Канон преподобному Антонию Оптинскому

Тропа́рь, глас 1:

Украси́лся еси́, о́тче Анто́ние, смире́нием,/ благода́тию же о́чи душе́внеи просвети́л еси́,/ разсужде́ние, я́ко верх доброде́тели, стяжа́л еси́/ и послуша́нием Бо́гу угоди́л еси́,/ сего́ ра́ди со умиле́нием зове́м ти:/ сла́ва Да́вшему ти кре́пость,/ сла́ва Просла́вльшему тя,// сла́ва Подаю́щему тобо́ю нам исцеле́ния.

Кано́н свята́го, глас 8.

Песнь 1

Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припев: Преподобне отче Антоние, моли Бога о нас!

Мы́сленнаго фарао́на послуша́нием во́ли Бо́жией потопи́в, преше́л еси́ от сме́рти в живо́т ве́чный и, побе́дный вене́ц от Го́спода прие́м, Небе́сных оби́телей дости́гл еси́.

Припев: Преподобне отче Антоние, моли Бога о нас!

Ри́зою молниеви́дною оде́явся, преобрази́л еси́ лик души́ своея́ в подо́бие Христо́во, и пред ученики́ свои́ми просия́л еси́ све́том нетле́нным, те́мже в Ца́рствии Све́та при́сно пребыва́еши.

Припев: Преподобне отче Антоние, моли Бога о нас!

Еле́ню жа́ждущему уподобля́яся, к исто́чнику воды́ живо́тныя припа́л еси́ и Сло́вом Бо́жиим жа́жду се́рдца твоего́ утоли́л еси́. Ны́не, свя́те Анто́ние, наслажда́ешися в Ца́рствии Небе́снем даро́в нетле́нных.

Слава: Сту́дное ру́бище ве́тхаго жития́ отри́нув, в бе́лыя ри́зы безстра́стия оде́ялся еси́, непреста́нно и́мя Бо́га на́шего прославля́я, И́мже све́тло просла́влен еси́.

И ныне: Ороси́ Тя Дух Святы́й, и зачала́ еси́ во утро́бе Бо́га, к Нему́же те́пле проле́й моли́тву Твою́, Пресла́вная Богоро́дице, да да́рует ми благода́ть и сле́зное покая́ние.

Песнь 3

Ирмос: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Припев: Преподобне отче Антоние, моли Бога о нас!

От ю́ности Го́спода взыску́я, в пусты́ню удали́лся еси́, дре́внему Анто́нию подо́бяся, те́мже и дости́гл еси́ Ца́рствия Отца́ Небе́снаго.

Припев: Преподобне отче Антоние, моли Бога о нас!

Помышле́ния се́рдца своего́ приле́жно обнови́в, я́ко незло́бивый младе́нец, любо́вию ко Христу́ прилепи́лся еси́, преподо́бне, во вся дни и но́щи хвалу́ Тому́ соверша́я.

Припев: Преподобне отче Антоние, моли Бога о нас!

Благоче́стие возлюби́в, честны́й о́тче, к Бо́гу всем се́рдцем устреми́лся еси́, стра́сти воздержа́нием, по́мыслы же испове́данием усмиря́я, к животу́ безсме́ртному преше́л еси́.

Слава: Нощь грехо́вную земна́го жития́ минова́в, Све́та Невече́рняго во дни несконча́емем дости́гл еси́, иде́же Тро́ицу Святу́ю воспева́еши непреста́нно.

И ныне: Безконе́чно согреша́юще, на ми́лость Твою́ наде́емся и мо́лим Тя: вознеси́ моли́твы Твоя́ о нас ко Го́споду, Ма́ти Пречи́стая.

Седа́лен преподо́бнаго, глас 3:

Изведи́ нас из пле́на грехо́внаго, о́тче Анто́ние прехва́льне, ты бо се́ти вра́жия нетру́дно избе́гл еси́ и зло́бу бесо́вскую невре́дно угаси́л еси́. Помози́ же ны́не нам немощны́м, я́ко до́бля игу́мена чту́щим тя.

Песнь 4

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.

Припев: Преподобне отче Антоние, моли Бога о нас!

Ру́це свои́ на ра́ло возложи́в, николи́же вспять обрати́лся еси́, преподо́бне, и в Небе́сное Ца́рство по сло́ву Бо́жию упра́влен был еси́. Помози́ и нам тебе́ после́довати.

Припев: Преподобне отче Антоние, моли Бога о нас!

Христа́ Бо́га, Его́же возлюби́л еси́ всем се́рдцем твои́м, и все́ю душе́ю, и всем разуме́нием, с Ним и ны́не пребыва́еши, боголю́бче. Испроси́ и нам моли́твою твое́ю Того́ Еди́наго люби́ти во вся дни живота́ на́шего.

Припев: Преподобне отче Антоние, моли Бога о нас!

Пле́велы грехо́вных по́мыслов исторга́я, ни́ву се́рдца своего́ неле́ностно возде́лал еси́, о́тче Анто́ние, от нея́же до́брыя кла́сы в пи́щу духо́вную ча́дом твои́м предлага́л еси́.

