Канон на первое и второе пренесение мощей преподобных Зосимы, Савватия и Германа Соловецких

Тропа́рь преподóбным, глас 8:

Я́ко свети́льницы яви́стеся всесве́тлии/ во отóце океа́на мóря,/ преподóбнии отцы́ на́ши Зоси́мо, Савва́тие и Ге́рмане:/ вы бо, крест Христóв на ра́мо взе́мше,/ усе́рдно Томý после́довасте/ и, чистотóю Бóгови прибли́жившеся,/ отонýдуже си́лами чуде́с обогати́стеся./ Те́мже и мы любе́зно притека́ем ко святы́м моще́м ва́шим и уми́льно глагóлем:/ о преподóбнии, моли́те Христа́ Бóга// спасти́ся душа́м на́шим.

Ин тропа́рь, глас 4:

Пóстническое и равноа́нгельное житие́ ва́ше,/ преподóбнии отцы́ Зоси́мо, Савва́тие и Ге́рмане,/ вселе́нней позна́ны сотвори́ вас:/ чудодея́нии бо разли́чными, богонóснии, просвеща́ете// ве́рою призыва́ющия вы и чтýщия честнýю па́мять ва́шу.

Канóн преподóбным, глас 2.

Песнь 1

Ирмос: Гряди́те, лю́дие,/ пои́м песнь Христý Бóгу,/ разде́льшему мóре и наста́вльшему лю́ди,/ я́же изведе́ из рабóты еги́петския,// я́ко просла́вися.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Просвеще́нием Трисóлнечнаго Божества́ озари́вшеся, премýдрии,/ свети́ла яви́стеся осиява́юща всю́ду:/ тем и нас, страстьми омраче́нных,/ просвеще́нием благода́ти озари́ти помоли́теся/ и сýщаго получи́ти спасе́ния.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Све́том Боже́ственныя благода́ти просвеща́еми,/ Зоси́мо, Савва́тие и Ге́рмане преблаже́ннии,/ ве́рно светонóсную ва́шу па́мять торжествýющих просвети́те/ и от тьмы грехóвныя моли́твами ва́шими, преподóбнии, изба́вите.

Слава: Дýху Святóму хра́ми, премýдрии, бы́сте,/ и к Немý все духóвное жела́ние обрати́сте,/ и сегó ра́ди крóтких зе́млю насле́довасте./ Те́мже бýрю стра́стей на́ших укроти́те, преподóбнии,/ да в тишине́ боже́ственней песнослóвим ва́ша пóдвиги.

И ныне: Лю́тыми страсте́й наве́ты обурева́емь есмь, Отрокови́це,/ и прилóги грехóвными погружа́емь;/ к Твоемý еди́ному ти́хому и невла́емому приста́нищу любóвию прибега́ю, Всепе́тая:/ уще́дривши спаси́ мя, Присноде́во.

Песнь 3

Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,// и несть пра́веден, па́че Тебе́, Гóсподи.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Высотóю смире́ния украша́еми,/ Зоси́мо, Савва́тие и Ге́рмане преподóбнии,/ все жела́ние ко Влады́це своемý прострóсте,/ я́ростная же движе́ния на враги́ вооружи́сте,/ со изря́дными де́лы свои́ми, постóм и моли́твами.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Плóтей свои́х воста́ния кре́пким поще́нием, преподóбнии, умертви́вше,/ оби́телище бы́сте Влады́чне;/ Егóже умоли́те изба́витися скорбе́й и мучи́тельства страсте́й/ с ве́рою притека́ющим к вам, преблаже́ннии.

Слава: Имýща споспешествýющу боже́ственную си́лу,/ исцеле́ния безчи́сленная источа́ют мóщи ва́ша, Зоси́мо, Савва́тие и Ге́рмане преподóбнии:/ отгоня́ют от челове́к боле́зни теле́сныя/ и душе́вныя стра́сти врачýют пóдвиги ва́шими, всечестни́и.

И ныне: Тружда́ет мя бýря грехóвная/ и возмуще́ние безме́стных помышле́ний:/ умилосе́рдися, Всенепорóчная, и рýку ми пóмощи я́ко ми́лостива простри́,/ да спасе́н велича́ю Тя.

Седа́лен преподóбным, глас 4:

Жите́йское мóре воздержа́нием безбе́дно преплы́сте/ и ко приста́нищу мы́сленному безстра́стия, ра́дующеся, доидóсте,/ преподóбнии отцы́ на́ши Зоси́мо, Савва́тие и Ге́рмане,/ богомýдрии и преблаже́ннии;/ моли́те Христа́ Бóга, спасти́ся душа́м на́шим. Два́жды.

