21 августа.
Канон cвятителю Емилиану исповеднику, епископу Кизическому
![Святаго Емилиана исповедника, епископа Кизическаго Святаго Емилиана исповедника, епископа Кизическаго](img_i/052.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 4:
Пра́вило ве́ры и о́браз кро́тости, воздержа́ния учителя, яви тя стаду твоему Яже веще́й истина; сего ради стяжа́л еси́ смирением высо́кая, нищетою бога́тая, о́тче священнонача́льниче Емилиане, моли Христа́ Бо́га спастися душа́м на́шим.
Канон святаго, глас 1.
Пе́снь 1
Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ Изра́ильтяном пу́ть глубины́ новосоде́лавшая.
Припев: Святителю отче Емилиане, моли Бога о нас.
С преми́рными живы́й чинонача́льствы, Богому́дре блаже́нне,/ творя́щия твое́ ра́достно любе́зное торжество́, о́тче,/ назира́я, спасе́ния сподо́би.
Припев: Святителю отче Емилиане, моли Бога о нас.
Ве́сь Влады́це спримеси́вся и отону́дными облиста́вся огнесия́ньми,/ все просвети́л еси́ твои́ми уче́ньми благочести́выми торжество́,/ я́ко священноявле́н я́влься, Богому́дре Богоприя́тне.
Припев: Святителю отче Емилиане, моли Бога о нас.
Ум влады́ку страсте́м доброде́телию, святи́телю, поста́вил еси́,/ я́коже пра́веден строи́тель души́ и те́ла, о́тче,/ подая́ кому́ждо потре́бная.
Сла́ва Отцу́ и Сы́ну и Свято́му Ду́ху:
Таи́нник изря́ден су́щих па́че ума́, Це́ркви я́ве предстоя́, яви́лся еси́, пресла́вне,/ и держа́вен и́стины побо́рник, че́люсти льво́в сокруша́я/ и загражда́я уста́.
И ны́не и при́сно и во ве́ки веко́в. Ами́нь.
Богоро́дичен: Еди́наго во двою́ благоче́стно от утро́бы Твое́й рожде́нна ве́мы естества́х, Пренепоро́чная,/ Бо́га вку́пе па́че естества́ и Челове́ка,/ иму́ща соверше́нна коего́ждо сво́йства.
Пе́снь 3
Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жся,/препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме неизрече́нный сла́вы Твоея́, Человеколю́бче.
Припев: Святителю отче Емилиане, моли Бога о нас.
Моли́твенника Богому́дра Христу́, ве́рнии, тя предлага́ем,/ того́ ра́ди све́тло до́бльствовавша, и о́браз сего́ поче́тша,/ и зако́н соблюда́ла честна́го пропове́дания,/ и ю́же свы́ше ве́ру сохрани́т.
Припев: Святителю отче Емилиане, моли Бога о нас.
Му́чеников утвержде́ние яви́лся еси́, Богому́дре досточу́дне,/ злочести́вое шата́ние низложи́л еси́, Це́ркве я́влься забра́ло незы́блемо и неукло́нно/ и хода́тай Боже́ствен, тве́рдо облича́я безу́мныя.
Сла́ва Отцу́ и Сы́ну и Свято́му Ду́ху:
Я́да е́реси испи́в до сы́тости, вселука́вый учи́тельным твои́м сло́вом обличи́ся:/ све́том бо тьма́ отгоня́ется и обнажа́ется плете́ние лука́ваго сове́та/ Боже́ственный му́дрости сия́ньми.
И ны́не и при́сно и во ве́ки веко́в. Ами́нь.
Богоро́дичен: Све́тлым Тя гла́сом ны́не от души́ вои́стинну Богома́терь, Бо́га ро́ждшую, пропове́даем,/ воплоще́нна из Тебе́ Безпло́тнаго, в нас все́льшася,/ не преложе́нне прие́мша, ни смеше́нием сме́шшася, Всенепоро́чная.
