30 августа.

Канон святому мученику Мирону

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь священномученику Мирону Кизическому, глас 4

Му́ченик Твой, Го́споди, Ми́роне/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н свята́го, гла́с 2.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Припев: Мучениче Мироне, моли́ Бо́га о нас.

Хвалу́ Бо́гу, в па́мяти лику́юще страда́льца Ми́рона, дне́сь воспое́м, укре́пльшему сего́ держа́ву погуби́ти борца́.

Припев: Мучениче Мироне, моли́ Бо́га о нас.

Да́р са́м себе́ Благоде́телю прине́сл еси́, и свяще́нно возложе́ние, и добро́ заколе́ние, и благово́нну же́ртву, зако́нно пострада́в, му́чениче многострада́льне.

Сла́ва Отцу́ и Сы́ну и Свято́му Ду́ху:

Яко му́др, я́ко чи́ст хра́м, сла́вне, от Де́вы Возсия́вшаго, устреми́вшагося возмути́ти боже́ственное ста́до душетле́ннаго во́лка отгна́л еси́.

И ны́не и при́сно и во ве́ки веко́в. Ами́нь.

Богоро́дичен: Еди́на Бо́га неискусобра́чно родила́ еси́, Его́же страстоте́рпцы му́ченицы испове́давше, на́м уподо́бльшася, упраздни́ша пре́лесть, Чи́стая Влады́чице.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Мучениче Мироне, моли́ Бо́га о нас.

Возвы́сив твое́ жела́ние серде́чное ко Го́споду, на Кре́ст возне́сшемуся, вознесе́н бы́л еси́, пресла́вне, на дре́ве стру́жемь, усе́рдно же вопия́: я́ко не́сть пра́веден, па́че Тебе́, Го́споди.

Припев: Мучениче Мироне, моли́ Бо́га о нас.

Глаго́л твои́х стрела́ми о́стрыми пронзи́л еси́ мучи́теля в се́рдце, до́блий во́ине Царя́ Христа́, всехва́льне, и, поя́, глаго́лал еси́: не́сть пра́веден, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Яко у́тро, я́ко де́нь, возсия́в, разори́л еси́ мра́к неве́дения, просвети́л еси́ пою́щия всегда́, Ми́роне многострада́льне: Ты́ еси́ Бо́г на́ш, и не́сть пра́веден, па́че Тебе́, Го́споди.

И ны́не и при́сно и во ве́ки веко́в. Ами́нь.

Богоро́дичен: Неду́гующую безбо́жием тва́рь всю́, Бо́га ро́ждши Исцели́теля, Де́во, исцели́ла еси́ пресла́вно. Те́мже, благодаря́ще, взыва́ем Ти́: не́сть пречи́сты, па́че Тебе́, Влады́чице.

Седа́лен, гла́с 1.

Огнедохнове́нно показа́лся еси́ благово́ние, страда́нием обонева́еши на́ша тезоиме́нно сердца́, му́чеников украше́ние и ве́рных удобре́ние. Те́мже, дне́сь всесвяту́ю твою́ па́мять пра́зднующе, освяща́емся вси́ любо́вию, чту́щии тя́.

Пе́снь 4.

Ирмо́с: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Мучениче Мироне, моли́ Бо́га о нас.

Спа́са, и Бо́га, и Го́спода, возсия́вшаго от Де́вы, испове́дуя, сла́вне, посреди́ суди́ща, мучи́телей шата́ние терпе́нием смири́л еси́ и многобо́жие потреби́л еси́.

Припев: Мучениче Мироне, моли́ Бо́га о нас.

Ника́коже устраши́вся, стру́жемь и бие́мь, доблему́дренне, Ангелы удиви́л еси́, зря́щия твое́ терпе́ние, и́мже враги́ безпло́тныя погуби́в, и победоно́сен му́ченик бы́л еси́.

Сла́ва Отцу́ и Сы́ну и Свято́му Ду́ху:

Сы́й Боже́ственныя ро́сы испо́лнен, проше́л еси́ доблему́дренно о́гненную пе́щь, зри́мь в не́й, Ми́роне му́дре, со Ангелы ра́дующся и ника́коже, блаже́нне, опаля́емь.

И ны́не и при́сно и во ве́ки веко́в. Ами́нь.

