Канон святителю Нифонту, Патриарху Константинопольскому

Тропарь, глас 3:

Де́лы просия́л еси́ благоче́стия,/ высокотво́рным смире́нием украша́емь,/ Афо́на похвало́, патриа́рхов удобре́ние,/ Ни́фонте сла́вне,/ моли́ся о нас, любо́вию сла́вящих тя.

Канон, глас 8.

Песнь 1

Ирмос: Во́ду проше́д, я́ко су́шу,/ и еги́петскаго зла избежа́в,/ Изра́ильтянин вопия́ше:/ Изба́вителю и Бо́гу на́шему пои́м.

Припев: Святителю отче Нифонте, моли́ Бо́га о нас.

Пресве́тлою сла́вою Божества́ озаря́емь, Боже́ственный о́тче,/ души́ мое́й мглу разжени́,/ да воспою́ сла́вныя по́двиги твоя́, Христо́в иера́рше.

Припев: Святителю отче Нифонте, моли́ Бо́га о нас.

Благочести́ваго ко́рене о́трасль сый, блаже́нне,/ зако́н животво́рный всех Влады́ки от ю́ности возлюби́л еси́/ и вся́кое беззако́ние умерщвля́ющее возненави́дел еси́.

Припев: Святителю отче Нифонте, моли́ Бо́га о нас.

Теку́щих непостоя́нства избежа́в,/ веще́ственная на духо́вная премени́л еси́, я́ко Богому́дрый,/ и благода́тию Бо́жиею обогати́лся еси́, благосла́вне.

Припев: Святителю отче Нифонте, моли́ Бо́га о нас.

Четвери́цу доброде́телей приусво́ил еси́, преподо́бне,/ целому́дрие, му́дрость, му́жество и пра́вду,/ и те́ми возше́л еси́ на высоту́ богозре́ния.

Сла́ва Отцу́ и Сы́ну и Свято́му Ду́ху:

Боже́ственными бодростьми́, постом же и моли́твою вооружи́вся,/ пло́ти, ми́ра и диа́вола победи́тель, о́тче, был еси́,/ Всемогу́щия Тро́ицы осене́н си́лою.

И ны́не и при́сно и во ве́ки веко́в. Ами́нь.

Богоро́дичен: Ма́ти Бо́жия,/ моли́тися не преста́й о живу́щих в Горе́ Твое́й,/ да напра́вит Госпо́дь стопы́ на́ша по словеси́ Своему́,/ да благода́ть и ми́лость от Него́ обря́щем.

Песнь 3

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Припев: Святителю отче Нифонте, моли́ Бо́га о нас.

Плотско́е му́дрование раче́нием Боже́ственным препобеди́в,/ прите́кл еси́ всеусе́рдно на святу́ю Го́ру,/ иде́же, Богозва́нне, стяжа́л еси́ смире́нием высо́кая.

Припев: Святителю отче Нифонте, моли́ Бо́га о нас.

Все́льник сый оби́тели Предте́чи, блаже́нне,/ благоугоди́л еси́ Бо́гови преподо́бническими труды́ твои́ми/ и мона́шествующих Афо́на яви́лся еси́ наста́вник и засту́пник.

Припев: Святителю отче Нифонте, моли́ Бо́га о нас.

Исти́ны ревни́теля уве́девше тя, святого́рстии и́ноцы/ Богому́дрыми словесы́ твои́ми просвеща́хуся и позна́нию воли Бо́жии поуча́хуся./ Те́мже тя, о́тче отце́в, почита́ем.

Сла́ва Отцу́ и Сы́ну и Свято́му Ду́ху:

Трисо́лнечнаго Божества́ невече́рний свет прии́м в се́рдце свое́м,/ показа́лся еси́ столп пресве́тлый,/ всю Го́ру озаря́я, Ни́фонте богатносве́тле.

И ны́не и при́сно и во ве́ки веко́в. Ами́нь.

Богоро́дичен: Держа́вное прибе́жище и́ноком Горы́ Твое́й, Богоро́дице,/ не пре́зри нас, притека́ющих к заступле́нию Твоему́,/ но, предваря́ющи, спа́сай от вся́кия беды́ и ско́рби.

