Шрифт
23 августа.
Канон святому мученику и архидиакону Лаврентию
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 4:
Му́ченик Твой, Го́споди, Лавре́нтий/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ души на́ша.
Канон святаго. Глас 4.
Песнь 1
Ирмос: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/да Тебе́, я́ко в тимпа́не,/во умерщвле́нии телесе́/ побе́дное воспою́ пе́ние.
Припев: Архидиаконе Лаврентие, моли Бога о нас.
В цве́тнице сла́дости, я́ко Христо́в во́ин, досто́йно наслажда́яся/ и а́нгельским сликовству́яй си́лам,/ сия́ние ми светоно́сное дарова́ти моли́,/ воспева́ющу тя, блаже́нне Лавре́нтие.
Припев: Архидиаконе Лаврентие, моли Бога о нас.
В по́двиги вшед честна́го му́чения,/ победоно́сный страда́лец тве́рдостию души́ показа́лся еси́, Лавре́нтие,/ венце́м правды благоле́пно оде́явся и диади́мою побе́ды.
Сла́ва Отцу́ и Сы́ну и Свято́му Ду́ху:
Сын я́ко быв све́та и дне,/ пресла́вно от за́пад, я́ко со́лнце нам чу́вственно, возсия́л еси́,/ заре́ю пресве́тлою озаря́я концы́, всесла́вный му́чениче Лавре́нтие.
И ны́не и при́сно и во ве́ки веко́в. Ами́нь.
Богоро́дичен: Изба́вльшеся честны́м рождество́м Твои́м, Де́во,/ а́дских и тле́нных уз и зако́ннаго осужде́ния, Пречи́стая,/ – ра́дуйся, Обра́дованная, – благода́рно вопие́м Ти,/ – спаси́тельная две́ре благода́ти.
Песнь 3
Ирмос: Лук си́льных изнемо́же,/ и немощетву́ющии препоя́сашася си́лою,/ сего́ ра́ди утверди́ся в Го́споде се́рдце мое́.
Припев: Архидиаконе Лаврентие, моли Бога о нас.
Име́яй Креста́ побе́ду,/ к сопротивобо́рцем до́блественне ополчи́лся еси́/ и побе́ды венцено́сец яви́лся еси́, досточу́дне.
Припев: Архидиаконе Лаврентие, моли Бога о нас.
Зако́ном Христо́вым огражде́н,/ законоположе́нию злочести́вых, я́ко непобеди́м, сопроти́вился еси́/ до́блим терпе́нием, всеблаже́нне.
Сла́ва Отцу́ и Сы́ну и Свято́му Ду́ху:
Си́лою Бо́жиею укрепля́емь,/ многобо́жия не́мощь разори́л еси́,/ Христо́во же преве́чное уясни́л еси́ Бо́жество́.
И ны́не и при́сно и во ве́ки веко́в. Ами́нь.
Богоро́дичен: Ра́вен Отцу́ и Ду́ху естество́м, и су́ществом, и Бо́жество́м бысть,/ челове́ком ра́вно Сло́во,/ вопло́щшееся от Тебе́, Всенепоро́чная.
Седа́лен, глас 8.
Небе́сное бога́тство собра́в и ни́щим сие́ прине́с, расточи́л еси́,/ дал еси́ а́лчущим хлеб твой/ и, сим стяжа́в жизнь нетле́нную,/ во Христо́ве испове́дании просия́л еси́, сла́вне./ Те́мже, му́жествовав и зако́нно пострада́в,/ вене́ц прия́л еси́ от Бо́га трудо́в твои́х, страстоно́сче Лавре́нтие./ Моли́ Христа́ Бо́га грехо́в оставле́ние дарова́ти/ чтущим любо́вию святу́ю па́мять твою́.
Песнь 4
Ирмос: Седя́й в сла́ве на Престо́ле Божества́/во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Припев: Архидиаконе Лаврентие, моли Бога о нас.
Служи́тель Сло́ва и сло́вом украше́н,/ Сло́ва любо́вию, нра́вом душе́вным закала́ется/ и с Сло́вом пра́ведно Ца́рствует ны́не,/ весе́лия и сла́вы его́ насыща́яся.
Припев: Архидиаконе Лаврентие, моли Бога о нас.
Дрема́нием нече́стия благоче́стно не воздрема́вся,/ бо́дростию Боже́ственною, му́ченическим твои́м стоя́нием/ от о́чию сон и́же в сме́рть оттря́сл еси́, му́чениче Христо́в свяще́нне.
Сла́ва Отцу́ и Сы́ну и Свято́му Ду́ху:
На сопротивобо́рных злочести́ваго противле́ния и́стинными ору́жии благоче́стия огра́ждся,/ сих до конца́ низложи́л еси́ па́мять/ ве́ры ра́ди и нра́ва любо́вию.
И ны́не и при́сно и во ве́ки веко́в. Ами́нь.
