Канон преподобному Феодору, князю Острожскому, во иноцех Феодосию Киево-Печорскому чудотворцу

Тропарь святаго, глас 7.

Преобрази́л еси́ земнаго княже́ния сла́ву/ во и́ночества о́браз смире́нный,/ и вме́сто враго́в ви́димых/ на неви́димыя ополчи́лся еси́,/ и, обою́ победи́тель кра́сен явля́яся,/ еди́н от чудотво́рец Пече́рских показа́лся еси́;/ Те́мже и нам ре́вности Бо́жия дар испроси́,/ братолю́бием сердца́ на́ша просвети́/ и ко спасе́нию ве́чному стези́ на́ша, Фео́доре блаже́нне, напра́ви.

Ин тропарь, глас 4:

Кня́жеских дароноше́ний и всего́ су́етствия мирска́го спе́шне отве́ргся,/ Бо́жиих же дарова́ний, прему́дре Фео́доре, преи́скренне сподо́битися жела́я,/ прия́л еси́ и́ноческий о́браз/ и, в нем смире́нным послуша́нием и безмо́лвным житие́м Царю́ Небе́сному благоугожда́я,/ получи́л еси́ от Него́ безсме́ртныя дары́,/ и́хже и нам, чту́щим тя,/ получи́ти моли́ся.

Ин тропарь, глас тойже:

Я́ко благочести́ваго ко́рене пречестна́я о́трасль был еси́,/ блаже́нне Фео́доре,/ яви́ бо тя Христо́с/ я́ко вои́стинну богодарова́нное сокро́вище Волы́нстей земли́,/ но́ваго побо́рника ве́ры Правосла́вныя,/ и наро́ду росси́йскому пресла́вна и благоприя́тна./ Те́мже ны́не, плоды́ светоно́сных трудо́в твои́х/ в стране́́ на́шей под се́нию Святы́я Це́ркве Правосла́вныя наслажда́ющеся,/ хва́лим Го́спода,/ дарова́вшаго Тебе́ си́лу и кре́пость на сопроти́вныя,/ Его́же моли́ спасти́ оте́чество твое́,/ и держа́ве сро́дник твои́х богоуго́дней бы́ти,/ и сыново́м росси́йским спасти́ся.

Канон преподобнаго, глас 8

Песнь 1

Ирмос: Посече́нный несеко́маго пресече́,/ и ви́де со́лнце зе́млю, ю́же не ви́де;/ лю́таго врага́, вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.

Припев: Преподобне отче Феодоре, моли́ Бо́га о нас.

Фео́дора блаже́ннаго просла́вим, бра́тие, кня́зя же и во́ина,/ не свое́й сла́вы иска́вшаго, но с еретики́ за ру́сскую зе́млю пра́вшагося,/ последи́ же во а́нгельстем о́бразе земна́я вся оста́вившего/ и де́моны попра́вшаго кре́пко.

Припев: Преподобне отче Феодоре, моли́ Бо́га о нас.

Еди́н от чудотво́рец Пече́рских яви́лся еси́, Фео́доре блаже́нне,/ но и Волы́нская земля́ о па́мяти твое́й весели́тся,/ от всех же конце́в земли́ ве́рнии ко предста́тельству твоему́ притека́ют,/ всем у́бо бу́ди слы́шатель благи́й и покая́нию учи́тель.

Сла́ва Отцу́ и Сы́ну и Свято́му Ду́ху:

О́наго блаже́ннаго живота́, его́же сподо́бился еси́, Фео́доре преподо́бне,/ и нас насле́дники сотвори́ твои́ми моли́твами,/ а́ще и погреша́ющих много, но многостра́стное житие́ свое́ осужда́ющих/ и твои́м моще́м ве́рою покланя́ющихся.

И ны́не и при́сно и во ве́ки веко́в. Ами́нь.

Богоро́дичен: На Тя, Де́во, наде́жду положи́х спасе́ния моего́,/ грехо́вныя скве́рны всего́ мя омы́й и чи́ста соде́лай Сы́ну Твоему́,/ изря́дно благоугожда́юща и творя́ща Сего́ всесвяту́ю волю.

