1 августа.

Канон праведному Стефану Высокому, Деспоту Сербскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, гла́с 8:

Яко забра́ло кре́пкое яви́лся еси́ стра́ждущему ро́ду на́шему, Стефа́не прему́дре, и после́довав ца́рственным роди́телем твои́м, оте́чество на́ше украси́л еси́ це́рквами мно́гими. В ве́ре же святе́й отцы́ на́ша наста́вил еси́, в не́йже не преста́й и на́с укрепля́ти моли́твами твои́ми у престо́ла Вы́шняго.

Кано́н свята́го, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Блаже́нне о́тче Стефа́не, моли́ Бо́га о нас.

Восхвали́ти прему́драго отве́рзи ми́ у́м, Го́споди, наста́ви мя́ Ду́хом Твои́м Святы́м, да воспою́ па́мять его́ по достоя́нию.

Припев: Блаже́нне о́тче Стефа́не, моли́ Бо́га о нас.

Похвало́ вели́кая кни́жным лю́дем земли́ Се́рбския, уте́хо уничиже́нным и ра́досте опеча́ленным, помяни́ все́х си́рых, стра́ждущих ны́не, и моли́ся о ни́х у престо́ла огнезра́чнаго.

Сла́ва Отцу́ и Сы́ну и Свято́му Ду́ху:

О, блаже́нне Де́споте Высо́кий, на све́щнице оте́чества твоего́ свети́ло вели́кое все́м бы́л еси́ в ро́де на́шем, освеща́я пу́ть к Ца́рствию небе́сному.

И ны́не и при́сно и во ве́ки веко́в. Ами́нь.

Богоро́дичен: Ма́ти ми́лостивая Христа́ Бо́га на́шего, Его́же кроме́ зако́на естества́ родила́ еси́, не преста́й моли́твами Свои́ми проси́ти ми́лости Его́, да спасе́т ны́ от прегреше́ний на́ших.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Блаже́нне о́тче Стефа́не, моли́ Бо́га о нас.

Наде́ждею испо́лнил еси́ сердца́ люде́й твои́х, опеча́ленных поги́бельными ра́ти ага́рянскими, и, укрепи́в сердца́ и́х му́жеством, подо́бно Иису́су Нави́ну, возве́л еси́ и́х к побе́де враго́в.

Припев: Блаже́нне о́тче Стефа́не, моли́ Бо́га о нас.

Сто́лпе ве́ры, вождю́ богоизбра́нный, научи́л еси́ на́с в беда́х бо́дрствовати и в моли́твах Го́сподеви неусыпа́ти.

Сла́ва Отцу́ и Сы́ну и Свято́му Ду́ху:

Му́дрости ева́нгельския носи́телю, Ангельских медото́чных слове́с учи́телю, утверди́ ны́ в си́ле богове́дения.

И ны́не и при́сно и во ве́ки веко́в. Ами́нь.

Богоро́дичен: Притецы́те, бра́тие, единоду́шно принесе́м Богоро́дице досто́йное Ея́ хвале́ние, Та́ бо на́с спаса́ет моли́твами Свои́ми воплоти́вшемуся от Нея́ Спаси́телю.

Седа́лен, гла́с 6:

Све́тлость небе́снаго сия́ния яви́лся еси́ оте́честву твоему́, обновля́я в не́м ра́дости непобеди́маго Креста́ и просвеща́я погиба́ющия во тме́ лю́ди твоя́, Стефа́не ангелоподо́бне, хва́лим тя́.

Сла́ва, и ны́не, [тро́ичен], гла́с то́йже:

О, Пресвята́я Тро́ице, в Не́йже сла́вим Еди́наго Бо́га, при́зри на ны́, в ве́ре коле́блемыя, и сохрани́ ду́ши на́ша невреди́мы, я́ко да сла́вим Тя́ со Ангелы, при́сно Ти́ хвалы́ принося́ще.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Блаже́нне о́тче Стефа́не, моли́ Бо́га о нас.

Стефа́не, се́рбских ду́ш ра́дование, разуме́хом бо́ли души́ твоея́ о поги́бшем роди́тели твое́м и друго́в его́, пре́дков на́ших, и се́ мо́лим тя́: отжени́ от на́с подо́бную печа́ль.

