3 августа.

Канон святому пророку Иезекиилю

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь проро́ка, гла́с 2:

Проро́ка Твоего́ Иезеки́иля па́мять, Го́споди, пра́зднующе, те́м Тя́ мо́лим: спаси́ ду́ши на́ша.

Кано́н проро́ка, гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Проро́че Бо́жий Иезеки́иле, моли́ Бо́га о нас.

Хотя́щу восхвали́ти Иезеки́иля, проро́ка Твоего́, дарова́ние ми́ пода́ждь, Благоде́телю, и благода́ть духо́вную.

Припев: Проро́че Бо́жий Иезеки́иле, моли́ Бо́га о нас.

Име́я восхожде́ния, Иезеки́иль свяще́нный, неизглаго́ланных самови́дец, Госпо́днею сла́вою озаря́ется.

Сла́ва Отцу́ и Сы́ну и Свято́му Ду́ху:

Упра́вив твое́ житие́ и по́мыслу взыгра́ния плотска́я повину́в, проро́к яви́лся еси́ богоприя́тный.

И ны́не и при́сно и во ве́ки веко́в. Ами́нь.

Богоро́дичен: Ве́сь просвеще́н, к восто́ком многопе́тую обраще́нную две́рь, проро́чествуеши Де́ву, богодохнове́нне.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Проро́че Бо́жий Иезеки́иле, моли́ Бо́га о нас.

Умерщвле́ние стяжа́в страстно́е, зри́ши, сла́вне, ме́ртвых пронапи́санное, я́ко проро́к, воста́ние.

Припев: Проро́че Бо́жий Иезеки́иле, моли́ Бо́га о нас.

Ми́лостив быва́я Своему́ Бо́г созда́нию, боже́ствен ра́зум тя́ заблужде́нным, богоявле́нне, показа́.

Сла́ва Отцу́ и Сы́ну и Свято́му Ду́ху:

Уясни́ тя́, сла́вне, Божества́ сия́ние, Иже на херуви́мех седя́щее, богоглаго́ливе, тебе́ я́вльшееся.

И ны́не и при́сно и во ве́ки веко́в. Ами́нь.

Богоро́дичен: Ни́ву проро́к Тво́й прозорли́выма чи́стую зри́т очи́ма, де́вства соблюде́нный, Благоде́телю, Тебе́ вхо́д.

Седа́лен проро́ка, гла́с 3.

Сло́ва воплоще́ние предуясни́л еси́, Боже́ственным Ду́хом озаря́емь, вели́кий в боже́ственных проро́цех, Иезеки́иле богодохнове́нне. Те́мже я́ко проро́ка тя́ свяще́нно ублажа́ем и торжеству́ем па́мять твою́ дне́сь, согла́сно вопию́ще ти́, му́дре: моли́ся Христу́ спасти́ ду́ши на́ша.

Слава И ны́не, Богоро́дичен:

Недомы́сленно и непостижи́мо е́сть, Влады́чице Богора́дованная, е́же соде́ланное о Тебе́ стра́шное Бо́жие та́инство, и́бо Необыме́ннаго, заче́нши, родила́ еси́, пло́тию обложе́на от пречи́стых крове́й Твои́х; Его́же всегда́, Чи́стая, я́ко Сы́на Твоего́, моли́ спасти́ся душа́м на́шим.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Проро́че Бо́жий Иезеки́иле, моли́ Бо́га о нас.

На тебе́ рука́ бы́сть твоего́ Влады́ки и Вседержи́теля, неизглаго́ланная уча́щи и просвеща́ющи Тя́ Боже́ственными веле́ньми.

Припев: Проро́че Бо́жий Иезеки́иле, моли́ Бо́га о нас.

Ви́дети я́ко сподо́бился еси́ ужа́сно Боже́ственная виде́ния, на лицы́ па́л еси́ и гла́с услы́шал еси́ Боже́ственнаго Ду́ха.

Сла́ва Отцу́ и Сы́ну и Свято́му Ду́ху:

Да́нный твои́м усто́м из руки́ Госпо́дни сви́ток, изря́дне, се́рдце твое́ услади́ и проро́ка боже́ственна соверши́.

И ны́не и при́сно и во ве́ки веко́в. Ами́нь.