Песнь 3

Ирмос:Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии твое́м.

Припев: Преподобне отче Феодоре, моли́ Бо́га о нас.

Даждь ми, преподо́бне о́тче, от даро́в Боже́ственныя благода́ти,/ и́хже оби́льно причасти́лся еси́, неуста́нную о спасе́нии ре́вность,/ от Го́спода мне сию́ испроси́в/ и твои́м благослове́нием запечатле́в неви́димо.

Припев: Преподобне отче Феодоре, моли́ Бо́га о нас.

О, ка́ко восхоте́л бых аз не то́чию усты́ твое́ житие́ прославля́ти, блаже́нне,/ но и подража́тель того́ яви́тися,/ о сем у́бо сотвори́ моли́тву Христу́ Бо́гу,/ презира́я моя́ лю́тая прегреше́ния и покая́нию моему́ внима́я.

Сла́ва Отцу́ и Сы́ну и Свято́му Ду́ху:

Ра́зум всесоверше́н показа́л еси́, о́тче преподо́бне,/ егда́ за зло добро́м супоста́ту твоему́ возда́л еси́/ и я́ко друг благи́й врагу́ твоему́ яви́лся еси́./ Аз же бесо́м друг страстьми́ свои́ми бых, увы мне;/ но твои́ми моли́твами па́ки победи́теля тех яви́ мене́, блаже́нне Фео́доре.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, Я́же еди́на ра́дость несказа́нно ро́ждши;/ ра́дуйся, колесни́це и о́блаче Сло́ва;/ ра́дуйся, Ма́ти Бо́жия, Де́во Неискусобра́чная;/ ра́дуйся, преподо́бных сла́во;/ ра́дуйся, му́чеников венча́ние.

Седа́лен преподо́бнаго, глас 4.

Неприступную сла́ву Пресвяты́я Тро́ицы созерца́ет днесь преподо́бный Фео́дор,/ мы же земны́х помышле́ний не оставля́ем, увы нам,/ но, того́ исправле́ния воспомина́юще, па́ки к Небе́сным душе́ю восхища́еми, глаго́лем:/ о́тче преподо́бне, моли́тву сотвори́ Христу́ Бо́гу,/ е́же спасти́ и просвети́ти ду́ши на́ша.

Песнь 4

Ирмос: Проро́к Авваку́м умны́ма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ сла́ва си́ле Твое́й, сла́ва снизхожде́нию Твоему́.

Припев: Преподобне отче Феодоре, моли́ Бо́га о нас.

Укра́сися княже́ние твое́, о́тче преподо́бне,/ не то́чию свои́х ти по ве́ре от враго́в защище́нием,/ но и че́шскаго народа проти́ву лати́н заступле́нием,/ вся бо в любо́вь Христо́ву, я́ко Па́вел о́ный, призва́ти вожделе́л еси́.

Припев: Преподобне отче Феодоре, моли́ Бо́га о нас.

Остро́г град, ма́лую часть твои́х нетле́нных моще́й прия́ти сподо́бивыйся,/ а́ки насле́дие княже́ния твоего́,/ о сем све́тло возра́довася и твои́ми доброде́тельми хва́лится,/ та́кожде свята́я Ла́вра Ки́евская, твое́ нетле́нное те́ло показу́ющи ве́рным,/ засту́пника тя своего́ имену́ет/ и на моли́твы твоя́ упова́ет те́пле.

Сла́ва Отцу́ и Сы́ну и Свято́му Ду́ху:

Святы́й Фео́дор ны́не от Небе́с на зе́млю Росси́йскую призира́ет/ и на брань духо́вную нас, бра́тие, воздвиза́ет:/ потщи́мся у́бо грехо́вную оттрясти́ ле́ность, и сердца́ на́ша горе́ воздви́гнути,/ и жела́нием ве́чныя жи́зни испо́лните.

И ны́не и при́сно и во ве́ки веко́в. Ами́нь.

