30 августа.
Канон второй преподобному Алипию, иконописцу Печерскому
![Преподо́бному Али́пию, иконопи́сцу Пече́рскому Преподо́бному Али́пию, иконопи́сцу Пече́рскому](img_i/080.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Зра́ки изобразу́я святы́х на дщи́цах, си́х благодея́ния спе́шно, я́ко иску́сен худо́жник, всехва́льне Али́пие, написова́л еси́ на скрижа́лех твоего́ се́рдца, и сего́ ра́ди а́ки о́браз боголе́пно укра́шен, свяще́нства благода́тию а́ки зла́том обложи́лся еси́ от Христа́ Бо́га и Спа́са ду́ш на́ших.
Кано́н преподо́бному, гла́с 8.
Пе́снь 1.
Ирмо́с: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.
Припев: Преподобне отче Алипие, моли́ Бо́га о нас.
Пе́снь возсла́ти пода́ждь, Христе́, по́мощь свы́ше рабо́м Твои́м, да принесе́м от те́плыя любве́ хвале́ние, в па́мяти уго́дника Твоего́, Тебе́, Еди́ному Влады́це.
Припев: Преподобне отче Алипие, моли́ Бо́га о нас.
Благода́ти умно́жившейся, процвета́ше ве́ра, и умножа́шеся по́лк преподо́бных на горе́ Пече́рской, и́мже соо́бщник в житии́ хотя́ бы́ти преподо́бный, прии́де послужи́ти Еди́ному Христу́ и Влады́це.
Припев: Преподобне отче Алипие, моли́ Бо́га о нас.
От ю́ности твоея́, вда́лся еси́ роди́тельми свои́ми, преподо́бне, в науче́ние ико́ннаго писа́ния, ему́же усе́рдно прилежа́, напи́совал еси́ в се́рдце свое́м целому́дрие и чистоту́, я́ко от обои́х бы́л еси́ ра́б своему́ Влады́це.
Сла́ва Отцу́ и Сы́ну и Свято́му Ду́ху:
Чу́дное твое́ послуша́ние ди́внаго тя́ чудесе́ зри́теля показа́, о́тче, ви́дел бо еси́ о́браз Влады́чицы, изображе́н нерукотворе́нне, и, от сего́ виде́ния бо́льшею любо́вию к богомы́слию разгоре́вся, се́рдце свое́ уготовля́л еси́, а́ки скрижа́ль, к написа́нию па́мяти о Христе́ Влады́це.
И ны́не и при́сно и во ве́ки веко́в. Ами́нь.
Богоро́дичен: Скрижа́ль, иму́щая Ду́хом Святы́м напи́санный несказа́нно о́браз Ипоста́си Отчия, мое́ злообра́зие, Ма́ти Де́во, во благообра́зие благи́х дея́ний претвори́, да от ны́не угото́влюся послужи́ти Христу́, Бо́гу моему́ и Влады́це.
Пе́снь 3.
Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че Тебе́, Го́споди.
Припев: Преподобне отче Алипие, моли́ Бо́га о нас.
Не́сть Тебе́ подо́бен в бозе́х, Христе́, де́йством бо Твоего́ Пресвята́го Ду́ха изобрази́л еси́ ико́ну Ма́тере Твоея́ нерукотворе́нне, и бы́сть чу́до ве́лие, ему́же самови́дец бе́ преподо́бный Тво́й, Го́споди.
Припев: Преподобне отче Алипие, моли́ Бо́га о нас.
Иже чудеса́ де́йствоваше, То́йжде излете́ от у́ст ико́ны нерукотворе́нныя во о́бразе голуби́ном, Его́же ви́дев облета́юща вну́трь це́ркве, преподо́бный Тво́й, Христе́, вся́ презре́, и ничто́же в ми́ре се́м возлюби́, па́че Тебе́, Го́споди.
Припев: Преподобне отче Алипие, моли́ Бо́га о нас.
Образ сла́вы Бо́жия ви́дев, преподо́бне, а́бие измени́л еси́ мирски́й о́браз, бы́в чернори́зец, до́бре напису́я доброде́тели изображе́ние, е́же и на́м вообрази́ те́плыми моли́твами твои́ми.
