Канон преподобному Пимену Многоболезненному, в Ближних пещерах почивающему

Тропарь, глас 5:

Богоно́снаго Анто́ния смиренному́дрием подража́я,/ терпе́нием И́ову подо́бяся,/ не исцеле́ния от боле́зни, но па́че протяже́ния тоя́/ жела́л еси́ себе́, терпеливоду́шне Пи́мене,/ да не ка́ко, здрав быв/ и от ме́ста сего́ роди́тельми исто́ржен,/ сожи́тия преподо́бных и чи́на их лиши́шися,/ тем па́че наде́жды от сами́х А́нгел постри́жен был еси́,/ с ни́миже моли́ Христа́ Бо́га/ спасти́ся душа́м на́шим.

Канон преподобнаго, глас 2.

Песнь 1

Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь, сла́вно бо просла́вися.

Припев: Преподобне отче Пимене, моли Бога о нас.

Глубино́ю недоуме́ния содержи́м, молю́ Тя, Прему́дрости глубино́, Иису́се:/ возведи́ ум мой и подви́гни язы́к/ восхвали́ти уго́дника Твоего́, Пи́мена, вели́кое терпе́ние.

Припев: Преподобне отче Пимене, моли Бога о нас.

Во глубине́ безстра́стия стра́сти, преподо́бне, потопи́в,/ преше́л еси́ мо́ре ми́ра немо́крыми нога́ми,/ я́ко ни ум твой тиме́нию грехо́вному не при́косну́ся,/ от него́же и мене́ сохрани́ моли́твами твои́ми.

Сла́ва Отцу́ и Сы́ну и Свято́му Ду́ху:

Во глубине́ слез твои́х потопи́л еси́ мы́сленнаго фарао́на,/ ны́не же в приста́нищи Небе́снем пое́ши песнь побе́дную,/ иде́же и о мне, преподо́бне, моли́ся.

И ны́не и при́сно и во ве́ки веко́в. Ами́нь.

Богоро́дичен: Во глубиие́ зол потопля́ему ми, Влады́чице,/ пода́ждь ру́ку помощи, я́коже Сын Твой Петро́ви,/ и приведи́ к приста́нищу спасе́ния.

Песнь 3

Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Припев: Преподобне отче Пимене, моли Бога о нас.

Процвела́ есть оби́тель Пече́рская преподо́бными отцы́,/ я́коже вертогра́д благово́нными кри́ны,/ посреде́ же их и ты, преподо́бне, в житии́ святы́нею,/ по преставле́нии же нетле́нием кра́сно процве́л еси́.

Припев: Преподобне отче Пимене, моли Бога о нас.

Процве́л еси́ богоуго́дным твои́м житие́м, я́коже цвет по́льный, преподо́бне,/ ны́не же святы́я твоя́ мо́щи в пеще́ре издаю́т благоуха́ние, я́ко крин удо́льный,/ и источа́ют благода́ть с ве́рою притека́ющим.

Сла́ва Отцу́ и Сы́ну и Свято́му Ду́ху:

Крин в те́рнии, Пи́мен в терпе́нии боле́зней процвете́ чи́стотою,/ и́же, в ра́йския пресажде́н вертогра́ды,/ облагоуха́ет нас ны́не моли́твами свои́ми.

И ны́не и при́сно и во ве́ки веко́в. Ами́нь.

Богоро́дичен: Цве́те благовонный, Пречи́стая Де́во,/ отжени́ смрад греха́ моего́/ и яви́ мя благоуха́ние Христо́во моли́твами Твои́ми.

Седа́лен, глас 2:

Сильне́е бе моли́тва твоя́, свя́те, к Бо́гу,/ егда́ отцы́ Пече́рстии о исцеле́нии твое́м моля́хуся,/ ты же приложе́ния боле́зней себе́ у Го́спода проси́л еси́/ и преодоле́вшие моле́ние твое́ еди́наго всех мольбы./ Ве́руем у́бо, я́ко и ны́не мно́го мо́гут святы́я твоя́ моли́твы.