Богоро́дичен: В жена́х еди́на Де́ва пребыла́ еси́ и пре́жде рождества́, и по рождестве́:/ Бог бо бе, обновля́я естества́ па́че сло́ва, из Тебе́ неизрече́нно воплоща́емь,/ и́же горе́ пре́жде век и на земли́ в после́дняя ле́та рождься, Пренепоро́чная.

Песнь 5

Ирмос: Мрак души́ мое́й разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да, у́тренюя, сла́влю Тя.

Припев: Преподобне отче Феодоре, моли́ Бо́га о нас.

Тре́бующим твоего́ на враги́ заступле́ния,/ царе́м же и лю́дем, был еси́, Фео́доре, неуста́нный помо́щник,/ зане́ по глаго́лу Госпо́дню за дру́ги ду́шу свою положи́ти гото́в был еси́,/ Те́мже и нас не отри́ни, блаже́нне,/ твоего́ заступле́ния на де́моны прося́щих.

Припев: Преподобне отче Феодоре, моли́ Бо́га о нас.

Ра́дуйся, Влади́мире равноапо́стольне, твоего́ пра́внука зря,/ ра́йскою сла́вою украше́на на Небеси́, и на земли́ от христиа́н ублажа́ема,/ и на враги́ сим моли́твою свое́ю спобо́рствующа.

Сла́ва Отцу́ и Сы́ну и Свято́му Ду́ху:

О́блак искуше́ний, на Росси́йския лю́ди от безбо́жник наше́дший,/ твои́ми моли́твами разжени́, Фео́доре прему́дре,/ зане́, умно́жившимся собла́зном, кре́пость на́ша оскуде́./ Не оста́ви у́бо зе́млю твою́ от враго́в Христо́вых противорастле́тися,/ но ве́ру несомне́нную и упова́ние от Бо́га низпосли́ душа́м на́шим.

И ны́не и при́сно и во ве́ки веко́в. Ами́нь.

Богоро́дичен: Де́во Ма́ти Отрокови́це, Непостижи́маго пло́тию ро́ждши,/ А́нгелов сла́во и де́монов я́зво, Богоневе́сто,/ мое́ се́рдце, уя́звенное грехми́, исцеле́ния Боже́ственнаго сподо́би.

Песнь 6

Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Припев: Преподобне отче Феодоре, моли́ Бо́га о нас.

Житие́ мое́ страстьми́ умертви́ся,/ моли́тва ле́ностию мно́гою оскуде́, братолю́бием украси́тися не попеко́хся;/ и́же ми́ру умертви́выйся и в моли́тве до сме́рти пребы́вый,/ братолю́бия рачи́телю, о́тче преподо́бне, помози́ ми во гресе́х погиба́ющему́.

Припев: Преподобне отче Феодоре, моли́ Бо́га о нас.

Самаго себе́ пла́чу, окая́нный, и земли́ на́шея растле́ния,/ но, твое́ предста́тельство призыва́я, о́тче преподо́бне,/ па́ки к духо́вному де́ланию воздвиза́юся и глаго́лю:/ заступи́ твою́ зе́млю, уго́дниче Бо́жий,/ и о спасе́нии мое́м сотвори́ моли́тву.

Сла́ва Отцу́ и Сы́ну и Свято́му Ду́ху:

Кто от ве́рных не удиви́тся преподо́бнаго Фео́дора ре́вности духо́вней:/ той бо на княже́нии ве́ры бысть подви́жник/ и в по́двизе пеще́рнем князь над страстьми́ вско́ре показа́ся,/ по преставле́нии же свое́м А́нгелов купножи́тель.

И ны́не и при́сно и во ве́ки веко́в. Ами́нь.

Богоро́дичен: Ума́ моего́ извраще́ния/ и души́ двиза́ния страстна́я и лю́тая, Де́во, испра́ви/ и це́ла мя соблюди́ от всегда́ неми́лостивно находя́щих ми.

Конда́к, глас 4:

Красоты́ ри́зныя возгнуша́вшагося/ и бога́тства тле́ннаго со благодаре́нием отве́ргшагося,/ в ри́зу же безстра́стия обле́кшагося/ и бога́тому в щедро́тах Христу́ возсле́довавшаго,/ прииди́те, ве́рнии, восхва́лим Фео́дора достосла́вна,/ я́ко моля́щася непреста́нно/ о душа́х на́ших.