Слава: Любо́вию Боже́ственною уязви́вся, в по́двизех мно́зех преуспе́л еси́, свя́те, мы же, тобо́ю наставля́еми, Христа́ всем се́рдцем люби́ти навыко́хом.

И ныне: А́дскую кре́пость попра́ла еси́ Рождество́м Твои́м, я́ко родила́ еси́ Бо́га, а́довы вереи́ сокруши́вшаго, те́мже мо́лим Тя, Богоро́дице, помози́ нам от грехо́вных уз свободи́тися.

Песнь 5

Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Припев: Преподобне отче Антоние, моли Бога о нас!

Путь у́зкий избра́в, преподо́бне, воздержа́нием и посто́м те́ло свое́ утесни́л еси́, те́мже и дости́гл еси́ в широту́ Небе́сную, греху́ непристу́пную.

Припев: Преподобне отче Антоние, моли Бога о нас!

Нищету́ духо́вную возлюби́в, Ду́хом Святы́м обогати́лся еси́ и, я́ко прему́дрый купе́ц, к Небе́сному сокро́вищу всем се́рдцем прилежа́л еси́.

Припев: Преподобне отче Антоние, моли Бога о нас!

Еди́наго на потре́бу взыску́я и по подо́бию Бо́жию ду́шу свою́ устроя́я, серде́чныя чистоты́ ева́нгельски дости́гл еси́, преподо́бне, те́мже и Христа́ лицезре́ти сподо́бился еси́.

Слава: Анто́нию тезоимени́тому подража́я, нападе́ние бесо́в моли́твою отража́л еси́, богому́дре, и́же, не терпя́ще и́мене Иису́сова, я́ко та́яй воск от лица́ огня́, вспять бежа́ху.

И ныне: Я́ко ни́ва неора́нная, Богоро́дице Де́во, Клас Живота́ нетле́нно прозябла́ еси́, те́мже Тя, я́ко Пита́тельницу жи́зни на́шея, правосла́вно велича́ем.

Песнь 6

Ирмос: Моли́тву пролию́ ко Го́споду,/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся я́ко Ио́на:// от тли, Бо́же, возведи́ мя.

Припев: Преподобне отче Антоние, моли Бога о нас!

Таи́нниче Бо́жия благода́ти и те́плый наш предста́телю, услы́ши у́бо глас наш и помози́ моли́твами твои́ми, да изба́вимся от тли грехо́вныя.

Припев: Преподобне отче Антоние, моли Бога о нас!

Одоле́л еси́ в лю́тей бра́ни зми́я дре́вняго и, я́ко победи́тель, венце́м побе́дным от Го́спода венча́лся еси́. Помози́ у́бо и нам в духо́вней бра́ни устоя́ти, во́ине Христо́в прекре́пкий.

Припев: Преподобне отче Антоние, моли Бога о нас!

Ну́жду и́мамы в моли́твеннем предста́тельстве твое́м, преподо́бне о́тче, по вся дни в мы́сленней бра́ни и страсте́х пребыва́юще, окамене́нием бо грехо́вным ду́ши на́ша отяготе́ша.

Слава: Ио́не проро́ку уподо́бихомся непослуша́нием во́ли Бо́жией, те́мже и низве́рженнии, вопие́м: от тли, Бо́же, возведи́ нас моли́тв ра́ди Анто́ния досточу́днаго.

И ныне: Еле́й ми́лости проле́й, Богоро́дице, на гре́шную мою́ ду́шу, зело́ бо ура́нена от мы́сленных враго́в и грехми́ изъязвле́на есть премно́го, и спаси́ мя, раба́ Твоего́.

Конда́к, глас 7:

Преподо́бне о́тче Анто́ние,/ се́рдцем младе́нствуя, Бо́гу пел еси́,/ ра́зумом ста́рец быв,/ ю́ныя наставля́л еси́,/ ду́хом высо́к,/ пред отцы́ и бра́тиею себе́ ума́лил еси́,/ ве́рный же в ма́лом,/ ны́не вели́к в Ца́рстве Бо́жием нарече́н еси́,// я́ко ты еси́ вои́стинну О́птины похвало́.

И́кос:

Вертогра́да О́птинскаго прозябе́ние, скитонача́льниче му́дрый, не жела́л еси́ сла́вы земны́я, но нача́льство смире́нием растворя́л еси́ и, тяготы́ гре́шных во всю жизнь нося́, мно́ги ско́рби претерпе́л еси́, пра́ведне. Сего́ ра́ди помози́ и нам, прему́дрый наста́вниче, да не бежи́м трудо́в доброде́лания, но, весе́лыми нога́ми к Све́ту Невече́рнему иду́ще, Па́схи Небе́сныя дости́гнути возмо́жем и тебе́ благода́рственно воспои́м: преподо́бне Анто́ние, ты еси́ вои́стинну О́птины похвало́.

Песнь 7

Ирмос: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша пою́ще:// отце́в Бо́же, благослове́н еси́.

Припев: Преподобне отче Антоние, моли Бога о нас!