Сла́ва, и ны́не, Богоро́дичен:

Мно́го может моли́тва Ма́терняя на умоле́ние Влады́ки,/ моли́ у́бо его́ о нас, Де́во Ма́ти, и печа́ль нашу возвести́ Ему́,/ да, послу́шав Тя, ми́лостив нам бу́дет/ и, печа́ль в ра́дость претвори́в, пода́ст живо́т ве́чный.

Песнь 4

Ирмос: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое твое́ снизхожде́ние, е́же на мя,/ прославля́ю, Многоми́лостиве.

Припев: Преподобне отче Пимене, моли Бога о нас.

Пе́ти и сла́вити Бо́га досто́йно пода́ждь нам, о́тче преподо́бне, моли́твами твои́ми,/ да всегда́ ублажа́ем тя.

Припев: Преподобне отче Пимене, моли Бога о нас.

Пе́ния а́нгельская в полу́нощи слы́шаша близ су́щии отцы́,/ егда́ в ри́зу тя спасе́ния облека́ху./ И нас у́бо а́нгельских пе́ний наслажда́тися сподо́би хода́тайством твои́м, блаже́нне.

Сла́ва Отцу́ и Сы́ну и Свято́му Ду́ху:

Пою́ Тебе́, о́тче, усе́рдно,/ ублажа́ю преподо́бие твое́,/ велича́ю незло́бие и кро́тость твою́,/ хвалю́ терпе́ние, удивля́юся нетле́нию твоему́/ и покланя́юся целе́бным моще́м твои́м.

И ны́не и при́сно и во ве́ки веко́в. Ами́нь.

Богоро́дичен: Певцы́ Твоя́ спаси́, о Всепе́тая Ма́ти, пла́ча ве́чнаго избавля́ющи,/ ми́лостию твое́ю отри́ вся́ку слезу́ от о́чию мое́ю/ и ра́дости ве́чныя сподо́би.

Песнь 5

Ирмос: Хода́тай Бо́гу и челове́ком был еси́, Христе́ Бо́же,/Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/приведе́ние и́мамы.

Припев: Преподобне отче Пимене, моли Бога о нас.

Хода́тайством твои́м, свя́те, от вся́каго наве́та вра́жия соблюда́й оби́тель,/ в не́йже сам богоуго́дне пожи́л еси́,/ и и́ночествующим помо́щник бу́ди,/ на твоя́ бо моли́твы упова́ем.

Припев: Преподобне отче Пимене, моли Бога о нас.

Хода́тай бу́ди мне к Пра́ведному Судии́, блаже́нне:/ есмъ бо неради́в, я́коже оный схи́мник,/ его́же бра́тии при кончи́не свое́й показа́л еси́,/ и́же о́браз вели́к име́яше, де́ла же ни ма́ла./ Сего́ ра́ди схи́ма его́ нетле́нна на обличе́ние и осужде́ние ему́ блюде́тся.

Сла́ва Отцу́ и Сы́ну и Свято́му Ду́ху:

Хода́тайствуй ми спасе́ние отча́янному, блаже́нне,/ наста́ви на покая́ние гре́шнаго, преподо́бне,/ пода́ждь исправле́ние развраще́нному, о́тче,/ да не постыжду́ся, наде́яся на твоя́ моли́твы.

И ны́не и при́сно и во ве́ки веко́в. Ами́нь.

Богоро́дичен: Хода́таице ко Творцу́, Пречи́стая Де́во,/ всего́ мя, грехми́ оскверне́ннаго, очи́сти моли́твами Твои́ми,/ на Тя бо все упова́ние мое́ возлага́я, не постыжду́ся во век.

Песнь 6

Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Припев: Преподобне отче Пимене, моли Бога о нас.

В бе́здне злых весь мир лежи́т,/ сего́ ра́ди отве́рглся еси́ его́, да Благо́му благоугожда́еши Бо́гу;/ Ему́же благоугоди́ти и мене́ сподо́би, уго́дниче Бо́жий.

Припев: Преподобне отче Пимене, моли Бога о нас.

