7 августа.

Канон святым женам Олимпиаде и Евпраксие

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 2:

И́стинному жела́нию уневе́стившеся Христосла́внии,/ и вре́меннаго обру́чника отве́ргшеся совокупле́ния,/ и доброде́тельными по́двиги возра́стше,/ на высоту́ востеко́сте нетле́ния,/ красноду́шнии и многобога́тнии,/ столпи́ иноку́ющим жена́м и пра́вило./ Те́мже о нас моли́те непреста́нно,// и́же любо́вию ва́шу па́мять пра́зднующих.

Канон. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святи́и преподо́бныя жены, моли́те Бо́га о нас.

Плотско́ю не́мощию си́льнаго врага́ низложи́сте, и присво́истеся к Бо́гу, преподо́бныя жены́, моля́щеся си́лу все́м на́м пода́ти спаси́тельную.

Припев: Святи́и преподо́бныя жены, моли́те Бо́га о нас.

Уязви́стеся добро́тою Женихо́вою и во сле́д Его́ прилепи́стеся псало́мски, после́дующе живоно́сным стопа́м Его́, и сего́ ра́ди низложи́сте врага́ зми́я.

Сла́ва Отцу́ и Сы́ну и Свято́му Ду́ху:

Увяди́вше труды́ по́стническими теле́сныя добро́ты, украси́сте ва́ша ду́ши и со Христо́м Женихо́м в черто́ги све́тлыя внидо́сте, преподо́бныя.

И ны́не и при́сно и во ве́ки веко́в. Ами́нь.

Богоро́дичен: Неве́стник показа́ся светови́ден утро́ба Твоя́, Де́во, ми́лости ра́ди теле́сно из Тебе́ воплоти́вшагося Го́спода и вся́ческая богоразу́мия луча́ми просве́щшаго.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святи́и преподо́бныя жены, моли́те Бо́га о нас.

Презре́ла еси́ добро́ту теле́сную, пречестна́я, и мимогряду́щую сла́ву, я́ко со́н, вмени́ла еси́, во смире́нии же, Олимпиа́до, и поще́нии Бо́га взыска́ла еси́, богоблаже́нная.

Припев: Святи́и преподо́бныя жены, моли́те Бо́га о нас.

Младе́нствующи ле́ты, на́с ра́ди Младе́нца Сло́ва, на зе́млю, Евпракси́е, прише́дшаго, ве́рою возлюби́ла еси́ и Того́ о́бразу ду́шу связа́ла еси́, непрело́жна пребы́вши.

Сла́ва Отцу́ и Сы́ну и Свято́му Ду́ху:

Отверго́стеся ми́ра и пло́ти мудрова́ния, воздержа́нием же и труды́ стяжа́вше Христа́, Жениха́ Пречи́стаго, черто́г небе́сный, подаю́щаго ва́м боже́ственное наслажде́ние.

И ны́не и при́сно и во ве́ки веко́в. Ами́нь.

Богоро́дичен: Свяще́нных проро́к свяще́нныя трубы́ дре́вле Тя́ провозвести́ша, две́рь Све́та ро́ждшую и сви́ток одушевле́нный, на не́мже не рука́ми Сло́во написа́ся па́че сло́ва, Пречи́стая Де́во.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святи́и преподо́бныя жены, моли́те Бо́га о нас.

Странноприе́мница усе́рднейша была́ еси́, собо́р свяще́нных упокоева́ющи и Христа́ о се́м веселя́щи, за милосе́рдие стра́нна бы́вшаго.

Припев: Святи́и преподо́бныя жены, моли́те Бо́га о нас.

Добро́ту пречи́стую люби́маго ви́девши Жениха́ твоего́, Евпракси́е, увяди́ла еси́ пло́ти добро́ту воздержа́нием.

Сла́ва Отцу́ и Сы́ну и Свято́му Ду́ху:

Дрема́ние отри́нувше от душе́вных ве́ждей свяще́нныя жены́, успи́сте двиза́ния теле́сная воздержа́нием.

И ны́не и при́сно и во ве́ки веко́в. Ами́нь.

Богоро́дичен: Воплоти́вшагося Тебе́, Го́споди, от Пречи́стыя Де́вы преподо́бныя возлюби́вше, в воню́ мѵ́ра Твоего́ потеко́ша, Твое́ю уязви́вшеся Боже́ственною любо́вию.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святи́и преподо́бныя жены, моли́те Бо́га о нас.

От исто́чника напая́ема, вселе́нную всезлаты́ми уче́нии свяще́ннаго па́стыря напои́вшаго, кла́сы прозябла́ еси́ до́брыя де́тели, Олимпиа́до, пита́еши сердца́ на́с, чту́щих тя́.

Припев: Святи́и преподо́бныя жены, моли́те Бо́га о нас.

Блаже́нными наде́ждами твою́ сла́вную ду́шу укре́пльши и пи́щею невеще́ственною пита́ема, ума́ чистото́ю де́ньми мно́гими терпели́вно а́лчбу, Евпракси́е, претерпе́ла еси́, ра́дующися.

Сла́ва Отцу́ и Сы́ну и Свято́му Ду́ху:

Умертви́вшеся ми́рови, насле́довасте жи́знь безсме́ртную и черто́га Боже́ственнаго сподо́бистеся, богоблаже́нныя, свещи́ ва́ша по́стническим еле́ем неугаси́мы соблю́дше, всечестны́я.

И ны́не и при́сно и во ве́ки веко́в. Ами́нь.

Богоро́дичен: Бо́жие Бо́г Сло́во во утро́бу Неискусобра́чную во́лею всели́ся и Челове́к узре́н бы́сть, Иже Де́вою соблюды́й Тя́, Пречи́стая, Его́же жела́юще, отрокови́цы по́стнически Сему́ после́доваша житие́м све́тлым.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Святи́и преподо́бныя жены, моли́те Бо́га о нас.