Песнь 4

Ирмос: Прише́л еси́ от Де́вы не хода́тай, ни А́нгел,/ но Сам, Гóсподи, воплóщся/ и спасл еси́ всегó мя челове́ка.// Тем зовý Ти: сла́ва си́ле Твое́й, Гóсподи.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Умóм и душе́ю предочи́стившеся, преподóбнии,/ пре́лесть душепа́губную всеконе́чне от себе́ отвергóсте/ и, чýвства своя́ к немýтней тишине́ упра́вивше,/ во отóк морски́й, премýдрии, всели́стеся, воспева́юще:/ сла́ва си́ле Твое́й, Гóсподи.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Закóном Писа́ния Свяще́ннаго и ра́зуму святы́х поуча́ющеся,/ Зоси́мо, Савва́тие и Ге́рмане преподóбнии,/ вся́кия доброде́тели óбразу навыкóсте, мýдрей пчеле́ подóбящеся,/ и прия́телище изря́дно Дýху Святóму, премýдрии, бы́сте, воспева́юще:/ сла́ва си́ле Твое́й, Гóсподи.

Слава: Вся́ческими, преподóбнии, светя́щеся чудоде́йствы/ и боже́ственною озаря́еми благода́тию,/ всем позна́стеся сокрóвище исцеле́ний неистощи́мо,/ страсте́й отгоня́ете омраче́ние/ и вра́жия низлага́ете ополче́ния, воспева́юще:/ сла́ва си́ле Твое́й, Гóсподи.

И ныне: Из утрóбы Твоея́, Чи́стая Отрокови́це, возсия́в Боже́ственное Сóлнце,/ сýщия во тьме многобóжия просвети́/ и в се́ни сме́ртней седя́щия, Влады́чице, осия́,/ Емýже воспева́юще зове́м:/ сла́ва си́ле Твое́й, Гóсподи.

Песнь 5

Ирмос: Просвеще́ние во тьме лежа́щих,/ спасе́ние отча́янных, Христе́ Спа́се мой,/ к Тебе́ ýтренюю, Царю́ ми́ра,/ просвети́ мя сия́нием Твои́м,// инóго бо, ра́зве Тебе́, бóга не зна́ю.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Те́сный путь простра́нному предпоче́тше,/ во отóце морсте́м вся́ческая утесне́ния ра́достию претерпева́ли есте́, преподóбнии,/ боже́ственными же поуче́нии дýши своя́ очища́юще,/ на добрóту Бóжию неизглагóланную при́сно взира́ли есте́, преблаже́ннии.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Незлóбиви, и крóтцы, и ми́лостиви бы́сте, преподóбнии,/ вся злóбы и стре́лы вра́жия до конца́ погýбльше;/ те́мже, благода́ть от Бóга свы́ше прие́мше, ми́лостивно нас посеща́йте,/ любóвию святýю па́мять ва́шу почита́ющих.

Слава: Я́ко вели́кое сóлнце, вели́чием пóдвиг ва́ших/ возсия́сте нам, Зоси́мо, Савва́тие и Ге́рмане преподóбнии,/ земны́я осиява́юще концы́/ и вся просвеща́юще све́том богоразýмия./ Те́мже мóлим вы:/ просвети́те наш ра́зум, отцы́ преблаже́ннии.

И ныне: От мнóжества востаю́щих на ны в боле́зни исчезе́ живóт наш,/ погрязóхом в прóпасти безчи́сленных согреше́ний./ Спаси́ ны, Влады́чице, и возведи́ я́ко ми́лостива, Всенепорóчная,/ Тебе́ бо и́мамы Еди́ну Предста́тельницу непобеди́му, раби́ Твои́.

Песнь 6

Ирмос: В бе́здне грехóвней валя́яся,/ неизсле́дную милосе́рдия Твоегó призыва́ю бе́здну:// от тли, Бóже, мя возведи́.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Ева́нгельски, преподóбнии, Христа́ возлю́бльше, ми́ра отврати́стеся,/ в непроходи́мыя же и в пусты́я отóки заше́дше,/ Еди́ному Влады́це своемý прилепи́стеся,/ от Негóже и трудóм воздая́ние прие́мше, животý ве́чному я́ве причасти́стеся,/ за пою́щия вы моли́теся.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Богомýдрыми пóмыслы преудобри́вшеся, преподóбнии,/ и вся, я́же на земли́ льстя́щая, я́ко уме́ты вмени́вше,/ к нестаре́ющему преста́вистеся блаже́нству./ Ныне с ли́ки во све́те безплóтных сил о Бóзе при́сно сликовству́ете, преблаже́ннии.

