25 августа.

Канон преподобномученице Рафаиле (Тартацкой), игумении Свято-Троицкого Чигиринского женского монастыря

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 1:

Агница Христова мати Богоблаженная Рафаило, и наставница мудрая агниц Его явилася еси, венца мученичества сподобилася еси от десницы Иисусовы, Емуже не престай моляся, да соблюдет в мире Церковь Православную, и обитель твою от всех навет вражиих защитит, и спасет души наша, яко Милосерд.

Величание:

Величаем тя, страстотерпице преподобная, мати Рафаило, и чтем честная страдания твоя, яже за Христа во утверждение Православия претерпела еси.

Канон, глас 8

Песнь 1

Ирмос: Воду прошед яко сушу и египетскаго зла избежав, израильтянин вопияше: Избавителю и Богу нашему поим.

Припев: Святая преподобномученице Рафаило, моли Бога о нас.

Сетей лукаваго посреди безбожных живущи избавльшаяся, молитвы воссылала еси о отечестве земнем, ныне же от земли сама преставилася еси и наша молитвы приемлеши.

Припев: Святая преподобномученице Рафаило, моли Бога о нас.

Ты воду искушений немокренно прошла еси, Рафаило, и Избавителю представше, венец повелительный на главу твою от десницы Господней прияла еси.

Припев: Святая преподобномученице Рафаило, моли Бога о нас.

Рафаиле, игумений обители Троицкия, приносяще моления, всякого злаго обстояния чаем избавление прияти.

Сла́ва Отцу́ и Сы́ну и Свято́му Ду́ху:

Аще и тело твое, чистая, растерзаша, яко львове, безумнии мучителие, обаче души твоей не возбраниша полчища бесов лютых на небо восход совершити.

И ны́не и при́сно и во ве́ки веко́в. Ами́нь.

Богоро́дичен: Дверь Небесная, Пресвятая Дево, нам явилася еси, яко Тобою нам спасения вход отверзеся Рождеством Твоим.

Песнь 3

Ирмос: Небеснаго круга Верхотворче Господи и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.

Припев: Святая преподобномученице Рафаило, моли Бога о нас.

Агниц, пожершихся Владыце от лет древних, любве ко Христу подражала еси, мати, неугасимым светильником веры Жениха сретила еси и на брак Агнчий вошла еси радостно.

Припев: Святая преподобномученице Рафаило, моли Бога о нас.

Небесных селений жительница, мощи своя нам оставила еси в память страданий за веру во Христа, Егоже возлюбила еси всем сердцем твоим.

Припев: Святая преподобномученице Рафаило, моли Бога о нас.

Иже вере твоей подражающим, и мощем покланяющимся твоим, и в помощь молитвенно призывающим тя, буди помощница, Рафаило, мати преподобная.

Сла́ва Отцу́ и Сы́ну и Свято́му Ду́ху:

Явилася еси мудрая паче Евы, праматере твоея: та бо лукаваго льсти внимаше, ты же вся козни диавольския поправши, от слуг его умерщвления прияла еси, жизни вечные обручение приявши.

И ны́не и при́сно и во ве́ки веко́в. Ами́нь.

Богоро́дичен: Помощница матерем и девом Покрове, бельцем Заступница и иночествующим Защищение, Господа Иисуса Родительница и вопиющим к Тебе крепость Ты еси, Марие пресладкая.

Седален святыя, глас 8:

Благочестия образы умудрившися, нечестия прелесть низвергла еси, мученице, и Божественным деланием присно распаляемая, мучителей угасила еси безбожное свирепство. Темже источаеши исцеления верою притекающим и празднующим любовию святую память твою, преславная Рафаило.

Слава и ныне, глас 4:

Возбуди нас твоими молитвами, преподобная, аки дев нерадивых, яже уснуша в час сретения Жениха, да, тебе подражающии, светильницы своя елеем благодати присно наполняюще, чертоги Его не отвержены пребудем.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Припев: Святая преподобномученице Рафаило, моли Бога о нас.

Радости вечныя сподобльшаяся, оскудевающим в вере молитвами твоими ко Господу помощь подай, во еже, умножившейся вере нашей, радости небесныя улучим.

Припев: Святая преподобномученице Рафаило, моли Бога о нас.

Емшым тя беззаконным, тех суровства никакоже убоялася еси, преславная, и посреде мучений прославила еси Христа, Рафаило преподобная.

Припев: Святая преподобномученице Рафаило, моли Бога о нас.