Седа́лен, глас 3.
Боже́ственным Ду́хом просвеще́н,/ пропове́дал еси́ со дерзнове́нием правосла́вия, всеблаже́нне, преда́ния/ и царя́ посрами́л еси́ беззако́ннаго, в заточе́ния непра́ведно отсыла́емь./ О́тче преподо́бне, Христа́ Бо́га моли́ дарова́ти нам ве́лию ми́лость.
Пе́снь 4
Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Припев: Святителю отче Емилиане, моли Бога о нас.
Возмо́гл еси́ шата́ние низложи́ти льсти́ваго,/ присво́ився доброде́телию, всеблаже́нне Емилиа́не,/ Всемогу́щему и Си́льному во бране́х, пребога́те, и ны́не зове́ши:/ сла́ва си́ле Твое́й, Го́споди.
Припев: Святителю отче Емилиане, моли Бога о нас.
Приима́л еси́ го́рькая заточе́ния, отсыла́емь,/ терпели́в показа́лся еси́, Богому́дре Емилиа́не, сло́вом благода́ти огра́ждся,/ священнотаи́нниче чу́дне, Бо́гу взыва́я:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху:
Зако́нно яви́лся еси́, из де́тства освяще́н,/ по́стными просвети́вся, всеблаже́нне Емилиа́не, пе́рвыми обуче́ньми,/ и архиере́й, священному́чениче, по́слежде показа́лся еси́, Богоно́се преизря́дне.
И ны́не и при́сно и во ве́ки веко́в. Ами́нь.
Богоро́дичен: И́же вся́кия вы́ше разумева́емый тва́ри,/ е́же па́че ума́ живонача́льна богозда́ния на земли́ соверша́я та́инство,/ де́вства укра́шену све́тлостьми, во Твою́ утро́бу всели́ся, Пречи́стая.
Пе́снь 5
Ирмос: Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам;/ тем, Богоразу́мия к Све́ту наста́вльшеся,/ от но́щи у́тренююще,/ славосло́вим Тя, Человеколю́бче.
Припев: Святителю отче Емилиане, моли Бога о нас.
Разуме́в проразуме́нием Боже́ственным Христо́с вели́кия твое́й души́ предложе́ние,/ вели́кими почестьми́ украси́ я́ве, оде́ждами свяще́нства тя уясни́в/ и му́ченическими страда́ньми, священнотаи́нниче всече́стне.
Припев: Святителю отче Емилиане, моли Бога о нас.
Привле́к благода́ть Ду́ха, ре́ки уче́ний поче́рпл еси́,/ всеблаже́нне освяще́нне, ста́да Христо́ва,/ Те́мже, тобо́ю о́браз его́ почита́ти навы́кше и святы́х всех,/ богобо́рца посрамля́ем.
Сла́ва Отцу́ и Сы́ну и Свято́му Ду́ху:
Умертви́в пло́ти твое́й мудрова́ние в по́стных боле́знех, пребога́те,/ заре́ю Ду́ха оживи́л еси́ ум./ Те́мже во обои́х просия́л еси́, иера́рше,/ Бо́гу благоугоди́в, священному́чениче досточу́дне.
И ны́не и при́сно и во ве́ки веко́в. Ами́нь.
Богоро́дичен: Святы́х Свята́я, Де́во Чи́стая, Святы́х Свята́го родила́ еси́,/ всех освяща́ющаго Христа́ Изба́вителя./ Те́мже Тя, Цари́цу и Влады́чицу всех,/ я́ко Ма́терь Зижди́теля тва́ри пропове́дуем.
Пе́снь 6
Ирмос: Из утро́бы Ио́ну младе́нца изблева́ морски́й зве́рь,/ якова́ прия́т;/ в Де́ву же все́льшееся Сло́во/ и пло́ть прие́мшее про́йде, сохра́ньшее нетле́нну./ Его́же бо не пострада́ нетле́ния,/ ро́ждшую сохрани́ неврежде́нну.
