Канон обретению мощей блаженного Максима, Христа ради юродивого, Московского чудотворца

Тропа́рь, глас 4:

Терпе́нием свои́м ве́лию мзду на Небесе́х стяжа́л еси́,/ в бу́йство во́лею Христа́ ра́ди преложи́ся/ и на Не́бо мы́сленное, я́ко на колесни́це о́гненней,/ возше́л еси́, прему́дре Макси́ме./ Дне́сь мы ны́не чтим честны́х моще́й твои́х обре́тение/ вку́пе с благочести́выми и ве́рными людьми́ Ца́рствующаго гра́да Москвы́,/ да вси вопие́м ти:/ моли́ Христа́ Бо́га/ спасти́ся душа́м на́шим.

Канон святаго Максима, глас 5.

Песнь 1

Ирмо́с: Зе́млю, на ню́же не возсия́, ни ви́де со́лнце когда́,/ бе́здну, ю́же не ви́де на́гу широта́ Небе́сная,/ Изра́иль про́йде невла́жно, Го́споди,/ и ввел еси́ его́ в го́ру святы́ни Твоея́,/ хва́ляща и пою́ща побе́дную пе́снь.

Припев: Святый блаженный Максиме, моли Бога о нас

Аз же, Го́споди мой, я́ко мыта́рь, вопию́ Ти:/ поми́луй мя, Бо́же, по вели́цей ми́лости Твое́й/ и да́ждь ми, Иису́се, Бо́же мой,/ я́ко да и аз, недосто́йный, воспою́ обре́тения Твоего́ рачи́теля, блаже́ннаго Макси́ма, торжество́,/ хва́ляща и пою́ща побе́дную пе́снь.

Припев: Святый блаженный Максиме, моли Бога о нас

Безве́стная и та́йная после́днему ро́ду явле́на бы́ша, честны́я мо́щи твоя́, прему́дре Макси́ме,/ к ни́мже прикаса́ющеся, освяще́ние прие́млем,/ Христа́ хва́ляще и пою́ще побе́дную пе́снь.

Слава Отцу и Сыну и Святому Духу:

Вседержи́телеву Престо́лу предстои́ши, му́дре,/ я́ко изря́дный во́ин, подо́бяся своему́ Влады́це,/ Ему́же от ю́ности вожделе́л еси́,/ и бы́сть А́нгелом собесе́дник и пра́ведным единожи́тель, Макси́ме всеблаже́нне.

И ныне и присно и во веки веков. Аминь.

Господоимени́тая Де́во, Ма́ти Бо́жия Всенепоро́чная,/ стра́стныя моея́ души́ я́звы исцели́,/ сла́сти утоли́ пло́ти моея́,/ и омраче́нное се́рдце мое́ просвети́,/ и умири́ ум мой от вся́каго вре́да,/ вра́жиих мя изба́ви напа́стей.

Песнь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.

Припев: Святый блаженный Максиме, моли Бога о нас

Де́нь пра́зднственный дне́сь пра́зднуют моско́встии наро́ди,/ обрето́ша бо мо́щи блаже́ннаго Макси́ма, я́ко не́кое сокро́вище бога́тное,/ непреста́нно Христу́ воспева́юще:/ Це́рковь Свою́ утверди́, Еди́не Бла́же и Человеколю́бче.

Припев: Святый блаженный Максиме, моли Бога о нас

Естество́ тле́нное ни во что́же вмени́в,/ в ве́чныя оби́тели взы́де, ра́дуяся,/ житие́ чи́сто име́л еси́, посреде́ ми́ра обнажа́яся./ Те́мже чтим обре́тение твое́, непреста́нно Христу́ зову́ще:/ Це́рковь Свою́ утверди́, Еди́не Бла́же и Человеколю́бче.

Слава Отцу и Сыну и Святому Духу:

Житие́ свое́, о́тче Макси́ме, на земли́ же́стоко показа́л еси́,/ со́лнечным ва́ром и мра́зом зе́льным опаля́емь,/ и сего́ ра́ди насле́довал еси́ Небе́сное селе́ние,/ моли́ и нам получи́ти та́мошнее блаже́нство,/ пра́зднующим твое́ обре́тение.

И ныне и присно и во веки веков. Аминь.

Зело́ лю́те погружа́емей души́ мое́й в пучи́не жите́йских страсте́й,/ бу́рею одержи́м е́смь безме́рных обстоя́ний,/ спасе́ния ми простри́ ру́ку, Пресвята́я,/ и возведи́ из глубины́ зол мои́х.

Господи, помилуй. (3 раза).