И́ноческия доброде́тели стяжа́в, огнь страсте́й моли́твами твои́ми угаси́л еси́ и, я́коже о́троцы в пещи́, не опали́вся, Бо́гу воспева́л еси́: отце́в Бо́же, благослове́н еси́.

Припев: Преподобне отче Антоние, моли Бога о нас!

Я́ко муж иску́сен во бра́нех духо́вных, враги́ безпло́тныя щито́м ве́ры отража́л еси́ и, любо́вию ко Христу́ пламене́я, моли́твенне взыва́л еси́: отце́в Бо́же, благослове́н еси́.

Слава: Из че́люстей а́да исхити́ ны гре́шныя, пла́менем страсте́й опаля́емыя, да вку́пе с тобо́ю благода́рне воспое́м: отце́в Бо́же, благослове́н еси́.

И ныне: Просвети́ о́чи се́рдца моего́, Благослове́нная Влады́чице, да узрю́ Христа́ Бо́га и Тому́ возопию́: отце́в Бо́же, благослове́н еси́.

Песнь 8

Ирмос: Богоглаго́ливии о́троцы в пещи́/ со огне́м пла́мень попира́юще, поя́ху:// благослови́те, дела́ Госпо́дня, Го́спода.

Припев: Преподобне отче Антоние, моли Бога о нас!

Огнь Боже́ственныя благода́ти озари́ клеть се́рдца твоего́, преподо́бне, о́блак же све́тел над ке́лиею твое́ю узре́вше, возопи́ша лю́дие: благослови́те, дела́ Госпо́дня, Го́спода.

Припев: Преподобне отче Антоние, моли Бога о нас!

При́сно горе́ устремля́яся, боле́знь тя́жкую превозмога́л еси́, по вся дни в моли́тве Бо́гу предстоя́ и вопия́: благослови́те, дела́ Госпо́дня, Го́спода.

Слава: О́тче Анто́ние преподо́бне, ты, многоболе́зненному Пи́мену Пече́рскому подо́бяся, со све́тлым лице́м безро́потне три́десять лет боле́знь свою́ претерпева́л еси́, Бо́га в Тро́ице прославля́я.

И ныне: Луча́ми Невеще́ственнаго Со́лнца озаря́еми, благодари́м Тя, Де́во Всепе́тая, Ты бо Со́лнце Мы́сленное, Христа́, родила́ еси́, ми́ру Еди́наго Спаси́теля.

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к.// Те́мже Пречи́стую Богоро́дицу ве́рнии велича́ем.

Припев: Преподобне отче Антоние, моли Бога о нас!

Упоко́ився вку́пе с бра́том и отце́м твои́м духо́вным, преподо́бным Моисе́ем, ны́не со Христо́м бесе́дуеши, о́тче Анто́ние, мы же утеша́емся у святы́х моще́й твои́х, от них бо прие́млем исцеле́ние.

Припев: Преподобне отче Антоние, моли Бога о нас!

Святи́теля Митрофа́на почита́телю, во еди́ном дни с ним и прославля́ешися, той бо повеле́ тебе́ труди́тися и моли́тися неле́ностно: те́мже ны́не в раи́ с ним весели́шися и от моще́й свои́х исцеле́ния нам источа́еши.

Слава: Источа́ются то́ки благода́тныя от честны́я ра́ки твоея́, о́тче Анто́ние, ты бо неду́гующих исцеля́еши и стра́сти гре́шников врачу́еши, сердца́ ве́рных любо́вию возвеселя́я.

И ныне: Превы́ше А́нгельских лико́в почте́нную, Тя, Пречи́стая, воспева́ем и, я́ко Богороди́тельницу, ублажа́ем, не отри́ни, Ма́ти, нас гре́шных, но к Ца́рствию Бо́жию путево́дствуй.

Свети́лен:

Возсия́ в се́рдце твое́м Свет Невече́рний, о́тче Анто́ние, к Нему́же еди́ному от ю́ности всем помышле́нием устремля́лся еси́, те́мже и ны́не на Небесе́х во Христе́ лику́еши.

Моли́тва

Преподо́бне и богоно́сне о́тче наш Анто́ние, О́птинская похвало́, услы́ши нас гре́шных, с ве́рою ко святы́м моще́м твои́м припа́дающих. Ты бо в житии́ твое́м, я́ко свети́льник, свет любве́ Христо́вы лю́дем ще́дро дарова́л еси́; я́ко оте́ц чадолюби́вый, вся́каго ка́ющагося с любо́вию принима́л еси́. Те́мже мо́лим тя, о́тче: я́ко име́яй моли́твенное дерзнове́ние ко Святе́й Тро́ице, испроси́ у Го́спода Оте́чество на́ше в ми́ре и благоде́нствии сохрани́ти, наро́д его́ в благоче́стии утверди́ти, па́стырей ре́вностию Бо́жиею испо́лнити, мона́шеския оби́тели соблюсти́, мона́хов стра́ху Бо́жию научи́ти и к моли́твенному де́ланию наста́вити: да вси чи́стым се́рдцем просла́вим Бо́га, в Тро́ице Еди́наго, Отца́, и Сы́на, и Свята́го Ду́ха. Ами́нь.