И́кос:

Восхва́лим, бра́тие, Фео́дора блаже́ннаго,/ той бо от ю́ности себе́ не пощади́,/ в похо́дех проти́ву враго́в ве́ры на́шея плоть изнуря́я и живо́т свой за дру́ги полага́яй,/ и, я́ко Дави́д Соломо́ну, своему́ сы́нови о построе́нии хра́мов Бо́жиих заве́т преда́в,/ мона́шеское житие́ изво́лил есть,/ а́ки раб бра́тии угожда́яй и себе́ сама́го смиря́яй,/ того́ у́бо воспои́м, бра́тие, я́ко Бо́гу и бли́жним порабо́тившагося,/ враги́ же ви́димыя и неви́димыя смири́вшаго/ и моля́щагося непреста́нно о душа́х на́ших.

Песнь 7

Ирмос: На по́ле Деи́ре/ иногда́ мучи́тель пещь поста́ви на муче́ние Богоно́сных,/ в не́йже три о́троки песносло́вяху Еди́наго Бо́га,/ тро́ично воспева́ху, глаго́люще:/ отце́в Бо́же, благослове́н еси́.

Припев: Преподобне отче Феодоре, моли́ Бо́га о нас.

Остро́г град твоя́ по́двиги, о́тче преподо́бне, пропове́дует,/ храни́т же оби́тель Де́рманская тех па́мять,/ воспева́ет и Пече́рская Ла́вра терпе́ние твое́ и ве́ру,/ лю́дие же росси́йстии и наро́д че́шский в твое́м заступле́нии обще́ние любве́ свое́й утвержда́ют.

Припев: Преподобне отче Феодоре, моли́ Бо́га о нас.

Мо́лмся Тебе́, Фео́доре блаже́нне,/ да, я́коже кре́пость стоя́ния твоего́ ча́дом твои́м по пло́ти дал еси́/ и сих до четве́ртаго рода ада́манты Правосла́вныя ве́ры яви́л еси́/ и проти́ву враго́в той борцы́ неодоли́мы,/ та́кожде и нас, твоя́ же по ду́ху ча́да,/ подража́тели му́жества твоего́ предста́тельством твои́м соде́лай.

Сла́ва Отцу́ и Сы́ну и Свято́му Ду́ху:

Ум мой изнемога́ет, от страсте́й противобо́рствуемь,/ и де́рзость враго́в Христо́вых стра́хом коле́блет мою́ ду́шу,/ сию́ у́бо укрепи́, о́тче преподо́бне,/ и Боже́ственною просвети́ ре́вностию и о вре́менных небреже́нием.

И ны́не и при́сно и во ве́ки веко́в. Ами́нь.

Богоро́дичен: Разуме́вше издале́ча честни́и проро́цы та́инства Твоего́ неизрече́нную глубину́,/ многоо́бразно всем уясни́ша твое́ рождество́, Де́во, взыва́юще:/ благослове́н еси́, Бо́же оте́ц на́ших.

Песнь 8

Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Припев: Преподобне отче Феодоре, моли́ Бо́га о нас.

Мое́ неразу́мие твое́ю моли́твою исцели́, о́тче преподо́бне,/ по́мыслы покая́ния просвеща́я мою́ ду́шу/ и враги́ проща́ти о́бразом жития́ твоего́ науча́я,/ и к по́двигу возведи́ воздержа́ния.

Припев: Преподобне отче Феодоре, моли́ Бо́га о нас.

Огнь любве́ Бо́жия, преди́вный Фео́доре, в свое́м се́рдце возже́г,/ единоплеме́нныя че́шския лю́ди проти́ву лати́нян защити́л еси́:/ тем и ны́не бу́ди проти́ву е́реси защити́тель, о́тче преподо́бне,/ и́же Правосла́вную ве́ру от язы́ка их любо́вию восприя́ша.

