8 августа.

Канон священномученику Ермолаю и иже с ни́м

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Кано́н, его́же краегране́сие: Пе́сньми почита́ю Ермола́я труды́. Ио́сиф. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Священному́чениче Ермола́е, моли́ Бо́га о нас.

Пе́сньми светоно́сную, и прехва́льную, и всесла́вную восхва́лим па́мять Ермола́я, Христа́ велича́юще.

Припев: Священному́чениче Ермола́е, моли́ Бо́га о нас.

Вели́ка твоя́ сла́ва бы́сть, Ермола́е всехва́льне, и́бо вели́каго Бо́га яви́лся еси́ уго́дник превели́к.

Сла́ва Отцу́ и Сы́ну и Свято́му Ду́ху:

Зако́нно проше́д, сла́вне, по́двиг, попра́л еси́ беззако́ннующих на́глость, всесла́вный му́чениче Ермола́е.

И ны́не и при́сно и во ве́ки веко́в. Ами́нь.

Богоро́дичен: Ми́лостива ми́, Де́во, Христа́ сотвори́, Всенепоро́чная, в де́нь Суда́ стра́шнаго осужде́ния изыма́ющи.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Священному́чениче Ермола́е, моли́ Бо́га о нас.

Си́лою укрепля́емь Вседе́теля, му́дре, духо́вною, си́льнаго, му́чениче, в зло́бе кре́пость низложи́л еси́.

Припев: Священному́чениче Ермола́е, моли́ Бо́га о нас.

Зна́емь бы́л еси́ Вседержи́телю, свя́те, всезна́емы сло́вом твои́м боже́ственным в Не́м соде́лав.

Сла́ва Отцу́ и Сы́ну и Свято́му Ду́ху:

Позна́, поуча́емь от твоего́, му́дре, ду́ха, Творца́ Пантелеи́мон и зако́нно пострада́.

И ны́не и при́сно и во ве́ки веко́в. Ами́нь.

Богоро́дичен: Изба́ви мя́, Всенепоро́чная, грехо́в лю́тыя бу́ри и по́мыслов, находя́щих неща́дно се́рдцу моему́.

Седа́лен, гла́с 8.

Свяще́нно житие́ твое́ соверши́в, свяще́нник показа́лся еси́ Изба́вителя, просвеща́я ве́рою к тебе́ приступа́ющия всегда́, и при кончи́не, блаже́нне, боже́ственней облиста́л еси́ муче́ния сия́нием, и ми́р озари́л еси́. Те́мже, светоно́сную и святу́ю твою́ па́мять соверша́юще, пое́м тя́ и ве́рно ублажа́ем, страстоте́рпче Ермола́е. Моли́ Христа́ Бо́га, грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богоро́дичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Священному́чениче Ермола́е, моли́ Бо́га о нас.

Ше́ствия твоя́, Ду́хом Боже́ственным иду́ще, запя́ша ше́ствия лука́ваго и пу́ть пра́в мно́гим яви́шася.

Припев: Священному́чениче Ермола́е, моли́ Бо́га о нас.

Свяще́нник свяще́нен, му́ченик и́стинен бы́л еси́, достосла́вне Ермола́е, сего́ ра́ди тя́ вси́ восхваля́ем.

Сла́ва Отцу́ и Сы́ну и Свято́му Ду́ху:

Тве́рдым умо́м беззако́ннующему сопроти́влься, муче́ния вене́ц прия́л еси́, му́жески пострада́в, свяще́нне.

И ны́не и при́сно и во ве́ки веко́в. Ами́нь.

Богоро́дичен: Якоже престо́л огнеобра́зен но́сиши Влады́ку, Богоблагода́тная, Его́же моли́ спасти́ мя, грехо́вною волно́ю обурева́ема.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Священному́чениче Ермола́е, моли́ Бо́га о нас.

Иже в нощи́ ле́стней одержи́мыя к све́ту наста́вил еси́ и мзду́ прия́л еси́, е́же сконча́тися кро́вию.

Припев: Священному́чениче Ермола́е, моли́ Бо́га о нас.

