29 августа.

Канон преподобному Иоакиму Осоговскому, монаху, Сарандапорскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 1:

Пусты́нный жи́тель, и в телеси́ Ангел, и чудотво́рец яви́лся еси́, богоно́се о́тче на́ш Иоаки́ме: посто́м, бде́нием, моли́твою небе́сная дарова́ния прие́м, исцеля́еши неду́жныя и ду́ши ве́рою притека́ющим ти́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н преподо́бнаго отца́, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподобне отче Иоакиме, моли́ Бо́га о нас.

Свети́ло да́нное пусты́нным, красноблаже́нне о́тче Иоаки́ме, омраче́нное мое́ се́рдце с душе́ю просвети́, молю́тися, твои́ми моли́твами мра́к отгна́в и прича́стие све́та испроси́.

Припев: Преподобне отче Иоакиме, моли́ Бо́га о нас.

Во чи́стей и непоро́чней жи́зни доброде́тельми, свя́те, по́стником свети́ло бы́сть, богогла́се, я́коже дре́вле Самуи́л прозира́я бу́дущая, по обетова́нию бы́в сосу́д пречестны́й Ду́ху Пресвято́му.

Припев: Преподобне отче Иоакиме, моли́ Бо́га о нас.

Ясным житие́м, преблаже́нне, сия́я я́ко Ангел, от ю́ности у́бо бы́л еси́ сосу́д пречестны́й, вы́ше жития́ возше́д челове́ча, богому́дре, доброде́тельми ду́шу при́сно венчава́я, о́тче Иоаки́ме.

Припев: Преподобне отче Иоакиме, моли́ Бо́га о нас.

От ю́ности сса́в доброде́тель воздержа́ния, боле́зньми и по́ты по́стническими му́жество дости́гл еси́ и в ме́ру духо́внаго приспе́л еси́ во́зраста Христо́ва, о́тче преподо́бне.

Сла́ва Отцу́ и Сы́ну и Свято́му Ду́ху:

Стра́сти плотски́я покори́в и пучи́ну грехо́в преше́д, к ти́хому приста́нищу безстра́стия немо́кренно устреми́лся еси́, о́тче преподо́бне.

И ны́не и при́сно и во ве́ки веко́в. Ами́нь.

Богоро́дичен: Сло́во, е́же без ма́тере из Отца́, Сего́ напосле́док богому́жно родила́ еси́ Еди́наго, Богома́ти, я́ко вы́шши все́х тва́рей.

Пе́снь 3.

Ирмос: Утверже́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче.

Припев: Преподобне отче Иоакиме, моли́ Бо́га о нас.

Поще́нием процвете́ цве́т богоразу́мный, непло́дная ложесна́ разверза́я, я́коже дре́вле Самуи́л и Предте́ча, святы́й Крести́тель, с ни́миже, богогла́се о́тче, ны́не за на́с моли́ся.

Припев: Преподобне отче Иоакиме, моли́ Бо́га о нас.

Утвержде́ние все́м яви́ тя́ Влады́ка, целому́дрием украси́в пусты́нным, сла́дости же исто́чник и удержа́ние похоте́й о́браз тя́ показа́.

Припев: Преподобне отче Иоакиме, моли́ Бо́га о нас.

Сла́дости духо́вныя испо́лни пусты́ню Осого́вскую, я́ко исто́чник кипя́щий благода́тию сия́я, де́монския ле́сти вся́ искорени́в, те́мже восприя́л еси́ вене́ц побе́ды, о́тче Иоаки́ме.

Припев: Преподобне отче Иоакиме, моли́ Бо́га о нас.

Возше́д на высоту́ безстра́стия и доброде́телей, во мра́к боговиде́ния вше́л еси́, преподо́бне о́тче Иоаки́ме, и прия́л еси́ в се́рдце свое́м зако́н Боже́ственный, и́мже укрепле́н, мона́шествующим свети́льник пресве́тел бы́л еси́, о́тче преподо́бне.

Сла́ва Отцу́ и Сы́ну и Свято́му Ду́ху:

Плодови́та ма́слина в дому́ Госпо́дни я́ве насажде́н яви́лся еси́, о́тче, ма́слом по́двигов твои́х умасти́ лица́ на́ша, восхваля́ющих твоя́ чудеса́, Иоаки́ме преподо́бне.

И ны́не и при́сно и во ве́ки веко́в. Ами́нь.

Богоро́дичен: Ле́ностию житие́ мое́ ижди́х и грехми́ се́рдце оскверни́х, приступа́ю к Тебе́, Влады́чице, умиле́нием души́, и молю́ся: уще́дри и спаси́ мя.

Седа́лен преподо́бнаго отца́, гла́с 8.

