Канон cвятым мученикам Фотию и Аниките

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости; те́х моли́твами спаси́ ду́ши на́ша.

Кано́н му́чеников, гла́с 4.

Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святии мученицы Фотие и Аникито, моли́те Бо́га о нас.

Боле́зни те́ла, прехва́льнии, претерпе́вше, тверде́йшим по́мыслом ве́ры, к неболе́зненней жи́зни, ра́дующеся, преста́вистеся, о на́с при́сно моля́щеся.

Припев: Святии мученицы Фотие и Аникито, моли́те Бо́га о нас.

Боже́ственными огра́ждся, Аники́то, ору́жии ве́ры, к боре́нию безпло́тных вра́г тве́рдо отлучи́лся еси́ и те́х во́инства Боже́ственною си́лою потреби́л еси́.

Сла́ва Отцу́ и Сы́ну и Свято́му Ду́ху:

Вити́йское глумле́ние, сла́вне, и у́м неиску́сен е́ллинский, ра́зумом Боже́ственным просвеща́емь, посрами́л еси́, и себе́ сама́го, Аники́то, всего́ к страда́нию отда́л еси́.

И ны́не и при́сно и во ве́ки веко́в. Ами́нь.

Богоро́дичен: Де́ва и пре́жде рождества́, Чи́стая, и по рождестве́ я́ко вои́стинну яви́лася еси́, Бо́га бо па́че сло́ва родила́ еси́, святы́я му́ченики страда́вшия венча́вшаго.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святии мученицы Фотие и Аникито, моли́те Бо́га о нас.

Победи́в со Христо́м ополче́ния вра́жия, вене́ц побе́дный прия́л еси́, му́чениче страстоте́рпче Аники́то.

Припев: Святии мученицы Фотие и Аникито, моли́те Бо́га о нас.

Неради́ша о пло́ти я́ко тле́ющей Христо́вы му́ченицы и лю́тая муче́ния ра́зумом тве́рдым претерпе́ша.

Сла́ва Отцу́ и Сы́ну и Свято́му Ду́ху:

Во́д животво́рных испо́лнени, му́тныя то́ки пре́лести, му́дрии му́ченицы, тече́нии кро́вными уста́висте.

И ны́не и при́сно и во ве́ки веко́в. Ами́нь.

Богоро́дичен: Всели́ся во утро́бу Твою́ живы́й на небесе́х Госпо́дь и от на́с вся́ку пре́лесть, Богоро́дице, отгна́л е́сть.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святии мученицы Фотие и Аникито, моли́те Бо́га о нас.

Распала́еми любо́вию Бо́жиею, усе́рдно пла́мень огня́ проидо́сте, пребы́вше росо́ю неопа́льна духо́вною, непобеди́мии му́ченицы, боже́ственнии моли́твенницы о душа́х на́ших.

Припев: Святии мученицы Фотие и Аникито, моли́те Бо́га о нас.

Отве́ргшеся те́ла, разли́чными о́бразы страда́льцы стру́жеми, все́м бо умо́м к Бо́гу взира́ху, си́м подаю́щему терпе́ние ве́ры ра́ди.

Припев: Святии мученицы Фотие и Аникито, моли́те Бо́га о нас.

Кре́пцы, я́ко столпи́ благоче́стия, сте́ны вра́жия низложи́сте и гра́да Боже́ственнаго, му́ченицы, гра́ждане бы́сте, вопию́ще: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Дрема́нием не воздрема́сте злоче́стия, но бо́дростию боже́ственною, му́ченицы, спя́щия всегда́ в сме́рти к све́ту наста́висте богоразу́мия благода́тию.

И ны́не и при́сно и во ве́ки веко́в. Ами́нь.

Богоро́дичен: Яко красна́ породила́ еси́ Кра́снаго, Де́во Ма́ти Чи́стая, красны́ показа́вшаго му́ченика, тве́рдо пострада́вшия и безбо́жие потре́бльшия.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Припев: Святии мученицы Фотие и Аникито, моли́те Бо́га о нас.

Премно́гими ра́нами умерщвле́но те́ло твое́, Аники́то, живо́т тебе́ нестаре́емый, преблаже́нне, преподо́бно исхода́таи.

Припев: Святии мученицы Фотие и Аникито, моли́те Бо́га о нас.

Потребле́ние огню́ жгу́щему бы́л еси́, о Фо́тие, Боже́ственнаго сия́ния соприча́стниче, и дне́ незаходи́маго ча́до при́сное!

Сла́ва Отцу́ и Сы́ну и Свято́му Ду́ху:

Теку́щих тле́ние до конца́ отри́нуша, возжеле́вше пребыва́ющая кра́сная, единоду́шно, му́ченицы сла́внии.

И ны́не и при́сно и во ве́ки веко́в. Ами́нь.

Богоро́дичен: Кто́ мо́жет сказа́ти Твое́ та́инство, о Влады́чице Богоро́дице? Па́че ума́ бо и сло́ва, Бо́га неизрече́нно родила́ еси́.

Пе́снь 6.

Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею Кро́вию.

Припев: Святии мученицы Фотие и Аникито, моли́те Бо́га о нас.

Возвы́шен бы́л еси́, не ми́лостивно на дре́ве стру́жем, умерщвле́ния дебельство́ отмета́я, в боже́ственную оде́жду с небесе́ одева́емь, му́чениче Аники́то.

Припев: Святии мученицы Фотие и Аникито, моли́те Бо́га о нас.

