31 августа.

Канон святым мученикам Флору и Лавру

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́х, гла́с 4:

Преудо́бренную и богому́друю дво́ицу пресве́тлую восхва́лим, ве́рнии, по достоя́нию, Фло́ра преблаже́ннаго и Ла́вра всечестна́го, и́же усе́рдно Тро́ицу несозда́нную я́сно пропове́дасте все́м, те́мже пострада́вше до кро́ве, и венцы́ пресве́тлыми увязо́стеся, моли́теся Христу́ Бо́гу, да спасе́т ду́ши на́ша.

Кано́н святы́х, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святии мученицы Флоре и Лавре, моли́те Бо́га о нас.

Светоза́рными блиста́нии Ду́ха просвеща́еми, мра́чныя о́блаки души́ моея́ разори́те, я́ко да воспою́, ра́дуяся, светоно́сную, святи́и, и честну́ю ва́шу па́мять, му́ченицы Христо́вы предо́блии.

Припев: Святии мученицы Флоре и Лавре, моли́те Бо́га о нас.

На ка́мени непоро́чныя ве́ры созда́вше доброде́тельми боже́ственными са́ми себе́, блаже́ннии, предо́бр показа́стеся и красе́н хра́м, в него́же Оте́ц всели́ся, и Сы́н, и Ду́х Святы́й.

Сла́ва Отцу́ и Сы́ну и Свято́му Ду́ху:

Из ко́рене посека́юще пре́лести те́рние, великоимени́тии, посека́тельным сло́вом Боже́ственныя ве́ры сердца́ обнови́ша, олядене́вшая ле́стию, и плодоно́сна показа́ша, ве́ру процвета́юща непоро́чную.

И ны́не и при́сно и во ве́ки веко́в. Ами́нь.

Богоро́дичен: От Деви́ческия утро́бы прозябла́ еси́ Ко́реня ненапое́ннаго, Сади́теля все́м, Челове́ка бы́вша и стра́сти претерпе́вша, Его́же жела́юще, боже́ственнии ве́рно пострада́ша му́ченицы, Пречи́стая Де́во Всепе́тая.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святии мученицы Флоре и Лавре, моли́те Бо́га о нас.

Зако́н Боже́ственный исполня́юще, прехва́льнии му́ченицы, ни́щим бога́тно хле́б пода́сте и ко благоче́стию наста́висте боже́ственному, спасе́ния хода́таи си́м бы́вше.

Припев: Святии мученицы Флоре и Лавре, моли́те Бо́га о нас.

Дво́ица светоно́сных страда́лец, возсия́вши чуде́сными заря́ми, тму́ отгна́ пре́лести многобо́жныя, и прельще́нныя к сия́нию Боже́ственныя ве́ры вся́ наста́висте.

Сла́ва Отцу́ и Сы́ну и Свято́му Ду́ху:

Младе́нствующий наро́д, благочести́вии му́ченицы, Боже́ственными уче́нии к стези́ Боже́ственнаго ра́зума наста́висте и тре́бища де́монская моли́твою, блаже́ннии, низложи́сте.

И ны́не и при́сно и во ве́ки веко́в. Ами́нь.

Богоро́дичен: Неискусобра́чная Де́во, Ея́же ра́ди на́м возсия́ Сло́во, е́же вы́ше вся́каго нача́ла разумева́емо, спаса́й ста́до Твое́ и вся́к гра́д и страну́ от вся́каго обстоя́ния, Богора́дованная.

Седа́лен, гла́с 8.

Зо́дчии показа́стеся духо́внии, назда́сте ве́рою благочести́вых ду́ши, Боже́ственною благода́тию на ка́мени ве́ры, и, себе́ са́ми соверши́вше хра́м свяще́н честны́я Тро́ицы, тве́рдо пострада́сте. Те́м и исцеле́ния источа́ете ве́рою к ва́м притека́ющим, и стра́сти отгоня́ете, страстоно́сцы самобра́тнии. Моли́те Христа́ Бо́га грехо́в оставле́ние пода́ти чту́щим любо́вию святу́ю па́мять ва́шу.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Припев: Святии мученицы Флоре и Лавре, моли́те Бо́га о нас.

Юношски со враго́м спле́тшеся, до́блии, сего́ низложи́сте кре́стным ору́жием тве́рдо и сокруше́нныя грехо́м сотвори́ша хра́мы Го́сподеви жи́вы, благоче́стно пою́щия: си́ле Твое́й сла́ва, Человеколю́бче.

Припев: Святии мученицы Флоре и Лавре, моли́те Бо́га о нас.

От Христа́ — ка́мене усе́ченаго, я́коже пи́шет, от горы́ — Де́вы Богоотрокови́цы укре́пльшеся, всесла́внии святи́и, и́долом сокруше́ние соде́ласте, и взя́ти бы́сте к горе́ явле́нней муче́ния, и Ангелом я́ве уподо́бистеся.

Припев: Святии мученицы Флоре и Лавре, моли́те Бо́га о нас.