Богоро́дичен: Ве́лие и стра́шное та́инство рождества́ Твоего́ удивля́ет, Чи́стая, вся́к у́м: я́ко Бо́г вочелове́читися из Тебе́ бла́гостию изво́ли во спасе́ние ми́ра и назда́ние.

Пе́снь 5

Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Мучениче Мироне, моли́ Бо́га о нас.

Богоза́рная и светоно́сная твоя́ па́мять, Свята́го Ду́ха си́лою в ве́сь ми́р простира́ема, просвеще́нием благоче́стия озаря́ет сию́ чту́щия и до́блести твоя́ возвеща́ющия.

Припев: Мучениче Мироне, моли́ Бо́га о нас.

Юношски го́рькая томле́ния претерпе́л еси́, я́ко безпло́тен, до́блий му́чениче: одира́еме бо ко́же терпе́л еси́, я́коже ино́му стра́ждущу, сла́вне, си́лою неви́димою я́ве укрепля́емь.

Сла́ва Отцу́ и Сы́ну и Свято́му Ду́ху:

Миро твоя́ иска́паша боле́зни, му́чениче, благово́нно, вся́к смра́д отгоня́ безбо́жия, Христо́ву же Святу́ю Це́рковь благово́нствуя при́сно, ве́рно тя́ и любо́вию я́ве блажа́щую.

И ны́не и при́сно и во ве́ки веко́в. Ами́нь.

Богоро́дичен: О на́с из Тебе́ Воплоще́ннаго неизглаго́ланным сло́вом, Пречи́стая, моли́, Благослове́нная, я́ко да изба́вимся ви́димых все́х и неви́димых вра́г, Всенепоро́чная, Тя́, Богоро́дицу, при́сно испове́дающии.

Пе́снь 6.

Ирмо́с: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́.

Припев: Мучениче Мироне, моли́ Бо́га о нас.

Кропле́нием твои́х крове́й свяще́нных потопи́л еси́ де́монския полки́, во́ине до́блий, и, вене́ц нося́, к Бо́гу восте́кл еси́, победоно́сец бы́в изря́ден.

Припев: Мучениче Мироне, моли́ Бо́га о нас.

Ви́девше твое́ лице́, просвети́вшееся, мучи́тели, боже́ственными светлостьми́, страстоте́рпче, удиви́шася, не позна́вше же Бо́га, тму́ прия́ша, в ве́чную му́ку отсыла́еми.

Сла́ва Отцу́ и Сы́ну и Свято́му Ду́ху:

Повеле́нием суро́ваго мучи́теля терпе́л еси́ ко́жи отъя́тие, па́че естества́, достохва́льне, показа́в е́же к Бо́гу чи́стое твое́ жела́ние и при́сное, всеблаже́нне, воззре́ние.

И ны́не и при́сно и во ве́ки веко́в. Ами́нь.

Богоро́дичен: Зако́ны в Тебе́ обновля́ются, Де́во, естества́: па́че бо естества́ естество́м непостижи́маго, Бо́га Емману́ила пресла́вно родила́ еси́ в на́ше ве́рных порожде́ние.

Конда́к свята́го, гла́с 4

Измла́да Христа́ возлюби́в, пресла́вне, и Того́ соблюда́я Боже́ственныя за́поведи, к Тому́ прите́кл еси́ ве́сь це́л, Ми́роне всече́стне, и со Ангелы мо́лишися приле́жно. Проси́ все́м почита́ющим па́мять твою́ оставле́ния грехо́в.

Пе́снь 7.

Ирмо́с: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Мучениче Мироне, моли́ Бо́га о нас.

Ум тво́й, све́тло распаля́емь, му́дре, боже́ственным жела́нием, ра́довашеся и веселя́шеся, посреди́ пла́мене стоя́щу тебе́, я́коже трие́м ю́ношам, с ни́миже ве́рно взыва́л еси́: благослове́н еси́, Бо́же оте́ц на́ших.

Припев: Мучениче Мироне, моли́ Бо́га о нас.