Христо́вы ору́жницы, Ерми́пп же и боже́ственный Ермола́й вку́пе с Ермокра́том, священносло́вии да просла́вятся.

Сла́ва Отцу́ и Сы́ну и Свято́му Ду́ху:

За честну́ю Тро́ицу трие́ вку́пе пострада́вше, му́ченицы со тма́ми Ангел ны́не на небесе́х веселя́тся.

И ны́не и при́сно и во ве́ки веко́в. Ами́нь.

Богоро́дичен: Тя́ предста́тельницу вси́, прибе́жище и тве́рдое заступле́ние иму́ще, Де́во, избавля́емся Тобо́ю вся́кия печа́ли.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Священному́чениче Ермола́е, моли́ Бо́га о нас.

Ермола́й, до́блий ору́жник, Ермокра́т и Ерми́пп вку́пе еди́н тве́рд пока́заша нра́в, Еди́наго Бо́га над все́ми пропове́давше, и, уме́рше за Христа́, небе́сныя венцы́ прия́ша.

Припев: Священному́чениче Ермола́е, моли́ Бо́га о нас.

Кропле́нии излия́нных крове́й себе́ очервлени́вше багряни́цу страда́льцы и све́тло оде́явшеся, Царю́ веко́в предстоя́т, моля́щеся о на́с со все́ми вы́шними си́лами.

Сла́ва Отцу́ и Сы́ну и Свято́му Ду́ху:

Науча́ется и́же в Ду́се Боже́ственнем тобо́ю Пантелеи́мон вели́кий ве́ре пра́вей и, пострада́в зако́нно, муче́ния тебе́ хода́тай бы́сть, Ермола́е, с ни́мже Христа́ Бо́га о все́х умоли́.

И ны́не и при́сно и во ве́ки веко́в. Ами́нь.

Богоро́дичен: Бу́ря мя́ безме́рных согреше́ний смуща́ет и во глубину́ отсыла́ет вы́ну отча́яния, Де́во, но, предвари́вши, ру́ку ми́ простри́ и да́ждь ми́ к ти́хим покая́ния приста́нищем дости́гнути.

Конда́к, гла́с 4.

Яко святи́тель благоче́стно пожи́в и священномуче́ния вене́ц прия́л еси́. Идольския же́ртвы погаси́в, до́брый па́стырь Христо́ва ста́да бы́л еси́, прему́дре, и Пантелеи́мону и́стинный учи́тель. Сего́ ра́ди почита́ем тя́ пе́сньми, вопию́ще: от бе́д изба́ви на́с при́сно моли́твами твои́ми, Ермола́е, о́тче на́ш.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Священному́чениче Ермола́е, моли́ Бо́га о нас.

Просвети́вся незаходи́мым просвеще́нием боже́ственнаго ра́зума, преподо́бне, к све́ту богоразу́мия мно́жество спаса́емых наста́вил еси́, вопи́ти: оте́ц на́ших Бо́же, благослове́н еси́.

Припев: Священному́чениче Ермола́е, моли́ Бо́га о нас.

Бра́тски сму́дрствующе, Ермокра́т вели́кий и боже́ственный Ерми́пп, Ермола́е всеблаже́нне, с тобо́ю муче́ния ча́шу пию́т, пою́ще: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

По Боже́ственней Тро́ице разжига́еми любо́вию, му́ченицы сла́внии, о́гнь безбо́жия кро́вными кропле́ньми угаси́сте, пою́ще: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Пресвята́я Де́во, Бо́га плотоно́сна поро́ждшая, от вся́каго греха́ и ско́рби вопию́щия лю́ди Твоя́ спаса́й: оте́ц на́ших Бо́же, благослове́н еси́.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Священному́чениче Ермола́е, моли́ Бо́га о нас.

Свяще́нный Ермола́й, свяще́нно просвеща́емь, за милосе́рдие на́с ра́ди, я́ко овча́ти, Закла́вшемуся безкро́вну же́ртву принесе́, и, закла́ся Его́ ра́ди во́лею, благоприя́тна же́ртва принесе́ся, зовы́й: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Священному́чениче Ермола́е, моли́ Бо́га о нас.