Седален, глас 3:

Ко Го́споду жела́нием, преблаже́нне, одержи́м,/ в бу́йство претвори́ся Христа́ ра́ди,/ в Ца́рствующем гра́де посреде́ ми́ра живы́й,/ и ту богоуго́дно житие́ соверши́л еси́, о́тче Макси́ме,/ моли́ Христа́ Бо́га дарова́ти пра́зднующим честно́е твое́ обре́тение/ оставле́ние грехо́в и ве́лию ми́лость.

Песнь 4 

Ирмо́с: Дела́ смотре́ния Твоего́, Го́споди,/ ужаси́ша проро́ка Авваку́ма,/ изше́л бо еси́ на спасе́ние люде́й Твои́х,/ спасти́ пома́занныя Твоя́ прише́л еси́.

Припев: Святый блаженный Максиме, моли Бога о нас

Землени́и бо есмы́ и пе́рстнии челове́цы,/ ве́рно припа́даем к пречестны́м моще́м твои́м, блаже́нне Макси́ме, прося́ще отпуще́ния грехо́в,/ моли́ся о пра́зднующих твое́ честно́е обре́тение.

Припев: Святый блаженный Максиме, моли Бога о нас

И́же крест взем, блаже́нне,/ и жела́емаго ти оте́чества дости́г, Го́рняго Иерусали́ма,/ и в нем со А́нгелы лику́еши, юро́де прему́дре,/ моли́ся о чту́щих твое́ честно́е обре́тение.

Слава Отцу и Сыну и Святому Духу:

И ны́не на Небесе́х с пра́ведными весели́шися, преблаже́нне Макси́ме,/ с ни́миже Христо́ви предстоя́, моли́ мир ми́рови пода́ти,/ и всем правосла́вным христиа́ном здра́вие и на враги́ победи́тельная,/ и всем скорбя́щим утеше́ние.

И ныне и присно и во веки веков. Аминь.

Кто не удиви́тся или́ кто не почуди́тся человеколю́бию Бо́жию,/ я́ко соше́дый с Небе́с и воплоти́ся нас ра́ди из Тебе́ без отца́, еди́на Всепе́тая,/ того́ моли́ изба́вится рабо́м Твои́м от вся́кия ско́рби.

Пе́снь 5

Ирмо́с: Окая́нную ду́шу мою́, нощеборю́щуюся со тьмо́ю страсте́й,/ предвари́в, уще́дри/ и возсия́й мы́сленное со́лнце днесве́тлыя зве́зды во мне,/ во е́же раздели́ти но́щь от све́та.

Припев: Святый блаженный Максиме, моли Бога о нас

Любо́вию твое́ обре́тение чту́щии,/ приле́жно тя мо́лим, юро́де прему́дре,/ не преста́й моля́ся Христу́ Бо́гу, да прии́мем грехо́в просты́ню/ и да озари́т нас в нощи́ свет.

Припев: Святый блаженный Максиме, моли Бога о нас

Моско́встии наро́ди, соше́дшеся дне́сь в твое́ обре́тение, блаже́нне Макси́ме,/ прикаса́ющеся честны́м моще́м твои́м,/ и от них исцеле́ние прие́млем, Христу́ воспева́юще,/ да озари́т нас в нощи́ свет.

Слава Отцу и Сыну и Святому Духу:

Не то́кмо в житии́ чудеса́ твори́л еси́,/ но и по сме́рти мно́га чудеса́ от честна́го твоего́ гро́ба содева́ются приходя́щим с ве́рою, всеблаже́нне Макси́ме,/ неду́ги прогоня́еши и от бед избавля́еши си́лою Христо́вою./ К Нему́же непреста́нно зове́м,/ да озари́т нас в нощи́ свет.

И ныне и присно и во веки веков. Аминь.

Он вселука́вый змий по вся дни поощря́ется расто́ргнута смире́нную мою́ ду́шу,/ но сему́ сокруши́ душетле́нныя зу́бы, Богоро́дице,/ да пою́ Твоя́ вели́чия.

Песнь 6 

Ирмо́с: Обы́де мя бе́здна,/ гроб мне кит бы́сть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.

Припев: Святый блаженный Максиме, моли Бога о нас

Прииди́те, собери́теся, моско́встии наро́ди,/ све́тло пра́зднующе обре́тение честны́х моще́й блаже́ннаго Макси́ма,/ моля́щася ко Влады́це и Бо́гу на́шему,/ да изба́вит нас от вся́каго озлобле́ния.

