23 августа.

Канон собору новомучеников и исповедников Соловецких

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 1:

Во страда́ниих ве́ру сохрани́вше,/ дре́вним му́чеником уподо́билися есте́, новому́ченицы Солове́цтии,/ и, смерть за Христа́ прие́мше,/ к жи́зни ве́чней преста́вилися есте́,/ иде́же со все́ми святы́ми// моли́те о душа́х на́ших.

Кано́н му́чеником, глас 8.

Песнь 1

Ирмо́с: Пресла́вный в мо́ри устро́ивый лю́дем путь,/ Небе́сное нам ше́ствие проходи́мо сотвори́,// да но́вую песнь пои́м Тебе́, Го́споди.

Припе́в: Го́споди Иису́се Христе́, Бо́же наш, поми́луй нас.

Христе́, А́гнче Бо́жий,/ благода́ть не то́кмо ве́ровати, но страда́ти по Тебе́ лю́дем Твои́м дарова́вый,/ даждь нам ра́зум досто́йно воспе́ти страда́ния новому́чеников Солове́цких,/ да назида́ются ве́рнии их по́двиги.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Я́коже дре́вле посреде́ мо́ря путь лю́дем Изра́ильским устро́ивый, Го́споди,/ си́це и ны́не на о́стровех Солове́цких лю́дем Твои́м посреде́ страда́ний лю́тых/ путь в Ца́рствие Небе́сное проходи́мь сотвори́л еси́,/ да воспою́т Тебе́ песнь побе́дную.

Сла́ва Отцу́ и Сы́ну и Свято́му Ду́ху:

Прииди́те, празднолю́бцы, па́мять новому́чеников Солове́цких просла́вим:/ си́и бо, от всех конце́в земли́ Росси́йския на о́стровех сих собра́ннии,/ кровь за Христа́ проли́ша и Це́рковь Ру́сскую украси́ша.

И ны́не и при́сно и во ве́ки веко́в. Ами́нь.

Богоро́дичен: Изба́вльшеся честны́м Рождество́м Твои́м, Де́во,/ а́дских и тле́нных уз и зако́ннаго осужде́ния, Пречи́стая,/ ра́дуйся, Обра́дованная, благода́рно вопие́м Ти,/ спаси́тельная Две́ре благода́ти.

Песнь 3

Ирмо́с: Утвержде́й на ка́мени ве́ры,/ на сем сози́жду Мою́ Це́рковь, реки́й Го́споди,/ спаси́ мя вопию́ща:/ Ты еси́, Христе́, Сын Бо́га жива́го,// и в Тебе́ утверди́ся дух мой.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Себе́ отве́ргшеся и крест взе́мше,/ Христу́ после́довали есте́, страстоте́рпцы Солове́цтии,/ и, ду́ши ва́ша за Него́ положи́вше,/ неувяда́емый вене́ц сла́вы на Небесе́х прия́ли есте́.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Ка́меню ве́ры, священному́чениче Пе́тре, архиере́ю достохва́льне,/ Воро́нежския земли́ сла́во и похвале́ние,/ ты во дни страда́ний на о́стровех Солове́цких испове́днически вопия́л еси́:/ Христо́с есть Сын Бо́га жива́го,/ и в Нем утверди́ся дух мой.

Сла́ва Отцу́ и Сы́ну и Свято́му Ду́ху:

Сто́лпе Правосла́вия неруши́мый, красото́ и сла́во Це́ркве Ру́сския, священному́чениче Евге́ние,/ ты, ста́рей от архиере́ев во узи́лищи Солове́цтем быв,/ пра́вило ве́ры и о́браз кро́тости юне́йшим яви́л еси́/ и Христа́ Бо́га до кончи́ны дней твои́х испове́дал еси́.

И ны́не и при́сно и во ве́ки веко́в. Ами́нь.

