Канон преподобному Максиму Исдоведнику

Тропарь преподобнаго, глас 8:

Правосла́вия наста́вниче, благоче́стия учи́телю и чистоты́, вселе́нныя свети́льниче, мона́шествующих богодухнове́нное удобре́ние, Макси́ме прему́дре, уче́ньми твои́ми вся́ просвети́л еси́, цевни́це духо́вная. Моли́ Христа́ Бо́га спасти́ся душа́м на́шим.

Кано́н преподо́бнаго, гла́с 8.

Пе́снь 1.

Ирмос: Изра́иля от рабо́ты изба́вил еси́, Го́споди, десни́цею Твое́ю держа́вною, я́ко о́наго спа́сл еси́, ны́не на́с спаси́.

Припев: Преподобне отче Максиме, моли́ Бо́га о нас.

Вы́шния прему́дрости сокро́вище стяжа́в в се́рдцы, преподо́бне, тоя́ ра́ди обогати́л еси́ ми́р уче́нии.

Припев: Преподобне отче Максиме, моли́ Бо́га о нас.

Ангельское показа́л еси́ житие́, на земли́ живы́й, и бы́л еси́ хра́м Бо́гу, христопропове́дниче преподо́бне, те́мже и возложи́лся Ему́.

Сла́ва Отцу́ и Сы́ну и Свято́му Ду́ху:

Еди́но мы́сляще дру́г ко дру́гу, во еди́ну Твою́ ве́ру, Христе́, преподо́бнии пропове́даху Тя́ в безъязы́чных усте́х, я́ко трубы́ боговеща́нныя.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, Чи́стая Богоро́дице, Яже пре́жде су́щаго Сло́ва Бо́жия ро́ждши в после́дняя пло́тию; ра́дуйся, стено́ все́м на́м, и покро́ве чту́щим Тя́.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че Тебе́, Го́споди.

Припев: Преподобне отче Максиме, моли́ Бо́га о нас.

Кро́ви ка́плют честны́я твоея́ руки́, и уче́ния теку́т целому́дреннаго язы́ка твоего́, изве́стно вопию́ща по отсече́нии его́, Христа́ во двою́ естеству́.

Припев: Преподобне отче Максиме, моли́ Бо́га о нас.

Рука́ твоя́ писа́ньми не преста́ вопия́, и язы́к уче́нии тру́бит ве́ру твою́, богоглаго́ливе треблаже́нне: Бо́г бо бе́ обоя́ движа́, слага́я глаго́лати.

Сла́ва Отцу́ и Сы́ну и Свято́му Ду́ху:

Треми́ у́бо телесы́, во еди́ной же души́, единому́дренно сопроти́вистеся, отцы́ чу́днии, зле́ отъе́млющим Христо́вы стра́сти и сугу́бое де́йство.

И ны́не и при́сно и во ве́ки веко́в. Ами́нь.

Богоро́дичен: Жены́ у́бо ражда́ют, Ма́ти Де́во Чи́стая, но не ктому́ де́вы пребыва́ют, я́коже Ты́: ниже́ бо еди́на от си́х Бо́га породи́, то́кмо Ты́, Богоро́дице Чи́стая.

Седа́лен преподо́бнаго, гла́с 3.

Уче́ние Боже́ственное держа́, сто́лп бы́л еси́ Правосла́вия, и держа́ва, богому́дре, ве́ры: во двою́ существу́ и дву́ хоте́нию, пропове́дал еси́ Христа́ Бо́га на́шего, о́тче Макси́ме, Его́же приле́жно моли́, дарова́ти на́м ве́лию ми́лость.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Припев: Преподобне отче Максиме, моли́ Бо́га о нас.

Ты́ Моисе́ю подо́бяся, богому́дре, скрижа́ли разу́мно прия́т уче́ний: во мра́к бо вше́л еси́ виде́ний, и обогати́лся еси́ ра́зума све́том.

Припев: Преподобне отче Максиме, моли́ Бо́га о нас.

Ты́ Авраа́му поревнова́в, богому́дре, друга́го Исаа́ка приве́л еси́ Го́сподеви, твое́ же́ртвовав, о́тче, се́рдце во огни́ со́вестне.