Еди́ну зарю́ трисо́лнечнаго Божества́ безбо́жным ра́дующеся возвести́ дво́ица честна́я му́ченик, Фло́р же и Ла́вр, и муче́ния ча́шу испи́ша усе́рдно, Христу́ пою́ще: сла́ва си́ле Твое́й, Человеколю́бче.

Сла́ва Отцу́ и Сы́ну и Свято́му Ду́ху:

Зако́ну Бо́жию покло́ньшеся, преклони́ша беззако́нныя сего́ еди́наго чести́ отверзе́нием оче́с, разу́мная и́х зре́ния просве́щше, му́ченицы боже́ственнии, свети́льника два́, и́же концы́ вся́ просвети́вше.

И ны́не и при́сно и во ве́ки веко́в. Ами́нь.

Богоро́дичен: Яко Чи́стую от родо́в избра́, Богоро́дице, Тя́ Присноде́ву Зижди́тель все́х и Бо́г, и Твою́ утро́бу пала́ту соде́ла нескве́рну еди́ный Ца́рь веко́в, и из Тебе́ челове́ком яви́ся.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святии мученицы Флоре и Лавре, моли́те Бо́га о нас.

Разделе́ния не подъя́т боже́ственная дво́ица му́ченик самобра́тная: Неразде́льней бо Святе́й Тро́ице ве́ровавше еди́ною наде́ждою, разделе́нием пре́лести безме́стныя содержи́мыя совокупи́ благода́тию.

Припев: Святии мученицы Флоре и Лавре, моли́те Бо́га о нас.

Истины ве́рвию, оско́рдом же боже́ственнаго ра́зума окамене́нныя мы́сли благоче́стно, страда́льцы, истеса́вше, хра́мы Тро́ице пресла́вны Боже́ственною ве́рою соде́ласте, си́лою Ду́ха.

Сла́ва Отцу́ и Сы́ну и Свято́му Ду́ху:

Кореносека́тели зло́бы вся́кия яви́стеся, му́ченицы сла́внии, сади́тели же вся́каго благоче́стия и словесы́ и вещьми́: изра́стший цве́т Иессе́ев от ко́рене Боже́ственнаго в непроходи́мых сердца́х насади́сте.

И ны́не и при́сно и во ве́ки веко́в. Ами́нь.

Богоро́дичен: Пре́жде все́х ве́к, Де́во, сокрове́нное вели́кое та́инство, е́же не уве́дено бы́сть родо́м пе́рвым, Всенепоро́чная, Тобо́ю яви́ся Сло́во Отчее Преве́чное, вопло́щся и бы́в Челове́к.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святии мученицы Флоре и Лавре, моли́те Бо́га о нас.

Терпе́нием неукло́нным беззако́нныя побежда́юще, по зако́ну, страда́льцы, Христу́ достохва́льный коне́ц принесо́сте, не покры́вшеся нече́стия су́етством.

Припев: Святии мученицы Флоре и Лавре, моли́те Бо́га о нас.

Ору́жия си́льнаго явля́еми Ду́ха, победи́сте враги́ безпло́тныя, блаже́ннии, и стра́сть блаже́нную в ре́бра Прободе́ннаго благоче́стно вообрази́сте.

Сла́ва Отцу́ и Сы́ну и Свято́му Ду́ху:

Якоже два́ предобра́ сосца́, сла́внии, яви́стеся Це́ркви Христо́ве, не млеко́ пролива́юще, но да́р незави́стен и спаси́телен исцеле́ний источа́юще.

И ны́не и при́сно и во ве́ки веко́в. Ами́нь.

Богоро́дичен: Неду́говавшую ду́шу мою́ грехо́м исцели́, Яже Врача́ ду́ш и теле́с ро́ждшая, Пречи́стая, Его́же боже́ственнии му́ченицы испове́дающе, вра́чеве страсте́й яви́стеся.

Конда́к святы́х, гла́с 8.

Яко благоче́стия му́ченики и страда́льцы Христо́вы богому́дрены, вселе́нная пресла́вно почита́ет Фло́ра и Ла́вра дне́сь, я́ко да улучи́м благода́ть и ми́лость моли́твами и́х и изба́вимся бе́д и напа́стей, гне́ва же и ско́рби в де́нь су́дный.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святии мученицы Флоре и Лавре, моли́те Бо́га о нас.

Древяны́я у́бо и ка́менныя бо́ги безбо́жных разори́ша, столпы́ богоразу́мныя, Фло́р и Ла́вр великоимени́тии, пою́щим себе́ возста́виша: благослове́н Бо́г оте́ц на́ших.

Припев: Святии мученицы Флоре и Лавре, моли́те Бо́га о нас.

Су́ще испо́лнени огня́ Боже́ственнаго, му́ченицы, Ду́ха, в пе́щь воврещи́ преподо́бныя му́жи непра́ведно хотя́щия, ту́чами боже́ственных моли́тв ва́ших соблюдо́сте неврежде́ны, сла́внии.

