29 августа.

Канон святому мученику Диомиду

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

Му́ченик Твой, Го́споди, Диомид,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кано́н свята́го Диоми́да, гла́с 4.

Пе́снь 1.

Ирмос: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Святый мучениче Диомиде, моли́ Бо́га о нас.

Све́том озаря́емь трисо́лнечным, разреши́ мра́к, блаже́нне, неразу́мия моего́, я́ко да воспою́ светоно́сную твою́ па́мять и исправле́ние жития́ твоего́.

Припев: Святый мучениче Диомиде, моли́ Бо́га о нас.

Страсте́й неприя́тен по́мысл соде́лав, прия́телище, сла́вне, яви́лся еси́ Ду́ха, и источи́л еси́ исцеле́ний пучи́ну, всю́ потопля́ющую неду́гов скве́рну.

Сла́ва Отцу́ и Сы́ну и Свято́му Ду́ху:

Жи́зни жела́я безконе́чныя, ча́шу сме́ртную, прехва́льне, испи́ти потща́лся еси́, ю́же и получи́л еси́, я́коже ве́сть Зва́вый тя́ к венцу́ неувяда́ющему, му́чениче непобеди́мый.

И ны́не и при́сно и во ве́ки веко́в. Ами́нь.

Богоро́дичен: Гра́де одушевле́нный Царя́, Всенепоро́чная, стра́нное рождество́ и боже́ственное успе́ние показа́вшая, гра́д Тво́й от вся́каго тру́са и паде́ния покажи́ невреди́мь.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Святый мучениче Диомиде, моли́ Бо́га о нас.

Неизглаго́ланным и Боже́ственным рукоде́йством очища́я стра́сти челове́ков, от Бо́га дарова́лся еси́ ве́рным вра́чь изря́ден и моли́твенник те́пл, тя́ чту́щим, пребога́те.

Припев: Святый мучениче Диомиде, моли́ Бо́га о нас.

В пу́ть свиде́ний Твои́х теку́ и Твое́й подо́бяся стра́сти во́льней, — му́ченик взыва́ше, на заколе́ние влеко́мь, — к Тебе́, еди́ному Бо́гу на́шему.

Сла́ва Отцу́ и Сы́ну и Свято́му Ду́ху:

Сла́вный му́ченик Диоми́д, на́с созва́в та́йно на трапе́зу дне́сь, предлага́ет страда́ния своя́, я́коже бра́шно невеще́ственное, ве́рнии, прииди́те, наслади́мся.

И ны́не и при́сно и во ве́ки веко́в. Ами́нь.

Богоро́дичен: Гра́д Тво́й се́й, от вся́каго тру́са и паде́ния, Чи́стая, я́ко на Тя́, Богоблагода́тная, возложе́н е́сть, изба́ви и в ми́ре сохрани́ и единомы́слии, Богоневе́сто.

Седа́лен свята́го, гла́с 4.

Даро́в Боже́ственных испо́лнен, ду́ш показа́лся еси́ вра́чь и теле́с, и му́ченическим благосла́вием обогати́вся я́ве, ра́дуяся, прише́л еси́ ко оби́телем присноживо́тным. Те́мже, святу́ю твою́ пра́зднующе па́мять, взыва́ем: помяни́ на́с, тя́ чту́щих, богому́дре и пребога́те.

Пе́снь 4.

Ирмос: Неизсле́дный Бо́жий сове́т, е́же от Де́вы, воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Припев: Святый мучениче Диомиде, моли́ Бо́га о нас.

Сло́во Боже́ственнаго ра́зума, я́ко реку́, нося́ в се́рдцы, потопи́ пре́лести пото́ки и и́дольскую кре́пость до конца́ погрузи́ му́ченик Диоми́д сла́вный.

Припев: Святый мучениче Диомиде, моли́ Бо́га о нас.

Возсия́, я́ко со́лнце на земли́, заре́ю доброде́телей и чуде́с бога́тством и просвети́ ве́рных правосла́вныя собо́ры му́ченик Диоми́д всему́дрый.