Страда́ния боле́зньми искуша́емь, страда́ньми же утвержда́емь поще́ния, зла́та светле́йший благоче́стием облиста́л еси́, и чи́стое прия́телище бы́л еси́ Ду́ха, лука́вых бесо́в тму́ разгна́в. Те́м со́бранному мно́жеству благочести́вых бы́л еси́ па́стырь и свети́льник све́тел, Иоаки́ме блаже́нне, моли́ Христа́ Бо́га, грехо́в оставле́ние дарова́ти чту́щим любо́вию святу́ю па́мять твою́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподобне отче Иоакиме, моли́ Бо́га о нас.

Ты́ ми́р оста́вив, о́тче Иоаки́ме, ве́сь Бо́гу себе́ предаде́, чистото́ю же обложи́в себе́, возше́л еси́ на о́ное свято́е житие́, иде́же веселя́ся со Ангелы, моли́ Христа́ Бо́га, спасти́ся душа́м на́шим.

Припев: Преподобне отче Иоакиме, моли́ Бо́га о нас.

Ты́ Исто́чника благосты́ни возлюби́л еси́, преподо́бне, жа́ждущия сия́ возвесели́л еси́, бесо́вския полки́ разгоня́я, верте́пы и го́ры Осого́вския богоразу́мием испо́лнив, те́мже, соше́дшеся, па́мять твою́ прославля́ем, о́тче блаже́нне.

Припев: Преподобне отче Иоакиме, моли́ Бо́га о нас.

Новора́сль плодоно́сная из непло́дна ко́рене прозябе́, посто́м и моли́твою возсия́в, ре́ки исцеле́ния точи́л еси́, я́коже Моисе́й дре́вле лю́дем в пусты́ни, о́тче Иоаки́ме.

Припев: Преподобне отче Иоакиме, моли́ Бо́га о нас.

Насажде́н бы́в при вода́х, воздержа́ния лоза́ богора́сленна яви́лся еси́, блаже́нне, гро́здие благоче́стия предлага́я.

Сла́ва Отцу́ и Сы́ну и Свято́му Ду́ху:

На ка́мени ве́ры сто́пы се́рдца твоего́ поста́вив, непоколеби́м бы́л еси́, преблаже́нне, прило́ги бесо́вскими не ужаса́яся.

И ны́не и при́сно и во ве́ки веко́в. Ами́нь.

Богоро́дичен: Херуви́м превы́шшую и серафи́м, Тя́ пое́м, Пречи́стая, на ру́ку пло́тию носи́ла еси́ Бо́га на́шего, Его́же бо трепе́щут вся́ си́лы небе́сныя.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподобне отче Иоакиме, моли́ Бо́га о нас.

По́стником на небеса́ пу́ть благове́рно отве́рзл еси́, о́тче Иоаки́ме, восходя́ умо́м при́сно к небе́сным, на высоту́ вся́ вознося́, я́ко сто́лп о́гненный благода́тию о́блаки облиста́я.

Припев: Преподобне отче Иоакиме, моли́ Бо́га о нас.

Врача́, боля́щим стра́сти отгоня́ща, показа́ тя́ Христо́с, о́тче Иоаки́ме, и пита́теля а́лчущим, безу́мным каза́теля целому́дренна, си́рым же и ни́щим засту́пника.

Припев: Преподобне отче Иоакиме, моли́ Бо́га о нас.

Луча́ми Боже́ственными вся́ просвети́л еси́, о́тче Иоаки́ме, вра́жия ополче́ния, богогла́се, разори́л еси́, благосты́нею все́х упася́, я́коже Христо́с, сла́вне, возво́диши к небе́сным.

Припев: Преподобне отче Иоакиме, моли́ Бо́га о нас.

На го́ру истинноде́тельную воздержа́нием восте́кл еси́, богоно́се, и с высоты́ пра́вду твою́ показа́в, вселе́нныя концы́ па́че со́лнца облиста́юща чудесы́.

Сла́ва Отцу́ и Сы́ну и Свято́му Ду́ху:

Не оскуде́л еси́ мно́гим по́двигом, доброде́тели приближа́яся, но́щи бо и дни́, преподо́бне, пребы́л еси́ стоя́, непрекло́нен ну́ждами естества́.

И ны́не и при́сно и во ве́ки веко́в. Ами́нь.

Богоро́дичен: Сло́во Отчее, предочи́стившися, о Чи́стая, Ду́хом, слове́снаго естества́ на благодея́ние родила́ еси́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Иоакиме, моли́ Бо́га о нас.

Вла́сть прие́м от Бо́га на бе́сы проти́вныя, о́тче Иоаки́ме, посто́м побо́рника богоизбра́нна тя́ показа́, твои́ми моли́твами неду́ги исцеля́я и стра́сти отгоня́, богогла́се о́тче на́ш.