Твоих молитвенник не презри, преподобная, вознеси ко Престолу Вседержителеву моления наша, да и мы от Него спасение душам нашим улучити сподобимся, прославляюще Его Божество.

Сла́ва Отцу́ и Сы́ну и Свято́му Ду́ху:

Елико мощно нам, к тебе взывати будем, Рафаило, страстотерпице, нам скорая услышательница буди и пред Христом Ходатаица о прославляющих Его Божество.

И ны́не и при́сно и во ве́ки веко́в. Ами́нь.

Богоро́дичен: Радование ангелом приимшая, радости вечныя сподоби и нас, Матерь Божию Тя Именующих и почитающих образ Твой и Сына Твоего.

Пе́снь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Припев: Святая преподобномученице Рафаило, моли Бога о нас.

Поболевши на земли и много пострадавши, душу свою исцелила еси совершенне, и спасение бысть плод страданий твоих, еже от Человеколюбца Господа прияла еси, преподобномученице.

Припев: Святая преподобномученице Рафаило, моли Бога о нас.

Егоже возлюбила еси Христа умоли, да сподобит и нас в вере твердей и надежде несумненней любви сподобитися Божественныя.

Припев: Святая преподобномученице Рафаило, моли Бога о нас.

Вседержителевою мышцею укрепляема, прещения безбожных в ничтоже вменяющи, смерть прияла есн, яже восход в небесная явися тебе.

Сла́ва Отцу́ и Сы́ну и Свято́му Ду́ху:

Шатания безбожных, на многая лета нашедшия на страну нашу, десницею Господнею сокрушишася, молитвами же твоими ко Господу от сих и мы присно избавитися чаем.

И ны́не и при́сно и во ве́ки веко́в. Ами́нь.

Богоро́дичен: Аще к Сыну на Небо с телесем взята была еси, Пречистая, обаче ушеса Твоя скоры есть на слышание молящих Тя, руце же быстры на помощь исправляющим житие свое в воле Сына Твоего.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Припев: Святая преподобномученице Рафаило, моли Бога о нас.

Яже древних мучениц образу страданий подражающая, и наши души да укрепиши в терпении и исповедании веры православныя: явилася бо еси, Рафаило, водительница инокинь честных ко спасению.

Припев: Святая преподобномученице Рафаило, моли Бога о нас.

Слыша Господь молитвы твоя на всяко время, игумение премудрая, от среды скимнов рыкающих на Церковь Его, обаче тело твое растерзати сим попусти, да будеши хлеб Ему чистый и жертва приятная.

Припев: Святая преподобномученице Рафаило, моли Бога о нас.

Во дни древния зверем телеса предавшия сподобишася славы неувядаемыя, тех стопам и матерь наша Рафаила последоваше, ныне от нас песньми ублажается.

Сла́ва Отцу́ и Сы́ну и Свято́му Ду́ху:

Яко львове, поглотити агницу Христову восхотевше безбожницы, обаче ничтоже успеша, и памяти сея погубити не возмогоша, Дух во Святый память ея в день сей быти в Церкви учреди.

И ны́не и при́сно и во ве́ки веко́в. Ами́нь.

Богоро́дичен: Твоего заступления не отыми от нас, Богородице, в печалех житейских пребывающих и ко аду приближающихся в прегрешениех своих, мольбами к Сыну Твоему скоро к покаянию возстави.

Кондак, глас 6:

Агницу Христову Рафаилу прославляем, на небесех Ему предстоящую, память ея в храме творяще, к горним же сердца наша возносяще. Та бо от безбожных мучителей страдания и смерть претерпе, венец нетленный прият от Господа, и благодать молитися о нас, любовию воспоминающих честная страдания ея.

Икос:

Противоста сонму лукавнующих и на Церковь Христову злобою дышущих кроткая агница Христова Рафаила, и от вепрей лютых растерзаема, крови алчущих, в мучении житие сконча. Обаче кровию ея честною потопи Христос началовластие безбожное, и пламень гонений угаси, и дарова земли нашей в сонме новомученик Черкасских ходатаицу и молитвенницу о всех, любовию воспоминающих честная страдания ея.

Песнь 7

Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси.

Припев: Святая преподобномученице Рафаило, моли Бога о нас.

Аще изгнаша тя безбожнии от обители Троицы, во граде Чигирине бывшей, не возмогоша воспретити души твоей в небесную обитель внити, вопиющей: отцев Боже, благословен еси.

Припев: Святая преподобномученице Рафаило, моли Бога о нас.

Яже исцелению Божию, Рафаило, тезоименитая, подаждь душам и телесам нашим исцеление, в помощь тя призывающим и поющим: отцев и матерей преподобных Боже, благословен еси.