Слава: Стра́нна и пресла́вна, преподóбнии, о Бóзе содева́юще чудеса́,/ всем, и́же в мóри пла́вающим и зле стра́ждущим,/ призыва́еми скóро предстае́те, от бед избавля́юще;/ и нас, бе́дствующих лю́те и напа́стьми одержи́мых,/ ми́лостивно предста́вше спаса́йте, преблаже́ннии.

И ныне: Греха́ тя́жкое бре́мя, е́же отяготе́ на мне, Пречи́стая, облегчи́:/ Ты бо еси́ Предста́тельница гре́шником пресла́вная,/ Изба́вителя и Спа́са рóждши земны́м.

Конда́к преподóбным, глас 2:

Христóвою любóвию уязви́вшеся, преподóбнии,/ и Тогó крест на ра́мо взе́мше,/ понесли́ есте́, боже́ственне вооружи́вшеся на неви́димыя враги́/ и, непреста́нныя моли́твы я́ко копие́ в рука́х имýще,/ кре́пко победи́ли есте́ бесóвская ополче́ния;/ благода́ть Госпóдню прие́мше цели́ти недýги душ и теле́с/ притека́ющих ко святы́м моще́м ва́шим,/ чуде́с лучи́ испуща́ете всю́ду./ Тем зове́м вам:// ра́дуйтеся, преподóбнии отцы́ на́ши Зоси́мо, Савва́тие и Ге́рмане, мона́хом украше́ние.

И́кос:

Кто довóлен изрещи́ ва́ша чудодея́ния,/ преподóбнии отцы́ Зоси́мо, Савва́тие и Ге́рмане?/ Мы ýбо, ра́достию и боже́ственною любóвию почита́юще всехва́льную и всечестнýю па́мять ва́шу,/ от непости́жнаго ума́ на́шего недостóйнии,/ ма́лое сие́ пе́ние принóсим:/ ра́дуйтеся, испóлненнии Христóвы красоты́,/ и пресве́тла от Негó и преизоби́льна восприи́мшии ве́чнующая воздая́ния:/ телесы́ ýбо вас морски́й óстров прия́т,/ дýши же са́мое Не́бо,/ иде́же пóчести трудóв свои́х, прехва́льнии,/ восприя́сте от Христа́ всех Царя́ и Бóга./ Те́мже мóлим вы:/ посеща́йте ми́лостивно и моли́те непреста́нно о всех нас,/ преподóбнии отцы́ на́ши Зоси́мо, Савва́тие и Ге́рмане, мона́хом украше́ние.

Песнь 7

Ирмос: Óбразу златóму, на пóле Деи́ре служи́му,/ трие́ Твои́ óтроцы небрегóша безбóжнаго веле́ния,/ посреде́ же огня́ вве́ржени, ороша́еми, поя́ху:// благослове́н еси́, Бóже оте́ц на́ших.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

В моли́твах бóдренное, и в поще́ниих кре́пкое,/ и терпе́ние во искуше́ниих неосла́бное, ума́ чистотóю, преподóбнии, показа́сте,/ земли́ бо и земны́х достóйно отстýпльше,/ Небе́сное обретóсте наслажде́ние, воспева́юще:/ благослове́н Бог оте́ц на́ших.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Плод духóвный и же́ртву непорóчную, житие́ свое́, преподóбнии, Влады́це принесóсте,/ в воздержа́нии бо вся́цем пожи́сте,/ от Негóже и пóчести трудóм я́ко подвигополóжницы восприе́мше,/ де́йствуете пресла́вная чудеса́, воспева́юще:/ благослове́н Бог оте́ц на́ших.

Слава: Страстьми́ коле́блющихся и бýрею грехóвною, преподóбнии, погружа́емых,/ я́ко вели́кое к Бóгу дерзнове́ние имýще, руковóдствуйте/ и всегда́, премýдрии, сохраня́йте почита́ющих вас благоче́стно,/ я́ко да воспева́ем:/ благослове́н Бог оте́ц на́ших.

И ныне: Изба́ви нас от напа́стей и скорбе́й, и печа́лей разли́чных,/ и иноплеме́нных наше́ствия, и междоусóбныя бра́ни, Влады́чице Всепе́тая,/ я́ко да Тя сла́вим и Сы́ну Твоемý взыва́ем:/ благослове́н Бог оте́ц на́ших.