В бе́здне боле́зней тя́жких лежа́,/ мно́гажды от служа́щих небрего́мый и оставля́емый быв,/ Бо́га то́чию посеща́ющего тя име́л еси́;/ не оста́ви нас, о́тче, присеще́нием моли́тв твои́х,/ я́ко вы́ну боле́знуем.

Сла́ва Отцу́ и Сы́ну и Свято́му Ду́ху:

В бе́здну а́дскую мно́жества ра́ди грехо́в мои́х да не осужде́н бу́ду,/ ты, о́тче, Пра́ведному Судии́ предста́ни и умоли́ его́,/ да изба́вит мя пра́веднаго суда́ Своего́.

И ны́не и при́сно и во ве́ки веко́в. Ами́нь.

Богоро́дичен: Я́ко бе́здну ми́лости ро́ждшая,/ от бе́здны безме́рных беззако́ний мои́х исхи́ти мя,/ милосе́рдия Ма́ти, молю́ся Ти.

Конда́к, глас 6:

Долговре́менную боле́знь благода́рне претерпе́вшаго,/ прииди́те, соше́дшеся, восхва́лим Пи́мена многотерпели́ваго,/ и́же бо иногда́ за смрад в боле́зни бе гнуша́емь,/ сей ны́не благоуха́ние испуща́ет/ с ве́рою к ра́це моще́й его́ приходя́щим/ и прого́нит злосмра́дие страсте́й от вопию́щих:/ прииди́, Пи́мене́, к нам, и ничто́же успе́ет враг на ны́.

И́кос:

Вси, и́же разли́чными боле́зньми и страстьми́ одержи́мии,/ соше́дшеся к многоболе́зненному Пи́мену, почуди́теся терпе́нию его́:/ той бо, мно́гажды гла́ден и жа́жден пребы́в,/ не поскорбе́ на служа́щих ему́,/ но с ра́достию вся терпя́ше, благодаря́ Бо́га;/ два́десятъ же лет в страда́нии свое́м препроводи́в,/ я́ко зла́то в Горни́ле искуси́ся, и обре́теся досто́ин Бо́гови,/ и прия́т от Него́ дар цели́ти неду́ги и прогоня́ти стра́сти от притека́ющих к нему́ с ве́рою./ К тому́ у́бо и мы притеце́м и того́ призове́м, вопию́ще:/ прииди́, Пи́мене́, к нам, и ничто́же успе́ет враг на ны.

Песнь 7

Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Припев: Преподобне отче Пимене, моли Бога о нас.

Богопроти́внаго ми́ра возненави́дел еси́, о́тче, ве́дый Глаго́лющаго:/ хотяй бы́ти ми́ру друг, враг Бо́жий быва́ет./ Пода́ждь у́бо и нам бе́гати ми́ра и всех его́ по́хотей.

Припев: Преподобне отче Пимене, моли Бога о нас.

Богопроти́вный зако́н зла́то моего́ обы́чая ну́ждею влече́т мя на дела́ зла́я,/ и не е́же хощу́, сие́ творю, но е́же не хощу́, сие́ содева́ю./ Ты у́бо, преподо́бне, моли́твами твои́ми от того́ мя зла свободи́.

Сла́ва Отцу́ и Сы́ну и Свято́му Ду́ху:

Богопроти́вное веле́ние ца́рствующаго греха́ во удесе́х мои́х/ принужда́ет мя ча́сто прогне́вати Бо́га,/ к Тебе́ прибегаю, о́тче, от ну́ждных мя грехо́в изба́ви.

И ны́не и при́сно и во ве́ки веко́в. Ами́нь.

Богоро́дичен: Бо́га ро́ждшая, Де́во,/ даждь нам испо́лнити повеле́ния Сы́на Твоего́,/ и да ни в чем же проти́вни Ему́ обря́щемся по́мощию твое́ю.

Песнь 8

Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Припев: Преподобне отче Пимене, моли Бога о нас.