Богоро́дичен: Скве́рну всю пе́рвыя отложи́вше сне́ди,/ живо́тнаго хле́ба с Небесе́ напита́емся,/ от земли́ Де́вы возсия́вшаго,/ Ю́же, я́ко Хода́таицу благи́х, воспои́м.

Седа́лен святы́м, глас 4:

Новому́ченицы приснопа́мятнии,/ вы, а́ще живу́ще, а́ще умира́юще, вы́ну Го́сподеви предстоя́ли есте́/ и, ду́ши за ве́ру Христо́ву положи́вше,/ Небе́снаго жи́тельства ве́чную ра́дость восприя́ли есте́,/ обре́тшеся я́ко зла́то неги́блющее Ца́рствия Бо́жия.

Песнь 4

Ирмо́с: Я́ко Петру́ ру́ку простры́й в по́мощь,/ и мене́ поми́луй,// и спаси́ я́ко Человеколю́бец.

Припе́в: Святи́и новому́ченицы и испове́дницы Солове́цтии, моли́те Бо́га о нас.

О, вели́кий со́нме новому́чеников и испове́дников Солове́цких:/ святи́телие и иере́и, мона́си и мирсти́и,/ ста́рцы и ю́нии и жен сосло́вие, исполне́ние Це́ркве Христо́вы!/ Вы, на еди́ном по́прищи страда́ний совоку́пльшеся,/ еди́ну мзду во Ца́рствии Небе́снем обрето́сте.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Фаво́р и Ермо́н о и́мени Госпо́днем возра́довашася,/ Голго́фа же А́нзерская страда́ния земна́я и Небе́сную сла́ву новому́ченик пропове́дует./ Ти́и бо, го́рькими рабо́тами, гла́дом, боле́зньми и сме́ртию за Христа́ спасе́ние обре́тше,/ в го́рнем Иерусали́ме с первому́ченики ликовству́ют.

Сла́ва Отцу́ и Сы́ну и Свято́му Ду́ху:

Архиере́ев ру́сских похвало́ и Солове́цких у́зников добро́то,/ патриа́ршаго чи́на ревни́телю и лжеобнови́телей Це́ркве обличи́телю,/ Иларио́не, священному́чениче богому́дрый,/ страда́ния о Го́споде и лови́тву рыб со смире́нием прия́л еси́, я́ко апо́стольское де́лание./ Ны́не же и нам те́плый моли́твенник и предста́тель пред Бо́гом явля́ешися.

И ны́не и при́сно и во ве́ки веко́в. Ами́нь.

Богоро́дичен: И́стинную Богоро́дицу Тя вси ро́дове родо́в сла́вят,/ святе́йшу А́нгел я́ве бы́вшу, Пресвята́я Де́во./ Те́мже вопие́м:/ освяти́ на́ша ду́ши, оскверни́вшияся страстьми́.

Пе́снь 5

Ирмо́с: У́тренюет дух мой к Тебе́, Бо́же,/ зане́ свет повеле́ния прише́ствия Твоего́,/ и́миже у́бо озари́ ум наш, Влады́ко,// и наста́ви на стезю́ жи́зни.

Припе́в: Святи́и новому́ченицы и испове́дницы Солове́цтии, моли́те Бо́га о нас.

И́ноцы преподо́бнии дре́вле благоле́пием церко́вным о́стровы Солове́цкия преобрази́ша,/ новому́ченицы же и испове́дницы во дни гоне́ний лю́тых/ страда́ньми за Христа́ ме́сто сие́ па́че просла́виша./ Ны́не же ку́пно Бо́гу предстоя́т, моля́щеся о оби́тели Солове́цтей.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Вениами́не досточу́дне, па́стырю преди́вный,/ ты, Солове́цкия бра́тии нача́льник быв,/ свиде́тель злодея́ний и поруга́ния оби́тели святы́я яви́лся еси́./ Страда́льческую же кончи́ну от беззако́нник в земли́ Арха́нгельстей прие́м,/ му́ченический лик умно́жил еси́.