Припев: Святый блаженный Максиме, моли Бога о нас

Ра́ка моще́й твои́х, му́дре Макси́ме, дража́йши сапфи́ра показа́ся,/ чудотвори́ва бо бе, исцеле́ния источа́ющи./ Ея́же облобыза́юще, ве́рнии, ра́достно от души́ зове́м Христу́:/ спаси́ нас, Го́споди.

Слава Отцу и Сыну и Святому Духу:

Све́тлыми сия́нии провозсия́ша честны́я твоя́ мо́щи, Макси́ме чу́дне,/ от мног лет бы́ша сокрове́ны,/ ны́не же а́ки заря́ пресве́тлая, просвеща́ющи и освеща́ющи чту́щих тя ве́рно/ и ра́достно от души́ Христу́ зову́щих:/ спаси́ нас, Го́споди.

И ныне и присно и во веки веков. Аминь.

Трепе́щу Суди́ща, Де́во, и незабы́тнаго очесе́ Твоего́ Сы́на,/ соде́лав мно́ги грехи́ на земли́,/ и сего́ ра́ди Ти вопию́:/ Всеми́лостивая Влады́чице, помози́ ми/ и тогда́шния мя ну́жды изми́ неосужде́на, Честна́я.

Кондак, глас 8: 

Ве́рою и любо́вию твое́ честно́е обре́тение пра́зднующих, блаже́нне,/ сохрани́ и соблюди́ от вся́кия зло́бы и собла́зна змии́на,/ и́маши бо дерзнове́ние ко Влады́це всех Христу́,/ Его́же моли́ спасти́ лю́ди, моля́щия ти ся,/ да вси вопие́м ти:/ ра́дуйся, о́тче Макси́ме, Ца́рствующему гра́ду Москве́ похвало́.

Икос: 

А́нгел на земли́ житие́м показа́ся,/ а́нгельския полки́ удиви́л еси́, и бе́сы устраши́л еси́,/ и челове́ки просвети́л еси́ чуде́с твои́х заря́ми, Богоно́се и преблаже́нне о́тче наш Макси́ме,/ и ны́не нас вразуми́ воспева́ти пе́снь к твоему́ похвале́нию ра́достным гла́сом, си́це глаго́люще:/ ра́дуйся, оста́вив тле́нное мудрова́ние, прие́м нетле́нный вене́ц;/ ра́дуйся, терпели́вый душе́ю;/ ра́дуйся, целому́дрый ра́зумом и Бо́гу зре́нием;/ ра́дуйся, предо́блий юро́де, и́же злоко́зненнаго врага́ под нога́ма сотры́й;/ ра́дуйся, я́ко ни́жнее мудрова́ние оста́вль и Вы́шняго Ца́рствия дости́г;/ ра́дуйся, цели́телю боле́знем и отгони́телю страсте́м;/ ра́дуйся, о́тче Макси́ме, Ца́рствующему гра́ду Москве́ похвало́.

Песнь 7 

Ирмо́с: Огня́ гаси́лище – отроко́в моли́твы,/ ороша́ющая пе́щь, пропове́дница чудесе́,/ не опаля́ющи, ниже́ сожига́ющи/ песносло́вцы Бо́га оте́ц на́ших.

Припев: Святый блаженный Максиме, моли Бога о нас

Юро́д яви́ся изволе́нием, о́тче,/ и о́ному ди́вному Андре́ю после́дователь,/ и, я́коже той ви́де духо́вными очи́ма Богоро́дицу на возду́се, за мир моля́щуся,/ та́ко и ты ны́не зри́ши Святу́ю Тро́ицу,/ Е́йже ны́не ра́достно пое́ши:/ благослове́н Бог оте́ц на́ших.

Припев: Святый блаженный Максиме, моли Бога о нас

Фарисе́йски не лицеме́руем,/ но со смире́нием и ра́достию, притека́юще к честне́й ра́це твое́й, прему́дре Макси́ме,/ про́сим проще́ния грехо́в, Христо́ви от души́ вопию́ще:/ благослове́н Бог оте́ц на́ших.

Слава Отцу и Сыну и Святому Духу:

Храни́тель бу́ди Це́ркве на́шея и вели́кия Руси́, Богому́дре Макси́ме,/ сохраня́й от пога́ных наше́ствия и междоусо́бныя бра́ни, гла́да же и па́губы,/ да, моли́твами твои́ми изба́вльшеся, ра́достно Христу́ зове́м:/ благослове́н Бог оте́ц на́ших.

И ныне и присно и во веки веков. Аминь.

