Канон апостолу Матфию

Тропарь апостола, глас 3:

Апосто́ле святы́й Матфи́е,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Канон святаго апостола, глас 8.

Песнь 1

Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися.

Припев: Апостоле Матфие, моли Бога о нас.

Пе́сньми твое́ светоно́сное пою́щу, Матфи́е, ны́не торжество,/ с Небесе́ ми зарю́ спасе́ния да́ти моли́ся.

Припев: Апостоле Матфие, моли Бога о нас.

Ве́лие со́лнце яви́лся еси́ Све́та Вели́каго, досточу́дне,/ с на́ми бо бы́вшу, бесе́довал еси́, нехода́тайственне, апосто́ле.

Сла́ва Отцу́ и Сы́ну и Свято́му Ду́ху:

Зако́ном Влады́ки, блаже́нне, повину́йся,/ мре́жею уловля́еши твоего́ язы́ка из глуби́ны́ неве́дения концы́.

И ны́не и при́сно и во ве́ки веко́в. Ами́нь.

Богоро́дичен: Всего́ мя Спа́сает Сло́во Пребоже́ственное бла́гостию,/ восхоте́в из утро́бы Твое́я воплоти́тися,/ Чи́стая Ма́ти Де́во.

Песнь 3

Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных/ и пое́т Тя дух мой.

Припев: Апостоле Матфие, моли Бога о нас.

Возмо́гл еси́, укрепля́емь живонача́льным, му́дре, манове́нием,/ кре́пкаго коры́сти восхи́тити и порабо́тити благода́тнию.

Припев: Апостоле Матфие, моли Бога о нас.

Любя́ Учи́теля,/ служа́ того́ манове́нием вседе́йственным,/ от пре́лести спаса́еши челове́ки, досточу́дне.

Сла́ва Отцу́ и Сы́ну и Свято́му Ду́ху:

Тя двоенадеся́тному числу́ ученико́в ли́ка свята́го,/ вседе́йственный Дух исполня́юща, Богоглаго́ливе, избира́ет.

И ны́не и при́сно и во ве́ки веко́в. Ами́нь.

Богоро́дичен: Име́я Тя по́мощь,/ злых враго́в стремле́ния, Чи́стая, не ужаса́юся,/ име́я Тя Предста́тельницу, тех побежда́ю полки́.

Седа́лен апосто́ла, глас 8.

Мо́лниями твои́х сло́вес Боже́ственных/ попали́л еси́ пре́лесть лука́вую, ве́рныя просвети́л еси́,/ воспева́ти е́же во пло́ти прише́ствие, блаже́нне, все́ми Влады́чествующаго,/ и того́ стра́сти Боже́ственней поревнова́л еси́./ Отону́дуже соше́дшеся, святу́ю твою́ па́мять соверша́ем, веселя́щеся,/ и согла́сно вопие́м ти:/ Матфи́е апосто́ле, моли́ Христа́ Бо́га согреше́ний оставле́ние дарова́ти/ чтущим любо́вию святу́ю па́мять твою́.

Сла́ва и ны́не, глас 2:

Незаходи́мое со́лнце яви́ся,/ Со́лнцу вели́кому присовоку́плься,/ Те́мже и просвети́ су́щих во тьме неразу́мия,/ отгоня́я неду́ги от душ и теле́с, Матфи́е, таи́н самови́дче,/ и служи́телю вои́стинну Христо́в,/ при́сно моли́ся Ему́ о всех нас.

Песнь 4

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих твое́ Бо́жество́.

Припев: Апостоле Матфие, моли Бога о нас.

Еди́но естество́ Божества́,/ еди́но Ца́рство и госпо́дство возвеща́я, преблаже́нне,/ язы́ков стада́ улови́л еси́.

Припев: Апостоле Матфие, моли Бога о нас.

Наведе́ тя Госпо́дь на мо́ре жития́, прему́дре,/ я́коже коня́, смуща́юща многобо́жия го́рькия во́ды.

Сла́ва Отцу́ и Сы́ну и Свято́му Ду́ху:

Сло́вом Боже́ственным обнови́л еси́ олядене́вшая сердца́, сла́вне,/ все́яв благоче́стие, исти́ны позна́ние.