Сла́ва Отцу́ и Сы́ну и Свято́му Ду́ху:

Благохвале́ние воздади́м богоблаже́нному Ники́фору,/ той бо, в Солове́цтей оби́тели преподо́бнически пожи́в,/ в изгна́нии о́бщник Вениами́ну яви́ся/ и, кончи́ну му́ченическую с ним вку́пе восприе́м,/ Ца́рствия Небе́снаго дости́же.

И ны́не и при́сно и во ве́ки веко́в. Ами́нь.

Богоро́дичен: Не пре́зри, моля́щи о нас/ Сы́на Твоего́, Христа́ Бо́га на́шего, при́сно Благослове́нная,/ изба́витися вся́кия ско́рби, Чи́стая.

Песнь 6

Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния:/ но Твою́ кре́пкую ру́ку мне простри́, я́ко Петро́ви,// о Упра́вителю, и спаси́.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Во Христе́ страда́вше, новому́ченицы Солове́цтии,/ Це́ркве Правосла́вныя столпи́ кре́пцыи, я́ко победи́вшии ко́зни диа́вольския, яви́стеся,/ сего́ ра́ди дарова́ся вам и́мя но́вое и жи́тельство в Небе́снем Иерусали́ме.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Во страда́ниих и го́рьких рабо́тах на о́стровех Солове́цких подвиза́вшиися/ к покая́нию и доброде́тельному житию́ подви́гните нас, святи́и новому́ченицы,/ да и мы ва́шими моли́твами сподо́бимся прославля́ти Го́спода во Ца́рствии Его́.

Сла́ва Отцу́ и Сы́ну и Свято́му Ду́ху:

В ско́рбех и беда́х, страда́ниих и тягота́х темни́чных многоле́тне пребыва́я, святи́телю Афана́сие, испове́дниче,/ слу́жбе боже́ственней всем се́рдцем прилежа́л еси́/ и песносло́вие хвале́бное святы́м земли́ Росси́йския сложи́л еси́./ Ны́не же с ни́ми во Ца́рствии Небе́снем пребыва́я,/ Тро́ицу Святу́ю прославля́еши.

И ны́не и при́сно и во ве́ки веко́в. Ами́нь.

Богоро́дичен: Сло́во во утро́бе Твое́й, Чи́стая, воплоща́ется,/ безслове́сных плотски́х страсте́й мир избавля́я.

Конда́к, глас 3:

Днесь престо́лу Бо́жию предстоя́т новому́ченицы Солове́цтии/ и с Небе́сными ли́ки за ны мо́лятся Бо́гу,/ мы же, па́мять их благогове́йно соверша́юще, взыва́ем:/ ра́дуйтеся, достопокланя́емии сро́дницы на́ши,// я́ко мзда ва́ша мно́га на Небесе́х.

И́кос:

Присноблаже́ннии новому́ченицы Солове́цтии,/ Христу́ Бо́гу ве́рно после́довавшии и мир просвети́вшии страда́нии ва́шими,/ вы, за́поведи Христо́вы испо́лнивше, блаже́нства Ева́нгельская насле́довали есте́./ Сего́ ра́ди, па́мять ва́шу благогове́йно соверша́юще, взыва́ем вам си́це:/

ра́дуйтеся, во смире́нии ду́хом Христо́вым обогати́вшиися;

ра́дуйтеся, в Бо́зе утеше́ние обре́тшии;

ра́дуйтеся, зе́млю кро́тких насле́довавшии;

ра́дуйтеся, оправда́нием Госпо́дним насы́тившиися;

ра́дуйтеся, милосе́рдием ми́лость Бо́жию стяжа́вшии;

ра́дуйтеся, чистото́ю се́рдца Бо́га узре́вшии;

ра́дуйтеся, мир сотво́рше, сы́ны Бо́жии нарече́ннии;

ра́дуйтеся, изгна́нием пра́вды ра́ди Ца́рствие Небе́сное улучи́вшии;

ра́дуйтеся, поноше́ния и оболга́ния за Христа́ прие́мшии.