Сла́ва Отцу́ и Сы́ну и Свято́му Ду́ху:

Боля́щим исцеле́ние, оби́димым избавле́ние, бе́дствующим все́м спасе́ние при́сно подаю́т Фло́р и Ла́вр, вопию́ще, му́ченицы: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Яко ши́пок удо́лия, Тя́ в житии́, Отрокови́це, Христо́с избра́ и, в Тя́ всели́вся, пло́тию про́йде, благово́нствуя на́с богоразу́мия дохнове́нии, Всенепоро́чная, Богоро́дицу при́сно испове́дающих Тя́.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии мученицы Флоре и Лавре, моли́те Бо́га о нас.

Глаго́лом живы́м пита́юще ду́ши, всеприснопа́мятнии, гла́дом та́ющим — спаси́тельное бра́шно, убо́гим — промышле́ние и си́рым яви́стеся, все́м дово́льствующе, и Христу́ пою́ще: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святии мученицы Флоре и Лавре, моли́те Бо́га о нас.

Освяще́нно иму́ще житие́ и кончи́ну, вре́мя до́лго, му́дрии, скрыва́еми, от земли́ изда́стеся, па́че зари́ со́лнечныя на́м возсия́вше лучи́ пресла́вных чуде́с, ве́рою пою́щим: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Два́ свети́льника яви́стеся мы́сленней тве́рди, Це́рковь свяще́нно украша́юще, и всю́ просвеща́ете све́тло тва́рь, при́сно чудотворе́нии страстоте́рпцы, вопию́ще: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Святе́йши еси́ Ангел, ро́ждши, Де́во Пресвята́я, святы́х Свята́го, за милосе́рдие бы́вша несме́сно Челове́ка, я́коже есмы́, спасти́ вопию́щия Ему́ непреста́нно: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святии мученицы Флоре и Лавре, моли́те Бо́га о нас.

Се́ у́бо, — вопия́ше дре́вле Дави́д, — что́ добро́, и красно́, и спаси́тельно? Но е́же я́ве боже́ственным бра́тиям вку́пе жи́ти в ду́се, подви́гшимся я́сно и побе́ду взе́мшим на диа́вола, и́хже по достоя́нию ублажа́ем.

Припев: Святии мученицы Флоре и Лавре, моли́те Бо́га о нас.

Красны́ яви́стеся о́чи честны́я Це́ркве благода́тию, и о́чи, дре́вле ослепле́ныя тмо́ю лю́тою, и пре́жде сме́рти, святи́и, и по кончи́не свяще́нней отверзо́сте в сла́ву все́х Благоде́телю, Ла́вре и Фло́ре достохва́льнии.

Припев: Святии мученицы Флоре и Лавре, моли́те Бо́га о нас.

Зна́меньми явле́нными и стра́шными Христо́с гро́б ва́ш, святи́и, и ра́ку, дре́вле я́коже прорече́, явля́ет, иде́же терпели́вая телеса́ лежа́ху свяще́нно, лучи́ исцеле́ний испуща́юще бога́тно и благово́ние достохва́льное.

Сла́ва Отцу́ и Сы́ну и Свято́му Ду́ху:

Боже́ственная и светоно́сная вои́стинну дво́ица, Ла́вре и Фло́ре, добропобе́днии му́ченицы, на небесе́х всегда́ Тро́ице Вседе́тельней предстоя́ще, избавле́ние грехо́в лю́тых испроси́те, ве́рою ва́шу боже́ственную па́мять на земли́ торжеству́ющим.

И ны́не и при́сно и во ве́ки веко́в. Ами́нь.

Богоро́дичен: Стра́шно Твое́ рождество́, Ма́ти Чи́стая, небе́сныя бо Его́же трепе́щут чи́ни, Сло́ва Бо́жия, Челове́ка бы́вша на земли́, па́че естества́ родила́ еси́, пребы́вши Де́вою, я́коже пре́жде. Те́мже Тя́, Богоро́дицу, и язы́ком и се́рдцем испове́дающе, велича́ем.

Молитва

Прехвальнии мученицы Флоре и Лавре, вас не земля потаила есть, но небо прият вы, во еже быти вам молитвенники и предстатели о чтущих с любовию честную память вашу. Молитеся же за ны, трудолюбцы незлобивии, да подвигнет Господь и нас, в трудех и утеснении сущих, к деланию заповедей Его, да не токмо о пищи и питии, но и о еже како угодити Господеви попечемся; споболите печалем и воздыханием нашим, и да не озлобятся до конца души наша, но да возгорятся любовию друг ко другу, да пребудем в мире и единомыслии, якоже и вы, самобратнии блаженнии. Наипаче же утвердите ны в вере святей и правей, юже имуще в сердцам наших, не устрашимся в поношении и унижении и всяких обстояниих, имиже одержими есмы, но, яко испытание силы веры нашея с благодарением сие приимше, доброе исповедание соблюдем, в немже и прейдем от юдоли сей в вечное Царствие Господа нашего, Емуже слава и держава во веки веков. Аминь.