29 августа.

Канон Нерукотворенному образу Господа нашего Иисуса Христа (второй)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 2

Пречи́стому Твоему́ о́бразу покланя́емся, Благи́й,/ прося́ще проще́ния прегреше́ний на́ших, Христе́ Бо́же:/ во́лею бо благоволи́л еси́ пло́тию взы́ти на Крест,/ да изба́виши я́же созда́л еси́ от рабо́ты вра́жия./ Тем благода́рственно вопие́м Ти:/ ра́дости испо́лнил еси́ вся, Спа́се наш,// прише́дый спасти́ мир.

Други́й кано́н, гла́с 6.

Ирмос: Волно́ю морско́ю, Скры́вшаго дре́вле гони́теля мучи́теля — под земле́ю скры́ша, спасе́нных о́троцы; но мы́, я́ко отрокови́цы, Го́сподеви пои́м, сла́вно бо просла́вися.

Припев: Слава Тебе, Боже наш, слава Тебе.

Свы́ше благода́ть Боже́ственная, ми́р ны́не земны́й озаря́ющи, свои́ми дарова́нии наполня́ет воспева́ющия: Го́сподеви пои́м, сла́вно бо просла́вися.

Припев: Слава Тебе, Боже наш, слава Тебе.

Подоба́ше принести́ся к Ца́рствующему все́ми гра́ды, небесе́ и земли́ Царя́, о́браза начерта́нию, е́же о́н, вопло́щся самоде́льно, омочи́, царе́й христолюби́вых поспеше́ньми.

Сла́ва Отцу́ и Сы́ну и Свято́му Ду́ху:

Богоза́рныя лучи́ исполня́ху, все́ уясня́юще и украша́юще челове́ческое существо́, от о́браза исходя́ще, его́же покрыва́ют серафи́ми сла́вою Христо́вою.

И ны́не и при́сно и во ве́ки веко́в. Ами́нь.

Богоро́дичен: Возвраща́ема к земли́ и́же от земли́, Богоблагода́тная, пре́лестию врага́, на Тя́ бо соше́дшаго вопло́щши Бо́га па́че ума́, от земли́ взе́мши, к небеси́ вознесла́ еси́.

Пе́снь 3.

Ирмос: Тебе́, на вода́х пове́сившаго всю́ зе́млю неодержи́мо, тва́рь, ви́девши на Ло́бнем ви́сима, у́жасом мно́гим содрога́шеся, не́сть свя́т, ра́зве Тебе́, Го́споди, взыва́ющи.

Припев: Слава Тебе, Боже наш, слава Тебе.

Тебе́ сотво́ршаго челове́ка по о́бразу пе́рвее, в о́ньже вообрази́ся а́бие за милосе́рдие, прие́мша вои́стинну подо́бие неизме́нное, со Ангелы, Христе́, сла́вим.

Припев: Слава Тебе, Боже наш, слава Тебе.

Ты́ жела́ющим благопристу́пен, и́щущим же все́м благопослушли́в, Ще́дре, за мно́гую благосты́ню, ея́же ра́ди приближе́нием, Влады́ко, красоте́ Твоего́ раче́ния чуди́мся.

Сла́ва Отцу́ и Сы́ну и Свято́му Ду́ху:

Уста́вил еси́ ме́стному кня́зю жела́ния, е́же к Тебе́ любо́вь, вку́пе же и неду́г, ти́хим Тво́им пода́нием, вседе́тельною держа́вою Твое́ю, ви́девшу Тя́, Спа́се, во изображе́нии.

И ны́не и при́сно и во ве́ки веко́в. Ами́нь.

Богоро́дичен: Ме́сто Тя́ Госпо́дне, Всепе́тая, Дави́д преднаписа́, хотя́щее яви́тися, Иже бо ника́коже вмести́мый во Твое́ чре́во вмести́ся и облага́ется пло́тию ве́щною Невеще́ственный.

Седа́лен, гла́с 4. Подо́бен: Вознесы́йся.

