1 августа.

Канон преподобной Макрине, сестре святителя Василия Великаго

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́я, гла́с 8:

В тебе́, ма́ти, изве́стно спасе́ся, е́же по о́бразу: прии́мши бо кре́ст, после́довала еси́ Христу́, и, де́ющи, учи́ла еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней. Те́мже и со Ангелы сра́дуется, преподо́бная Макри́но, ду́х тво́й.

Кано́н преподо́бныя, его́же краегране́сие: Неве́сту чи́сту тя́ Христу́, Макри́но, венча́ю. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Преподо́бная ма́ти Макри́но, моли́ Бо́га о нас.

Жениха́ пречи́стаго, ду́ш красоту́, Макри́но всесла́вная, Его́же возжела́вши, возлюби́ла еси́ от всего́ се́рдца твоего́, просвети́ти моли́ пою́щия тя́.

Припев: Преподо́бная ма́ти Макри́но, моли́ Бо́га о нас.

Сы́й бе́здна па́че ума́ бла́гости, Христе́, Твою́ нескве́рную неве́сту просла́вил еси́, жела́нием Твои́м пригвожде́ную, Макри́ну непоро́чную и пресла́вную.

Сла́ва Отцу́ и Сы́ну и Свято́му Ду́ху:

Макри́но богому́драя, де́вства похвало́, те́пле соблюла́ еси́ невре́дно воздержа́нием твое́ житие́, пло́ть ду́ху покори́вши.

И ны́не и при́сно и во ве́ки веко́в. Ами́нь.

Богоро́дичен: Светоно́сно возсия́ в сердца́х, Пренепоро́чная, ве́рою чту́щих Тя́, Бо́жию Ма́терь, и озари́ де́нь светоно́сный Христо́с, из утро́бы Твоея́ возсия́вый, Богоневе́сто.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Преподо́бная ма́ти Макри́но, моли́ Бо́га о нас.

Укра́шена добро́тою богода́нною и благода́тию, и му́ченик благосла́вие, изводи́ма ро́да че́стна, нра́ву поревнова́ла еси́ си́х боже́ственному.

Припев: Преподо́бная ма́ти Макри́но, моли́ Бо́га о нас.

Зако́ну Боже́ственному повину́ющися, де́во, оста́вила еси́ жития́ мяте́ж и молвы́ убежа́ла еси́, поще́нием и моли́твами, жела́нием упражня́ющися.

Сла́ва Отцу́ и Сы́ну и Свято́му Ду́ху:

Свяще́ние от мя́гких ногте́й возлюби́ла еси́, очи́ма же ма́тернима блюдо́ма, пребыла́ еси́, Макри́но, нетле́нна и непоро́чна.

И ны́не и при́сно и во ве́ки веко́в. Ами́нь.

Богоро́дичен: Зе́млю Тя́, Де́во, Всенепоро́чная Отрокови́це, ве́мы, я́ко кла́с жи́зни на́м безсе́менно прозя́бшую, Имже утвержда́еми, Тя́ ублажа́ем.

Седа́лен святы́я, гла́с 4.

Боже́ственная па́мять твоя́, Макри́но, дне́сь возсия́вши, яви́ся ми́рови, я́ко со́лнце, сказу́ющи житие́ твое́: ты́ бо, воздержа́нием плотска́я движе́ния разо́рши, уневе́стилася еси́ Христу́ от младе́нства. Те́мже хва́лящия тя́ изба́ви от вся́ких зо́л.

Сла́ва, И ны́не, Богоро́дичен:

Небе́сную две́рь и киво́т, пресвяту́ю го́ру, све́тлый о́блак воспои́м, неопали́мую купину́, слове́сный ра́й, Евы воззва́ние, вселе́нныя всея́ вели́кое сокро́вище, я́ко спасе́ние в Не́й соде́лася ми́рови и оставле́ние дре́вних согреше́ний. Сего́ ра́ди вопие́м Ей: моли́ся Сы́ну Твоему́, прегреше́ний оставле́ние дарова́ти, благоче́стно покланя́ющимся всесвято́му Рождеству́ Твоему́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Преподо́бная ма́ти Макри́но, моли́ Бо́га о нас.