Припев: Блаже́нне о́тче Стефа́не, моли́ Бо́га о нас.

Лю́дие се́рбстии, возведи́те очеса́ своя́ к небеси́ и у́зрите до́блестнаго Стефа́на Высо́каго посреде́ пре́дков на́ших, торжеству́юща ны́не с ни́ми во сла́ве Бо́жией, всегда́ побежда́ющей враги́ Креста́ Правосла́внаго.

Сла́ва Отцу́ и Сы́ну и Свято́му Ду́ху:

Яко оре́л, паря́щий небе́сными высота́ми, Стефа́н му́дрый воздви́жеся на высоту́ Боже́ственнаго уче́ния и наставля́ше духо́вными писа́ньми пре́дки на́ша, от ни́хже и мы́ сия́ прия́вше, восхваля́ем и́мя его́, я́ко вели́каго благоде́теля ро́да се́рбскаго.

И ны́не и при́сно и во ве́ки веко́в. Ами́нь.

Богоро́дичен: Богоро́дице, Ма́ти Христа́ Бо́га на́шего, всегда́ помина́ем Тя́ и в моли́твах возно́сим и́мя Твое́, прося́ще Твоего́ хода́тайства у престо́ла Сотво́ршаго вселе́нную о спасе́нии ду́ш на́ших.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Блаже́нне о́тче Стефа́не, моли́ Бо́га о нас.

Се́рбие, Бо́гом возлю́бленная, помни́ всегда́ дни́ вели́ких скорбе́й и страда́ний, я́же ча́да твоя́ терпя́ху грехо́в ра́ди роди́телей свои́х, от ни́хже всегда́ да сохрани́т ны́ Госпо́дь.

Припев: Блаже́нне о́тче Стефа́не, моли́ Бо́га о нас.

Стефа́н яви́ся любому́др наро́ду своему́ и, повину́яся словесе́м ева́нгельским, крепля́ше се́рдце свое́ ду́хом пра́вды, ду́хом любве́ и соболе́знования к лю́дем свои́м.

Сла́ва Отцу́ и Сы́ну и Свято́му Ду́ху:

Прииди́те, рачи́телие Боже́ственнаго законове́дения, и почерпи́те му́дрость исто́чников Христо́вых учи́лищ, я́же откры́ Стефа́н Высо́кий душа́м на́шим.

И ны́не и при́сно и во ве́ки веко́в. Ами́нь.

Богоро́дичен: Ве́лия сла́ва Твоя́, Пресвята́я Богоро́дице, возно́сится в ро́де се́рбстем, ему́же Сы́н Тво́й посла́ апостолоподо́бна ревни́теля, Стефа́на де́спота, и́же воздви́же и освяти́ лю́ди своя́ ве́рою Христо́ва спасе́ния.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Блаже́нне о́тче Стефа́не, моли́ Бо́га о нас.

Игом лю́таго порабоще́ния оте́чество на́ше обремене́но бы́сть, и вси́ го́рько пла́кахуся, но Стефа́н му́дрый утеша́ше все́х упова́нием ве́лиим на Го́спода Всеси́льнаго.

Припев: Блаже́нне о́тче Стефа́не, моли́ Бо́га о нас.

Земле́ Се́рбская, преда́ждь забве́нию лю́тыя го́рести и возвесели́ся со́лнцу благода́ти, получе́нном де́спотом Стефа́ном, его́же теплото́ю согрева́ет всегда́ сердца́ сыно́в твои́х.

Сла́ва Отцу́ и Сы́ну и Свято́му Ду́ху:

Мно́жество вдо́в и стра́ждущих припа́даху тебе́, Стефа́не, и пла́кахуся о ча́дех свои́х и о бра́тии, изги́бших с роди́телем твои́м, ты́ же, милосе́рдовав о ни́х, вся́кому воздава́л еси́ к жи́зни потре́бная, утеша́я и́х Бо́жиим правдолю́бием.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, Звездо́, Со́лнце спасе́ния ро́ждшая, к Твоему́ покро́ву прибега́ем и мо́лимся: изба́ви ны́, стра́ждущия, от мно́жества лю́тых прегреше́ний и к Сы́ну Твоему́ приведи́ на́с.