Богоро́дичен: Сия́ющу ви́де Иезеки́иль две́рь Боже́ственну, е́юже про́йде Госпо́дь, затворе́ну Сию́ сохрани́.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Проро́че Бо́жий Иезеки́иле, моли́ Бо́га о нас.

Иезеки́иле блаже́нне богоприя́тне, обраща́тися все́х согреша́ющих наста́вил еси́ словесы́ твои́ми.

Припев: Проро́че Бо́жий Иезеки́иле, моли́ Бо́га о нас.

Во все́м подо́бящеся Го́сподеви проро́к: о чужди́х бо согреше́ниих моля́шеся.

Сла́ва Отцу́ и Сы́ну и Свято́му Ду́ху:

Вити́йстии тя́ язы́цы не мо́гут восхвали́ти: пренебе́сною бо украси́лся еси́ све́тлостию.

И ны́не и при́сно и во ве́ки веко́в. Ами́нь.

Богоро́дичен: Боже́ственный зря́ше Тя́ две́рь Иезеки́иль, е́юже на́м возсия́ Светода́вец и Госпо́дь.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Проро́че Бо́жий Иезеки́иле, моли́ Бо́га о нас.

Ви́дети сподо́бился еси́ Бо́га, проро́че чу́дный, вся́каго явле́ния веще́ственна очи́щся, преблаже́нне.

Припев: Проро́че Бо́жий Иезеки́иле, моли́ Бо́га о нас.

Пло́ти превы́ше бы́в, взя́тся превысо́кою си́лою Ду́ха и све́та чи́стаго яви́лся еси́ испо́лнен.

Сла́ва Отцу́ и Сы́ну и Свято́му Ду́ху:

Прече́стно житие́ имы́й, ликова́ние небе́сное, пе́ния испуща́ющее, зри́ши херуви́мскаго Вседержи́теля.

И ны́не и при́сно и во ве́ки веко́в. Ами́нь.

Богоро́дичен: Ма́терь и Де́ву вои́стинну во о́бразе ви́дел еси́, две́рь многосве́тлую, Бо́гу и челове́ком Хода́таицу.

Конда́к проро́ка, гла́с 4.

Бо́жий яви́лся еси́ проро́к, Иезеки́иле чу́дне, воплоще́ние Госпо́дне все́м провозвести́л еси́, Сего́ Агнца и Зижди́теля, Сы́на Бо́жия, я́вльшася во ве́ки.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Проро́че Бо́жий Иезеки́иле, моли́ Бо́га о нас.

Хра́м одушевле́н яви́лся еси́ Бо́жий, богоно́се, о всеблаже́нне, и церко́вным ме́рилом мы́сленно научи́лся еси́, воспева́я ду́хом: оте́ц на́ших Бо́же, благослове́н еси́.

Припев: Проро́че Бо́жий Иезеки́иле, моли́ Бо́га о нас.

Ве́сь сы́й во у́жасе, преложе́н во гра́д святы́й иногда́, и Боже́ственных та́ин научи́ся явле́нием, пе́ти поуча́яся: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Свяще́нник я́влься Бо́га Вы́шняго, досточу́дне, же́ртвы и мольбы́ прино́сиши Влады́це лю́дем предстоя́щим и пою́щим: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Спасти́ восхоте́ челове́ческое существо́ Сло́во Пребоже́ственное, де́вственную две́рь проше́д, пло́тию из Нея́ оде́явыйся: оте́ц на́ших Бо́же, благослове́н еси́.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Проро́че Бо́жий Иезеки́иле, моли́ Бо́га о нас.

Свяще́нством проро́ческим проро́чествия свяще́нно украша́емь, сия́еши, проро́че, Христа́ Жизнода́вца поя́ во вся́ ве́ки.

Припев: Проро́че Бо́жий Иезеки́иле, моли́ Бо́га о нас.

На коле́ну преклоня́ющася, я́ко Бла́г, о ми́ре, зри́теля приими́ Твоея́ сла́вы, Иезеки́иля, я́ко да Тя́ пое́м во вся́ ве́ки.

Сла́ва Отцу́ и Сы́ну и Свято́му Ду́ху:

Жела́нием боже́ственным разже́гся, научи́лся еси́ па́че ума́ та́йнам, Иезеки́иле, вопия́: Тя́, Христе́, превозно́сим во ве́ки.