Сла́ва Отцу́ и Сы́ну и Свято́му Ду́ху:

Врачевство́ безме́здно тво́й хра́м все́м, ве́рою притека́ющим, яви́ся, преблаже́нне, и забра́ло тве́рдо Ца́рскому гра́ду, упражня́я наше́ствия иноплеме́нных вра́г.

И ны́не и при́сно и во ве́ки веко́в. Ами́нь.

Богоро́дичен: Стра́нно Твое́ рождество́, я́ко и честно́е успе́ние, показа́ся, Пренепоро́чная Благослове́нная, е́же гра́д Тво́й почита́ет, иноплеме́нных избега́я вре́дов те́плым Твои́м предста́тельством.

Пе́снь 5

Ирмос: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Припев: Святый мучениче Диомиде, моли́ Бо́га о нас.

Яви́лся еси́ без кро́ве му́ченик досточу́ден, без боле́зней вене́чник, без я́зв победи́тель изря́ден, полки́ враго́в низлага́я твои́ми по́двиги, Диоми́де блаже́нне.

Припев: Святый мучениче Диомиде, моли́ Бо́га о нас.

Све́т тебе́ возсия́, су́щу пра́ведну, неугаси́мый, сего́ же супру́г, богому́дре, тебе́ весе́лие после́дова, я́ко пра́ву иму́щу ду́шу, все́м после́дующу Спа́са повеле́нием.

Сла́ва Отцу́ и Сы́ну и Свято́му Ду́ху:

Све́та лиша́ются у́бо теле́снаго мучи́тели, твою́ главу́ по кончи́не отсе́кшии, но душе́внии светоза́рно зе́ницы отверза́ются, Христу́ ве́рою присту́пльше, Диоми́де чу́дный.

И ны́не и при́сно и во ве́ки веко́в. Ами́нь.

Богоро́дичен: Забра́ло име́я Ца́рский гра́д, Тя́, Цари́цу и Госпожу́, побежда́ет ва́рваров звери́на стремле́ния, избавля́ется вся́ких напа́стей, расте́т и утвержда́ется, Богома́ти Всенепоро́чная.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Припев: Святый мучениче Диомиде, моли́ Бо́га о нас.

Твои́х по́двиг тече́нием погрузи́л еси́ врага́ безпло́тнаго и чуде́с твои́х источе́нием омыва́еши страсте́й многови́дныя скве́рны, досточу́дне.

Припев: Святый мучениче Диомиде, моли́ Бо́га о нас.

Боже́ственными дыха́нии дви́жимь, Вы́шним манове́нием окормля́емь, к ти́хому приста́нищу пра́ве дости́гл еси́, о на́с моли́ся, му́чениче прехва́льне.

Сла́ва Отцу́ и Сы́ну и Свято́му Ду́ху:

Страсте́й па́жити потребля́ются неизглаго́ланным рукоде́йствием твои́м, сла́вне, и отгоня́ется по́лк де́монский боже́ственным твои́м предста́тельством, му́чениче присноблаже́нне.

И ны́не и при́сно и во ве́ки веко́в. Ами́нь.

Богоро́дичен: О Тебе́, Де́во, хва́лимся, Тобо́ю от вра́г избавля́емся, наде́янием Твои́м наше́ствия не убои́мся вра́г иноплеме́нных, воспева́ющии Тя́.

Конда́к, гла́с 2. Подо́бен: Вы́шних ища́.

Истинный и непобеди́мый страстоте́рпец, благоче́стия и благода́ти небе́сный таи́нник я́влься, Диоми́де пресла́вне, победи́в мучи́теля и победоно́сец бы́в, венцы́ побе́дными просла́вися.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Святый мучениче Диомиде, моли́ Бо́га о нас.

Отсе́чена бы́вши, глава́ твоя́, све́т облиста́ суему́дрым, ю́же, я́ко жи́ву, ви́дев, устыде́ся мучи́тель, умерщвле́н умо́м, не разуме́ же вопи́ти, пресла́вне: Бо́же, благослове́н еси́.

