / непросвеще́нных болга́р / Правосла́вней ве́ре, / восприя́сте венцы́. / О на́с моли́теся Христу́, седмочи́сленницы, / да́ти прегреше́ний оставле́ние.

Икос:

В по́стничестве возсия́вшия благоче́стия пропове́дники, и́стинныя столпы́ и основа́ния Це́ркве, трубы́ боже́ственныя Христо́вых догма́т, и́же е́реси огне́м Ду́ха попали́ша и Правосла́вную ве́ру я́сно возвести́ша, богоно́сныя седмочи́сленники, прииди́те, ве́рнии, благопохва́лим, си́и бо изложе́нием писме́н бо́лгарския ро́ды от ди́вия ма́слины в до́брую присади́вше, все́х к непоро́чней ве́ре боже́ственным креще́нием приведо́ша. Те́мже к ни́м возопии́м: отцы́ боже́ственнейшии и равноапо́стольнии, о на́с моли́теся Христу́, седмочи́сленницы, да́ти прегреше́ний оставле́ние.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припе́в: Святи́и седмочи́сленницы, моли́те Бо́га о на́с.

Оте́чески вити́йствующе та́инства Ду́ха язы́ку слове́нскому седмочи́сленницы, и в темни́цу всажде́ни бы́вше, и от у́з изба́вившеся, в ра́дости поя́ху: препе́тый отце́в Госпо́дь и Бо́г, благослове́н еси́.

Припе́в: Святи́и седмочи́сленницы, моли́те Бо́га о на́с.

Ра́зума вы́шняго уче́ньми цели́тели челове́ком яви́стеся на земли́, ны́не же, зерца́лом разре́шшимся, Всецарю́ пое́те непреста́нно: препе́тый отце́в Госпо́дь и Бо́г, благослове́н еси́.

Сла́ва Отцу́ и Сы́ну и Свято́му Ду́ху:

Иско́нный Трисо́лнечный Све́те Несозда́нный, Тро́ице Пребоже́ственная, Отче, Сы́не и Боже́ственный Ду́ше, уще́дри ны́ моле́нии седмочи́сленников, пою́щих: препе́тый отце́в Госпо́дь и Бо́г, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: И селе́ние одушевле́нное, Неве́сто Всенепоро́чная, и пала́та кра́сная, и престо́л златозра́чный показа́лася еси́ Зижди́теля, Ему́же вопие́м: препе́тый отце́в Госпо́дь и Бо́г, благослове́н еси́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припе́в: Святи́и седмочи́сленницы, моли́те Бо́га о на́с.

Вся́каго озлобле́ния избавля́я и ве́чнаго муче́ния моли́твами седмочи́сленников, уще́дри на́с, Безнача́льная Тро́ице, и Еде́ма сподо́би пою́щия: Го́спода по́йте, дела́, и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Озари́ ва́с Боже́ственными отраже́нии равносла́вный све́т Безвино́внаго, и нра́вы апо́стольскими снабде́, и ва́ми вселе́нную воздви́же пе́ти: Го́спода по́йте, дела́, и превозноси́те Его́ во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Спасе́ние челове́ком Тобо́ю ны́не вои́стинну прибли́жися, Чи́стая. Изба́ви у́бо мя́ согреше́ний, под кро́в Тво́й прибега́ющаго и те́пле пою́щаго: Го́спода по́йте, дела́, и превозноси́те Его́ во вся́ ве́ки.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припе́в: Святи́и седмочи́сленницы, моли́те Бо́га о на́с.

Прия́телища Ду́ха, Сло́ва же пропове́дницы и Отца́ зерца́ла, седмочи́сленницы сла́внии, боже́ственною ра́достию ны́не со Ангелы весели́теся, вы́шнему престо́лу предстоя́ще.

Сла́ва Отцу́ и Сы́ну и Свято́му Ду́ху:

Отцы́ седмочи́сленнии, Мефо́дие и Кири́лле, Кли́менте и Нау́ме, Са́вво, Гора́зде и Ангела́рие, непреста́нно о на́с моли́теся ко Го́споду да́ти на́м мно́гих согреше́ний проще́ние и Ца́рствия го́рняго насле́дие.

И ны́не и при́сно и во ве́ки веко́в. Ами́нь.

Богоро́дичен: Юнице Чи́стая, Ма́ти Бо́жия, разреши́ ны́ от у́з страсте́й, утоли́ грехо́в смуще́ние, отжени́ собла́зны лука́ваго, покори́ благочести́вым порожде́ния нечести́вая моли́твами Твои́ми.

Молитва

К вам, о святи́и седмочи́сленнии: Мефо́дие и Кири́лле, Кли́менте и Нау́ме, Са́вво, Гора́зде и Ангела́рие, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.