30 августа.

Канон преподобному Рафаилу Банатскому, Хиландарцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 1:

Смире́нием и поще́нием превозвы́сился еси́ к Бо́гу, отри́нув ми́ра попече́ние, сла́ву же сего́ нивочто́же вмени́в, бу́дущия сла́вы взыска́л еси́. Те́м ны́не со Ангелы предстоя́ Го́споду, моли́ о все́х на́с, чту́щих па́мять твою́.

Кано́н преподо́бнаго. Гла́с 3.

Пе́снь 1.

Ирмо́с: Пе́снь но́вую пои́м, лю́дие, от Де́вы Ро́ждшемуся во спасе́ние на́ше и еди́но Сотво́ршему с небе́сными земна́я, я́ко просла́вися.

Припев: Преподобне отче Рафаиле, моли́ Бо́га о нас.

Проще́ние душетле́нных прегреше́ний испроси́ ми у Христа́ Бо́га, и да́ти ми́ просвеще́ние с небесе́, я́ко да па́мять твою́ честну́ю по достоя́нию восхвалю́.

Припев: Преподобне отче Рафаиле, моли́ Бо́га о нас.

Ангельски на земли́ пожи́в, преподо́бне, на небеси́ Ангелов похвалы́ сподо́бился еси́. Ка́ко у́бо досто́йно воспою́ све́тлое житие́ твое́?

Сла́ва Отцу́ и Сы́ну и Свято́му Ду́ху:

Мудрова́ние плотско́е умертви́в, мяте́жное мо́ре страсте́й изсуши́л еси́, укрепля́яся еди́ною наде́ждею ве́чных бла́г, я́же и прия́л еси́ от Христа́ Бо́га.

И ны́не и при́сно и во ве́ки веко́в. Ами́нь.

Богоро́дичен: Погаси́, Богоро́дице, кропле́нием ми́лости Твоея́, у́глие страсте́й мои́х, и уга́сший свети́льник се́рдца моего́ возжжи́, Све́щниче Всезлаты́й, Богора́дованная.

Пе́снь 3.

Ирмо́с: Утверди́ мене́, Го́споди, еди́не Многоми́лостиве, и простри́ ми ру́ку, я́ко Петро́ви, и спаси́ мя.

Припев: Преподобне отче Рафаиле, моли́ Бо́га о нас.

Язы́к мо́й недоуме́ет благохвали́ти тя́ по достоя́нию, но ты́, преподо́бне Рафаи́ле, предстоя́ престо́лу Влады́чню, да́ждь ми́ просвеще́ние воспе́ти досто́йно твое́ торжество́.

Припев: Преподобне отче Рафаиле, моли́ Бо́га о нас.

Ты́ Го́споду после́довати восхоте́в, блаже́нне, на го́ру Афо́н прише́л еси́, и во оби́тель Хиланда́рскую всели́лся еси́, иде́же посто́м и моли́твами Христу́ благоугоди́л еси́.

Сла́ва Отцу́ и Сы́ну и Свято́му Ду́ху:

Терпе́нием, посто́м и моли́твами яви́лся еси́ в Бана́те, я́ко ши́пок, нося́ та́йно благово́ние, смра́д же пре́лести отгоня́я Боже́ственною благода́тию.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, Обра́дованная, Ма́ти Бо́жия, я́ко Исто́чник исцеле́ний яви́лася еси́: из Тебе́ бо истече́ Пото́к сла́дкий, вся́ лю́ди напая́я, скве́рны же ду́ш измыва́я.

Седа́лен преподо́бнаго, гла́с 1:

Окрест ра́ки твоея́ дне́сь предстоя́ще и па́мять твою́ пра́зднующе, мо́лим тя́ ны́не, ча́да твоя́, и любе́зно вопие́м ти́: моли́ся Го́споду, преподо́бне, поми́ловатися душа́м на́шим.

Пе́снь 4.

Ирмо́с: Еда́ в река́х прогне́ваешися, Го́споди, еда́ в река́х я́рость Твоя́ или́ в мо́ри устремле́ние Твое́?

Припев: Преподобне отче Рафаиле, моли́ Бо́га о нас.

Возлюби́в, преподо́бне, моли́тву непреста́нну и любо́вь нелицеме́рну, у́м сво́й си́ми очища́л еси́, и ду́шу свою́ просвеща́л. Те́м и те́ло свое́ смири́л еси́ и ко дневны́м трудо́м благопоко́рно устро́ил еси́.

Припев: Преподобне отче Рафаиле, моли́ Бо́га о нас.

Отче преподо́бне Рафаи́ле, ве́сь Бана́т ны́не весе́лием красу́ется, име́я в себе́ мо́щи твоя́, ро́д же се́рбский мо́лит тя́: испроси́ все́м на́м грехо́в проще́ние.