Седа́лен, глас 4:

Вы́шних ища́, прия́л еси́ бога́тство некра́домо благода́ти,/ и вся обогаща́еши ве́рныя, свяще́ннейший Ни́фонте,/ и сердца́ весели́ши притека́ющих к Тебе́./ Тем, досто́йную мзду твои́х трудо́в прии́м от подвигополо́жника Христа́,/ моли́ся тому́ прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Сло́во О́тчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во,/ еди́на Чи́стая, еди́на Благослове́нная./ Тем непреста́нно Тя, воспева́юще, велича́ем.

Песнь 4

Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра Отча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Припев: Святителю отче Нифонте, моли́ Бо́га о нас.

Ты был еси́, всече́стне, по́стник,/ во а́лчбе и жа́жди пребыва́яй и трезвя́йся во бде́ниих и моли́твах,/ ты друг друго́м и враго́в примире́ние,/ ты стра́нных упокое́ние и в беда́х помо́щник.

Припев: Святителю отче Нифонте, моли́ Бо́га о нас.

Ты, о́тче, смире́н, кро́ток, незло́бив, безмо́лвен и сострада́телен ко всем показа́лся еси́,/ ты заступле́ние си́рых, ни́щих бога́тство,/ утеше́ние скорбя́щих и всех исправле́ние, досточу́дне.

Припев: Святителю отче Нифонте, моли́ Бо́га о нас.

Ты, преподо́бне, мона́шествующим Горы́ Афо́нския свети́льник, утвержде́ние и ра́дование,/ ты в по́двизех и доброде́телех ясне́йший о́браз,/ живопису́яй нам спаси́тельную стезю́ дея́ния и зре́ния.

Сла́ва Отцу́ и Сы́ну и Свято́му Ду́ху:

Ты, Ни́фонте, наста́вник возжеле́нен был еси́,/ сла́док словесы́, прост нра́вы, духо́вными дарова́нии пребога́т,/ Пресвято́ю Тро́ицею ущедря́емь во спасе́ние мно́гих, Богоприя́тне.

И ны́не и при́сно и во ве́ки веко́в. Ами́нь.

Богоро́дичен: Ты патриа́рхов сла́ва, Влады́чице,/ святи́телей похвала́ пресве́тлая,/ Ты по́стников украше́ние и и́ноков освяще́ние,/ Ты ве́рных спасе́ние и ми́ра всего́ покро́в, Преблагослове́нная.

Песнь 5

Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Припев: Святителю отче Нифонте, моли́ Бо́га о нас.

По́стничеством предочи́стив ду́шу и те́ло, прехва́льне,/ свяще́нства сподо́бился еси́ пома́зания свята́го/ и был еси́ иере́ев благоле́пие.

Припев: Святителю отче Нифонте, моли́ Бо́га о нас.

Сосу́д свяще́н сый Ду́ха благода́ти,/ испроси́ нам освяще́ние,/ любо́вию почита́ющим, священнотаи́нниче, па́мять твою́.

Припев: Святителю отче Нифонте, моли́ Бо́га о нас.

В высоту́ любве́ дости́г, всече́стне,/ на высо́цем све́щнице Це́ркве поста́вился еси́,/ архипа́стырь быв христоимени́тым лю́дем.

Сла́ва Отцу́ и Сы́ну и Свято́му Ду́ху:

Трои́ческим сия́нием озаря́емь,/ Боже́ственных, Ни́фонте, позна́л еси́ уче́ний глубину́/ и па́ству твою́ те́ми уму́дрял еси́.

И ны́не и при́сно и во ве́ки веко́в. Ами́нь.

Богоро́дичен: Тебе́, Богоизбра́нная, Предста́тельницу и́мамы непосты́дную:/ изба́ви, Госпоже́, Го́ру и оби́тель сию́ от наше́ствия язы́к,/ я́ко твое́ достоя́ние.

Песнь 6

Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к тебе́ бо возопи́х, и услы́ши мя,/ Бо́же спасе́ния моего́.

Припев: Святителю отче Нифонте, моли́ Бо́га о нас.

Велича́ют тя, Богому́дре, Фессалони́кский град и Византи́я сла́вная/ и с ни́ми святоиме́нный Афо́н,/ иму́ще тя па́стыря и моли́твенника.

Припев: Святителю отче Нифонте, моли́ Бо́га о нас.

Ублажа́ет тя Влахи́йская страна́ и ра́дуется о Тебе́,/ сладкоглаго́ливаго уче́ния твоего́ наслади́вшися и моли́тв,/ и́миже утвержда́л еси́ ю.