И ны́не и при́сно и во ве́ки веко́в. Ами́нь.

Богоро́дичен: Де́вства сосу́де и невмести́маго естества́ селе́ние,/ ду́шу мою́ просвети́,/ омраче́нную мно́гими страстъми́.

Песнь 5

Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Припев: Апостоле Матфие, моли Бога о нас.

Я́ко многопло́дну ло́зу, и́стинный тя простре́ виногра́д,/ де́лающа грозд, пролива́юща вино́ спаси́тельное,/ его́же пи́вше, блаже́нне, одержи́мии неразу́мием,/ пре́лести пия́нство отверго́ша.

Припев: Апостоле Матфие, моли Бога о нас.

Ученико́в двоенадеся́тых яви́лся еси́, исполня́я лик блаже́нный,/ из него́же преда́тель себе́ отве́рг,/ приобре́те го́рькое удавле́ние, на Христа́ воздви́г пя́ту,/ тайновеща́телю Матфи́е чу́дне.

Сла́ва Отцу́ и Сы́ну и Свято́му Ду́ху:

Соль Боже́ственна, вве́рглся еси́, блаже́нне, в мир, Матфи́е апосто́ле,/ гной пре́лести очища́я сла́дкими уче́нии,/ отгоня́ боле́зни и отъе́мля я́звы душ и теле́с, прехва́льне.

И ны́не и при́сно и во ве́ки веко́в. Ами́нь.

Богоро́дичен: Безо́бразных риз и дре́вняго совлече́ся умерщвле́ния Ада́м, Де́во,/ пречи́стым Твои́м рождество́м, Богоневе́сто/ и во оде́жду свя́ту и и́стинну облече́ся,/ ника́коже оскверне́ну страстьми́.

Песнь 6

Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Припев: Апостоле Матфие, моли Бога о нас.

Бог был еси́ положе́н, едине́нием Боже́ственным обожа́емь,/ и, перводе́лательны от Бо́га лучи́ прии́м, ве́рныя просвети́л еси́/ и зе́млю от мглы и́дольския очи́стил еси́.

Сла́ва Отцу́ и Сы́ну и Свято́му Ду́ху:

Се Тебе́ вмеща́ется, учени́ку, вся́ко прорече́ние свяще́нных проро́к:/ самови́дец бо быв, Его́же дре́вле провозвести́ша,/ служи́телю Матфи́е, подо́бник же и апосто́л.

И ны́не и при́сно и во ве́ки веко́в. Ами́нь.

Богоро́дичен: Свяще́ние у́мное и неприкоснове́нно очисти́лище,/ све́щник злат и трапе́зу одушевле́ну,/ Хлеб носи́вшую живота́, Де́во, ве́рнии, Тя и́менуем.

Конда́к, глас 4.

Светоза́рное, я́ко со́лнце, во весь мир изше́дшее веща́ние твое́/ просвеща́ет язы́ческую Це́рковь благода́тию,/ чудоно́сче Матфи́е апо́столе.

И́кос:

Струю́ сло́ва пода́ждь ми, Го́споди, водно́е естество́ соде́явый,/ и се́рдце мое́ укрепи́, Благоутро́бне,/ и́же зе́млю утверди́вый сло́вом Твои́м,/ и просвети́ мое́ помышле́ние, све́том, я́ко ри́зою, одева́яйся,/ да глаго́лю и пою́ подо́бная:/ досто́йно почести́, Многоми́лостиве, Твоего́ Матфи́я апосто́ла.

Песнь 7

Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Припев: Апостоле Матфие, моли Бога о нас.

Ток изсуши́л еси́ пре́лести наводне́нием твоея́ Боже́ственныя му́дрости/ и пото́ком пи́щи напои́л еси́ ве́рою вопию́щия, сла́вне:/ Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Си́лою Бо́га Всеси́льнаго изнемого́ша вра́жия кова́рства/ пред лице́м твоего́, апосто́ле, ше́ствия/ и сокруши́шася го́ры же и хо́лми безбо́жия.

И ны́не и при́сно и во ве́ки веко́в. Ами́нь.

