29 августа.

Канон преподобному Роману Дюнискому, чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 1:

Пусты́нный жи́тель, и в телеси́ Ангел, и чудотво́рец яви́лся еси́, богоно́се о́тче на́ш Рома́не: посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою притека́ющим ти́. Сла́ва Да́вшему ти́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н преподо́бнаго, творе́ние Никола́я, епи́скопа Охридскаго, на 4, гла́с 6:

Пе́снь 1.

Ирмо́с: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобне отче Романе, моли́ Бо́га о нас.

Спа́са Христа́ возлюби́в, в пусты́нную го́ру всели́лся еси́, хотя́ очи́стити и украси́ти ду́шу свою́, и удосто́ити ю́ ко бра́ку ве́чному с Сы́ном Царя́ Бо́га. [Два́жды.]

Сла́ва Отцу́ и Сы́ну и Свято́му Ду́ху:

Велича́йшим терпе́нием вооружи́вся, на бра́нь вступи́л еси́ с по́лчищи де́монов, и вся́ я́ победи́л еси́, си́лою Креста́ Христо́ва.

И ны́не и при́сно и во ве́ки веко́в. Ами́нь.

Богоро́дичен: Ева согреши́вши, роди́ Ка́ина братоуби́йцу, Ты́ же, Пречи́стая, не согреши́вши, родила́ еси́ Спа́са ро́ду челове́ческому, хода́тайством Твои́м спаса́емся.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобне отче Романе, моли́ Бо́га о нас.

Тма́ де́монов ополча́шеся на тя́, преподо́бне, ты́ же, во́плем и воздыха́нием мно́гим, вопия́ше ко Христу́ Победи́телю, Иже изба́ви тя́ и просла́ви. [Два́жды.]

Сла́ва Отцу́ и Сы́ну и Свято́му Ду́ху:

Имя Иису́са Сладча́йшаго непреста́нно име́л еси́ в се́рдцы и на язы́це, я́коже ме́д в го́рести жи́зни свое́й, до́ндеже всю́ го́ресть изгна́л еси́, и подо́бно Па́влу глаго́лати возмо́же: а́з же не живу́, но Христо́с во мне́.

И ны́не и при́сно и во ве́ки веко́в. Ами́нь.

Богоро́дичен: Раю́ стреми́лася еси́, Ра́й во утро́бе Свое́й носи́ла еси́, в Раи́ всели́лася еси́, о Пречи́стая Де́во, моли́ Сы́на Свое́го Ра́й и на́м дарова́ти.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобне отче Романе, моли́ Бо́га о нас.

Освяти́в ду́шу и пло́ть свою́ Ду́хом Святы́м, Рома́не преподо́бне, ты́ ны́не освяща́еши и на́с моли́твами твои́ми. [Два́жды.]

Сла́ва Отцу́ и Сы́ну и Свято́му Ду́ху:

Му́ки безчи́сленныя отгоня́еши от люде́й твои́х: слепи́и ви́дят, глуси́и слы́шат, хро́мии хо́дят, бесни́и очища́ются, моли́твами твои́ми, Рома́не преподо́бне.

И ны́не и при́сно и во ве́ки веко́в. Ами́нь.

Богоро́дичен: Анну пра́ведную, ма́терь Свою́, свободи́ла еси́ от кля́твы безча́дия и, я́коже Ма́ти Бо́га на́шего, свободи́ла еси́ на́с от прокля́тия греха́.

Пе́снь 5

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобне отче Романе, моли́ Бо́га о нас.

Ни гла́д, ни нагота́, ни нападе́ние бесо́в не возмого́ша тя́ разлучи́ти от любве́ Христо́вы, ны́не же соедине́н со Христо́м ве́чно на небеси́, моли́ся о на́с, мо́лим тя́.[Два́жды.]

Сла́ва Отцу́ и Сы́ну и Свято́му Ду́ху:

Егда Ла́зарь, кня́зь пресла́вный, позна́ си́лу чудоде́ющую от моще́й твои́х, созда́ хра́м над гро́бом твои́м, иде́же вси́ собира́емся, воспева́ти чудеса́ твоя́, Рома́не свя́те.

И ны́не и при́сно и во ве́ки веко́в. Ами́нь.

Богоро́дичен: Сы́на без отца́ родила́ еси́, рожде́ннаго от Отца́ без ма́тере, духоно́сная Де́во, честне́йшая небе́сных си́л; покры́й на́с покро́вом Твои́м.

Пе́снь 6.

Ирмо́с: Ят бы́сть, но не удержа́н в пе́рсех ки́товых Ио́на: Тво́й бо о́браз нося́, Страда́вшаго и погребе́нию Да́вшагося, я́ко от черто́га, от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Припев: Преподобне отче Романе, моли́ Бо́га о нас.

Послу́шал еси́ Повеле́вшаго: а́ще кто́ хо́щет по Мне́ ити́, —ты́ оста́вил еси́ ро́д сво́й и до́м отца́ своего́, и презре́в вся́ мирска́я, после́довал еси́ Христу́. [Два́жды.]