Сла́ва Отцу́ и Сы́ну и Свято́му Ду́ху:

Лю́дем безчи́сленным от мно́гих язы́к, во святу́ю Ла́вру приходя́щим,/ и на вся́ком ме́сте по́мощь твою́ призыва́ющим/ ско́рый слы́шатель и до́брый спасе́ния наста́вник, преблаже́нне Фео́доре, яви́лся еси́,/ всех ко Христу́ неви́димым посеще́нием твои́м призывая.

И ны́не и при́сно и во ве́ки веко́в. Ами́нь.

Богоро́дичен: Умерщвле́нную угрызе́нием змии́ным ду́шу мою,/ еди́на Исто́чник жи́зни ро́ждшая, Всенепоро́чная, оживи́/ и твори́ти сподо́би нас ра́ди из Тебе́, Де́во, Ро́ждшагося хоте́ние, вопию́щу:/ свяще́нницы, благослови́те, лю́дие, превозноси́те во вся ве́ки.

Песнь 9

Ирмос: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Припев: Преподобне отче Феодоре, моли́ Бо́га о нас.

Ю́жский преде́л земли́ Росси́йския твои́х по́двиг прославле́нию навы́че, Фео́доре блаже́нне,/ сей у́бо в Правосла́вии утверди́, проти́ву нечести́выя е́реси укрепи́,/ но и о всем ми́ре моли́твенник неуста́нный пребу́ди.

Припев: Преподобне отче Феодоре, моли́ Бо́га о нас.

Се вре́мя твоего́ заступле́ния прии́де, о́тче преподо́бне:/ ви́диши бо зе́млю нашу от нечести́вых уче́ний обурева́ему,/ зри́ши бо оскуде́ние любве́ на́шея, от Христа́ предрече́нное,/ и душ челове́ческих разслабле́ние, и о пра́вде Бо́жией нераде́ние./ Поми́луй у́бо, поми́луй нас твои́м заступле́нием.

Сла́ва Отцу́ и Сы́ну и Свято́му Ду́ху:

Я́звы душ на́ших, от враг неви́димых наложе́нныя, исцели́, Фео́доре блаже́нне,/ и от бед и обстоя́ний моли́твами твоими огради́ нас,/ и ра́дости ве́чныя нас сподо́би,/ а́ще и недосто́йных, но твоему́ предста́тельству ве́рующих те́пле.

И ны́не и при́сно и во ве́ки веко́в. Ами́нь.

Богоро́дичен: Глас Ти провозглаша́ем Гаврии́лов:/ ра́дуйся, земле́ избра́нная;/ ра́дуйся, трапе́зо златови́дная;/ ра́дуйся, челове́ков прибе́жище;/ ра́дуйся, му́чеников похвало́;/ ра́дуйся, А́нгелов ра́дование, Свята́я Богоро́дице,/ державо ве́рою чи́стою блажащих Тя.

Свети́лен:

Да восхва́лится преподо́бный Фео́дор от всех ве́рных язы́ков,/ я́ко ве́ры святы́я быв ратобо́рник, напа́ствуемых защити́тель,/ враго́м за зло до́брым воздая́тель,/ кня́жий вене́ц на и́ноческую власяни́цу премени́тель,/ поста́ и моли́твы благи́й о́браз яви́вый/ и о душа́х на́ших моли́твенник тепле́йший.