Умертви́вшися ми́ру и мирски́м ве́щем, Бо́гу жи́ти еди́ному жела́нием боже́ственным испра́вила еси́, твоего́ Жениха́ жела́ющи добро́ты, спаса́ющаго нетле́нну и чи́сту, всечестна́я.

Припев: Преподо́бная ма́ти Макри́но, моли́ Бо́га о нас.

Поревнова́вши Фе́кле честне́й, первому́ченице, и боже́ственному тоя́ житию́ вои́стинну подо́бящися, от вдохнове́ния Боже́ственнаго свы́ше и и́мя обра́зно прия́т.

Сла́ва Отцу́ и Сы́ну и Свято́му Ду́ху:

Невестоводя́щи, де́вы ты́, Макри́но, привела́ еси́ де́вственному Сло́ву, от Де́вы возсия́вшему, безстра́стным у́бо присвое́нием и подо́бием безстра́стие я́ве пока́зовала еси́.

И ны́не и при́сно и во ве́ки веко́в. Ами́нь.

Богоро́дичен: Дарова́ний Боже́ственныя струи́ и исто́чницы исцеле́ний, Боже́ственнаго бога́тства раздая́ния даю́тся живонача́льною дла́нию, Богоневе́стная, ро́ждшагося от Твоея́ утро́бы Вседержи́теля.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Преподо́бная ма́ти Макри́но, моли́ Бо́га о нас.

Оскверни́тися страстьми́ добро́те кра́сней, душе́вней и богови́дней не стерпе́ла еси́, всему́драя, добро́ту несказа́нную честна́го Жениха́ твоего́ поразуме́вши, до́брая де́во.

Припев: Преподо́бная ма́ти Макри́но, моли́ Бо́га о нас.

Кре́пким утеше́нием обогати́вшися Христа́, тве́рдо же и незы́блемо страсте́й умертви́ла еси́ мно́гий мяте́ж, от но́щи у́треневавши и сла́вящи Го́спода.

Сла́ва Отцу́ и Сы́ну и Свято́му Ду́ху:

Тве́рд соблюла́ еси́ ра́зум Христу́, Тому́ бо от утро́бы приве́рглася еси́, непоро́чная, Ему́же и возложи́ла еси́ ду́шу и те́ло твое́, от ю́ности пости́вшися.

И ны́не и при́сно и во ве́ки веко́в. Ами́нь.

Богоро́дичен: Христа́ родила́ еси́, Изба́вителя вся́ческих, на́с, к тле́нию во́лею па́дшихся, вообрази́вша и к сла́ве несказа́нней, Богома́ти, возне́сша.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Преподо́бная ма́ти Макри́но, моли́ Бо́га о нас.

Жела́ние Христо́во возраста́я явле́ннее, у́м тво́й ве́сь доброде́тель сво́йственну нося́ше, насади́ и благоче́стна Боже́ственная уче́ния.

Припев: Преподо́бная ма́ти Макри́но, моли́ Бо́га о нас.

Пою́щи Христа́ непреста́нными моли́твами, тве́рдую извлекла́ еси́ от Него́, де́во, по́мощь и Боже́ственную де́вства благода́ть соблюла́ еси́.

Сла́ва Отцу́ и Сы́ну и Свято́му Ду́ху:

Венце́м дарова́ний Христо́с венча́ тя, я́ко чи́стую де́ву и ли́ку де́вственному наста́вницу, и в черто́зех небе́сных, богому́драя, всели́ тя.

И ны́не и при́сно и во ве́ки веко́в. Ами́нь.