Ра́дуйтеся и весели́теся, достопокланя́емии сро́дницы на́ши, я́ко мзда ва́ша мно́га на Небесе́х.

Песнь 7

Ирмо́с: Безу́мное веле́ние/ мучи́теля злочести́ваго лю́ди поколеба́,/ ды́шущее преще́ние и злохуле́ние богоме́рзкое,/ оба́че три о́троки не устраши́ я́рость зве́рская,/ ни огнь снеда́яй,/ но противоды́шущу росоно́сному Ду́ху,/ со огне́м су́ще поя́ху:// препе́тый отце́в и нас Бо́же, благослове́н еси́.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Мучи́телей злочести́вых преще́ние богоме́рзкое презре́вше, новому́ченицы и испове́дницы Солове́цтии,/ я́ко дре́вле о́троцы в пещи́, во огни́ гоне́ний поя́ху:/ препе́тый отце́в и наш Бо́же, благослове́н еси́.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Безу́мное веле́ние власти́телей,/ е́же Бо́гу не покланя́тися и не чти́ти Его́, му́жески отве́ргше,/ изгна́ния, заточе́ния и го́рькия рабо́ты,/ я́ко часть благу́ю, избра́ли есте́, святи́и му́ченицы, Го́споду взыва́юще:/ препе́тый отце́в и наш Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Посреде́ муче́ний тя́жких любо́вию к Бо́гу пламене́ли есте́, святи́и,/ и, мучи́телей злоухищре́ния многоразли́чная посрамля́юще,/ со дерзнове́нием взыва́ли есте́:/ препе́тый отце́в и наш Бо́же, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Блажа́т Тя, Пречи́стая, му́ченический лик и мучениколю́бцев собра́ние,/ Бо́жие бо Сло́во па́че ума́ и сло́ва родила́ еси́.

Песнь 8

Ирмо́с: Победи́тели мучи́теля и пла́мене,/ благода́тию Твое́ю бы́вше,/ за́поведем Твои́м зело́ прилежа́ще, о́троцы вопия́ху:// благослови́те, вся дела́ Госпо́дня, Го́спода.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Святи́и новому́ченицы и испове́дницы во времена́ богобо́рческая Солове́цкия ото́ки ще́дро облагодати́ша,/ их бо страда́нии и кро́вию/ ме́сто муче́ния селе́ние сла́вы Госпо́дни бысть.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Прехва́льне служи́телю Христо́в Арка́дие,/ ве́ры Правосла́вныя изря́дный пропове́дниче,/ милосе́рдием и нищелю́бием Бо́гу усе́рдно угожда́л еси́./ Сего́ ра́ди, на мно́га ле́та во о́стровех Солове́цких заточе́н быв,/ вене́ц му́ченический от Судии́ Всеми́лостиваго восприя́л еси́.

Сла́ва Отцу́ и Сы́ну и Свято́му Ду́ху:

Тро́ичен: Свы́ше назира́йте, новому́ченицы, па́мять ва́шу любо́вию соверша́ющих/ и хода́тайствуйте у Трисо́лнечнаго Божества́ о проще́нии грехо́в,/ да ти́хое и безмо́лвное житие́ поживе́м во вся́ком благоче́стии и чистоте́.

И ны́не и при́сно и во ве́ки веко́в. Ами́нь.

Богоро́дичен: Дре́вле Елеаза́ру преподо́бному о гряду́щих гоне́ниих возвести́ла еси́, Богоро́дице Де́во,/ и Засту́пница Всемо́щная новому́чеником Солове́цким яви́лася еси́.

Песнь 9

Ирмо́с: Разбо́йника подража́яй окая́нный аз,/ испове́даяй Тя зову́ Тебе́,/ еди́наго от Отца́, и от Де́вы неизрече́нно воплоще́нна,/ и мене́ ра́ди бы́вша по мне:/ но, я́ко Свет у́мный, Со́лнце,/ не воспомяну́в зол, во Ца́рствии Твое́м помяни́ мя,// егда́ Судия́, Го́споди, ся́деши на Престо́ле.