Сла́ва Отцу́ и Сы́ну и Свято́му Ду́ху:

Юже показа́л еси́, о́тче, сла́дость спасе́ния, и ро́ду твоему́ се́рбскому проси́ ве́чнаго ея́ наслажде́ния.

И ны́не и при́сно и во ве́ки веко́в. Ами́нь.

Богоро́дичен: Ангелов весе́лие, му́чеников похвало́, и ве́рных спа́сение, Де́во Пренепоро́чная, восхваля́ют Тя́ вси́ ро́ди челове́честии: родила́ бо еси́ Бо́га, пребы́вши де́ва нетле́нна.

Пе́снь 5

Ирмо́с: К Тебе́ у́тренюем, Христе́ Бо́же, у́треннюю и́стину, возсия́вшу на́м от Де́вы и богоразу́мием озари́вшу, су́щим во мра́це неве́дения.

Припев: Преподобне отче Рафаиле, моли́ Бо́га о нас.

Миры духо́вными благоуха́я, Ангельский ви́д свяжа́л еси́, преподо́бне о́тче, с ни́миже и обходя́, правосла́вный ро́д тво́й спаса́й.

Припев: Преподобне отче Рафаиле, моли́ Бо́га о нас.

Упова́я на Го́спода, и та́йными к Нему́ моли́твами яви́лся еси́ изря́ден мно́гими труды́ и по́двиги. Он же, ви́дя сие́, и по сме́рти твое́й, чуде́с да́ром обогати́ тя.

Сла́ва Отцу́ и Сы́ну и Свято́му Ду́ху:

Ду́хом Бо́жиим наставля́емь, показа́лся еси́ житие́м Ангел на земли́. Те́м приобре́л еси́ бога́тство небе́сное и сожи́тель Ангелов яви́лся еси́ во Ца́рствии Христа́, Бо́га на́шего.

И ны́не и при́сно и во ве́ки веко́в. Ами́нь.

Богоро́дичен: Ми́лостивая Де́во, ро́ждшая Бо́га Преми́лостиваго, се́рдца моего́ о́чи просвети́, молю́ся, осле́пшия тмо́ю грехо́вною, и покажи́ прия́тны боже́ственным сия́нием, да боже́ственными гла́сы велича́ю Тя́.

Пе́снь 6.

Ирмо́с: Селе́ния Ио́на е́же в преиспо́днем а́де есте́ственный о́браз бы́в, вопия́ше: возведи́ от тли́ живо́т мо́й, Человеколю́бче.

Припев: Преподобне отче Рафаиле, моли́ Бо́га о нас.

Ра́дуяся, Христу́ рабо́тал еси́ на земли́, и бы́л еси́ сы́н послуша́ния, те́м ны́не, ра́дуяся, предстои́ши во све́те Святе́й Тро́ицы, Ейже за ны́ моли́ся, преподо́бне Рафаи́ле.

Припев: Преподобне отче Рафаиле, моли́ Бо́га о нас.

Естество́м бы́л еси́ челове́к, но житие́м свои́м, смире́нием и послуша́нием уподо́бился еси́ Ангелом, сего́ ра́ди и по сме́рти прия́л еси́ да́р исцеле́ний. И ны́не моли́ Христа́ Бо́га, исцели́ти и спасти́ ду́ши на́ша.

Сла́ва Отцу́ и Сы́ну и Свято́му Ду́ху:

Ра́ку моще́й име́я в себе́, ве́сь Бана́т ра́дуется, и боже́ственнаго ра́зума благоуха́ния исполня́ется, и все́х, хва́лящих тя́, сердца́ ве́рою наслажда́ются.

И ны́не и при́сно и во ве́ки веко́в. Ами́нь.

Богоро́дичен: Из утро́бы Твоея́ про́йде, Иже Отцу́ Собезнача́льный, и на́ше естество́ обожи́, Де́во Всенепоро́чная, Его́же моли́, я́ко Человеколю́бца, уще́дрити на́с, согре́шшия.

Конда́к преподо́бнаго, гла́с 6:

К боже́ственному зва́нию вы́ю твою́ приклони́в, изнури́л еси́ те́ло твое́ посто́м, бде́нием и моли́твами, ве́ры ра́ди и любве́ Бо́жия, всегда́ же ходи́л еси́ путе́м за́поведей Госпо́дних, и́хже и по сме́рти яви́ тя́ исцеле́ний исто́чника, Его́же со дерзнове́нием моли́, спасти́ся душа́м на́шим.

Пе́снь 7.

Ирмо́с: В пещи́ пла́мень пе́щный, и Де́ву сохрани́ ро́ждшую Тя́, Богоро́дицу: благослове́н еси́, Го́споди, Бо́же оте́ц на́ших.

Припев: Преподобне отче Рафаиле, моли́ Бо́га о нас.