Сла́ва Отцу́ и Сы́ну и Свято́му Ду́ху:
От ико́ннаго худо́жества своего́, о́тче, навы́кл еси́ духо́вныя де́тели вообража́ти, до́бре бо убели́в сви́ток се́рдца своего́ сле́зными пото́ки, написа́л еси́ па́мяти о Бо́зе помышле́ние.
И ны́не и при́сно и во ве́ки веко́в. Ами́нь.
Богоро́дичен: Ра́дуйся, сви́тче, Богоневе́стная Де́во, на не́мже пе́рстом Бо́жиим написа́ся Отчее Сло́во, напиши́ на сви́тце се́рдца моего́ па́мять Стра́шнаго Суда́, и гряду́щими муче́нии удержи́ е́ от злы́х, молю́ся.
Седа́лен, гла́с 4:
Бо́жия сла́вы зри́теля и ико́ннаго де́лателя прему́дра, кто́ с на́ми пе́сньми тя́ не восхва́лит, преподо́бне, ви́дел бо еси́ от ча́сти чу́вственне Свята́го Ду́ха, — ны́не же, предстоя́ Вы́шняго престо́лу, не зерца́лом, но лице́м к лицу́ присносу́щную зри́ши сла́ву Бо́жию, ея́же и мы́ да причасти́мся, о́тче Али́пие, моли́твами твои́ми.
Сла́ва, и ны́не, Богоро́дичен:
Предста́тельнице Святе́й Тро́ице, предста́ни на́м ско́ро, в дне́шний де́нь собра́вшимся в хра́ме Твое́м пречестно́м, и да́ждь сла́ву преподо́бных Твои́х зре́ти сла́вящим Тя́, Де́во, моли́твами Твои́ми.
Пе́снь 4.
Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.
Припев: Преподобне отче Алипие, моли́ Бо́га о нас.
Из горы́ призва́л еси́ в сле́д Тебе́ тещи́ преподо́бнаго Твоего́, Христе́, то́йже, мирски́я молвы́ отве́ргся, все́ю душе́ю приложи́ся Тебе́, и во уме́ изобража́ше при́сно си́лу Твою́.
Припев: Преподобне отче Алипие, моли́ Бо́га о нас.
Яко све́тлая звезда́, возсия́л еси́, о́тче, на горе́ Пече́рской, доброде́тели бо от тебе́, я́ко лучи́, простро́шася, блаже́нне, и освеща́ют дне́сь тя́ велича́ющих, те́мже и мы́ прославля́ем благода́ть твою́.
Припев: Преподобне отче Алипие, моли́ Бо́га о нас.
Не мзды́ ра́ди, но ре́вностию дви́жимь, прилежа́л еси́ де́лу своему́, и от сего́ во благоле́пие неща́дно раздава́л еси́ це́рквам Бо́жиим, я́ко да вси́, зря́ще на ико́ны твоя́, в любо́вь Бо́жию сердца́ своя́ обраща́ют.
Сла́ва Отцу́ и Сы́ну и Свято́му Ду́ху:
До́бр де́латель яви́лся еси́, блаже́нне, виногра́да Христо́ва, я́ко сво́йственно тебе́ со апо́столом глаго́лати: не ту́не хле́б ядо́х, и́бо ру́це мои́ мне́ и ине́м послужи́сте. Те́мже прия́л еси́ от Бо́га дина́р, и с благи́ми рабы́ сла́ву присносу́щную зри́ши.
И ны́не и при́сно и во ве́ки веко́в. Ами́нь.
Богоро́дичен: От чи́стаго сокро́вища чре́ва Твоего́ Дина́р яви́вшая ми́ру, искупи́ла еси́ те́м все́х от перво́роднаго до́лга, Ма́ти Бо́жия, к Тебе́ прибега́ю, искупи́ мя от мы́сленных заимода́вцов, да при́сно сла́влю бла́гость Твою́.
Пе́снь 5
Ирмо́с: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.
Припев: Преподобне отче Алипие, моли́ Бо́га о нас.
Утренюющих славосло́вием к тебе́ от уны́ния возста́ви, о́тче, и от мра́чных де́л к све́ту богоразу́мия моли́твами твои́ми возведи́ умы́ на́ша, ско́раго бо тебе́ на по́мощь поспе́шника зна́ем.