Сше́дый с небесе́ за милосе́рдие ми́лости, Благоутро́бне Спа́се, пло́ти Твоея́ пресвяты́я дне́сь пречи́стый зра́к гра́ду чту́щему Тя́, и лю́дем христоимени́тым сокро́вище по́дал еси́, я́ко тве́рдо всеору́жие, от него́же почерпа́юще освяще́ние, сего́ ве́рою те́пле прии́мем.

Пе́снь 4.

Ирмос: На Кресте́ Твое́ Боже́ственное истоща́ние прови́дя Авваку́м, ужа́сся, вопия́ше: Ты́ си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.

Припев: Слава Тебе, Боже наш, слава Тебе.

Иже ца́рским благоле́пием обложе́ни ны́не, и́же от Него́же ца́рствовати учини́шася, сла́вяще, благоле́пное от подо́бия виде́ние Его́ прие́млют.

Припев: Слава Тебе, Боже наш, слава Тебе.

Иже проро́ком жада́емый пе́рвее Спа́сов зра́к, ца́рие зря́т, все́ми ублажа́емый, в самоде́йствии нерукотво́рне воображе́нный.

Сла́ва Отцу́ и Сы́ну и Свято́му Ду́ху:

Кня́зи вси́ и судии́ земли́, благослови́те Христа́, с первосвяще́нники и святи́тели дне́сь и со все́ми людьми́, и́же Того́ зре́ния сподо́бленнии.

И ны́не и при́сно и во ве́ки веко́в. Ами́нь.

Богоро́дичен: Присносу́щнаго Тя́ Ма́терь Христа́ челове́ком позна́вшим блаже́нство небе́сное испроси́, и́же Твое́ неизрече́нное рождество́ ве́рно песносло́вят.

Пе́снь 5

Ирмос: К Тебе́ у́тренюю, милосе́рдия ра́ди Себе́ истощи́вшему непрело́жно и до страсте́й безстра́стно прекло́ншемуся, Сло́ве Бо́жий: ми́р пода́ждь ми́, па́дшему, Человеколю́бче.

Припев: Слава Тебе, Боже наш, слава Тебе.

Не в багряни́це, ни в червлени́це, ни в венце́ че́стне, боже́ственнии венцено́сцы, но о Го́споде Бо́зе крася́щеся, ра́дуются. Его́же добро́ту зря́ще, украша́ются.

Припев: Слава Тебе, Боже наш, слава Тебе.

На пра́ведныя лю́ди о́чи Госпо́дни царя́, и у́ши на моли́тву царе́й благоче́стно му́дрствующих, чту́щим Его́ подо́бие благоле́пия самопи́санное.

Сла́ва Отцу́ и Сы́ну и Свято́му Ду́ху:

Ны́не зря́ще неизме́ннаго Бо́га и Спа́са и неизчерта́емаго зра́ка ви́д, челове́ческое ви́дети предстоя́т, я́ко одушевле́ну притека́ти и просвети́тися.

И ны́не и при́сно и во ве́ки веко́в. Ами́нь.

Богоро́дичен: Ни чистоту́ поколеба́вши чи́стым Твои́м рождество́м, и Ма́ти позна́лася еси́, а́ще и ма́терское не подъя́ла: обоя́ бо на Тебе́, Богома́ти, соверша́ше Боже́ственное хоте́ние.

Пе́снь 6.

Ирмос: Ят бы́сть, но не удержа́н в пе́рсех ки́товых Ио́на: Тво́й бо о́браз нося́, Страда́вшаго и погребе́нию Да́вшагося, я́ко от черто́га, от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Припев: Слава Тебе, Боже наш, слава Тебе.

Содержи́мыя вре́дом челове́ки и подпа́дшия в тле́ние, не презре́ стерпе́ти, Соде́телю и Обнови́телю ро́да, но излия́в Себе́ Вы́шний и я́влься в подо́бие мое́ и смире́ние, назда́ прему́дре, добро́ту пода́в ми́ первообра́зную.