Припев: Святителю отче Емилиане, моли Бога о нас.
Уста́вити восхоте́в па́жить е́реси, усе́рдно к беда́м отлучи́лся еси́/ и обличи́л еси́ со дерзнове́нием, всеблаже́нне, нрав держа́щаго безбо́жия,/ ты пе́рвее глаго́лати наче́н собра́нному собо́ру богому́дрому.
Припев: Святителю отче Емилиане, моли Бога о нас.
Еди́наго Христа́ те́пле любя́ и сего́ улучи́ти Боже́ственнаго сия́ния жела́я,/ иера́рше Госпо́день Богоприя́тне, му́ченическу показа́л еси́, о́тче, тве́рдость,/ просия́в пе́рвее поще́нием, и сугу́бы венцы́ прия́л еси́ я́ве.
Сла́ва Отцу́ и Сы́ну и Свято́му Ду́ху:
Горе́ твой ум Бо́гу близ/ и Боже́ственными заря́ми, блаже́нне, сия́ющ, име́л еси́, преподо́бне,/ легко́ жития́ преплы́л еси́ мо́ре и ко приста́нищем Небе́сным ны́не устреми́лся еси́,/ ве́тры Свята́го Ду́ха направля́емь, Богодухнове́нне.
И ны́не и при́сно и во ве́ки веко́в. Ами́нь.
Богоро́дичен: Спасти́ челове́ческое естество́, я́ко Милосе́рд,/ истле́вшее лю́те за́вистию змии́ною, Пребоже́ственный благоизво́лив,/ во чре́во твое́ всели́ся, и пло́ть неизме́нна бы́сть,/ еди́ну Тя, Чи́стую, обре́т, Богоро́дице Де́во Пречи́стая.
Конда́к свята́го, глас 3:
До́бляго тя побо́рника по Трои́це я́вльшеся/ Це́рковь сла́вит, пою́щи, Емилиа́не,/ за ню́же пострада́л еси́./ сего́ ра́ди почита́ем па́мять твою́,/ язы́ческаго наше́ствия изба́ви рабы́ твоя́.
Пе́снь 7
Ирмос: Тебе́, у́мную, Богоро́дице, пе́щь/разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве твое́м всеце́л,/ хва́льный отце́в Бог и препросла́влен.
Припев: Святителю отче Емилиане, моли Бога о нас.
Святи́телей благоле́пное украше́ние, о́тче, ты еси́ вои́стинну:/ Ца́рствовав бо над страстьми́, столп неруши́м яви́лся еси́, досточу́дне, Це́ркви забра́ло,/ хва́льнаго велича́я Бо́га, препросла́вленнаго.
Припев: Святителю отче Емилиане, моли Бога о нас.
Но́вый Дави́д нам показа́лся еси́, иноплеме́нная уче́ния пра́щею низложи́в/ добролу́чных твои́х слове́с, пресла́вне, и учи́тельными стреля́ньми,/ хва́льнаго имену́я Бо́га, препросла́вленнаго.
Сла́ва Отцу́ и Сы́ну и Свято́му Ду́ху:
Стал еси́ све́тло, о́тче, на суди́щи мучи́теля Христа́ ра́ди/ и словеса́, я́ко от исто́чника Боже́ственна, источи́л еси́,/ всем бо пропове́дал еси́ ико́нное поклоне́ние,/ я́ве ве́дый преходи́ти то к первообра́зному.
И ны́не и при́сно и во ве́ки веко́в. Ами́нь.
Богоро́дичен: Странноле́пно де́вствуеши, ро́ждши всех Творца́,/ на престо́ле Херуви́мстем почива́ющаго,/ еди́на Всеблаже́нная, Де́во Ма́ти Всепе́тая,/ хва́льнаго отце́в Бо́га и препросла́вленнаго.