Песнь 8

Ирмос: Пещь иногда́ óгненная в Вавилóне де́йства разделя́ше,/ Бóжиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпóдня, Гóспода.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

В пребыва́лища при́сно живýщая всели́стеся, преподóбнии,/ нетле́нных благ наслажда́ющеся и Трисóлнечныя све́тлости исполня́ющеся./ Нас, призыва́ющих вы, те́плым предста́тельством ва́шим от всех лю́тых спаса́йте, пою́щих:/ благослови́те, вся дела́ Госпóдня, Гóспода.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Нам, любóвию почита́ющим вас/ и честнóе ва́ше соверша́ющим торжествó,/ Христóвы угóдницы Зоси́мо, Савва́тие и Ге́рмане, преподóбнии отцы́,/ согреше́нием испроси́те оставле́ние, и страсте́й премене́ние,/ и Боже́ственнаго све́та осия́ние, пою́щим:/ благослови́те, вся дела́ Госпóдня, Гóспода.

Слава: О Пребезнача́льное естествó и Триипоста́сное еди́нство,/ Óтче и Сы́не и Дýше Пресвяты́й,/ приими́ о нас моли́твенники Твоя́ преподóбныя угóдники/ и пода́ждь прегреше́нием разреше́ние, и житию́ исправле́ние, и злых отчужде́ние,/ и сподóби ны в ми́ре воспева́ти Твою́ держа́ву:/ благослови́те, вся дела́ Госпóдня, Гóспода.

И ныне: Я́ко Еди́на рóждшая безсе́менным рождествóм Христа́ Бóга,/ Ма́ти Безневе́стная Чи́стая,/ Сегó ми́лостива сотвори́, Влады́чице,/ спасти́ рабы́ Твоя́ от наси́лия и мучи́тельства вра́жия,/ вопию́щия Христý Сы́ну Твоемý:/ благослови́те, вся дела́ Госпóдня, Гóспода.

Песнь 9

Ирмос: Безнача́льна Роди́теля Сын, Бог и Госпóдь,/ вопло́щься от Де́вы, нам яви́ся,/ омраче́нная просвети́ти, собра́ти расточе́нная.// Тем Всепе́тую Богорóдицу велича́ем.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

Выспрь к Бóгу имýще мысль, Зоси́мо, Савва́тие и Ге́рмане преподóбнии,/ земна́я оста́вльше, Небе́сная восприя́сте, Бóгу и Спа́су вас вельми́ просла́вльшу,/ трудóв ра́ди ва́ших и воздержа́ния неосла́бнаго./ Сегó ра́ди почита́ем вас, преблаже́ннии.

Припе́в: Преподóбнии отцы́ на́ши Зоси́мо, Савва́тие и Ге́рмане, моли́те Бóга о нас.

И́хже благ, преподóбнии, получи́сте/ и Небе́сныя сла́вы, ея́же от Бóга сподóбистеся,/ и Емýже вы́ну предстоя́ще, моли́теся и нам неотлуче́нным бы́ти, мóлим вы,/ ра́достию и боже́ственною любóвию почита́ющим пóдвиги ва́ша, всечестни́и.

Слава: О боже́ственнии и богомýдрии отцы́ Зоси́мо, Савва́тие и Ге́рмане!/ Ми́рови мир от Бóга низпосла́тися испроси́те,/ Це́рквам соедине́ние, святе́й оби́тели ва́шей утвержде́ние/ и всем правосла́вным христиа́ном предста́тельство и спасе́ние, преблаже́ннии.

И ныне: Пощади́ мя, Христе́ Спа́се,/ пощади́ моли́твами Рóждшия Тя, и всех святы́х Твои́х,/ егда́ ся́деши суди́ти делóм мои́м,/ беззакóния и грехи́ моя́ пре́зри, я́ко Еди́н безгре́шен./ Мир же пода́ждь и спасе́ние воспева́ющим Тя,/ Ми́лостиве Бóже и Человеколю́бче.

Свети́лен преподóбным:

Мирска́го пристра́стия, я́ко скве́рны уклони́вшеся/ и а́лчбою плоть умертви́вше, блаже́ннии,/ Небе́сною сла́вою со А́нгелы обогати́стеся,/ те́мже непреста́нно о нас моли́те Христа́ Бóга,/ преподóбнии отцы́ на́ши Зоси́мо, Савва́тие и Ге́рмане.