Припев: Слава Тебе, Боже наш, слава Тебе.

Неве́дущу о Ца́рствии Твое́м небе́снем, к нему́же на́с, Благи́й, тле́нныя и до́лу лежа́щия, возведе́, Иже невеще́ственными херуви́мы непристу́пен, сни́де же ми́ до а́да, Твоего́ апо́стола Авгарю царю́, Христе́, посла́л еси́, та́инство уверя́юща.

Сла́ва Отцу́ и Сы́ну и Свято́му Ду́ху:

Ви́дев Твоего́, Сло́ве и Му́дросте Всеси́льнаго Отца́, неви́димаго Бо́га, неотсту́пне пре́жде ве́к, о́браза всечеловекозра́чна, дивля́шеся, Бо́га ве́дый, пло́ть и кро́вь и ду́шу у́мну прие́мша Тя́, ме́стный нача́льник.

И ны́не и при́сно и во ве́ки веко́в. Ами́нь.

Богоро́дичен: Неве́рием о Боже́ственней, сотво́ршим его́, Де́во, стра́шней за́поведи родонача́льника безсме́ртна, всегуби́тель премени́л е́сть, жи́зни же Пода́теля су́щим ро́ждши, нетле́нием на́с Еди́на си́лою утверди́ла еси́.

Конда́к, гла́с 2.

Неизрече́ннаго и Боже́ственнаго Твоего́ к челове́ком смотре́ния, неопи́санное Сло́во Отчее, и о́браз непи́санный, и богопи́санный победи́телен, ве́дуще нело́жнаго Твоего́ воплоще́ния, почита́ем, того́ лобыза́юще.

Икос:

Уверя́я челове́ком Госпо́дь вочелове́чения Своего́ та́йну ужа́сную, самопису́ет богому́жный Сво́й о́браз на убру́се, и первообра́зное у́бо возне́с от горы́ Елео́нския, на престо́ле споражда́ет Отчи, покланя́тися от безтеле́сных Ангел. Подо́бию же первообра́знаго на́м дарова́ покланя́тися: Его́же объе́млюще душе́ю же и се́рдцем, почита́ем, того́ лобыза́юще.

Пе́снь 7.

Ирмос: Неизрече́нное чу́до: в пещи́ Изба́вивый преподо́бныя о́троки из пла́мене во гро́бе ме́ртв, бездыха́нен полага́ется, во спасе́ние на́с, пою́щих: Изба́вителю Бо́же, благослове́н еси́.

Припев: Слава Тебе, Боже наш, слава Тебе.

К боговиде́нию о́чи угото́вим и досто́йно потщи́мся о́браз ви́дети Христо́в все́м честны́й, во спасе́ние на́м, пою́щим: Изба́вителю Бо́же, благослове́н еси́.

Припев: Слава Тебе, Боже наш, слава Тебе.

Якоже на Фаво́рскую го́ру возноси́ми, восхо́дными очесы́ ума́ зарю́ све́тлу в боговочелове́чении Христо́ве ви́дяще, единоипоста́сне, в дву́ же естеству́, богосло́вяще Его́ во ве́ки.

Сла́ва Отцу́ и Сы́ну и Свято́му Ду́ху:

Пра́зднующих и веселя́щихся, усе́рдно же о Го́споде все́х гла́с, пе́ние на́ше да соста́вится и да испо́лнится, согла́сно пою́щих: Изба́вителю Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: В де́вства я́ко светла́ еди́на добро́тах Соде́теля была́ еси́ Пита́тельница, скве́рну на́шу всю́ очи́стила еси́, Богороди́тельнице, су́щую от греха́, вопию́щих: Бо́же, благослове́н еси́.

Пе́снь 8.

Ирмос: Сто́лп зло́бы богопроти́вныя боже́ственнии о́троцы обличи́ша, на Христа́ же шата́ющееся беззако́нных собо́рище сове́тует тще́тная, уби́ти поуча́ется живо́т Держа́щаго дла́нию. Его́же вся́ тва́рь благослови́т, сла́вящи во ве́ки.