Припев: Преподобне отче Алипие, моли́ Бо́га о нас.
От де́ла руку́ твое́ю, о́тче, в че́сть Еди́наго Бо́га, в трича́стное отлуча́л еси́ разделе́ние: ико́нному тре́бованию, в монасты́рское де́лание и в ми́лостыню ни́щим, и си́м стяжа́л еси́ лу́чшее, присножела́емое рая́ селе́ние.
Припев: Преподобне отче Алипие, моли́ Бо́га о нас.
День ручны́м де́ланием, но́щь же бде́нием, моли́твою и поклоне́нием провожда́л еси́ всегда́, блаже́нне, и та́ко, возложи́в ру́ку на ра́ло, упра́влен бы́л еси́ в Ца́рство Бо́жие. Та́мо помяни́ и на́с хода́тайством твои́м к Бо́гу.
Сла́ва Отцу́ и Сы́ну и Свято́му Ду́ху:
Возсия́ со́лнце и ви́де твоя́ труды́, свя́те, и́бо смире́ние, нестяжа́ние, чистоту́, терпе́ние, по́ст любо́вию ко все́м растворя́л еси́, и си́м восхожде́нием возше́л еси́ на высоту́ богомы́слия, и небе́снаго дарова́ния сподо́бился.
И ны́не и при́сно и во ве́ки веко́в. Ами́нь.
Богоро́дичен: Утро мы́сленное, произве́дшая в ми́р вели́кое Со́лнце, озари́ на́ш у́м и се́рдце, и сы́ны Све́ту покажи́ ны, мо́лимтися, Безневе́стная Де́во, Ты́ бо еси́ просвеще́ние и упова́ние на́ше.
Пе́снь 6.
Ирмо́с: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.
Припев: Преподобне отче Алипие, моли́ Бо́га о нас.
Ри́зу Ангельскаго о́браза украси́в ша́рами и́ноческих трудо́в, возше́л еси́ на высо́кий степе́нь свяще́нства, сове́том наста́вника своего́, и на то́м стоя́ а́ки свети́ло, све́том твои́х де́л мно́гих просвети́л еси́.
Припев: Преподобне отче Алипие, моли́ Бо́га о нас.
Ри́зу креще́ния окаля́вшему мне́ греха́ ка́лом, да́ждь умиле́ние, свя́те, моли́твами твои́ми, да в не́м исперу́ и чи́ст явлю́ся лицу́ Бо́жию: се́ бо предстою́, песносло́вя хвалу́ Твою́ бре́нными устна́ми.
Припев: Преподобне отче Алипие, моли́ Бо́га о нас.
Оде́жду свяще́нства прие́мь, по подо́бию Вели́каго Архиере́я, Сы́на Бо́жия, вше́л еси́, о́тче, во вну́тренняя заве́сы, приноси́ти же́ртву Поже́ршемуся за гре́х всего́ ми́ра, твои́ми моли́твами ны́не, а́ки же́ртвою, и о на́с, свя́те, Творца́ уми́лостиви.
Сла́ва Отцу́ и Сы́ну и Свято́му Ду́ху:
Оде́ян сы́й оде́ждою свяще́нства, бо́льших дарова́ний сподо́бился еси́, я́ко и оде́янных прокаже́нием моли́твами твои́ми исцеля́л еси́, и на́с, мы́сленне неду́гующих, си́ми исцели́, мо́лимтися, преблаже́нне.
И ны́не и при́сно и во ве́ки веко́в. Ами́нь.
Богоро́дичен: Уязви́вших на́с грехолю́бия стрело́ю, уязви́, Пречи́стая Де́во, и побе́гнут, студо́м пораже́нни, де́монския полки́, Ты́ бо еси́ бесо́м стру́п неисце́льный.
Конда́к, гла́с 2:
От ю́ности Боже́ственное в себе́ име́я начерта́ние, вда́н бы́л еси́ в науче́ние ико́ннаго писа́ния; и внегда́ небеси́ подо́бная Богоро́дицы писа́шеся це́рковь, ты́ та́можде посо́бствовал, и ви́дел еси́ Ду́ха Свята́го осия́ние, от Него́же прия́л еси́ чуде́с де́йство, я́ко ико́ны твоя́ чудотворя́ху, те́м тя́ чте́м и ублажа́ем, чу́дне Али́пие.