Припев: Святителю отче Нифонте, моли́ Бо́га о нас.

Ка́ко досто́йно почти́м труды́, боле́зни и по́ты,/ подъя́тыя тобо́ю, иера́рше, па́ствы ра́ди твое́я,/ гоне́ния же от враг ви́димых и неви́димых?

Сла́ва Отцу́ и Сы́ну и Свято́му Ду́ху:

Да сла́ву неизме́нную благоугоди́вших Тро́ице улучи́ши на Небеси́,/ сла́ву земну́ю, о́тче, презре́л еси́,/ изгна́ние, озлобле́ние же и уничиже́ние терпя́ исти́ны ра́ди.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, стено́ необори́мая и́ночествующих в насле́дии твое́м, Присноде́во,/ и ору́жие непобеди́мое на борю́щия ны,/ спа́сающая Тя призыва́ющия.

Конда́к, глас 8:

Сла́вных по́двигов твои́х, святи́телю Христо́в,/ светоно́сная па́мять возсия́ днесь,/ услажда́ющи ду́ши и освяща́ющи/ лобыза́ющих твоя́ честны́я мо́щи./ Те́мже с весе́лием зове́м ти:/ ра́дуйся, Ни́фонте Богому́дре.

И́кос:

А́нгела тя зря́ще во пло́ти, свя́те,/ удивле́нием содержи́ми о вели́ких исправле́ниих твои́х по́стнических и па́стырских,/ си́цевая ра́достная Тебе́ прино́сим:/ ра́дуйся, све́та Боже́ственнаго прия́телище;/ ра́дуйся, доброде́телей сокро́вище./ Ра́дуйся, Це́ркве непоколеби́мый сто́лпе;/ ра́дуйся, Правосла́вия ревни́телю./ Ра́дуйся, свети́льниче Афо́на пресве́тлый;/ ра́дуйся, звездо́, Восто́к озаря́ющая./ Ра́дуйся, па́дающих возста́ние;/ ра́дуйся, согреша́ющих исправле́ние./ Ра́дуйся, я́ко яви́лся еси́ ве́рный служи́тель Бо́жий;/ ра́дуйся, я́ко вшел еси́ в ве́чную ра́дость Го́спода своего́./ Ра́дуйся, от бед избавля́яй призыва́ющия тя;/ ра́дуйся, от вся́ких злых подая́й свобожде́ние./ Ра́дуйся, Ни́фонте Богому́дре.

Песнь 7

Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Припев: Святителю отче Нифонте, моли́ Бо́га о нас.

Лише́нный престо́ла твоего́, я́ко други́й Златоу́ст, непра́ведно,/ дарова́лся еси́ па́ки, всече́стне, Афо́ну, взыва́ющему́ о Тебе́:/ отце́в Бо́же, благослове́н еси́.

Припев: Святителю отче Нифонте, моли́ Бо́га о нас.

Всели́вся, я́коже и пе́рвее, во оби́тели Дионисиа́тстей, украси́тель тоя́ был еси́,/ вели́ким же смире́нием и терпе́нием твои́м, свя́те, вся и́ноки Горы́ удиви́л еси́, взыва́ющия о Тебе́:/ отце́в Бо́же, благослове́н еси́.

Припев: Святителю отче Нифонте, моли́ Бо́га о нас.

Егда́ ты, досточу́дне, яви́лся еси́ к бе́дствовавшим в мо́ри,/ а́бие бысть тишина́, и вси спасо́шася от потопле́ния./ Но и на́ше утиши́ волне́ние страсте́й моли́твами твои́ми, да пое́м:/ отце́в Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Апо́столов прее́мника, вели́ких святи́телей единонра́вна,/ по́стников ревни́теля, мо́лим тя, Ни́фонте:/ бу́ди хода́тай ко Пресвяте́й Тро́ице о нас, пою́щих:/ отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Ди́вна Ты, Влады́чице, во святе́м Горы́ Твое́я/ и па́стыре слове́сных ове́ц Сы́на Твоего́, Ни́фонте прехва́льнем,/ его́же моли́твами соблюда́й нас в ми́ре и любви́, да пое́м:/ отце́в Бо́же, благослове́н еси́.

Песнь 8

Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Припев: Святителю отче Нифонте, моли́ Бо́га о нас.