Припе́в: Святи́и новому́ченицы и испове́дницы Солове́цтии, моли́те Бо́га о нас.

Никоди́ма священному́ченика па́мять досто́йно почти́м,/ и́же жития́ преподо́бных Солове́цких соста́ви/ и по́двигом му́ченическим в Бе́ле гра́де архипа́стырство свое́ увенча́./ Сего́ ра́ди Белгоро́дская земля́ и оби́тель Солове́цкая вку́пе того́ прославля́ют.

Припе́в: Святи́и новому́ченицы и испове́дницы Солове́цтии, моли́те Бо́га о нас.

О́тче Иоа́нне богодухнове́нне,/ дни мно́гия в заточе́нии Солове́цтем пребы́в,/ Христу́ за ны распе́ншуся сораспя́лся еси́/ и в земли́ Воро́нежстей смерть му́ченическую от гони́телей прия́л еси́./ Сего́ ра́ди тя велича́ем.

Сла́ва Отцу́ и Сы́ну и Свято́му Ду́ху:

Жизнода́вче Го́споди,/ моли́твами новому́чеников и испове́дников Солове́цких/ упоко́й со все́ми пра́ведными ве́рныя рабы́ Твоя́,/ за и́мя Твое́ на о́стровех сих пострада́вшия:/ святи́тели и иере́и, мона́хи и мирски́я,/ та́же жены́ с де́вами и всяк во́зраст и сосло́вие,/ и́хже имена́ Ты Сам ве́си,/ я́ко и́стинныя ча́да и дру́ги Твоя́.

И ны́не и при́сно и во ве́ки веко́в. Ами́нь.

Богоро́дичен: Досто́йно есть я́ко вои́стину блажи́ти Тя, Де́во Чи́стая,/ Твои́ми бо моли́твами всяк, испове́дуяй Сы́на Твоего́ я́ко и́стиннаго Бо́га утвержда́ется/ и жизнь ве́чную обрета́ет.

Свети́лен:

По́двиги и страда́нии новому́чеников и испове́дников Солове́цких/ свет Христо́в во тьме возсия́./ Его́же и нам улучи́ти сподо́би моли́твами святы́х Твои́х, Христе́, Све́те и́стинный.

Моли́тва

О, достохва́льнии и великоимени́тии новому́ченицы и испове́дницы Солове́цтии! Вы гоне́ния, хлад, глад, наготу́, поноше́ния, поруга́ния и я́рость мучи́телей со смире́нием претерпева́юще, ве́ру тве́рдую, упова́ние непосра́мленное и любо́вь и́стинную к Бо́гу, бли́жним и гони́телем ва́шим яви́ли есте́.

Сего́ ра́ди ны́не, предстоя́ще Престо́лу Влады́ки Христа́, моли́те о благостоя́нии святы́я Це́ркве Ру́сския, да избе́гнет гоне́ний, раско́лов, ересе́й, ра́спрей и мяте́жа мирска́го, да восприи́мет архипа́стыри и па́стыри до́брыя, пеку́щияся о спасе́нии душ, да украси́тся и́ноки честны́ми, ста́рцы му́дрыми, му́жы добронра́вными и де́вами чи́стыми, во е́же в ми́ре глубо́це ти́хое и безмо́лвное житие́ пожи́ти нам во вся́ком благоче́стии и чистоте́.

А́ще же прии́дет и наш час пострада́ти за ве́ру Правосла́вную, утверди́те ны, недосто́йныя сро́дники ва́ша, в терпе́нии, да́руйте нам му́жество и кре́пость испове́дати пред челове́ки Христа́, и́стиннаго Бо́га, да сподо́бимся с ва́ми воспева́ти пречестно́е и животворя́щее и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.