Пе́снь 7.
Ирмо́с: Отроцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.
Припев: Преподобне отче Алипие, моли́ Бо́га о нас.
Де́тски игра́юща сумне́нием в ве́ре, пра́ведно ка́знь Бо́жия пости́же: покры́ бо прока́за лице́ его́, сего́ ты́, о́тче, исцели́л еси́, и отъи́де, поя́: благослове́н Бо́г оте́ц на́ших.
Припев: Преподобне отче Алипие, моли́ Бо́га о нас.
Испове́давшему гре́х неве́рствия своего́, пе́рвее приложи́л еси́, блаже́нне, покая́ния пла́стырь, и, души́ исцеле́вшей, исцеле́ и лице́ пома́занием ва́п твои́х, и то́й о тебе́ воспетъ́: благослове́н Бо́г оте́ц на́ших.
Припев: Преподобне отче Алипие, моли́ Бо́га о нас.
Иже пе́рвее обоня́ния грехо́м острупи́вся, по сове́ту диа́волю отча́яся спасе́ния наде́жды. Се́ то́й па́ки, твои́м, свя́те, уче́нием к Бо́гу обрати́вся, исцеле́н бы́сть, и избы́в обои́х струпо́в, воззва́: благослове́н Бо́г оте́ц на́ших.
Сла́ва Отцу́ и Сы́ну и Свято́му Ду́ху:
Твои́м, преподо́бне, дивя́щеся чудесе́м мно́гим, взыва́ем согла́сно: ра́дуйся, Елисе́е но́вый, неве́рующаго исцели́вый от прока́зы, я́ко Неема́на, и о тебе́ пе́снь о́троческую воспе́т: благослове́н Бо́г оте́ц на́ших.
И ны́не и при́сно и во ве́ки веко́в. Ами́нь.
Богоро́дичен: Безобра́зие души́ моея́ кто́ испра́вит, а́ще не Ты́, Ма́ти Бо́жия, ша́рами бла́гости Твоея́ тоя́ лице́ в благообра́зие претвори́ши? И благоле́пие прие́м, воспою́: ра́дуйся, Образу́ющая живописа́тельне челове́ческий о́браз.
Пе́снь 8.
Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.
Припев: Преподобне отче Алипие, моли́ Бо́га о нас.
Яви́ тя, о́тче, все́х Созда́тель на горе́ Пече́рской доброцвету́щее ко исцеле́нию дре́во, плода́ми бо твои́х моли́тв все́м к тебе́ приходя́щим подава́л еси́ исцеле́ние неоску́дно, и отхожда́ху здра́вы, превознося́ще Го́спода во ве́ки.
Припев: Преподобне отче Алипие, моли́ Бо́га о нас.
Незло́бие се́рдца твоего́ не лиши́ тя, преподо́бне, вели́ких дарова́ний, никогда́же бо огорчи́лся еси́ на оскорбля́ющих тя́, ниже́ возда́л еси́ зло́ за зло́, те́м и просла́ви тя́ Христо́с зде́ и та́мо во ве́ки.
Припев: Преподобне отче Алипие, моли́ Бо́га о нас.
Сребролю́бия омраче́ннии тмо́ю облича́ху тя́ пред челове́ки, но Бо́г изведе́, я́ко све́т, пра́вду твою́ и незло́бие твое́, я́ко полу́дне, ископа́вшии же тебе́ я́му впадо́ша в ню́, и сту́д и́х помина́ют вси́ во ве́ки.
Сла́ва Отцу́ и Сы́ну и Свято́му Ду́ху:
Тро́ичен: Седми́ дарова́нии де́йствуяй в Тро́ице Еди́ный Бо́же, изобрази́тися седми́м ико́нам повеле́л еси́ нерукотворе́нне, и яви́л еси́ преподо́бнаго, иму́щаго се́дмь Паракли́та Твоего́ даро́в, сия́ и на́м пода́ждь, всеще́дрый Царю́, да превозно́сим Тя́ во ве́ки.
И ны́не и при́сно и во ве́ки веко́в. Ами́нь.