Припев: Преподобне отче Иоакиме, моли́ Бо́га о нас.

Блаже́н вои́стинну бы́л еси́, о́тче Иоаки́ме, вся́ плотска́я уго́дия возненави́дев, врага́ низложи́л еси́, те́мже прия́л еси́ вене́ц небе́сный.

Припев: Преподобне отче Иоакиме, моли́ Бо́га о нас.

Житие́ твое́ воздержа́нием и рыда́нием препроводи́л еси́, преподо́бне о́тче, жела́ние бо Боже́ственное тя́ распаля́я, ны́не на небесе́х обре́л еси́ утеше́ние, с ли́ки преподо́бных совокупля́яся.

Припев: Преподобне отче Иоакиме, моли́ Бо́га о нас.

Вели́кому в доброде́телех поревнова́л еси́ Анто́нию, и сему́ ду́хом после́дуя, воздержа́нием, преподо́бне, верхо́вен яви́лся еси́, и ста́ду твоему́ во утвержде́ние.

Сла́ва Отцу́ и Сы́ну и Свято́му Ду́ху:

Нестяжа́тельное житие́ пожи́в, преблаже́нне, пти́цам подо́бно кри́лы безстра́стия облегча́емь, ра́дуяся, вы́шния дости́гл еси́ оби́тели, сего́ ра́ди ве́рою тя́ ублажа́ем.

И ны́не и при́сно и во ве́ки веко́в. Ами́нь.

Богоро́дичен: Богоро́дице Де́во нескве́рная, Сы́на Твоего́ моли́ с го́рними си́лами, проще́ние прегреше́ний пре́жде конца́ дарова́тися, ве́рно Тя́ сла́вящим.

Конда́к, гла́с 2. [Подо́бен: В моли́твах.]

В моли́твах неусыпа́емых, си́лу на проти́внаго врага́ восприя́л еси́, терпе́нием бо свои́м, о́тче Иоаки́ме, на небеса́ возше́л еси́, жи́знь бо тле́нную оста́вив, в нетле́ние пресели́лся еси́, те́мже тя́ прославля́ем.

Икос:

Гора́ Осого́вская тебе́ испове́да, о́тче Иоаки́ме, па́стыря душа́м на́шим, неду́ги исцеля́юща, помо́щника су́ща и засту́пника ми́ру, те́мже и хва́ляще тя́, вопие́м: ра́дуйся, све́тлая мона́шествующих сла́во; ра́дуйся, я́сный целому́дрия сто́лпе; ра́дуйся, му́жеству я́ве сказа́тельное позна́ние; ра́дуйся, прему́драго ра́зума явле́ние; ра́дуйся, пра́вило равностоя́тельное пра́вде изве́стно; ра́дуйся, у́ме наслажда́яся неизрече́нных мы́слей; ра́дуйся, и́мже посрами́шася бе́си; ра́дуйся, помо́щниче все́м и́же ве́рно ти́ вопию́щим: ра́дуйся, о́тче Иоаки́ме.

Пе́снь 7.

Ирмос: Бо́жия снисхожде́ния о́гонь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших.

Припев: Преподобне отче Иоакиме, моли́ Бо́га о нас.

По́стников красоту́ святы́ни прояви́в, о́тче, воздержа́нием свои́м показа́л еси́ житие́ изря́дно, и ны́не непреста́нно со Ангелы воспева́еши: благослове́н Бо́г оте́ц на́ших.

Припев: Преподобне отче Иоакиме, моли́ Бо́га о нас.

Ору́жие обою́ду о́стро тя́ показа́ Христо́с, блаже́нне, на враги́ проти́вныя, попира́я ополче́ния безбо́жная и веселя́ ду́ши пою́щих: благослове́н Бо́г оте́ц на́ших.

Припев: Преподобне отче Иоакиме, моли́ Бо́га о нас.

Во све́те неизрече́ннем со безпло́тными ли́ки предстоя́, богогла́се о́тче Иоаки́ме, не пре́зри мене́ погиба́юща, но твою́ пречестну́ю моли́тву за на́с сотвори́ Вы́шнему Бо́гу поми́ловати ны́.

Сла́ва Отцу́ и Сы́ну и Свято́му Ду́ху:

Чуде́с за́ри просте́р, озаря́еши коле́блющия мгло́ю стра́сти, и лу́чи кре́пости подава́еши в де́нь наро́чит взыва́ющим: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Пло́д чре́ва Твоего́, Пречи́стая, проро́ков е́сть и зако́на исполне́ние, те́м Тя́, Богоро́дицу, в ве́дении сла́вяще, благоче́стно велича́ем.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Иоакиме, моли́ Бо́га о нас.