Свяще́нный Ермола́й, превели́кий Ерми́пп и Ермокра́т, тве́рдии адама́нти, пло́ти не пощаде́ша, ни истука́нным пожро́ша, же́ртвы же прия́тны себе́ Влады́це принесо́ша, вопию́ще: свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

От Христа́ укрепля́емь, богому́дрый Ермола́й сокрове́нное та́инство от родо́в ве́рным откры́, сокрове́нным от стра́ха враго́в, и, явле́нна себе́ сотво́рь, я́ве за все́х закла́вшагося Бо́га Сло́ва возвеща́ет, и умира́ет, и живе́т с му́ченики во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Тя́, кра́сную пала́ту и све́тлый сосу́д все́х Царя́, Пресвята́я Влады́чице, пое́м, моля́щеся, хра́мы ны́ покажи́ из Тебе́ рожде́нному и очи́стившему вся́кую зло́бу сопроти́вную, вопию́щия непреста́нно: лю́дие, превозноси́те Христа́ во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Священному́чениче Ермола́е, моли́ Бо́га о нас.

Ста́л еси́ проти́ву враго́м, Христа́ испове́дуя, пресла́вне, испове́давшаго до́брое испове́дание пред Пила́том, и, веде́н бы́в на заколе́ние, зе́млю у́бо освяти́л еси́ боже́ственною кро́вию, небеса́ же душе́ю уясни́л еси́.

Припев: Священному́чениче Ермола́е, моли́ Бо́га о нас.

Яви́шася трисве́тлыя свещи́, Боже́ственнаго Ду́ха огне́м вжига́еми, Ерми́пп сла́вный с Ермокра́том и Ермола́й, уясни́вше ве́рных ду́ши Боже́ственною благода́тию и отгоня́ще злоче́стия мглу́ многобо́жную.

Припев: Священному́чениче Ермола́е, моли́ Бо́га о нас.

Усты́ вси́ све́тло и ра́достною мы́слию воспое́м страстоте́рпцы Христо́вы, Боже́ственною сла́вою, я́коже ри́зою, оде́яны боголе́пно, и ны́не на небесе́х живу́щия, и чуде́с ре́ки источа́ющия.

Сла́ва Отцу́ и Сы́ну и Свято́му Ду́ху:

Со́лнце незаходи́мое, Христе́, Ермола́я свяще́нными мольба́ми, Пантелеи́мона и Ермокра́та и страда́вших с ни́ми не отри́ни от на́с, Сло́ве, ми́лости Твоея́, но, обы́чно на́с уще́дрив, от злы́х изба́ви.

И ны́не и при́сно и во ве́ки веко́в. Ами́нь.

Богоро́дичен: Пощади́ мя, Спа́се, рожде́йся и сохрани́в ро́ждшую Тя́ нетле́нну по рождестве́, егда́ ся́деши суди́ти вся́ческим, грехи́ презира́я и беззако́ния моя́, я́ко Безгре́шен, я́ко Ми́лостив Бо́г и Человеколю́бец.

Молитва:

О, преславный священномучениче Ермолае и скорый помощниче христианом в болезнех! Верую от всея души и помышления, яко дадеся тебе от Господа дар болящия врачевати и расслабленныя укрепляти. Сего ради к тебе, яко благодатному врачу болезней, аз немощный прибегаю и, твой досточтимый образ с благоговением лобызая, молюся: твоим предстательством у Царя Небеснаго испроси мне болящему исцеление от удручающия мя болезни, аще бо и недостоин есмь тебе, благостнейшаго отца и приснаго заступника моего, но ты, быв подражатель человеколюбия Божия, сотвори мя достойна твоего заступления чрез мое обращение от злых дел к благому житию, уврачуй обильно дарованною тебе благодатию язвы и струпы души и тела моего, даруй ми здравие и спасение и во всем благое поспешение, да тако, тихое и безмолвное житие пожив во всяком благочестии и чистоте, сподоблюся со всеми святыми славити Всесвятое имя Отца и Сына и Святаго Духа. Аминь.