Молитва

Вои́нствование земно́е на духо́вную брань преложи́вый и о лю́дех свои́х до́брое попече́ние показа́вый, блаже́нне Фео́доре преподо́бне! К Тебе́ в смяте́нии серде́ц на́ших днесь прибега́ем и твое́й по́мощи стране́ на́шей и душа́м на́шим смире́нно проси́ти дерза́ем. Ве́мы, уго́дниче Бо́жий, я́ко малоду́шие на́ше и ле́ность духо́вная дале́че от твое́я па́жити ны отрева́ет и вся́каго омерзе́ния досто́йны ны соде́ловает, но милосе́рдие твое́ ко враго́м и преда́телем твои́м помина́юще, и́мже па́ки защи́тник яви́лся еси́, ра́внаго милосе́рдия твоего́ и нам, недосто́йным, мо́лим. Ты у́бо, уго́дниче Христо́в, от агаря́н разоре́нную зе́млю на́шу и от инове́рных подавля́ему жа́лостию и любо́вию объе́мля, па́ки к бо́дренному житию́ ве́рныя призва́л еси́, ели́ко во́инскими побе́дами, толи́ко и моли́твою и о́бразом жития́ своего́, а́ки све́щник златы́й, блиста́яся. Ты, мирска́го жития́ суету́ оста́вль, сам у́бо о души́ свое́й попече́нию в пеще́рнем уеди́нении преда́лся еси́, земли́ же на́шея попече́ние и исцеле́ние сла́вному ро́ду твоему́ запове́дал еси́, и та́ко преде́л свой еще́ на две́сте лет и вя́щше по кончи́не твое́й от сете́й ерети́ческих огради́л еси́. Ты и дале́че су́щее еди́нокровное нам пле́мя че́шское ко Правосла́вней ве́ре приближа́ти тща́лся еси́ и от лати́нскаго наше́ствия огражда́л еси́. Ты и ны́не, на Небесе́х душе́ю со А́нгелы водворя́яся, нетле́нным же те́лом посреде́ нас почива́яй, на́ша не отри́ни гла́сы ско́рбныя, но моли́твенный плач согреша́ющих сыно́в земли́ на́шея услы́ши. Согреши́хом бо и непра́вдовахом и от заве́т Бо́жиих отступи́хом, в развраще́нныя обы́чаи зле впадо́хом, и е́же еди́но на потре́бу есть, душ на́ших спасе́ние, в небре́жении оста́вихом, Тебе́ в Бо́зе пра́вда и сла́ва, о́тче преподо́бне, нам же стыде́ние лица́. О́баче ели́ко грешне́йшии яви́хомся, толи́ко вя́щшаго сострада́ния твоего́ тре́буем и в покая́нии зове́м ти си́це: твоея́ неистощи́мыя любве́ луч нам низпосли́, гнев Бо́жий, пра́ведно на ны дви́жимый, моли́твою твое́ю от нас отведи́, спаси́тельную благода́ть его́ к нам, недосто́йным, предста́тельством твои́м низведи́ и от грехо́вныя бе́здны к высоте́ покая́ния нас возведи́, да та́ко и мы житие́ свое́ испра́вити потщи́мся, кре́пость земли́ на́шея па́ки обновля́ти начне́м, враго́в же ве́ры Христо́вы и злых преле́стников безбоя́зненно отража́ти сло́вом и житие́м возревну́ем и Спаси́теля на́шего со все́ми святы́ми благода́рно воспева́ти бу́дем, сла́вяще его́ со Отце́м и Святы́м Ду́хом, во ве́ки веко́в. Ами́нь.

Ина молитва

О преподо́бне о́тче Фео́доре, земли́ Волы́нския похвало́ и прибе́жище, святы́я же Ла́вры Пече́рския сла́во и украше́ние! При́зри на предстоя́щия лю́ди, твое́я по́мощи с ве́рою прося́щия и согреше́ния своя́ Тебе́ испове́дающия, приими́ тех усе́рдныя моли́твы и от вся́кия ско́рби и ну́жды предста́тельством твои́м изба́ви. Помози́ нам, уго́дниче Бо́жий, в ми́ре и покая́нии житие́ на́ше зде проводи́ти, во благополу́чии памятова́ние о за́поведех Бо́жиих всеме́рно храни́ти, в беда́х же от ро́пота и уны́ния огражда́тися, оба́че и по́мыслом лу́чшим сердца́ на́ша испо́лни, да твоего́ благоутро́бия и я́же о ве́ре ре́вности подража́тели бы́вше, о́ных сподо́бимся ве́чных благ, и́миже днесь украша́яся, моли́твы о спасе́нии на́шем возно́сиши ко Го́споду, Ему́же сла́ва подоба́ет, Отцу́ и Сы́ну и Свято́му Ду́ху, ны́не, и при́сно, и во ве́ки веко́в. Ами́нь.