Пещь страсте́й да угаси́ши, о́тче,/ умноже́ния боле́зней от Бо́га проси́л еси́,/ в ни́хже прохла́да Тебе́ бысть, о́тче, чистота́ душе́вная и теле́сная,/ ю́же и нам храни́ти моли́твами твои́ми даждь,/ да с тобо́ю Пречи́стому Бо́гу пое́м:/ благослови́те, вся дела́ Госпо́дня, Го́спода.

Припев: Преподобне отче Пимене, моли Бога о нас.

Пещь многоле́тных боле́зней а́ще опаля́ше ти те́ло,/ но святы́я души́ твое́я ничи́мже вреди́ти можа́ше:/ во все́х бо сих приклю́чшихся не согреши́л еси́,/ но посреде́ искуше́ний, а́ки посреде́ пла́мене, неопали́м пребыва́я, со о́троки воспева́л еси́:/ благослови́те, вся дела́ Госпо́дня, Го́пода.

Сла́ва Отцу́ и Сы́ну и Свято́му Ду́ху:

А́ки в пещи́, в пло́ти мое́й возжего́х огнь по́хотей/ и умно́жих нечистоты́ пла́мень невоздержа́нием мои́м;/ Ты, огнь пояда́яй, Бо́же,/ прохлади́ пла́мень, угаси́ огнь и ороси́ пещь страсте́й мои́х моли́твами уго́дника Твоего́, Пи́мена,/ да с ним Тебе́, в Тро́ице сла́вимому Бо́гу, пою́:/ благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Пещь иногда́ о́гненная, о́троко́в неопали́вшая,/ прообрази́ рождество́ твое́, Пречи́стая:/ Огнь бо заче́нши Боже́ственный, пребыла́ еси́ неопали́ма,/ и аз у́бо молю́ Тя, о Влады́чице,/ неопали́ма мя соблюди́ от огня́ сопроти́внаго, да, ра́дуяся, пою́ Ти:/ вся дела́ Госпо́дня, Госпожу́ Богоро́дицу по́йте/ и превозноси́те, прославля́юще пресвято́е и́мя Ея́ во ве́ки.

Песнь 9

Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Припев: Преподобне отче Пимене, моли Бога о нас.

Безнача́льне Роди́телю, приво́дим Ти в моли́тву уго́дника Твоего́ Пи́мена,/ и́же от нача́ла и́ночества своего́ все́ю душе́ю возлюби́ Тя/ и все́ю кре́постию порабо́та Тебе́;/ при́зри на его́ по́двиги, и тех ра́ди послу́шай о нас его́ моле́ния,/ и благи́й коне́ц да́руй нам.

Припев: Преподобне отче Пимене, моли Бога о нас.

Собезнача́льный Отцу́ и Ду́ху, Сы́не,/ представля́ем Ти в моли́тву блага́го и ве́рнаго раба́ Твоего́ Пи́мена;/ при́зри на его́ многоле́тныя и тя́жкия боле́зни,/ и тех ра́ди послу́шай о нас его́ моле́ния, и ми́лостив нам бу́ди.

Сла́ва Отцу́ и Сы́ну и Свято́му Ду́ху:

Соприсносу́щный Отцу́ и Сы́ну, Ду́ше Святы́й,/ предлага́ем Ти усе́рдныя моли́твы Пи́мена блаже́ннаго,/ того́ послу́шай и нас, его́ ра́ди, поми́луй.

И ны́не и при́сно и во ве́ки веко́в. Ами́нь.

Богоро́дичен: Ма́ти Бо́жия,/ с блаже́нным Пи́меном и со все́ми преподо́бными отцы́ Пече́рскими, Бо́гу угоди́вшими,/ моли́ Пресвяту́ю и Неразде́льную Тро́ицу поми́ловати рабы́ Своя́,/ Тя при́сно сла́вящия.

Свети́лен:

Черто́г Спа́сов отве́рст Тебе́, преподо́бне Пи́мене,/ и́маши бо бра́чну а́нгельскаго о́браза от А́нгел на тя возложе́нную оде́жду,/ в не́йже вшед на брак А́гнчий,/ не забу́ди нас, тя почита́ющих.

Молитва

О свяще́нная главо́, преподо́бне о́тче, преблаже́нне а́вво Пи́мене, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.