27 августа.

Канон преподобному Феодосию, игумену Киевопечерскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 8:

Правосла́вия наста́вниче, благоче́стия учи́телю и чистоты́, вселе́нныя свети́льниче, архиере́ев богодухнове́нное удобре́ние, Феодо́сие прему́дре, уче́ньми твои́ми вся́ просвети́л еси́, цевни́це духо́вная, моли́ Христа́ Бо́га спасти́ся душа́м на́шим.

Кано́н преподо́бнаго Феодо́сия . гла́с 4.

Пе́снь 1.

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Преподобне отче Феодосие, моли́ Бо́га о нас.

Пренесе́ния твоего́ честну́ю восхваля́ющу ми́, о́тче преблаже́нне, па́мять, с небесе́ просвеще́ние пода́ти мне́ моли́, Феодо́сие, и душетле́нных прегреше́ний проще́ние.

Припев: Преподобне отче Феодосие, моли́ Бо́га о нас.

После́довати восхоте́в Го́споду, блаже́нне, ко преподо́бному Анто́нию прише́л еси́, с ни́мже в пеще́ре затвори́вся ми́ра кроме́, Бо́гу неотлу́чен пребы́л еси́.

Сла́ва Отцу́ и Сы́ну и Свято́му Ду́ху:

Поревнова́в Вели́кому Феодо́сию, о́бщаго жития́ нача́льнику, нра́вом и житие́м, преподо́бне, того́ после́дуя по́двигом и трудо́м, Влады́це Христу́ благоугоди́л еси́.

И ны́не и при́сно и во ве́ки веко́в. Ами́нь.

Богоро́дичен: Освяти́, Влады́чице, оскверне́нное се́рдце мое́, Яже Пресвято́е Сло́во ро́ждшая, су́щи все́х святе́йшая вы́шних си́л, еди́на Всепе́тая.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Преподобне отче Феодосие, моли́ Бо́га о нас.

Све́т немерца́ющий возсия́ тебе́, я́ко пра́веднику, его́же от ю́ности пра́вым се́рдцем взыска́л еси́, Феодо́сие. Сего́ ра́ди во Све́те непристу́пном ве́чно весели́шися.

Припев: Преподобне отче Феодосие, моли́ Бо́га о нас.

Собра́ся тогда́ мно́жество и́ночествующих с наста́вником, е́же пренести́ мо́щи преподо́бнаго Феодо́сия, с ни́ми и мы́ дне́сь в па́мять пренесе́ния его́ духо́вно пра́зднуем.

Сла́ва Отцу́ и Сы́ну и Свято́му Ду́ху:

Многоле́тное поще́ние, я́ко в чужде́м телеси́, страда́льчески преше́д, ко Го́споду взы́де, насыща́тися пи́щи нетле́нныя со все́ми святы́ми.

И ны́не и при́сно и во ве́ки веко́в. Ами́нь.

Богоро́дичен: Кропле́нием ми́лости Твоея́, Де́во, у́глие погаси́ мои́х страсте́й, Богора́дованная, и уга́сший возжзи́ свети́льник се́рдца моего́, златы́й све́щниче, Всенепоро́чная.

Седа́лен преподо́бнаго, гла́с 4. Подо́бен: Яви́лся еси́ дне́сь.

Па́мять боя́щихся Бо́га весели́т ве́рных: прииди́те у́бо, и мы́ в па́мять пренесе́ния преподо́бнаго отца́ на́шего Феодо́сия воспое́м Бо́га, сего́ просла́вльшаго. [Два́жды.]

Пе́снь 4.

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Припев: Преподобне отче Феодосие, моли́ Бо́га о нас.

Умертви́в плотско́е мудрова́ние, страсте́й мо́ре мяте́жное изсуши́л еси́, еди́ною наде́ждою ве́чных бла́г укрепи́вся, я́же ны́не прия́л еси́, преподо́бне, изве́стно.

Припев: Преподобне отче Феодосие, моли́ Бо́га о нас.

Не́сть ле́по овца́м своего́ лише́нным бы́ти па́стыря, ни па́стырю та́кожде своя́ о́вцы оставля́ти, твои́ ученицы́, собра́вшеся, глаго́лаху, о́тче Феодо́сие.

Сла́ва Отцу́ и Сы́ну и Свято́му Ду́ху:

Не добро́ е́сть пребыва́ти учи́телю на́шему вне́ оби́тели и це́ркве своея́, ю́же са́м основа́л е́сть, твои́ ученицы́ глаго́лаху, о́тче преподо́бне.

И ны́не и при́сно и во ве́ки веко́в. Ами́нь.

Богоро́дичен: Смире́нное, еди́на Чи́стая, и прокаже́нное се́рдце мое́ нечи́стыми страсте́й наведе́нии, я́ко вра́чь, исцели́ и руки́ бесо́вския исхити́.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Припев: Преподобне отче Феодосие, моли́ Бо́га о нас.

Просвети́ся дне́сь пресла́вно хра́м Богома́тере, прие́мши своего́ служи́теля преподо́бнаго, сия́юща светови́дно и лучи́ исцеле́ний испуща́юща все́м неоску́дно, с ве́рою к нему́ приходя́щим.