Сла́ва Отцу́ и Сы́ну и Свято́му Ду́ху:

Адския си́лы устраша́ются до ны́не, от хра́ма твоего́ и от и́мене твоего́, и бе́гают, Рома́не чудотво́рче.

И ны́не и при́сно и во ве́ки веко́в. Ами́нь.

Богоро́дичен: Све́т от Све́та, Бо́га Истинна от Бо́га Истинна, вмести́ла еси́ в Себе́, Де́во, ши́ршая небе́с, я́коже и́стинную Свиде́тельницу Его́ рожде́ния, и страда́ния, и воскресе́ния, мо́лим, спаси́ ро́д христиа́нский.

Конда́к преподо́бнаго, гла́с 8:

Кре́ст Христо́в возлюби́в, о́тче преподо́бне, кре́ст сво́й на ся́ взя́л еси́, кре́стным зна́мением вся́ си́лы сопроти́вныя победи́в, вене́ц от Христа́ прия́л еси́, крестоно́сный Рома́не.

Пе́снь 7.

Ирмо́с: Отроцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди Бо́же оте́ц на́ших.

Припев: Преподобне отче Романе, моли́ Бо́га о нас.

Исцели́теля тя́ почита́ем и учи́теля мона́хов прославля́ем, Рома́не всеблаже́нне, не преста́й исцеля́ти на́с от страсте́й и похоте́й, и учи́ти на́с стра́ху Госпо́дню.[Два́жды.]

Сла́ва Отцу́ и Сы́ну и Свято́му Ду́ху:

Но́вый по́двиг совокупи́л еси́ дре́внему о́пыту отце́в, и та́ко подтверди́л еси́ и́стинный пу́ть спасе́ния, и вене́ц вели́ких отце́в Це́ркве получи́л еси́, Рома́не о́тче на́ш.

И ны́не и при́сно и во ве́ки веко́в. Ами́нь.

Богоро́дичен: Ада́м но́вый из Тебе́ яви́ся, Пречи́стая, Ада́ма ста́раго и ро́д его́ искупля́я от греха́ и сме́рти, сего́ ра́ди Ты́ еси́ Хода́таица спасе́ния на́шего.

Пе́снь 8.

Ирмо́с: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное, и совоку́плени, и́мже, не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Припев: Преподобне отче Романе, моли́ Бо́га о нас.

Ра́ны мно́гия от де́монов прия́л еси́, Бо́г же дарова́ ти́ си́лу благода́тную, ра́ны исцеля́ти неду́жных и де́моны му́чимых, Рома́не благода́тный. [Два́жды.]

Сла́ва Отцу́ и Сы́ну и Свято́му Ду́ху:

Огнь страсте́й погаси́л еси́ стра́хом Госпо́дним, бде́нием и воздержа́нием и, я́ко безстра́стен Ангел, жи́л еси́ между́ людьми́, все́м помога́яй и вся́ к покая́нию призыва́яй, преди́вный Бо́жий святи́телю Рома́не.

И ны́не и при́сно и во ве́ки веко́в. Ами́нь.

Богоро́дичен: Дарода́тельнице Богоро́дице, испроси́ на́м от Сы́на Твоего́ и Бо́га да́ры сия́: смире́ние ума́, чи́стое се́рдце, ми́лостивую ру́ку, да удосто́имся любве́ Христо́вы и Ца́рствия Его́ Небе́снаго.

Песнь 9

Ирмо́с: Стра́нствия Влады́чня и безсме́ртныя трапе́зы на го́рнем ме́сте высо́кими умы́, ве́рнии, прииди́те наслади́мся, возше́дша Сло́ва, от Сло́ва научи́вшеся, Его́же велича́ем.

Припев: Преподобне отче Романе, моли́ Бо́га о нас.

Наказу́яй та́ти и разбо́йники в святе́й оби́тели твое́й, ты́ устраши́л еси́ гре́шники, исцеля́я же и помога́я ве́рующим, ты́ яви́л еси́ Бо́га пра́вды и ми́лости, ревни́телю Бо́жий подо́бен Илии́, Рома́не, о́тче на́ш.[Два́жды.]

Сла́ва Отцу́ и Сы́ну и Свято́му Ду́ху:

Авва Отче! — Вопия́л еси́ к Бо́гу в теснота́х и ско́рбех свои́х, и Оте́ц Небе́сный вчисли́ тя́ в сы́ны не́ба, явля́я ми́ру тобо́ю си́лу и сла́ву Свою́, боже́ственный Рома́не.

И ны́не и при́сно и во ве́ки веко́в. Ами́нь.

Богоро́дичен: Ши́ршая небе́с показа́лася еси́, Де́во Избра́нная, егда́ Бо́г Сло́во хотя́ше роди́тися я́ко челове́к, да спасе́т ро́д челове́ческий. Сего́ ра́ди прославля́ем Тя́, я́ко ле́ствицу небе́сную и устраше́ние де́монов, и ра́дование ду́ш на́ших.

Молитва

О свяще́нная главо́, преподо́бне о́тче, преблаже́нне а́вво Романе, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.