Богоро́дичен: Се, Ю́же рече́ Де́ву Ду́хом вели́кий Иса́ия,/ во чре́ве Бо́га зача́т и ражда́ет, Ему́же пое́м:/ Го́споди Бо́же, благослове́н еси́.

Песнь 8

Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Припев: Апостоле Матфие, моли Бога о нас.

Уста́ Бо́жия быв, из горта́ни восхити́л еси́ человекоуби́йцы,/ и́хже лю́те пожре́ и снедь соде́ла свое́й злобе, му́дре,/ и ба́нею пакибытия́ сих приве́л еси́ Го́сподеви, пою́щия непреста́нно:/ лю́дие, превозноси́те во вся ве́ки.

Припев: Апостоле Матфие, моли Бога о нас.

Пре́лести меча́, зло́бы ору́жия, ору́жие быв Бо́жия Сло́ва, сла́вне,/ до конца́ истни́л еси́ и́дольския тре́бы,/ столпы́ же и хра́мы Боже́ственною си́лою низложи́л еси́,/ хра́мы же Тро́ицы соде́лал еси́, вопию́щия:/ лю́дие, превозноси́те во вся ве́ки.

Сла́ва Отцу́ и Сы́ну и Свято́му Ду́ху:

Слове́сное яви́ся не́бо, пове́дуя Единоро́днаго сла́ву Бо́жию неизглаго́ланную,/ Матфи́й всему́дрый, мо́лния благода́ти, лове́ц заблу́ждших,/ све́щник Боже́ственнаго светозаре́ния, неизрече́нных таи́нник,/ того́ с весе́лием воспое́м согла́сно.

И ны́не и при́сно и во ве́ки веко́в. Ами́нь.

Богоро́дичен: Па́че естества́ зача́ла еси́,/ па́че сло́ва роди́ла еси́ Соде́теля челове́ческаго естества́,/ бывша Челове́ка, Отцу́ неразлу́чна, Влады́чице Чи́стая./ Его́же пое́т вся тварь:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Припев: Апостоле Матфие, моли Бога о нас.

Дру́га тя рече́ Спас, того́ служа́ща повеле́нием, блаже́нне апосто́ле,/ и насле́дника Ца́рствия Своего́, в бу́дущий стра́шный день соседа́теля,/ Матфи́е прему́дре, двоенадеся́тых учени́к исполне́ние.

Припев: Апостоле Матфие, моли Бога о нас.

Ве́трилом, блаже́нне, Креста́ преше́д волну́ющееся мо́ре жития́,/ дости́гл еси́ ко приста́нищу поко́я и кра́йнему́ жела́нию/ и, ра́дуяся, ны́не предстои́ши со апосто́льским ли́ком,/ моля́ о нас Человеколю́бца.

Сла́ва Отцу́ и Сы́ну и Свято́му Ду́ху:

Све́щник вои́стинну златоза́рен,/ свети́ло Ду́ха сия́ющее, яви́ся язы́к твой,/ попаля́ющ иноплеме́нная уче́ния, погаша́ющ огнь, му́дре, чужди́й,/ свет облиста́ющ во тьме неразу́мия спя́щим.

И ны́не и при́сно и во ве́ки веко́в. Ами́нь.

Богоро́дичен: Уста́вила еси́ еди́на в жена́х кля́тву первозда́нных, Богоневе́сто,/ Неопи́саннаго пло́тию ро́ждши опису́ема,/ обнови́ла еси́ преде́лы естества́, Нескве́рная,/ разстоя́щая пе́рвее пресла́вным хода́тайством Твои́м соеди́нила еси́.

Свети́лен апосто́ла.

Тече́ние кра́сных твои́х ног, Матфи́е апосто́ле,/ возврати́в к ше́ствию Небе́сному, возше́л еси́, ра́дуяся,/ и, Тро́ице предста́в, во Отце́ ви́диши Сы́на и Ду́ха Боже́ственнаго./ сего́ ра́ди ве́рою пресвяще́нную твою́ и Боже́ственную пра́зднуем па́мять.

Молитва

Святы́й сла́вный и всехва́льный апо́столе Христо́в Матфие, мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.