Страда́льческаго жития́ твоего́, прехва́льне, подража́телие, ученицы́ твои́ Мака́рий и Иоаса́ф,/ моли́твами твои́ми укрепле́ннии,/ му́жески за Христа́ пострада́ша, вопию́ще:/ му́ченицы, превозноси́те его́ во ве́ки.

Припев: Святителю отче Нифонте, моли́ Бо́га о нас.

Тече́ние сконча́в, Богому́дре, ве́ру соблю́л еси́,/ про́чее соблюде́ся Тебе́ вене́ц пра́вды от Христа́,/ угото́ванный лю́бящим его́ па́стырем и вопию́щим:/ святи́телие, превозноси́те Го́спода во ве́ки.

Припев: Святителю отче Нифонте, моли́ Бо́га о нас.

Егда́ гони́тель твой, свя́те, не обрета́ше при жи́зни и по сме́рти поко́я,/ ты, я́ко незло́бивый, принесе́нием моще́й твои́х/ пода́л еси́ тому́ проще́ние и поко́й, во е́же всем вопи́ти:/ лю́дие, превозноси́те Го́спода во ве́ки.

Сла́ва Отцу́ и Сы́ну и Свято́му Ду́ху:

Я́ко за́поведей ева́нгельских храни́тель,/ от вся́кия скве́рны пло́ти и ду́ха очище́н,/ Пресвяты́я Тро́ицы был еси́ свяще́нное жили́ще./ Тем притека́ющия к моще́м твои́м освяща́еши, во е́же тем вопи́ти:/ раби́ Госпо́дни, превозноси́те Го́спода во ве́ки.

И ны́не и при́сно и во ве́ки веко́в. Ами́нь.

Богоро́дичен: Изба́ви, о Всеблага́я Госпоже́,/ су́щия во Афо́не рабы́ Твоя́ от лю́тых в житии́ сем и по кончи́не,/ да благода́рственно о Тебе́ взыва́ем:/ преподо́бнии, превозноси́те Го́спода во ве́ки.

Песнь 9

Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Припев: Святителю отче Нифонте, моли́ Бо́га о нас.

Свя́тостию дел и благода́тию сло́вес твои́х наслади́вшиися, всеблаже́нне, и́же во Влахи́и, ве́рнии/ и пра́ха от гро́ба твоего́ иска́ху прикосну́тися,/ ди́внаго во святы́х Свои́х Го́спода велича́юще.

Припев: Святителю отче Нифонте, моли́ Бо́га о нас.

Сострада́тельный ко всем нрав твой ви́дев,/ Всеблаги́й Бог исто́чник показа́ чуде́с честны́я оста́нки твоя́, всехва́льне,/ с ве́рою к ним припа́дающим и Вы́шняго Даропода́теля велича́ющим.

Припев: Святителю отче Нифонте, моли́ Бо́га о нас.

Свиде́тельствуют гра́ди и ве́си Влахи́и оби́лие благода́ти,/ исте́кшия от твои́х моще́й, всесла́вне,/ в принесе́нии бо тех исцеле́ния повсю́ду подава́хуся Го́спода о Тебе́ велича́ющим.

Сла́ва Отцу́ и Сы́ну и Свято́му Ду́ху:

Престо́лу предстоя́ Трисо́лнечнаго Божества́,/ я́ко преподо́бен, я́ко святи́тель, я́ко патриа́рх дея́нием и зре́нием,/ проси́ нам, Богоприя́тне, ми́ра и спасе́ния,/ да о Тебе́ Пресвяту́ю Тро́ицу велича́ем.

И ны́не и при́сно и во ве́ки веко́в. Ами́нь.

Богоро́дичен: Мари́е Всепе́тая, моли́твы Твоего́ уго́дника Ни́фонта приими́ о нас,/ соверша́ющих па́мять его́,/ да, предста́тельством того́ спасе́ннии Тобо́ю,/ с Безпло́тными ли́ки Тя велича́ем.

Свети́лен:

Огнь Пресвята́го Ду́ха прия́в в ду́шу твою́, о́тче,/ яви́лся еси́ весь о́гнен, я́коже ви́дяху тя и́ноцы Дионисиа́та,/ Боже́ственною бо любо́вию пламене́я,/ просвеща́еши и согрева́еши с ве́рою притека́ющия к Тебе́,/ святи́телю Ни́фонте пребога́те.

Молитва преподобному Нифонту

Преподобие отче Нифонте! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О. превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова. Идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.