И ны́не и при́сно и во ве́ки веко́в. Ами́нь.

Богоро́дичен: Струю́ оставле́ния, из но́щи у́тренюя, де́вства зря́, Иезеки́иль Го́сподеви вопия́ше: Тя́ превозно́сим во ве́ки.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Проро́че Бо́жий Иезеки́иле, моли́ Бо́га о нас.

Заре́ю сия́я, проро́че, благоче́стия, во огни́ и купине́ дре́вле Моисе́ю Явльшася, и са́м ви́дети сподо́бился еси́ Тя́, та́йно науча́юща неизглаго́ланным.

Припев: Проро́че Бо́жий Иезеки́иле, моли́ Бо́га о нас.

Свяще́нник показа́лся еси́, и таи́нник, и законоположи́тель, и проро́к прему́др, и подо́бник Влады́це и, страсте́й Его́ прича́стник бы́в, ны́не снасле́дник яви́лся еси́.

Сла́ва Отцу́ и Сы́ну и Свято́му Ду́ху:

О, неизглаго́ланнаго и боже́ственнаго светоявле́ния! Его́же ны́не наслажда́ешися, блаже́нне, издале́ча зря́ во Отце́ Сы́на и Ду́ха, три́ Ипоста́си Божества́.

И ны́не и при́сно и во ве́ки веко́в. Ами́нь.

Богоро́дичен: Ты́ еси́, Богоро́дице, ору́жие на́ше и стена́, Ты́ еси́ заступле́ние на Тя́ наде́ющимся, Тебе́ и ны́не на моли́тву подвиза́ем, да изба́вимся от вра́г на́ших.

Молитва

О прехва́льный и пречу́дный проро́че Бо́жий Иезеки́иле! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему́. Моли́ о нас Человеколю́бца Бо́га, да пода́ст нам дух покая́ния и сокруше́ния о гресе́х на́ших и всеси́льною свое́ю благода́тию да помо́жет нам оста́вити пути́ нече́стия, преспева́ти же во вся́ком де́ле бла́зе; да укрепи́т нас в борьбе́ со страстьми́ и похотьми́ на́шими; да всади́т в се́рдце на́ше дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к Сла́ве Бо́жией и спасе́нию бли́жних. Упраздни́ моли́твами твои́ми, проро́че, злы́я обы́чаи ми́ра, па́че же поги́бельный и тлетво́рный дух ве́ка сего́, заража́ющий христиа́нский род неуваже́нием к Боже́ственней правосла́вной ве́ре, к уста́вом Святы́я Це́ркве и к за́поведем Госпо́дним, непочте́нием к роди́телем и власте́м предержа́щим, и низверга́ющий люде́й в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твои́м пра́ведный гнев Бо́жий и изба́ви вся гра́ды и ве́си Оте́чества на́шего от бездо́ждия и гла́да, от стра́шных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Укрепи́ твои́ми моли́твами, пресла́вне, предержа́щия вла́сти на́ша в вели́цем и многотру́днем по́двизе народоправле́ния, благопоспе́шествуй им во всех благи́х дея́ниих и начина́ниих к водворе́нию ми́ра и пра́вды в стране́ на́шей. Посо́бствуй христолюби́вому во́инству во бране́х со врага́ми на́шими. Испроси́, проро́че Бо́жий, от Го́спода па́стырем на́шим святу́ю ре́вность по Бо́зе, серде́чное попече́ние о спасе́нии пасо́мых, му́дрость во уче́нии и управле́нии, благоче́стие и кре́пость, во искуше́ниих, судия́м испроси́ нелицеприя́тие и безкоры́стие, правоту́ и сострада́ние к оби́димым, всем нача́льствующим попече́ние о подчине́нных, ми́лость и правосу́дие, подчине́нным же поко́рность и послуша́ние ко власте́м и усе́рдное исполне́ние свои́х обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Ца́рствии Го́спода и Спа́са на́шего Иису́са Христа́, Ему́же подоба́ет честь и поклоне́ние со безнача́льным Его́ Отце́м и Пресвяты́м Ду́хом во ве́ки веко́в. Ами́нь.