Богоро́дичен: Скве́рну всю пе́рвыя отложи́вше сне́ди,/ живо́тным хле́бом с Небесе́ напита́емся, от земли́ Де́вы возсия́вшаго,/ Ю́же, я́ко Хода́таицу благих, воспои́м.
Песнь 5
Ирмос: Нечести́вии не у́зрят сла́вы Твое́я, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/воспева́ем Тя, Человеколю́бче.
Припев: Архидиаконе Лаврентие, моли Бога о нас.
Неукло́нным виде́нием Боже́ственныя добро́ты зря,/ вся кра́сная, я́же на земли́, Лавре́нтие, ты преоби́дел еси́/ и лю́тыя те́ла боле́зни, досточу́дне.
Припев: Архидиаконе Лаврентие, моли Бога о нас.
Христа́, Служи́теля бы́вша нам, дары от Отца́ позна́в,/ служи́тель того́ быв,/ к Нему́же кро́вию отше́л еси́, преблаже́нне.
Сла́ва Отцу́ и Сы́ну и Свято́му Ду́ху:
Свяще́нно возложе́ние и украше́ние благоле́пно Христу́, блаже́нне, прине́слся еси́,/ сень уясни́л еси́ Небе́сную,/ иде́же ны́не быва́я, наслажда́ешися сия́ния.
И ны́не и при́сно и во ве́ки веко́в. Ами́нь.
Богоро́дичен: Соесте́ствен и сообра́зен сый Отцу́, Сын Единоро́дный,/ челове́ком бысть во́лею сро́ден,/ вопло́щся Вы́шний из чре́ва Твоего́, Ма́ти Де́во.
Песнь 6
Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве.
Припев: Архидиаконе Лаврентие, моли Бога о нас.
Веще́ственный огнь, тя испе́к,/ Царю́ всех устрои́ сла́дко бра́шно,/ на́ше спасе́ние лю́бящему́ и а́лчущу, всесла́вне.
Припев: Архидиаконе Лаврентие, моли Бога о нас.
Весь Све́ту прибли́жился еси́ Нача́льныя Тро́ицы,/ я́ко служи́тель Тоя́, сый светови́ден, страстоте́рпче, был еси́,/ озаря́я пою́щия тя.
Сла́ва Отцу́ и Сы́ну и Свято́му Ду́ху:
Укрепля́емь Боже́ственною си́лою,/ на разжже́нней сковраде́ лежа́, терпе́л еси́, му́чениче,/ любо́вию Христо́вою ду́шу огне́м разжига́я и росо́ю духо́вною.
И ны́не и при́сно и во ве́ки веко́в. Ами́нь.
Богоро́дичен: Была́ еси́ Бо́жия Ма́ти, Де́во, вмести́тельно прия́телище,/ престо́л одушевле́н, гора́ свята́, и киво́т, и сень богоде́лана,/ и све́щник златоза́рен.
Конда́к, глас 2.
Огне́м Боже́ственным распали́в се́рдце твое́,/ огнь страсте́й до конца́ испепели́л еси́,/ страда́льцев утвержде́ние, Богоно́се му́чениче Лавре́нтие,/ и в страда́ниих вопия́л еси́ ве́рно:/ ничто́же мя разлучи́т любве́ Христо́вы.
И́кос:
Возсиявшаго, я́ко свети́ло неле́стное, в ми́ре,/ соше́дшеся, ве́рнии вси, пе́сньми почти́м Лавре́нтия страстоте́рпца,/ я́ко таи́нника неизрече́нных,/ того́ бо моли́твами избавля́емся лю́тых прегреше́ний./ Сердца́ очи́стивше, просла́вим Христа́,/ того́ прославля́ющаго, кре́пка в страда́нии, и глаго́люща:/ ничто́же мя разлучи́т от любве́ Христо́вы.
Песнь 7
Ирмос: Спасы́й во огни́ Авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.
Припев: Архидиаконе Лаврентие, моли Бога о нас.
Тайноводи́ти предъизбра́н и служи́ти Сло́ву,/ сосу́д показа́ся свяще́н Небе́снаго хра́ма и возложе́ние, воспева́я Сотво́ршему:/ препе́тый Го́споди, Бо́же оте́ц на́ших, благослове́н еси́.
Припев: Архидиаконе Лаврентие, моли Бога о нас.
Зако́ном живота́ и́же во Христе́ огражда́емь, преблаже́нне,/ су́щим сме́рти и тли законоположи́телем ума́ не подклони́л еси́, воспева́я, Лавре́нтие:/ препе́тый Го́споди, Бо́же оте́ц на́ших, благослове́н еси́.
Сла́ва Отцу́ и Сы́ну и Свято́му Ду́ху:
Я́коже не́кий, безболе́знен я́ве, те́лом обложе́н, преблаже́нне,/ до́блим по́мыслом на всея́дца огня́ дерзну́л еси́, взыва́я, пребога́те:/ препе́тый Го́споди, Бо́же оте́ц на́ших, благослове́н еси́.