Припев: Святая преподобномученице Рафаило, моли Бога о нас.

На небеса восшедши верою твердою, молитвою ко Святей Троице ты, мати, нам помози, поющим: отцев Боже, благословен еси.

Сла́ва Отцу́ и Сы́ну и Свято́му Ду́ху:

Ангельскаго чина светлое украшение и миряном похвала еси, игумение Рафаило, молися о нас, поюще: отцев Боже, благословен еси.

И ны́не и при́сно и во ве́ки веко́в. Ами́нь.

Богоро́дичен: Марие Дево, пламень страстей наших угаси благодатию Твоею, предстательствующи прилежно о вопиющих: отцев Боже, благословен еси.

Песнь 8

Ирмос: Царя Небеснаго, Егоже поют вои Ангельстии, хвалите, и превозносите во вся веки.

Припев: Святая преподобномученице Рафаило, моли Бога о нас.

Иже Ангельским ликом подражающих предстательством ко Господу укрепи, поющих Ему хвалу, Рафаило славная.

Припев: Святая преподобномученице Рафаило, моли Бога о нас.

Ученьми апостолов и святых отец душу насыщала еси на земли, сих вере подражающи, и о нас, православного учения держащихся, пред вся Сотворшим буди ходатаица.

Припев: Святая преподобномученице Рафаило, моли Бога о нас.

Болезней и скорбей исполнено бысть житие твое во отечестве твоем земнем, от Бога отлучившемся; радости же вечныя сподобльшеся, о обращении многих ко Христу ныне радуешися, мати преподобная.

Припев: Святая преподобномученице Рафаило, моли Бога о нас.

Людем, тебе летную память творящим, буди в житии сем помощница и душам от жизни отлучающихся к Царствию Небесному путеводительница.

Сла́ва Отцу́ и Сы́ну и Свято́му Ду́ху:

Аще и устне грешнии имамы, обаче пети святым похвальная навыком, сего ради и страстотерпице Рафаиле моление днесь честно совершаем.

И ны́не и при́сно и во ве́ки веко́в. Ами́нь.

Богоро́дичен: Живота вечнаго Родительнице, жизнь вечную улучити и нас сподоби, на Тя упование имущих.

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.

Припев: Святая преподобномученице Рафаило, моли Бога о нас.

Адовыми враты неодолима Церковь Христова нашими усты ныне песнь благохваления тебе, Рафайло, приносит.

Припев: Святая преподобномученице Рафаило, моли Бога о нас.

Емуже молитвы, моления, пощения и коленопреклонения приносившая, умоли Христа о память твою чтущих и совершающих, яко да милость Свою выну пробавит на нас.

Припев: Святая преподобномученице Рафаило, моли Бога о нас.

Тяготу от хулителей приявшая, безбожных началовластие и варвар гонение купно со всею Церковию претерпевшая, достойно мзду во граде Небеснем со всеми святыми улучила еси.

Сла́ва Отцу́ и Сы́ну и Свято́му Ду́ху:

Славим преподобномученицу Рафаилу, вернии, хвалу Господеви о ней воспевающе, яко земли нашей и Церкви новое украшение даровася.

И ны́не и при́сно и во ве́ки веко́в. Ами́нь.

Богоро́дичен: Яже Ангелом говейная и нами присночтимая, буди, Марие, Мати Господа, нам путеводительница в Царство Сына Твоего, якоже древле тьмам святых Его.

Светилен

Приими наше пение и помолися ко Христу, святая, да избавит сердца наша от прилога бесовскаго и страстей, вшедших в нея.

Молитва

О, блаженная мати, преподобная мученице, многострадальная Рафаило! Ты многия муки на земли за Христа прияла еси, темже во веки с Ним на небеси царствуеши, и имаши благодать подавати исцеления и всякую помощь в бедах и многоразличных нуждах. Темже тя, предстоящую Престолу Господа славы и нас, твоих молитвенников, на всякий час послушающую, просим: простри ко Господу руце твои, и вознеси молитвы твоя о нас, усердно почитающих память твою. Испроси Церкви Святей единства, обители твоей благостояния, стране нашей мира и благоденствия, всем же нам моли Господа даровати грехов прощение, скорбящим и недугующим скорое вспоможение, обидимым покров и заступление. Умоли Господа, да подаст нам христианскую кончину и добрый ответ на Страшнем Судищи Своем, да сподобимся купно с тобою славити Отца, и Сына, и Святаго Духа во веки веков. Аминь.