Зря́ще в пла́мени стоя́ща тя́, му́дре, посреди́ Ангел, зра́ком неизглаго́ланным блиста́юща, зри́тели удиви́шася и, к пе́нию прело́жшеся, Влады́це взыва́ху: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Умо́м чи́стым стоя́, со у́мными пое́ши Ангелы, посреди́ пе́щи ра́дуяся, Преблага́го Го́спода, я́коже обузда́юща пла́мень, и пою́ща тя́ спаса́юща: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Вмести́лище Бо́жие, и пала́та красна́, и боже́ственный престо́л, на не́мже се́де, угото́ва все́м седе́ние небе́сное, яви́лася еси́, Пречи́стая Де́во. Сего́ ра́ди взыва́ем: Благослове́нная, Яже Бо́га пло́тию ро́ждшая.

Пе́снь 8.

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди, о́браз же Сия́ из огня́ изыма́ше, неопа́льно входя́щия. Юже пое́м, я́вльшуюся Тобо́ю конце́м дне́сь, и превозно́сим во вся́ ве́ки.

Припев: Мучениче Мироне, моли́ Бо́га о нас.

Непобеди́ма зря́ безу́мный мучи́тель, тя́, доблему́дренне, егда́ реме́ние кроя́ще да́же до са́мых косте́й, приложи́ ногтьми́ терза́ти тя́, я́звами нестерпи́мыми уязви́вся неисце́льно.

Припев: Мучениче Мироне, моли́ Бо́га о нас.

Глаго́л Бо́жий с небесе́ во услы́шание всего́ наро́да, му́чениче, принесе́ся тебе́, Ми́роне, ко о́нем тя́ призы́вающь, неизрече́нным поко́ищем, сла́вне, и Ангельским кра́сным ликостоя́нием.

Сла́ва Отцу́ и Сы́ну и Свято́му Ду́ху:

Стоя́л еси́, я́коже Дании́л, посреди́ звере́й, стыдя́щихся блаже́нныя стра́сти и подвиго́в твои́х, преблаже́нне, неизче́тнаго вели́чества, живы́м же гла́сом твои́м заступа́емых.

И ны́не и при́сно и во ве́ки веко́в. Ами́нь.

Богоро́дичен: Устреле́н стрело́ю врага́, ду́шу до конца́ уязви́х, и неисце́льно стражду́: Яже Спа́са Христа́ неизрече́нно ро́ждши, Пренепоро́чная, исцели́ мя и спаси́, упова́ние ненаде́жных.

Песнь 9

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Мучениче Мироне, моли́ Бо́га о нас.

Да бу́дущую сла́ву и несказа́нную добро́ту Христа́ Подвигополо́жника ви́дети сподо́бишися, до́блественне, прекланя́еши вы́ю, и прие́млеши ме́чное усече́ние, и ра́дости му́ченик исполня́еши боже́ственныя полки́.

Припев: Мучениче Мироне, моли́ Бо́га о нас.

Якоже сладкодохнове́нное мѵ́ро, достохва́льне Ми́роне, благово́нствующее сердца́ ве́рных, достохва́льная па́мять твоя́ жела́ющим наста́, в не́йже торжеству́ющих на́с благово́ния боже́ственнаго твои́ми моли́твами испо́лни.

Припев: Мучениче Мироне, моли́ Бо́га о нас.

Твои́ми Аха́ия хва́лится пелена́ми и страда́нии, до́блий Госпо́день страда́льче, мно́жае же кра́сится Ки́зик, многострада́льное те́ло держа́, я́ко бога́тство и́стинное, и исто́чник исцеле́ний, и неду́гов очисти́лище.

Сла́ва Отцу́ и Сы́ну и Свято́му Ду́ху:

Святы́х все́х избра́нный в вы́шних, ма́ти градо́в Сио́н мы́сленный, пе́рвенец, я́коже пи́шет, кра́сная Це́рковь, я́ко му́ченика, о на́с моля́щася, тя́ и́мать му́чеников ве́рх.

И ны́не и при́сно и во ве́ки веко́в. Ами́нь.

Богоро́дичен: Гла́с вопие́м Ти́ вси́ Ангелов, Де́во, пала́то и престо́ле Бо́жий: ра́дуйся! Еюже сподо́бихомся небе́снаго Ца́рствия, дре́вле отринове́ннии тле́нием и добро́ту пе́рвую несмы́сленно погуби́вшии.

Молитва

О святы́й уго́дниче Бо́жий, му́чениче Мироне! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.