И ны́не и при́сно и во ве́ки веко́в. Ами́нь.
Богоро́дичен: Дверь показа́лася еси́ мы́сленная восто́ка Вы́шняго,/ я́вльшагося на земли́ челове́ком из Тебе́, Богоневе́сто,/ па́че сло́ва и ума́, Бо́га отце́в благослове́ннаго.
Песнь 8
Ирмос: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.
Припев: Архидиаконе Лаврентие, моли Бога о нас.
Тве́рдым умо́м был еси́ нестерпи́маго пла́мене крепча́йшей,/ я́ко в чужде́м телеси́ сожига́емь, блаже́нне, ве́рою поя́:/ благослови́те, вся дела́ Госпо́дня, Го́спода.
Припев: Архидиаконе Лаврентие, моли Бога о нас.
Отроко́м трие́м подо́бяся, огня́ погаси́л еси́ у́глие,/ росо́ю Боже́ственныя благода́ти, взыва́я и поя́:/ вся дела́, благослови́те, по́йте Го́спода.
Сла́ва Отцу́ и Сы́ну и Свято́му Ду́ху:
Просвеще́ние Христо́с Тебе́ быв, Свое́ю кре́постию препоя́са тя/ и к себе́ возведе́, благоче́стно пою́ща:/ вся дела́, благослови́те, по́йте Го́спода.
И ны́не и при́сно и во ве́ки веко́в. Ами́нь.
Богоро́дичен: Ко́рене Иессе́ова жезл была́ еси́/ и Христа́ Бо́га моего́ и Го́спода па́че естества́ прозябла́ еси́, Божества́ цвет./ Вся дела́ да благословя́т, Де́во, Рождество́ твое́.
Песнь 9
Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.
Припев: Архидиаконе Лаврентие, моли Бога о нас.
Соверше́нно заколе́ние и прия́тно кади́ло Влады́це прине́слся еси́,/ я́коже зла́то в го́рниле, огне́м искуси́вся страда́ния,/ и украше́ние Це́ркве быв пе́рвенец, досточу́дне.
Припев: Архидиаконе Лаврентие, моли Бога о нас.
Зре́нием неукло́нным к Бо́гу обожа́емь и соедине́нием лу́чшим,/ сло́вом и Боже́ственным виде́нием,/ све́том кра́йним, Лавре́нтие, просвети́лся еси́ све́тло./ Те́мже тя вси ублажа́ем.
Сла́ва Отцу́ и Сы́ну и Свято́му Ду́ху:
Я́ко со́лнце, блаже́нне, от за́пада возсия́л еси́, чу́до ве́лие и пресла́вно,/ всю просвеща́я Це́рковь твои́ми блиста́ньми, досточу́дне,/ и согрева́я вся теплото́ю ве́ры,/ Те́мже тя вси ублажа́ем.
И ны́не и при́сно и во ве́ки веко́в. Ами́нь.
Богоро́дичен: О́бразы, Всенепоро́чная, Твоего́ рождества́ проро́цы узре́вше,/ издале́ча сим научи́вшеся,/ от Боже́ственнаго вдохнове́ния Ду́ха, ми́ру велегла́сно пропове́даша,/ и́хже сбытие́м ны́не чуди́мся.
Молитва
О, пресвяты́й и преди́вный страстоте́рпче Христо́в, архидиа́коне Лавре́нтие! Восхваля́юще ве́ру и страда́ния твоя́, почита́ем побе́ду и венцено́сное прохожде́ние твое́ горя́щее у́глие от тьмы ве́ка сего́ ко све́ту невече́рнему Престо́ла Вели́чествия Бо́жия. Тем же у́бо мо́лим тя: я́коже дре́вле притека́вшия с ве́рою к покро́ву твоему́ чудесы́ твои́ми утверди́л еси́, та́ко да прии́меши и нас под покро́в твой, и в боле́зни и в печа́лех на́ших засту́пник нам да бу́деши и я́коже от слепоты́ теле́сных оче́с Крискентиа́на преложе́нием рук исцели́л еси́, та́ко да исцели́ши предста́тельством твои́м у Престо́ла Бо́жия и на́шу душе́вную слепоту́. При́зри на разслабле́ние на́ше теле́сное и душе́вное, и укрепи́ нас бо́дренностию проти́ву враг на́ших ви́димых и неви́димых, удруча́ющих нас напа́стьми, да твое́ю по́мощию путь маловре́менныя жи́зни сея́ преше́дше, непобежде́ни от бед и скорбе́й и вся́каго лю́таго обстоя́ния, дости́гнем непресту́пныя сла́вы вели́чествия Бо́жия, иде́же предстоя́, мо́лишися со дерзнове́нием за лю́ди прибега́ющия с ве́рою к тебе́ и воспева́ющия ди́внаго во святы́х Бо́га Изра́илева во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