Припев: Преподобне отче Феодосие, моли́ Бо́га о нас.

Благо́е совеща́ние ва́ше, о богоблаже́ннии отцы́! кра́сное совокупле́ние, по́стнический собо́ре, я́ко потща́стеся пренести́ ва́шего па́стыря и учи́теля, светоза́рнаго свети́льника, бо́драго ума́.

Сла́ва Отцу́ и Сы́ну и Свято́му Ду́ху:

Ме́сто, иде́же положены́ бы́ша честны́я мо́щи твоя́, преподо́бне, прокопа́вше, егда́ обрето́ша, а́бие наслади́шася благоуха́ния Ду́ха Свята́го, оби́льным исцеле́нием все́х сердца́ веселя́щаго.

И ны́не и при́сно и во ве́ки веко́в. Ами́нь.

Богоро́дичен: Песнопою́щи Тя́, Всепе́тая, сла́влю вели́чия Твоя́. Те́мже нечи́стых мя́ страсте́й изба́ви и ве́чныя сла́вы сподо́би.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Припев: Преподобне отче Феодосие, моли́ Бо́га о нас.

Прииди́те, ве́рнии, пе́сни духо́вныя принося́ще, Феодо́сия любо́вию ублажи́м и по до́лгу воспое́м, па́мять пренесе́ния его́ све́тло пра́зднующе.

Припев: Преподобне отче Феодосие, моли́ Бо́га о нас.

Воспое́м све́тлаго, изря́днаго в чудесе́х, вели́каго в доброде́телех, до́бляго житие́м, сла́внаго уго́дника Христо́ва и Пречи́стыя Богоро́дицы, блаже́ннаго Феодо́сия.

Сла́ва Отцу́ и Сы́ну и Свято́му Ду́ху:

На небесе́х ны́не ликовству́я со Ангельскими во́инствы ра́достно, о́тче пребога́те Феодо́сие, благода́ть и спасе́ние дарова́ти моли́ся, любо́вию пою́щим тя́.

И ны́не и при́сно и во ве́ки веко́в. Ами́нь.

Богоро́дичен: Ума́ моего́ уврачу́й сокруше́ние, Всенепоро́чная, исцели́ стра́сти души́ моея́, и уны́ния тму́ потреби́, я́ко да во хвале́нии Тя́ пою́, Присноблаже́нную, Богоро́дице Всепе́тая.

Конда́к, гла́с 8. Подо́бен: Взбра́нной.

Насле́дник отце́в бы́л еси́, преподо́бне, те́х после́дуя житию́ и уче́нию, обы́чаю и воздержа́нию, моли́тве же и предстоя́нию. С ни́миже, име́я дерзнове́ние ко Го́споду, проще́ние согреше́ний и спасе́ние испроси́ вопию́щим ти́: ра́дуйся, о́тче на́ш Феодо́сие.

Икос:

Ангельски пожи́в на земли́, преподо́бне, Ангелов похвалы́ на небеси́ сподо́бился еси́. Ка́ко у́бо воспою́ твое́ пресве́тлое житие́ и премно́гия твоя́ доброде́тели, зна́мения же и чудеса́, и́миже вся́ просвеща́еши, я́ко со́лнце? Те́мже вопию́ тебе́ такова́я: ра́дуйся, от младе́нства Христу́ после́довавый; ра́дуйся, вся́ земна́я я́ко уме́ты вмени́вый; ра́дуйся, прило́ги страсте́й умертви́вый; ра́дуйся, обличи́вый нача́ла тмы́ и вла́сти; ра́дуйся, небе́сных взыска́вый па́че земны́х; ра́дуйся, вожделе́вый прему́дрости Бо́жия; ра́дуйся, сподо́бивыйся зре́ти Непостижи́маго; ра́дуйся, Тро́ицы Пресвяты́я пропове́дниче; ра́дуйся, Богоро́дицы служи́телю; ра́дуйся, и́ноков сла́во и похвало́; ра́дуйся, и́мже избавля́емся от вре́да вра́жия; ра́дуйся, о не́мже спаса́емся вси́. Ра́дуйся, о́тче на́ш Феодо́сие.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Преподобне отче Феодосие, моли́ Бо́га о нас.

Ми́ра попече́ние отри́нув и сла́ву его́ нивочто́же вмени́в, сла́вы бу́дущия взыска́л еси́, молча́нием возлюби́в Бо́гу угоди́ти на земли́. Те́м То́й тя́ просла́ви, преподо́бне, на небесе́х.

Припев: Преподобне отче Феодосие, моли́ Бо́га о нас.

Плотски́я стра́сти от ю́ности возненави́дев, и су́етную красоту́ попра́в, поще́нием к Бо́гу превозвы́сился еси́, и ны́не, со Ангелы предстоя́ Го́сподеви, моли́ о чту́щих па́мять твою́.

Сла́ва Отцу́ и Сы́ну и Свято́му Ду́ху:

Являешися, преподо́бне, сокруше́нному хулы́ ра́ди Васи́лию, возвеща́я ему́, коли́кия сла́вы лиши́ся; его́же на свою́ ра́ку положи́ти повеле́в, сего́ в то́м часе́ исцели́л еси́.