Богоро́дичен: От все́х дарова́ний прие́мшая истка́нную ри́зу, ря́сны златы́ми оде́яна предста́ла еси́ Тро́ице Живонача́льней. Ста́ни у́бо, возде́вши пречи́стеи ру́це Твои́, и о на́с, благотворе́ния обнаже́нных, помоли́ся, Ты́ бо еси́, Пренепоро́чная, покрыва́ющая грехи́ на́ша.
Песнь 9
Ирмо́с: Тя́, неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых Си́л, немо́лчными славословле́нии велича́ем.
Припев: Преподобне отче Алипие, моли́ Бо́га о нас.
Тя́, о́тче, прославля́ющаго, просла́ви Бо́г, я́ко твоего́ писа́ния ико́нам никогда́же о́гнь одолева́ше, но пребыва́ху це́лы от пожа́ра невреди́мы, я́же чудоде́ющия ви́дяще, о тебе́ немо́лчно славословле́нии Христа́ велича́ем.
Припев: Преподобне отче Алипие, моли́ Бо́га о нас.
Отвсю́ду стека́хуся лю́дие ви́дети пресла́вное чу́до, я́ко вся́ ина́я пояде́ пла́мень о́гненный, твоего́же писа́ния ико́н, ника́коже вреди́. Еже и мы́, слы́шаще чудоде́йствующаго в тебе́ Бо́га, славословле́нии велича́ем.
Припев: Преподобне отче Алипие, моли́ Бо́га о нас.
Храни́л еси́ незло́бие и ви́дел еси́ правоту́, житие́ свое́ провожда́я во вся́кой святы́ни, те́мже отвсю́ду Бо́г тя́ прославля́ше, и изыма́ше от вся́кия напа́сти; сея́ и на́с изба́ви твои́ми моли́твами, свя́те, да вы́ну тя́ пе́сньми велича́ем.
Сла́ва Отцу́ и Сы́ну и Свято́му Ду́ху:
Ра́дуется гра́д Росто́в, содержа́й ико́ну, ма́нием Бо́жиим напи́санну, и я́ко многоце́нным сокро́вищем искупу́ется от все́х страсте́й, ю́же лобыза́юще, помина́ет, коли́ко Бо́г де́йствоваше тобо́ю, блаже́нне. Сие́ чудоде́йствие и мы́ дне́сь чту́ще, удивля́емся и славословле́нии велича́ем.
И ны́не и при́сно и во ве́ки веко́в. Ами́нь.
Богоро́дичен: Сто́лп кре́пости иму́ще Тя́, раби́ Твои́, Богоро́дице Де́во, от лица́ вра́г на́ших гони́ми, к Тебе́ прибега́ем, и припа́дающе, мо́лимся: сохраня́й на́с, в беда́х су́щих, Ты́ бо еси́ сто́лп на́м кре́пок от лица́ вра́жия и стена́ необори́ма.
Свети́лен:
При́сно храня́й тя́, преподо́бне, в ско́рбех, прии́де за тя́ пред лице́м твои́м, Богома́тере ико́ну написа́ти, ю́же в три́ часа́ изобрази́в све́тло, даде́ во благоле́пие пречи́стому хра́му на пра́здник, тебе́ же поя́т во хра́м Го́рний с су́щими от ве́ка святы́ми пра́здновати, иде́же ны́не гла́сом ра́дости пра́зднуяй, помяни́ и на́с, Али́пие, о́тче блаже́ннейший.
Сла́ва, и ны́не, Богоро́дичен:
Хра́м су́щи, Вы́шняго десни́цею созда́нный, хра́м души́ моея́, грехо́м па́дший, возста́ви, Ма́ти Бо́жия, обнови́ Твои́м посеще́нием, и да́ждь без ле́ности сла́ву Тебе́ принося́щим, непреста́нно Тебе́ воспе́ти: ра́дуйся, Хра́ме Госпо́день, в прибе́жище христиа́ном со́зданный.
Молитва
О, священная главо, преподобне отче, преблаженне авво Алипие, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподо́бному Али́пию, иконопи́сцу Пече́рскому Преподо́бному Али́пию, иконопи́сцу Пече́рскому](img_b/080.jpg)