Конда́к, гла́с 4:

Ве́рнаго Ти́ во́ина Стефа́на Высо́каго возлюби́в, Христе́ Бо́же, низпосла́л еси́ ему́ си́лу благода́ти, во е́же уве́дети та́йны небе́сныя и ревнова́ти о сла́ве Твое́й, е́йже кла́няющеся и мы́, всегда́ мо́лим Тя́: поми́луй ны́, Спа́се, во Ца́рствии Твое́м.

Икос:

Му́дрости исто́чник обре́т в Христо́вом Ева́нгелии, Де́споте всехва́льне, ду́ши ро́да своего́ воздви́гл еси́ к высоте́ престо́ла Вы́шняго. Сего́ ра́ди и мы́, сы́нове твои́, припа́даем ти́ и, сла́вяще и́мя твое́, вопие́м: ра́дуйся, Стефа́не, о́трасле благоче́стия роди́теля великому́ченика; ра́дуйся, благогове́йныя ма́тере ча́до вожделе́нное; ра́дуйся, полко́в ага́рянских потреби́телю; ра́дуйся, защи́тниче оте́чества и стра́ждущаго ро́да христиа́нскаго; ра́дуйся, дру́же пропове́дников Боже́ственных уче́ний; ра́дуйся, опеча́ленных уте́шителю; ра́дуйся, кре́посте духо́вная престо́льнаго Бе́лграда твоего́ и всего́ ро́да се́рбскаго; ра́дуйся, святи́телей на́ших Са́ввы и Симео́на Мироточи́ваго сомоли́твенниче; ра́дуйся, Де́споте Высо́кий, хвало́ на́ша, ве́чно живу́щая; ра́дуйся, Стефа́не, Ца́рствия Бо́жия сожи́телю; ра́дуйся, моли́твенниче о низпосла́нии на́м благода́ти Христо́вы; ра́дуйся, свети́льниче, Бо́гом поста́вленный освеща́ти на́м пу́ть к Ца́рствию небе́сному; ра́дуйся, Ангелов собесе́дниче о спасе́нии ду́ш на́ших; ра́дуйся, наде́ждо на́ша в беда́х ми́ра сего́; ра́дуйся, Де́споте Высо́кий, живу́щий высото́ю Ангельския жи́зни; ра́дуйся, сла́вныя ла́вры Манаси́и зижди́телю; ра́дуйся, Стефа́не, Бо́гом избра́нный вождю́ на́ш духо́вный; ра́дуйся и моли́ся ко Го́споду дарова́ти на́м и всему́ ро́ду се́рбскому кре́пость к побе́де на враго́в на́ших.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Блаже́нне о́тче Стефа́не, моли́ Бо́га о нас.

В хра́мех твои́х собира́емся дне́сь пра́здновати па́мять твою́, Стефа́не, изоби́льно бо в ни́х источа́ется благода́ть лю́дем твои́м, от се́рдца призыва́ющим тя́ в моли́твах свои́х.

Припев: Блаже́нне о́тче Стефа́не, моли́ Бо́га о нас.

Вне́млюще моли́твам ча́д твои́х, Стефа́не, не оставля́еши си́рых страда́ти, благоде́тель бо еси́ ро́да своего́, и про́сиши все́м по́мощь у Го́спода.

Сла́ва Отцу́ и Сы́ну и Свято́му Ду́ху:

С похвала́ми па́мяти твое́й прихо́дим ти́ дне́сь, Стефа́не му́дре, кре́пость бо еси́ все́м, а́лчущим пра́вды Бо́жия и исцеле́ния духо́внаго в печа́лех жи́зни ми́ра сего́.

И ны́не и при́сно и во ве́ки веко́в. Ами́нь.

Богоро́дичен: Пита́тельница еси́ Пита́теля тва́ри, Богоро́дице Пресвята́я, сего́ ра́ди, а́ще и недосто́йнии, припа́даем Ти́ и про́сим моли́тв Твои́х Сы́ну Твоему́, да пода́ст душа́м на́шим кре́пость спасе́ния в причаще́нии свята́го Те́ла и Кро́ве Его́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Блаже́нне о́тче Стефа́не, моли́ Бо́га о нас.

Оте́чество твое́ ра́дуется, Стефа́не, сла́вяще пра́здник па́мяти твоея́, благода́тными бо да́ры Ду́ха Свята́го укра́шен бы́л еси́; моли́ся у́бо, да и ду́ши на́ша бу́дут просвеще́ны благода́тию Его́ Боже́ственною.