Припев: Святый мучениче Диомиде, моли́ Бо́га о нас.

Совле́клся еси́ умерщвле́ния, сла́вне, ри́зы злообра́зныя, в безсме́ртия оде́жду красну́ благода́тию обле́клся. Те́мже Влады́це твоему́ вопие́ши, ра́дуяся: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Огне́м терпе́ния попали́л еси́ ве́щную ле́сть враго́в, богосия́нна же звезда́ яви́лся еси́ исцеле́ний, му́чениче, облиста́я лучи́ зову́щим: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Цари́ца ми́ра, ро́ждшая Царя́ Христа́, изба́ви тли́ и тру́са, и язы́к наи́тия, Ца́рствующий гра́д, Влады́чице, благослове́н, — по́ющий, — Пло́д чре́ва Твоего́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Припев: Святый мучениче Диомиде, моли́ Бо́га о нас.

Но́ги честны́я твоя́, страстоте́рпче, ко стезя́м муче́ния напра́вишася, хо́дят же ны́не, ра́дующеся, во стране́ живу́щих, прему́дре, в ра́йстей пи́щи. Те́мже и, соше́дшеся, чти́м, воспева́юще Христа́ во ве́ки.

Припев: Святый мучениче Диомиде, моли́ Бо́га о нас.

Исплете́ся тебе́ вене́ц нетле́ния, тве́рдо подви́гшуся и победи́вшу зми́я злонача́льнаго, му́чениче достохва́льне, и страда́льческий ли́к тя́ прия́т, Го́спода по́йте, — вопию́ща, — и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Чуде́с испуща́еши лучи́, Боже́ственною оде́ян, му́чениче, си́лою, уставля́еши боле́зни, реши́ши неду́ги, отгоня́еши ду́хи лука́выя, вопия́: Го́спода по́йте, дела́, и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Мно́гими прило́ги грехо́вными преклоне́ни, к Твоему́ непрекло́нному покро́ву прибега́ем: утверди́ рабы́ Твоя́, на стра́сти укрепи́ и от тру́са, и гла́да, и язы́к наше́ствия, Де́во, изба́ви Твое́ ста́до, я́ко на Тя́ возложе́но е́сть.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Святый мучениче Диомиде, моли́ Бо́га о нас.

Обре́л еси́ возме́здие трудо́в, горе́ тебе́ угото́вльшуюся пи́щу, иде́же водворя́яся, укра́шен му́ченическими добро́тами, наслажда́ешися Зижди́теля твоего́ красоты́, прося́, му́чениче, чту́щим тя́ очище́ния и зо́л избавле́ния.

Припев: Святый мучениче Диомиде, моли́ Бо́га о нас.

Сто́лп доброде́телей и ве́ры утвержде́ние, забра́ло недви́жимо, и стена́ непреклони́ма показа́лся еси́, му́чениче, Це́ркви Христо́ве, и река́ исцеле́ний, источа́я то́ки врачева́ния безме́здна любо́вию творя́щим твою́ па́мять, пресла́вне.

Сла́ва Отцу́ и Сы́ну и Свято́му Ду́ху:

Отгна́л еси́ от земли́ и́дольское безбо́жие, потреби́л еси́ мглу́ и к невече́рней зари́ приложи́лся еси́ светонача́льныя жи́зни, ея́же явле́ния, сла́вне, пе́рвее стяжа́л еси́, отону́дными сия́нии озаря́емь и ра́дости присносу́щныя исполня́яся.

И ны́не и при́сно и во ве́ки веко́в. Ами́нь.

Богоро́дичен: Гра́де Бо́жий, в о́ньже Са́м всели́ся, вои́стинну непоколеби́мый, изба́ви ста́до Твое́ тру́са, Де́во, и паде́ния, ва́рварскаго плене́ния, огня́ и меча́ враго́в, от вся́каго, Пречи́стая, озлобле́ния, те́плым ко Христу́ предста́тельством Твои́м.

Молитва

О святы́й уго́дниче Бо́жий, му́чениче Диомиде! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.