И ны́не и при́сно и во ве́ки веко́в. Ами́нь.

Богоро́дичен: Предста́тельство ми́ бу́ди, Пречи́стая, к Ро́ждшемуся из Тебе́, оставле́ние лю́тых долго́в, и Ца́рствия Бо́жия боже́ственный вхо́д, и пи́щи восприя́тие, и све́та прича́стие мне́ подаю́щи.

Пе́снь 8.

Ирмо́с: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.

Припев: Преподобне отче Феодосие, моли́ Бо́га о нас.

Душе́ю живы́й в вы́шних, в земли́ и́щущим являе́ши честны́я твоя́ мо́щи, я́же ви́девше це́лы и нетле́нны, и благоуха́ние испуща́ющия, возра́довашася ду́хом, глаго́люще: Го́спода по́йте, дела́, и превозноси́те Его́ во ве́ки.

Припев: Преподобне отче Феодосие, моли́ Бо́га о нас.

Подо́бно е́сть на́м, всегда́ очи́ма на́шима ви́дети честну́ю ра́ку отца́ на́шего Феодо́сия, и досто́йное поклоне́ние всегда́ тому́ приноси́ти, пренося́щии честны́я мо́щи, глаго́лаху, пою́ще: Го́спода по́йте, дела́, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Ме́сто, на не́мже са́м пре́жде сме́рти своея́ проре́кл еси́ положе́ну тебе́ бы́ти, прие́мше ны́не честно́е те́ло твое́, исцеле́ние подава́ет приходя́щим с ве́рою.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́ Ангелов вы́шши, ро́ждши Го́спода, Сего́ у́бо моли́, Влады́чице Всенепоро́чная, плотски́х вы́шшу ми́ бы́ти искуше́ний, и Суда́ изба́витися бу́дущаго и ве́чныя му́ки, Де́во.

Песнь 9

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Преподобне отче Феодосие, моли́ Бо́га о нас.

Победи́тель мироде́ржца, кня́зя тмы́, яви́лся еси́, вражде́бныя его́ стре́лы ору́жием кре́стным и ве́рою до конца́ сокруши́в, взыва́я: Бо́г на́м прибе́жище и си́ла.

Припев: Преподобне отче Феодосие, моли́ Бо́га о нас.

Ты́ па́стырь и́стинный Христо́ва ста́да бы́л еси́, о не́мже моли́ти не преста́й всегда́, преподо́бне, дарова́ти на́м согреше́ний оставле́ние, Боже́ственное заступле́ние и ве́чное ра́дование.

Сла́ва Отцу́ и Сы́ну и Свято́му Ду́ху:

Прозря́ исхожде́ние свое́ от те́ла, и бу́дущее тебе́ воздая́ние от Бо́га, моли́лся еси́ приле́жно, преподо́бне, о ста́де твое́м, и си́х ско́рбных уте́шил еси́, глаго́ля: се́ обеща́ю ва́м, бра́тие и отцы́, я́ко а́ще и те́лом отхожду́ от ва́с, но ду́хом при́сно бу́ду с ва́ми.

И ны́не и при́сно и во ве́ки веко́в. Ами́нь.

Богоро́дичен: Спаси́ мя, Чи́стая, Спа́са ро́ждшая Всеще́драго, уще́дри раба́ Твоего́, и к покая́ния пути́ наста́ви, лука́ваго же собла́зны от среды́ отжени́, и того́ мя́ изба́ви ловле́ния, и огня́ ве́чнаго исхи́ти.

Молитва преподобному Феодосию, Печерскому чудотворцу

О, священная главо, ангеле земный и человече небесный, преподобне и богоносне отче наш Феодосие, изрядный слуго Пресвятыя Богородицы, во имя Ея святое обитель пречудну на горах Печерских соорудивый, и в ней чудес множеством просиявый! Молим тя со усердием многим, молися за нас ко Господу Богу, и испроси от него великия и богатыя милости: веру праву, надежду спасения несомненну, любовь ко всем нелицемерну, благочестие непоколебимое, душ и телес здравие, житейских потреб довольство, и да не во зло обратим благая, даруемая нам от щедродательныя Его десницы, но в славу имени Его Святаго, и во спасение наше. Сохрани, угодниче Божий, предстательством твоим святым страну нашу, Церковь Православнороссийскую, град твой, и Лавру твою невредимыми от всякаго зла, и вся люди притекающия на поклонение к честному твоему гробу и пребывающия во святей обители твоей, осени Небесным твоим благословением и от всяких зол и бед милостивно избави. Наипаче же в час кончины нашея покажи нам многомощное твое покровительство: да избавимся молитвами твоими ко Господу власти лютаго миродержца и сподобимся наследити Царство Небесное. Яви нам, отче, благосердие твое и не остави нас сирых и безпомощных, да выну славословим дивнаго во святых Своих Бога, Отца, и Сына, и Святаго Духа, и твое святое заступление, во веки веков. Аминь.