Ангельское житие́ име́л еси́, преподо́бне о́тче Рафаи́ле, в смире́нии и послуша́нии, после́дуя стопа́м Влады́ки Христа́. Те́м тя́ вси́, ве́рнии, согла́сно похваля́ем, пою́ще: благослове́н еси́, Го́споди, Бо́же оте́ц на́ших.

Припев: Преподобне отче Рафаиле, моли́ Бо́га о нас.

Фи́никс, насажде́нный в дому́ Госпо́дни, яви́лся еси́, цве́ты принося́ чуде́сныя, и́миже сердца́ ве́рою наслажда́ются, хва́лящих тя́ при́сно, преподо́бне о́тче Рафаи́ле, и вопию́щих: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Аще челове́ком и неве́домы мно́гия труды́ твоя́ и по́двиги, и та́йныя моли́твы, но Бо́гом вся́ зри́мы и ве́домы, Ему́же при́сно вопие́ши: благослове́н еси́, Го́споди, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Ро́ждшая зако́ну Да́теля, просвеща́юща благода́тию всю́ вселе́нную, моли́ Его́ при́сно, зако́ном мя́ побежда́ема грехо́вным, уще́дрити вско́ре.

Пе́снь 8.

Ирмо́с: Благоде́теля, и Бо́га, и Изба́вителя все́х, и Творца́ всего́ ми́ра, свяще́нницы, по́йте, лю́дие, превозноси́те во вся́ ве́ки.

Припев: Преподобне отче Рафаиле, моли́ Бо́га о нас.

Испо́лнився благода́ти Свята́го Ду́ха, разуме́л еси́ благове́стие Госпо́дне: возненави́дев простра́нный пу́ть, вводя́й в па́губу, безмо́лвие возлюби́л еси́, те́сным путе́м после́дуя Христу́, к небе́сным оби́телем возше́л еси́.

Припев: Преподобне отче Рафаиле, моли́ Бо́га о нас.

Лику́ет дне́сь вся́ страна́ Бана́тская и веселя́тся наро́дов мно́жества, в честне́м преставле́нии твое́м, соверша́юще моле́бный пра́здник.

Сла́ва Отцу́ и Сы́ну и Свято́му Ду́ху:

Еди́наго Христа́ возлюби́в, Того́ кре́ст на ра́мо взе́м, поне́сл еси́. Терпе́нием же, посто́м и моли́твами, пло́ть твою́ ду́ху покори́л еси́. Те́м ны́не мо́лим тя́: моли́ся о душа́х на́ших.

И ны́не и при́сно и во ве́ки веко́в. Ами́нь.

Богоро́дичен: К Све́ту невече́рнему упра́ви у́м мо́й, Богоро́дице, и мои́х прегреше́ний плени́цу расто́ргни, моля́щи Сы́на Твоего́ и Го́спода, и томя́щий мя́ гре́х низложи́, я́ко да Тобо́ю спаса́емь, воспева́ю Тя́ всегда́.

Песнь 9

Ирмо́с: Благода́тная, ра́дуйся, Госпо́дь с Тобо́ю, благослове́на Ты́ в жена́х, и Тя́ велича́ем.

Припев: Преподобне отче Рафаиле, моли́ Бо́га о нас.

Пресвята́го Ду́ха хра́м тя́, вси́ ве́рнии, ве́мы, и́бо па́че все́х возлюби́л еси́ моли́тву непреста́нну, е́юже очища́я у́м, ду́шу же просвеща́я, те́ло свое́ смири́л еси́, те́м тя́ велича́ем.

Припев: Преподобне отче Рафаиле, моли́ Бо́га о нас.

Отче Рафаи́ле преподо́бне, возше́д на высоту́ доброде́телей, сла́дость спасе́ния показа́л еси́ на́м. Испроси́ на́м грехо́в проще́ние, да тя́ непреста́нно велича́ем.

Сла́ва Отцу́ и Сы́ну и Свято́му Ду́ху:

Юже прия́л еси́ от Христа́ Бо́га благода́ть, испроси́ и на́м, рабо́м твои́м, я́ко да спаса́емии, при́сно тя́ велича́ем.

И ны́не и при́сно и во ве́ки веко́в. Ами́нь.

Богоро́дичен: Облак светоза́рный показа́ся, росо́ю благода́ти вся́ скве́рны теле́сныя омыва́ющи, и ду́ши просвеща́ющи, еди́на Всепе́тая.

Свети́лен преподо́бнаго:

Све́т невече́рний, Христо́с, просвети́ тя и показа́ тя в мона́сех изря́дна: вои́стинну бо Христо́в слуга́ бы́л еси́, напая́я благода́ти умиле́ния сердца́ на́ша.

Молитва

О свяще́нная главо́, преподо́бне о́тче, преблаже́нне а́вво Рафаиле, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.