Отча́явшимся ве́лие прибе́жище,/ обурева́емым ти́хое приста́нище еси́, Богоро́дице,/ Те́мже и мы припа́даем, благодаря́ще, да не постыди́мся,/ Ма́ти И́стиннаго Живота́, Тебе́ пое́м:/ благослове́на Ты в жена́х, Всенепоро́чная Влады́чице.

Песнь 8 

Ирмо́с: Ороси́вшаго пе́щь и о́троки Сохра́ншаго посреде́ горя́щаго пла́мене,/ о́троцы, славосло́вите,/ свяще́нницы, благослови́те,/ лю́дие, превозноси́те во вся ве́ки.

Припев: Святый блаженный Максиме, моли Бога о нас

Це́ркви Ру́сстей моли́твенника тя те́пла стяжа́хом и ско́раго помо́щника/ и я́ко сте́ну тве́рду и забра́ло недви́жимо и необурева́емо,/ не забу́ди и моли́твенник твои́х,/ избавля́я нас от вся́кия ну́жды и печа́ли, да, ра́дующеся, зове́м:/ лю́дие, превозноси́те Го́спода во ве́ки.

Припев: Святый блаженный Максиме, моли Бога о нас

Чудесе́м исто́чник ра́ка твоя́ яви́ся, Макси́ме преблаже́нне,/ от нея́же вси, оби́льно притека́ющим,/ прие́млют телесе́м здра́вие и душа́м спасе́ние твои́ми моли́твами,/ да, ра́дующеся, зове́м:/ лю́дие, превозноси́те Го́спода во ве́ки.

Слава Отцу и Сыну и Святому Духу:

Ше́ствие свое́ до́бре сконча́л еси́,/ и мирски́й мяте́ж, а́ки безбу́рное приста́нище, преплы́л еси́,/ и а́нгельски на земли́ пожи́л еси́,/ пло́ть свою́ ду́хови покори́л еси́,/ и ны́не на Небесе́х предстои́ши всех Царю́ Христу́,/ помина́й нас, чту́щих твое́ обре́тение, зову́щих:/ лю́дие, превозноси́те его́ во ве́ки.

И ныне и присно и во веки веков. Аминь.

Ще́драго и Человеколюби́ваго Спа́са поро́ждши, Чи́стая,/ того́ моли́ уще́дрити раба́ Твоего́ и к покая́ния пути́ наста́ви,/ лука́ваго собла́зны от се́рдца моего́ отжени́,/ того́же изба́ви ловле́ния и огня́ ве́чнаго исхити́,/ я́ко да непреста́нно Тя пою́, Чи́стую, во вся ве́ки.

Песнь 9 

Ирмо́с: сайе, лику́й,/ Де́ва име́ во чре́ве и ро́ди Сы́на Еманну́ила,/ Бо́га же и Челове́ка, Восто́к и́мя Ему́,/ Его́же велича́юще, Де́ву ублажа́ем.

Припев: Святый блаженный Максиме, моли Бога о нас

Источа́ет чудеса́ честна́я ра́ка твоя́, преблаже́нне, преизоби́лующи благода́тию,/ и ве́рою приходя́щим здра́вие подае́т,/ тем вси единогла́сно Человеколю́бца Бо́га в пе́снех велича́ем.

Припев: Святый блаженный Максиме, моли Бога о нас

Ва́ром со́лнечным и зе́льным мра́зом, о́тче, лю́те опаля́емь,/ и нас, пали́мых грехо́вными страстьми́, ороси́ твои́ми моли́твами/ и изба́ви настоя́щаго гне́ва и скорбе́й,/ да тя непреста́нно велича́ем.

Слава Отцу и Сыну и Святому Духу:

Недосто́йною мое́ю руко́ю принесо́х ти таково́е слове́с изви́тие, Богому́дре Макси́ме,/ не пре́зри, но приими́ сия́ и моли́ за мя Творца́, своего́ Влады́ку и Го́спода,/ та́мошняго мя изба́вити муче́ния/ и ми́лость обрести́ в де́нь стра́шнаго испыта́ния.

И ныне и присно и во веки веков. Аминь.

Влады́чице ми́ру, Богоро́дице,/ и́же во глубине́ зол поги́бели мене́ погруже́ннаго злоу́мно/ сластьми́ плотски́ми и пристра́стием, вещми́ жития́,/ изведи́, Пресвята́я Де́во, Свои́м милосе́рдием,/ не и́мам бо наде́жды отню́д спасе́ния,/ ве́сь бо е́смь, Чи́стая, во отча́янии,/ да Тя непреста́нно велича́ю.

Светилен. 