Сла́ва Отцу́ и Сы́ну и Свято́му Ду́ху:

Еди́наго Христа́ пропове́давше, отцы́, еди́наго Сы́на во двою́ существу́ испове́дасте, хотя́ща по существу́ и де́йствующа обоя́.

И ны́не и при́сно и во ве́ки веко́в. Ами́нь.

Богоро́дичен: Безле́тна Сы́на родила́ еси́ в ле́то нетле́нно и чиста́ пребыла́ еси́, ро́ждши на́с ра́ди Воплоще́ннаго во утро́бе Твое́й, Богороди́тельнице Присноде́во.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Преподобне отче Максиме, моли́ Бо́га о нас.

Не усече́ твоего́, о́тче, ме́чь дерзнове́ния, не угаси́, преподо́бне, заточе́ние ве́ры твоея́.

Припев: Преподобне отче Максиме, моли́ Бо́га о нас.

Пропове́дует у́бо Ри́м ре́вность твою́, богоно́се, тру́бит же, преподо́бне, Це́рковь словеса́ твоя́.

Сла́ва Отцу́ и Сы́ну и Свято́му Ду́ху:

Пред кня́зи пропове́давше Спа́са, му́ченицы бы́сте произволе́нием, богому́дрии.

И ны́не и при́сно и во ве́ки веко́в. Ами́нь.

Богоро́дичен: Исто́чник безсме́ртия пое́м Тя́, Богоро́дице, Ты́ бо приснотеку́щий Живо́т ми́ру родила́ еси́.

Пе́снь 6.

Ирмос: Из чре́ва а́дова во́пля моего́ услы́шал еси́ гла́с мо́й и изба́вил еси́ от тли́ живо́т мо́й, Многоми́лостиве.

Припев: Преподобне отче Максиме, моли́ Бо́га о нас.

Удиви́ твое́, треблаже́нне, испове́дание, в тебе́ веща́вый Иису́с, со стра́ждущими тебе́.

Припев: Преподобне отче Максиме, моли́ Бо́га о нас.

Ни князе́й киче́ния, ни меча́, ни огня́, претя́щаго тебе́, убоя́ся, преподо́бне, ве́рою бы́л еси́ кре́пок.

Припев: Преподобне отче Максиме, моли́ Бо́га о нас.

Не поколеба́ твоего́ столпа́ правосла́вия вселука́вый вра́г, но победи́ся и поги́бе.

Сла́ва Отцу́ и Сы́ну и Свято́му Ду́ху:

Треплете́нною твое́ю пра́щею преще́ние Ариево мы́сленно стреля́ется, стрела́ми та́ин Христо́вых.

И ны́не и при́сно и во ве́ки веко́в. Ами́нь.

Богоро́дичен: Па́че ума́ и сло́ва, Де́во, Пита́теля все́х от сосцу́ пита́ющи, ма́терних не разуме́ла еси́.

Конда́к, гла́с 6.

Све́т трисия́нный, все́льшийся в ду́шу твою́, сосу́д избра́н показа́ тя, всеблаже́нне, явля́юща Боже́ственная конце́м, неудобопости́жных разуме́ний ты́ сказу́яй, блаже́нне, и Тро́ицу все́м, Макси́ме, воспропове́дуяй я́сно, Пресу́щную Безнача́льну.

Икос:

Подража́тель я́влься Спа́совых страсте́й и Того́ в души́ твое́й име́я, всеблаже́нне, восхожде́ния в се́рдцы твое́м возложи́л еси́, пребога́те, То́й же тебе́ подаде́ благода́ть с небесе́: сопроти́вился бо еси́ мучи́телем, му́дре, му́жески, Безнача́льную, и Боже́ственную, и Единосу́щную Тро́ицу пропове́дуя, и облича́я злосла́вныя и богобо́рныя, безме́рныя претерпе́л еси́ напа́сти, всехва́льне, язы́ка отре́зание богосло́внаго, преподо́бне, и твоея́ руки́ вку́пе, не преста́л же еси́ ты́ со дерзнове́нием глаго́ля, и утвержда́я ве́рныя боже́ственными твои́ми уче́нии, Тро́ицу все́м лю́дем пропове́дуя я́сно, Пресу́щную Безнача́льну.

Песнь 7.