Пе́снь 8
Ирмос: Чу́да преесте́ственнаго/ росода́тельная изобрази́ пе́щь о́браз:/ не бо, я́же прия́т, пали́т ю́ныя,/ я́ко ниже́ о́гнь Божества́ Де́вы,/ в то́же вни́де утро́бу./ Тем, воспева́юще, воспое́м:/ да благослови́т тва́рь вся Го́спода/ и превозно́сит во вся ве́ки.
Припев: Святителю отче Емилиане, моли Бога о нас.
Всю огне́м мы́сленным хвра́стную е́реси попали́л еси́ пе́щь, призыва́нием Боже́ственным,/ я́коже Илия́, и иере́и сту́дныя закла́л еси́ мече́м духо́вным./ И ны́не воспева́еши, веселя́ся:/ да благослови́т тва́рь вся Го́спода и превозно́сит во вся ве́ки.
Припев: Святителю отче Емилиане, моли Бога о нас.
Благода́ти же и си́лы Боже́ственныя испо́лнен яви́лся еси́, треблаже́нне,/ целому́дрия добро́тою укра́шен боголе́пно, благоче́стие непрело́жное держа́л еси́./ С ни́мже ны́не Влады́це предстоя́,/ да благослови́т тва́рь, вопие́ши, Го́спода и превозно́сит во вся ве́ки.
Сла́ва Отцу́ и Сы́ну и Свято́му Ду́ху:
Свы́ше певцы́ твоя́ назира́еши, свяще́нный о́тче Богому́дре,/ показу́я стезю́ нам пра́вую твои́ми моли́твами и сокруша́я ересе́й шата́ния,/ да со дерзнове́нием пое́м, ико́ну Христо́ву почита́юще, и поклони́мся,/ и Богоро́дицы, и святы́х всех.
И ны́не и при́сно и во ве́ки веко́в. Ами́нь.
Богоро́дичен: Поро́ка не́сть в добро́те Твое́й, Де́во:/ Ты бо, еди́на Пречи́стая, яви́лася еси́ от ве́ка Всечи́стая,/ де́вства луча́ми озари́вши мир и чистоты́ све́том./ Те́мже, воспева́юще, пое́м:/ да благослови́т тва́рь вся Го́спода и превозно́сит во вся ве́ки.
Пе́снь 9
Ирмос: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти моли́ся пе́щь,/да Тя, Богоро́дице,/ непреста́нно велича́ем.
Припев: Святителю отче Емилиане, моли Бога о нас.
Обре́л еси́ боле́зней возме́здие, в Небе́сных, Богоно́се, се́лех, Емилиа́не,/ ны́не жи́ти сподо́блен му́ченик с Боже́ственными во́инствы,/ я́ко Боже́ственный святи́тель, священному́чениче пречу́дне.
Припев: Святителю отче Емилиане, моли Бога о нас.
Сло́вом и му́дростию изря́дне укра́шен яви́лся еси́ повеле́ньми, Емилиа́не,/ Те́мже Христо́с венча́ честну́ю твою́ главу́, пребога́те,/ Его́же ны́не моли́ о нас при́сно, моли́ся.
Сла́ва Отцу́ и Сы́ну и Свято́му Ду́ху:
Врата́ Небе́сная, преподо́бне, отве́рз, Влады́ка прия́т, Емилиа́не, твою́ ду́шу,/ на ме́стех прохла́дных упоко́ив, я́ко пра́ведника,/ и ны́не обхо́диши о́крест Престо́ла всех Цари́.
И ны́не и при́сно и во ве́ки веко́в. Ами́нь.
Богоро́дичен: О, па́че ума́ чуде́с Твои́х, Богороди́тельнице,/ еди́на Всечи́стая Влады́чице!/ Вся бо ужаса́ет А́нгельская во́инства и челове́ков разли́чныя собо́ры./ Тем Тя, Богоро́дице, непреста́нно велича́ем.
Молитва
О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Емилиа́не, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святаго Емилиана исповедника, епископа Кизическаго Святаго Емилиана исповедника, епископа Кизическаго](img_b/052.jpg)