Припев: Блаже́нне о́тче Стефа́не, моли́ Бо́га о нас.

Па́че зла́та и ка́мений многоце́нных душа́ твоя́ возлюби́ му́дрость Ева́нгелия Христо́ва, те́мже и мо́лим тя́, Стефа́не вожделе́нне, да и на́с во́диши ко спасе́нию, пита́юще ду́ши на́ша се́ю му́дростию.

Сла́ва Отцу́ и Сы́ну и Свято́му Ду́ху:

Ко́ль светла́ яви́ся на́м дне́сь па́мять твоя́, христолюби́ве на́ш просвети́телю, ко́ль вели́кое твое́ попече́ние бы́сть о правосла́вном благоче́стии ро́да се́рбскаго, сего́ ра́ди моли́твенно припа́даем ти́ и ублажа́ем па́мять твою́, ве́чно живу́щую.

И ны́не и при́сно и во ве́ки веко́в. Ами́нь.

Богоро́дичен: Яко ю́ноши, в пещи́ несгара́емии, просла́виша Триипоста́снаго Бо́га, та́ко и мы́, Пресвята́я Богоро́дице, ве́рою озаря́емии, сла́вим де́вство Твое́, нетле́нное и по рождестве́ на́шего Спаси́теля.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Блаже́нне о́тче Стефа́не, моли́ Бо́га о нас.

Яко стена́ ве́ры неколеби́мая, показа́лся еси́ о́браз ро́ду на́шему, Де́споте всехва́льне, и душа́ твоя́ в ве́ре вознесе́на бы́сть ли́ку Ангельскому, моли́ся и о на́с, да и мы́ поми́ловани бу́дем от прегреше́ний и со Ангелы да пое́м сла́ву Бо́жию.

Припев: Блаже́нне о́тче Стефа́не, моли́ Бо́га о нас.

Сквозе́ о́гнь и во́ду искуше́ни бы́хом грехо́в ра́ди оте́ц на́ших, ны́не же, иму́ще тя́ хода́тая у престо́ла Бо́жия, припа́даем ра́це твое́й и про́сим тя́, Стефа́не, да моли́твами твои́ми огради́ши на́с от искуше́ний и утверди́ши ны́ в братолю́бии.

Сла́ва Отцу́ и Сы́ну и Свято́му Ду́ху:

В словесе́х Боже́ственных писа́ний созна́л еси́ бла́гость и милосе́рдие Бо́жие, Де́споте всехва́льне, и сподо́бился еси́ Ца́рствия Его́ вы́шняго, моли́ и о на́с, ча́дех твои́х, да сподо́бимся с тобо́ю бы́ти в Ца́рствии Бо́жии.

И ны́не и при́сно и во ве́ки веко́в. Ами́нь.

Богоро́дичен: Христо́с, Сия́ние ве́чное, возсия́ на́м от ложе́сн Твои́х, Богоро́дице, сего́ ра́ди, гре́шнии, припа́даем Ти́, да моли́твами Твои́ми хода́тайствуеши у Сы́на Своего́ спасти́ ны́ от тмы́ грехо́вныя.

Свети́лен:

Све́том Богодухнове́нных Писа́ний озари́вся, во́ждь кре́пок во́ином избра́нным яви́лся еси́, Стефа́не, и́мя се́рбское просла́вил еси́, любому́дрыя му́жи удиви́л еси́, сердца́ же Христо́вых враго́в стра́хом испо́лнил еси́, при́зри ны́не и на ны́ от небе́сных черто́гов и сокруши́ враги́, борю́щия на́с.[Два́жды.]

[Сла́ва, и ны́не,] Богоро́дичен:

Изба́вивши ми́р от кля́твы зако́нныя безсе́менным Рождество́м, Богоотрокови́це, вели́кия сла́вы сподо́билася еси́, и ны́не предстоя́ огнезра́чному престо́лу от Тебе́ Рожде́ннаго, моли́ся о спасе́нии ве́рно почита́ющих Тя́.

Молитва

О, святы́й уго́дниче Бо́жий блаже́нне Стефа́не, по́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал еси́ Госпо́дь всем лю́бящим Его́; те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.