Юна су́щи, Евпракси́я боле́зней усе́рдием, благочести́вым по́мыслом ве́тхаго запина́теля попира́ше в не́мощи же́нстей телесе́: утвержда́ше бо сию́ Христо́с, Иже в на́шу обо́лкся не́мощь.

Припев: Святи́и преподо́бныя жены, моли́те Бо́га о нас.

Воздержа́ние и смире́нное се́рдце, бде́ние с ми́лостынею, ра́зум, и ве́ру пра́ву, и соверше́нну любо́вь, Олимпиа́до, стяжа́вши, сла́вная, была́ еси́ хра́м Бо́жий и чуде́с исто́чник неоску́дный.

Сла́ва Отцу́ и Сы́ну и Свято́му Ду́ху:

Устрани́вше себе́ жите́йских сласте́й терпе́нием боле́зней по́стнических, на зе́млю Соше́дшаго на́с ра́ди и во́лею Стра́нствовавша, вы́, честны́я, сего́ ра́ди стяжа́сте на небесе́х, странноприи́мствовавша ва́с, досточу́дныя.

И ны́не и при́сно и во ве́ки веко́в. Ами́нь.

Богоро́дичен: Чистоты́ Тя́ и че́стна де́вства чи́стый сосу́д, Отрокови́це, Соде́тель обре́т, сло́вом в пречи́стое Твое́ чре́во всели́ся и всю́ вра́жию от челове́к зло́бу изгна́.

Седа́лен, гла́с 8.

В моли́твах та́йных бдя́ще и насла́ждшеся писа́ньми богодохнове́нными, Олимпиа́да и Евпракси́я сла́вная на ра́му Госпо́день взя́ша Кре́ст и, Сему́ после́дующе воздержа́тельно, всю́ ле́сть зми́я низложи́ша, зову́ще Христу́: Женише́ небе́сный, Ты́ бу́ди на́м утвержде́ние.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святи́и преподо́бныя жены, моли́те Бо́га о нас.

Сла́ву тле́ющую на нетле́нную премени́ша любо́вию, преподо́бныя, ея́же наслажда́ющеся при́сно, ра́дующеся и веселя́щеся, пою́т: благослове́н Бо́г оте́ц на́ших.

Припев: Святи́и преподо́бныя жены, моли́те Бо́га о нас.

О, ка́ко претерпе́ стоя́ние, а́лчбу же на дни́ мно́ги, Евпракси́я, Христу́ вопию́щи, Жениху́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Вели́к тя́ сосу́д узре́в Боже́ственнаго Ду́ха, Олимпиа́до, бога́тно вели́кими свои́ми исполня́ет тя́ уче́нии в патриа́рсех вели́кий Златосло́в, блаже́нная.

И ны́не и при́сно и во ве́ки веко́в. Ами́нь.

Богоро́дичен: Разреши́ла еси́ еди́на кля́тву прама́тернюю все́х благослове́ньми венча́ющаго Христа́ ро́ждши, Де́во, Ему́же пое́м: Го́споди Бо́же, благослове́н еси́ во ве́ки.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Святи́и преподо́бныя жены, моли́те Бо́га о нас.

По́мыслу, де́во, стра́сти безслове́сныя повину́ла еси́, и Жениху́ Сло́ву уневе́стившися, непоро́чная чи́стая, вопию́щи: благослови́те, вся́ дела́, Го́спода, по́йте и превозноси́те Его́ во ве́ки.

Припев: Святи́и преподо́бныя жены, моли́те Бо́га о нас.

Ва́шими по́двиги те́мнаго кня́зя низло́жше, вене́ц нетле́ния на́м исхода́таиша, и ра́йския вхо́ды, отрокови́це, и боже́ственное наслажде́ние в ра́дости души́ во ве́ки.

Сла́ва Отцу́ и Сы́ну и Свято́му Ду́ху:

Распе́ншеся ми́ру и Бо́жиею любо́вию уязви́вшеся, свяще́нныя де́вы, вкуше́нием сла́дким Еву уязви́вшаго, воздержа́ния стрела́ми уязви́сте, воспева́юще Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Иису́са ро́ждшая, от чи́стых крове́й Твои́х воплоще́нна, де́вы вся́ собрала́ еси́, Пречи́стая Де́во Ма́ти, и с ни́ми вопию́щи: благослови́те, вся́ дела́, Го́спода и превозноси́те Его́ во ве́ки.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Святи́и преподо́бныя жены, моли́те Бо́га о нас.

Кра́сныя Влады́це, и богоглаго́ливыя го́рлицы, и ла́стовицы све́тлыя и чистолюби́выя, в добро́ты небе́сныя приведе́ни бы́сте.

Припев: Святи́и преподо́бныя жены, моли́те Бо́га о нас.

Сочта́стеся с вы́шними ликостоя́нии и во избра́нных собо́рех всели́стеся, о на́с моля́щеся любо́вию ще́дрому Бо́гу.

Сла́ва Отцу́ и Сы́ну и Свято́му Ду́ху:

Па́мять Евпракси́и и Олимпиа́ды, я́ко со́лнце, ми́рови возсия́, ве́рных мы́сли просвеща́ющи, Христа́ велича́ющих при́сно.

И ны́не и при́сно и во ве́ки веко́в. Ами́нь.

Богоро́дичен: Све́та су́щи прия́телище, просвети́, Де́во, омраче́нную страстьми́ ду́шу мою́ и кроме́шния тмы́ изба́ви мя́ мольба́ми Твои́ми.

Молитва

К вам, о святи́и преподо́бныя жены, я́ко путево́дным свети́льницам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.