Припев: Слава Тебе, Боже наш, слава Тебе.

По Боже́ственному естеству́, Спа́се, сы́й все́м неви́димь, по челове́ческому же, а́ще и ви́димь Челове́к, пи́сан без шаро́в, вообрази́в Себе́ просвеще́нием Твоего́ лица́ самозри́маго, Твоего́ раба́ не лиши́л еси́, пою́ща: благослови́те, вся́ дела́ Госпо́дня, Го́спода.

Припев: Слава Тебе, Боже наш, слава Тебе.

Самоначерта́нное первообра́зное Спа́са изображе́ние подобозра́чно, богоде́льный о́браз зря́ще, и́же все́ми владя́щий избра́нный, со благогове́нием и че́стию, я́ко наде́ющиися на́нь, покрыва́ются и утвержда́ются.

Сла́ва Отцу́ и Сы́ну и Свято́му Ду́ху:

Па́че Моисе́я Богови́дца, богопи́санныя скрижа́ли прие́мшаго, возвели́чился еси́, честны́й местонача́льниче, прия́т честно́е посла́ние Бо́жия Сло́ва, блажа́щее тя́, благоче́стию ве́ровавша, и́же ника́коже ви́де чудоде́йствия.

И ны́не и при́сно и во ве́ки веко́в. Ами́нь.

Богоро́дичен: Во двою́ естеству́ несме́сно, Богома́ти, еди́ну Ипоста́сь воплоще́ннаго от пречи́стых Твои́х крове́й ви́дяще, Бо́га же и Челове́ка испове́дуем, Того́же от Отца́ Безле́тна пре́жде ве́к, безстра́стно и неслия́нно рожде́нна.

Песнь 9

Ирмос: Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу, Тя́ велича́ем.

Добро́та недомы́слима вои́стинну, красо́т красне́йши па́че естества́, се́ зри́тся досто́йно жела́ющим, притеце́м, ли́ца освяща́юще.

Стена́ и утвержде́ние держа́вно, ору́жие ми́рно, забра́ло необори́мо, невреди́мо все́ми хитростьми́ сопроти́вными, огражде́ние гра́ду на́шему дарова́ся.

Сла́ва Отцу́ и Сы́ну и Свято́му Ду́ху:

Образе неизме́нный Оте́чь, Сия́ние сла́вы Присносу́щнаго Све́та, печа́ть Вы́шняго, Сло́ве, Си́ло и Му́дросте, Тя́ богосло́вствующим благопремени́тель бу́ди.

И ны́не и при́сно и во ве́ки веко́в. Ами́нь.

Богоро́дичен: Уста́вила еси́ поноше́ние жена́м, взяла́ еси́ от челове́к и потреби́ла еси́ кля́тву, источи́ла еси́ все́м ра́дость и благослове́ние, Де́во Пречи́стая Богороди́тельнице.

Свети́лен.

Све́т невече́рний, Христе́, просвети́ на́с лица́ Твоего́ зра́ком, и све́тлости святы́х сподо́би, егда́ ся́деши возда́ти кому́ждо по дело́м его́, моли́твами ро́ждшия Тя́ Богоро́дицы.

Молитва.

Го́споди Ще́дре и Ми́лостиве, Долготерпели́ве и Многоми́лостиве, внуши́ моли́тву на́шу и вонми́ гла́су моле́ния на́шего, сотвори́ с на́ми зна́мение во бла́го, наста́ви нас на пу́ть Твой, е́же ходи́ти во и́стине Твое́й, возвесели́ сердца́ на́ша, во е́же боя́тися И́мене Твоего́ свята́го. Зане́ ве́лий еси́ Ты и творя́й чудеса́, Ты еси́ Бог еди́н, и не́сть подо́бен Тебе́ в бозе́х, Го́споди, си́лен в ми́лости и благ в кре́пости, во е́же помога́ти и утеша́ти и спаса́ти вся упова́ющия на И́мя свято́е Твое́. Ами́нь.