Ирмос: В начале землю основавый и небеса словом утвердивый, благословен еси во веки, Господи, Боже отец наших.

Припев: Преподобне отче Максиме, моли́ Бо́га о нас.

Ты́ оде́жду есте́ственнаго досто́инства кро́вию твое́ю украси́л еси́, богому́дре, молча́щ язы́к, о́тче, и веща́ющь, явле́ние подава́я се́ю слове́с твои́х.

Припев: Преподобне отче Максиме, моли́ Бо́га о нас.

Гро́б ва́ших не уста́ви язы́ков, земля́ же да́льняя не скры́ словеса́, я́коже пи́шет Дави́д в пе́снех, во всю́ вои́стинну зе́млю пропове́дашася.

Сла́ва Отцу́ и Сы́ну и Свято́му Ду́ху:

Якоже зла́то, трие́ искуси́вшеся во огни́ искуше́ний о́нех, чисте́йшу ве́ру ва́шу возрасти́сте Христу́, отцы́ честни́и.

И ны́не и при́сно и во ве́ки веко́в. Ами́нь.

Богоро́дичен: Та́йны о́браз Де́вы в Сина́и Ты́ прообрази́л еси́, купино́ю горя́щею и неопаля́емою: благослове́н еси́, Го́споди, Бо́же оте́ц на́ших.

Пе́снь 8.

Ирмос: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Преподобне отче Максиме, моли́ Бо́га о нас.

Зарю́ боже́ственнаго уче́ния в се́рдцы прие́м, богому́дре, просвеще́нием ра́зума обогати́лся еси́, и прему́дрости сокро́вище вложи́л еси́ в ду́шу твою́, о́тче.

Припев: Преподобне отче Максиме, моли́ Бо́га о нас.

Уче́ния предложи́в, богоблаже́нне, е́реси отгна́л еси́ от среды́, и Христо́вым поревнова́в страсте́м, бы́л еси́ же́ртва чи́ста и прия́тна Бо́гу произволе́нием.

Сла́ва Отцу́ и Сы́ну и Свято́му Ду́ху:

В чистоте́ соблю́дше житие́ и ве́рою украси́вше дела́, небе́сныя сла́вы сподо́бистеся, честни́и отцы́, те́мже воспева́ете Христа́ во ве́ки.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, две́ре и одушевле́нный о́блаче; ра́дуйся, горо́, и купино́, и све́щниче; ра́дуйся, хра́ме, и престо́ле, и раю́; ра́дуйся, ро́ждшая Соде́теля все́х, Благослове́нная.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше, ве́рных, спасе́ние, пе́сньми немо́лчными велича́ем.

Припев: Преподобне отче Максиме, моли́ Бо́га о нас.

Ты́ безстра́стием и виде́нием, треблаже́нне, научи́л еси́ словесы́ на́с жи́зни ве́чныя, сто́лп одушевле́н Правосла́вия ми́рови, испове́дание твое́ оста́вил еси́.

Припев: Преподобне отче Максиме, моли́ Бо́га о нас.

Ты́, Финее́су подо́бяся, богоно́се, я́ко ине́м копие́м, мече́м сло́ва новонасажде́нную посека́еши ве́ру, отрева́я ху́лящия Христа́.

Сла́ва Отцу́ и Сы́ну и Свято́му Ду́ху:

Вои́стинну просла́вистеся, богоно́снии отцы́, ра́нами и бие́нии, гоне́нии и беда́ми, во у́зах же, и темни́цах, и желе́зах, и в заточе́ниих пострада́вше.

И ны́не и при́сно и во ве́ки веко́в. Ами́нь.

Богоро́дичен: Купину́, горя́щу огне́м и неопаля́ему, предзря́ше дре́вле Моисе́й, Богома́ти Де́во, богоприя́тну прообразу́я Твою́ утро́бу, прие́мшую нетле́нный Огнь.

Свети́лен свята́го.

Труба́ яви́лся еси́ прему́дрости, благогла́сным язы́ком твои́м сопроти́вных ужаса́я полки́, Макси́ме, све́т мона́шествующих, те́мже, твои́ми пита́ющеся словесы́, ра́зум познава́ем су́щих.

Молитва

Преподобне отче Максиме! Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш, Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.