Расто́ргше у́зы пре́лести, святи́и, внегда́ свя́зани бы́сте кре́пко, терпе́нием же и пожда́нием, боже́ственными у́жи, предста́теля тмы́ удави́сте.

Сла́ва Отцу́ и Сы́ну и Свято́му Ду́ху:

Яви́стеся я́ко вели́цыи свети́льницы, просвеща́юще луча́ми исцеле́ний и заря́ми боже́ственных по́двиг всю́ тва́рь, страда́льцы Христо́вы предо́блии.

И ны́не и при́сно и во ве́ки веко́в. Ами́нь.

Богоро́дичен: Зако́нных породила́ еси́ кроме́, Всенепоро́чная, и́стиннаго Законополо́жника, Его́же моли́ зако́ном греха́ побежда́емую ду́шу мою́ уще́дрити и спасти́ мя.

Седа́лен му́чеников, гла́с 4.

Низло́жше вра́жия возноше́ния терпе́нием лю́тых му́к, страстоте́рпцы, на небесе́х живете́ ны́не, ра́дующеся, Фо́тие сла́вный и Аники́то блаже́нне. Те́мже ублажа́етеся во ве́ки веко́в, о на́с моля́щеся Христу́, творя́щих ва́шу па́мять.

Пе́снь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии мученицы Фотие и Аникито, моли́те Бо́га о нас.

Стра́нен по́двиг проше́дше, стра́нни яви́стеся вои́стинну мудрова́ний, сла́внии, плотски́х, Ангелом согра́ждане, снасле́дницы же Христу́, великоимени́тии му́ченицы.

Припев: Святии мученицы Фотие и Аникито, моли́те Бо́га о нас.

Терпе́нием же и пожда́нием победи́сте все́х враго́в безбо́жныя наве́ты и, све́тлы боле́зньми бы́вше, к сия́нию незаходи́мому преста́вистеся, пресла́внии.

Сла́ва Отцу́ и Сы́ну и Свято́му Ду́ху:

Хра́м Тро́ицы Пребоже́ственныя бы́вше, столпы́ и хра́мы низложи́ша му́жески безбо́жных, прехва́льнии, и к небе́сному хра́му преста́вистеся, ра́дующеся.

И ны́не и при́сно и во ве́ки веко́в. Ами́нь.

Богоро́дичен: Яко простра́ннейши небе́с, Чи́стая, прия́ла еси́ Сло́ва, ника́коже вме́стна па́че ума́, те́сным ходя́щия путе́м, Пренепоро́чная, к простра́нству вводя́ща Боже́ственныя жи́зни.

Пе́снь 8.

Ирмо́с: Ру́це распросте́р, Дании́л льво́в зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Припев: Святии мученицы Фотие и Аникито, моли́те Бо́га о нас.

Тве́рд у́м, му́дрии, показу́юще, звере́й стремле́ния не убоя́стеся, вре́ния коно́б не ужасо́стеся, ни удо́в отсече́ния, ни мучи́телей преще́ния, вопию́ще: благослови́те, вся́ дела́ Госпо́дня, Го́спода.

Припев: Святии мученицы Фотие и Аникито, моли́те Бо́га о нас.

Исцеля́ете стра́сти ве́рных, изобрази́вше стра́сть блаже́нную ва́шими страстьми́, святи́и, и отъе́млете неду́ги, и отгоня́ете лю́тыя ду́хи, вопию́ще: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Дво́ица страда́лец предо́брая Тро́ицу Несозда́нную испове́да, и тмосла́вных погуби́ супоста́т вои́стинну по́лк, и тма́м мы́сленных совокупи́ся, пою́ще: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Свята́я Де́во, Яже Бо́га Пресвята́го поро́ждши, венча́вшаго благода́тию святы́я Своя́ му́ченики, спаси́, освяти́ на́с, усе́рдно пою́щих: благослови́те, вся́ дела́ Госпо́дня, Го́спода.

Песнь 9

Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии мученицы Фотие и Аникито, моли́те Бо́га о нас.

Се́ све́тлый, и светоно́сный, и испо́лнен благода́ти де́нь возсия́ Фо́тия боже́ственнаго и Аники́ты, вся́ просвеща́я в не́м пра́зднующия светоза́рная си́х страда́ния.

Припев: Святии мученицы Фотие и Аникито, моли́те Бо́га о нас.

Яви́стеся, я́ко у́глие, всю́ ве́щь зло́бы попаля́юще, яви́стеся, я́ко честни́и а́гнцы, во́льне закала́еми и Агнцу, взе́млющему грехи́, приводи́ми.

Припев: Святии мученицы Фотие и Аникито, моли́те Бо́га о нас.

Ра́ны ва́ша, страстоно́сцы, страда́ния и боле́зни, и па́че ума́ терпе́ние, и по́двиги, и кончи́ну пресла́вно сла́вяще, дне́сь вси́ возра́дуемся.

Сла́ва Отцу́ и Сы́ну и Свято́му Ду́ху:

Процвето́ша во удо́лиях преподо́бно му́ченических, я́коже ши́пок, преудо́бреннии страда́льцы, и сердца́ благоуха́ют благочести́вых ду́хом, смра́д пре́лести отгоня́юще.

И ны́не и при́сно и во ве́ки веко́в. Ами́нь.

Богоро́дичен: Просвети́ на́с, ро́ждшая Све́т непристу́пный, Де́во, испо́лни на́с весе́лия, и ра́дости, и боже́ственнаго ра́зума, чи́стым се́рдцем Тя́ богому́дренно велича́ющия.

Молитва

Святи́и му́ченицы Фотие и Аникито! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.