Богоприя́тен пло́д из непло́дных ложе́сн пусты́ни Осого́вския прозябе́ на многопло́дство; верте́пы, го́ры и про́пасти Осого́вския исполня́еши Бо́жия уче́ния и све́тлости вы́шния, е́юже озари́ на́с, о́тче Иоаки́ме, да вопие́м: свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Иоакиме, моли́ Бо́га о нас.

Житие́ безпло́тное име́я, во пло́ти же сы́й, я́ко Ангел пло́ти уго́дия не позна́л еси́, свя́те; вы́ше челове́к пожи́в, полки́ бесо́вския и ле́сть их искорени́л еси́, пусты́ню украси́, со Ангелы вопия́: свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Иоакиме, моли́ Бо́га о нас.

Возвесели́ся пусты́ня Осого́вская, жа́ждущи при́сно прозябе́ния доброде́тели, дне́сь поще́ния све́тлый цве́т в тебе́ прозябе́, я́коже дре́вле Самуи́л и Предте́ча, из непло́дна чре́ва, тобо́ю процвето́ша верте́пы и про́пасти, и све́тло укра́шени бы́ша.

Припев: Преподобне отче Иоакиме, моли́ Бо́га о нас.

Кре́постию ума́ вся́ се́ти вра́жия попра́л еси́ и, я́ко пти́ца, благи́я юдо́ли, криле́ име́я позлаще́ны, возше́л еси́ к высоте́ небе́сней, блаже́нне Иоаки́ме, свети́льниче мона́шествующим, вопия́: свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

В моли́твах бо́дрое, в поще́ниих благомо́щное, в напа́стех терпели́вное на земли́, я́ко Ангел житие́ показу́я, Иоаки́ме блаже́нне, вопия́л еси́: свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Пло́д чре́ва Твоего́, Богоневе́сто, показа́ся челове́ком спасе́ния хода́тайственный, те́м Тя́, Богоро́дицу, ра́зумом и язы́ком сла́вяще, ве́рнии, велича́ем.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Иоакиме, моли́ Бо́га о нас.

Крило́ма на высоту́ при́сно вы́спрь возлета́я, пусты́ни и го́ры Осого́вския прелете́л еси́, верте́пы же и про́пасти испо́лни све́том богоразу́мия, о́тче Иоаки́ме. Те́мже и мы́, творя́ще па́мять твою́ пресве́тлую, мо́лимся, испроси́ на́м оставле́ние грехо́в.

Припев: Преподобне отче Иоакиме, моли́ Бо́га о нас.

Гора́ златоза́рна бы́л еси́, о́тче преблаже́нне, го́ры и верте́пы Осого́вския испо́лни Ангельскаго пе́ния, и́мже возвесели́ся пусты́ня Осого́вская и я́ко кри́н процвете́. Те́мже, преподо́бне, со Ангелы предстоя́ во сла́ве, моли́ся непреста́нно о на́с.

Припев: Преподобне отче Иоакиме, моли́ Бо́га о нас.

Изря́дными луча́ми я́ко со́лнце просия́в, треблаже́нне, житие́м твои́м святы́м пусты́ни Осого́вския я́ко гра́ды сотвори́л еси́. Те́мже ны́не, в ли́це Ангельсте предстоя́й, со проро́ки, ку́пно и патриа́рси, и апо́столы, блаже́нне, моли́ся о на́с.

Припев: Преподобне отче Иоакиме, моли́ Бо́га о нас.

Яви́ся твоя́ ве́лия сла́ва, я́же по Бо́зе, просвеща́ющая всю́ тва́рь свяще́нными уподобле́нии непоро́чнаго жития́, богому́дре Иоаки́ме, вои́стину бы́л еси́ мона́хом украше́ние и отце́м верхо́вник.

Сла́ва Отцу́ и Сы́ну и Свято́му Ду́ху:

Процве́л еси́ я́ко кри́н, о́тче Иоаки́ме, благоуха́ньми твои́х доброде́тель, на́ша благоуха́еши ду́ши. Те́мже соверша́ющим па́мять твою́, моли́ изба́витися злосмра́дия согреше́ний на́ших и вся́каго бесо́вскаго озлобле́ния.

И ны́не и при́сно и во ве́ки веко́в. Ами́нь.

Богоро́дичен: Ты́ еси́, Богоро́дице, ору́жие на́ше и стена́, Ты́ еси́ заступле́ние к Тебе́ прибега́ющих, Тя́ и ны́не на моли́тву предлага́ем, да изба́вимся от враго́в на́ших.

Молитва

О свяще́нная главо́, преподо́бне о́тче, преблаже́нне а́вво Иоакиме, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.