Ревни́тель бы́сть ди́вному Симео́ну,/ пусты́ню и све́рстника оста́вившему,/ и юро́дство на ся возло́жшему, и Го́рния митропо́лии дости́гшу./ С ни́мже ты ны́не наслажда́ешися, и нас помина́й,/ пра́зднующих твои́х честны́х моще́й обре́тение, Макси́ме Богому́дре.

Молитва блаженному Максиму

Уго́дниче Бо́жий, моли́твенниче наш те́плый и ско́рый помо́щниче, блаже́нне Макси́ме! Припа́дающе к ра́це моще́й твои́х, прославля́ем многотру́дныя по́двиги юро́дства твоего́ Христа́ ра́ди, возлюби́в бо Еди́наго Бо́га от всея́ души́ твоея́, ты мирски́ми красо́тами не восхоте́л еси́ наслажда́тися; родна́го жили́ща, любве́ сро́дник, бога́тства и сла́вы вре́менныя отре́клся еси́ и безприю́тное житие́ возлюби́л еси́. Прилежа́в о спасе́нии души́, пло́ть твою́ нагото́ю теле́сною, мра́зом и зно́ем, посто́м и бде́нием, долговре́менным на земли́ лежа́нием изнури́л еси́ и вся стра́сти ея́ ду́хови покори́л еси́, на земли́ пожи́в небе́сно, во пло́ти духо́вно. Умо́м ве́сь к преми́рным взе́мся, плотску́ю му́дрость отри́нул еси́ и, быв мудр о Христе́, юро́д ми́рови показа́лся еси́, от неразу́мных мно́гия оби́ды и бие́ния благоду́шно претерпева́я и мно́гих нечести́вых на пу́ть спасе́ния наставля́я. Те́мже, по сконча́нии твои́х по́двигов, Всепра́ведный Судия́ нетле́нием честны́х твои́х моще́й и мно́гими чудесы́ тя просла́ви, ду́шу же твою́ святу́ю в Небе́сныя оби́тели всели́, иде́же, предстоя́ Престо́лу Непристу́пнаго Боже́ственнаго Све́та, в нем, я́ко в зерца́ле, ви́диши на́ша ну́жды, слы́шиши на́ша к Тебе́ проше́ния и, я́ко друг Христо́в, и́маши ве́лие к Нему́ дерзнове́ние моли́тися о нас. сего́ ра́ди усе́рдно про́сим тя: помоли́ся Го́споду Бо́гу о нас, к земли́ приве́рженных, да и мы, в подража́ние твоему́ ангелоподо́бному на земли́ житию́, не погря́знем в су́етных жите́йских попече́ниих и в земны́х наслажде́ниих, не прельща́емся и не прилепля́емся все́ю душе́ю к тле́нным ми́ра сего́ благо́м, но да обрати́т Госпо́дь Свое́ю благода́тию на́ша мы́сли и жела́ния к Небе́сным и укрепи́т жела́ти восприя́тия бу́дущих нетле́нных сокро́вищ, да пода́ст нам, сла́бым, си́лу к побежде́нию страсте́й, мы́слей и жела́ний грехо́вных, да плени́т наш кичли́вый ум в послуша́ние ве́ры, изба́вит от высокоу́мия, суему́дрия, ло́жных па́губных уче́ний и да́рует нам му́дрость духо́вную, да раствори́т окамене́нная се́рдца на́ша слеза́ми умиле́ния и сокруше́ния о на́ших согреше́ниих, согре́ет их любо́вию к Нему́, на́шему Созда́телю, и к бли́жним на́шим. Испроси́ всем, во вся́кой ну́жди су́щим и к твоему́ заступле́нию прибега́ющим, вся́кий дар, коему́ждо благопотре́бен: больны́м исцеле́ние, печа́льным утеше́ние, бе́дствующим по́мощь, оби́женным защи́ту. Принеси́ ко Го́споду святу́ю моли́тву о всех нас, многогре́шных, я́ко да не по грехо́м на́шим возда́ст нам, ниже́ по беззако́ниим на́шим нака́жет нас, но отврати́т вся́кий гнев, пра́ведно дви́жимый на ны, и проба́вит ми́лость Свою́, вся́ких нужд, бед, напа́стей, скорбе́й и боле́зней нас избавля́я, и и́миже ве́сть судьба́ми да наста́вит нас на пу́ть спасе́ния, пода́ст про́чее вре́мя живота́ на́шего в покая́нии и благоче́стии преити́ и христиа́нскую кончи́ну, неболе́зненну, непосты́дну, ми́рну, и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.