Моли́тва, что́мая в Солове́цтей оби́тели

O преподо́бнии и богоно́снии отцы́ на́ши Зоси́мо, Савва́тие и Ге́рмане, земни́и а́нгели и Небе́снии челове́цы, бли́жнии дру́зи Христо́вы и уго́дницы Бо́жии, оби́тели ва́шея сла́во и украше́ние, сея́ же се́верныя страны́, па́че и всего́ правосла́внаго Оте́чества на́шего необори́мая стено́ и вели́кое заступле́ние! Се мы, недосто́йнии и многогре́шнии, с благогове́йною любо́вию ко святы́м моще́м ва́шим припа́дающе, ду́хом сокруше́нным и смире́нным се́рдцем приле́жно вопие́м: моли́те непреста́нно благосе́рдаго Влады́ку и Го́спода на́шего Иису́са Христа́, я́ко дерзнове́ние ве́лие к Тому́ иму́щии, да не отсту́пит от нас Его́ вседе́йствующая благода́ть, покро́в же и заступле́ние Пресвяты́я Влады́чицы на́шея Богоро́дицы на ме́сте сем да пребу́дет, и да не оскуде́ют никогда́же и́стиннии ревни́тели а́нгельскаго жития́ во святе́й оби́тели сей, иде́же вы, богоно́снии отцы́ и нача́льницы, безме́рными труды́ и поще́нии, то́ки же сле́зными и всено́щными бде́нии, непреста́нными моли́твами и моле́нии нача́ло и́ноческому житию́ положи́сте. Ей, уго́дницы святи́и, моли́твенницы к Бо́гу благоприя́тнейшии, те́плыми ва́шими к Нему́ мольба́ми огради́те и сохрани́те ны и свято́е селе́ние сие́ ва́ше от тру́са, пото́па, огня́ и меча́, наше́ствия иноплеме́нных и смертоно́сныя я́звы, от вражды́ и нестрое́ний, от бед и скорбе́й и от вся́каго зла, да непреста́нно на ме́сте сем, в ми́ре и безмо́лвии, благоче́стно сла́вится пресвято́е и́мя Го́спода и Бо́га, и обрета́ют ве́чное спасе́ние и́щущии Его́. O преблаже́ннии отцы́ на́ши Зоси́мо, Савва́тие и Ге́рмане! Услы́шите ны гре́шныя, во святе́й оби́тели ва́шей и под кро́вом ва́шего защище́ния недосто́йно жи́тельствующия, и благомо́щными ва́шими к Бо́гу хода́тайствы испроси́те душа́м на́шим грехо́в оставле́ние, жития́ исправле́ние и ве́чных благ восприя́тие в Небе́снем Ца́рствии; всем же ве́рующим, и́же на вся́ком ме́сте и во вся́кой ну́жде призыва́ют вас в по́мощь и заступле́ние, и и́же с благогове́йною любо́вию во оби́тель ва́шу притека́ют, не преста́ните излива́ти вся́кую благода́ть и ми́лость, сохраня́юще их от вся́кия сопроти́вныя си́лы, от вся́кия напа́сти и от вся́каго зла́го обстоя́ния, и подаю́ще им вся потре́бная к душе́вней и теле́сней по́льзе. Наипа́че же моли́те Премилосе́рдаго Бо́га, да огради́т Це́рковь Свою́ Святу́ю от всех враго́в ви́димых и неви́димых, Оте́чество на́ше да сохрани́т в ми́ре и тишине́, правове́рии и благоче́стии, и всем нам да́рует любо́вь и единомы́слие, да просла́вим Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

И́на моли́тва

O преподо́бнии отцы́, вели́цыи засту́пницы в ско́рби и услы́шателие моли́тв, уго́дницы Бо́жии и чудотво́рцы Зоси́мо, Савва́тие и Ге́рмане! Не забу́дите, я́коже обеща́стеся, посеща́ти ча́да ва́ша. А́ще бо и отыдо́сте от нас те́лом, но ду́хом при́сно с на́ми пребыва́ете. Мо́лим у́бо вы, o преподо́бнии: изба́вите ны от огня́, от наше́ствия иноплеме́нников и междоусо́бныя бра́ни, от тлетво́рных ве́тров, и от напра́сныя сме́рти, и от всех прило́гов бесо́вских, находя́щих на ны. Услы́шите нас гре́шных, и приими́те моли́тву сию́ и моле́ние на́ше, я́ко кади́ло благово́нное, я́ко же́ртву благоуго́дну, и ду́ши на́ша, злы́ми де́лы и сове́ты и по́мыслы умерщвле́нныя, оживи́те, и, я́коже уме́ршую отрокови́цу возста́висте, я́коже неисце́льныя ра́ны мно́гих исцели́сте, от духо́в нечи́стых зле му́чимых изба́висте, та́ко и нас, содержи́мых во у́зах вра́жиих, изми́те, и от сете́й диа́вола изба́вите, из глубины́ прегреше́ний изведи́те, и ми́лостивым ва́шим посеще́нием и хода́тайством от всех враго́в ви́димых и неви́димых огради́те ны, да просла́вим Всесвяту́ю Тро́ицу, Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.