Богоро́дичен: Едине́нием я́же пе́рвее разстоя́щаяся совокупи́, два́ бо естества́ совокупле́на родила́ еси́ неизрече́нно Бо́га Сло́ва, вои́стинну воплоще́нна, Всенепоро́чная.

Конда́к святы́я, гла́с 4. Подо́бен: Яви́лся еси́.

Бо́га Блага́го все́м се́рдцем возлюби́ла еси́, Макри́но преподо́бная, и, Сего́ кре́ст честны́й на ра́мо прие́мши, усе́рдно после́довала еси́ Ему́, отону́дуже согреше́ний обрела́ еси́ проще́ние.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Преподо́бная ма́ти Макри́но, моли́ Бо́га о нас.

Еди́наго жела́юши Христа́ и соверше́нною любо́вию я́ко уя́звена я́ве, вопия́ше: теку́ в сле́д Тебе́, препе́тый Го́споди, Бо́же оте́ц на́ших, благослове́н еси́.

Припев: Преподо́бная ма́ти Макри́но, моли́ Бо́га о нас.

Отри́нувши стра́сти и многомяте́жная движе́ния, в безстра́стия све́тлую облече́ся ри́зу, зову́щи: препе́тый Го́споди, Бо́же оте́ц на́ших, благослове́н еси́.

Сла́ва Отцу́ и Сы́ну и Свято́му Ду́ху:

Низложи́вши шата́ние зверови́дное вознесе́нное злонача́льнаго врага́, и по́честь побе́ды прия́ла еси́, достохва́льная, пою́ши: Го́споди, Бо́же оте́ц на́ших, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Расто́ргни согреше́ний плени́цы Твои́м Ма́терним дерзнове́нием благоче́стно и ве́рно пою́щих, Де́во, Рождество́ Твое́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Преподо́бная ма́ти Макри́но, моли́ Бо́га о нас.

Священноле́пно ты́ житие́ и жи́знь чи́сту препроводи́ла еси́, некра́домо возложе́ние, добро́та же сокрове́на, богови́дно украше́ние яви́лася еси́, богодохнове́нная, зову́щи: Го́спода по́йте, дела́, и превозноси́те Его́ во вся́ ве́ки.

Припев: Преподо́бная ма́ти Макри́но, моли́ Бо́га о нас.

Умерщвле́нием стра́сти оде́янна, к Боже́ственному безсме́ртию премину́ла еси́, изря́дная научи́вши и любому́дреная души́ безсме́ртней и самодви́жней, — Го́спода по́йте, — вопию́щи, — и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Заре́ю трисия́ннаго светоли́тия у́м просве́щши и лице́, усну́ла еси́, пребога́тая, успе́нием блаже́нным, с весе́лием ви́дящи тебе́ Жела́емаго, — Го́спода по́йте, — вопию́щи, — и превозноси́те Его́ во вся́ ве́ки.

И ны́не и при́сно и во ве́ки веко́в. Ами́нь.

Богоро́дичен: Тя́, ковче́г пресвяты́й, осеня́емый Боже́ственным Ду́хом, Преве́чное Сло́во и Присносу́щное, за милосе́рдие неизрече́нное вочелове́чшееся, ро́ждшую Богома́терь пое́м и превозно́сим во вся́ ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Преподо́бная ма́ти Макри́но, моли́ Бо́га о нас.

Ми́лости вои́стинну Бо́жией бога́тей подо́бящися, сконча́ла еси́, пита́ющи вся́, нището́ю снеда́емыя, прехва́льная, отсю́ду Ми́лостивый просла́ви тя́, я́вльшуюся ми́лостиву.

Припев: Преподо́бная ма́ти Макри́но, моли́ Бо́га о нас.

Пред лице́м ста́ла еси́ Бо́жиим, всехва́льная, светоно́сна бо была́ еси́, житие́м и сло́вом укра́шена и вся́ческими хвала́ми и ро́да благосла́вием сия́ющи, превысо́кими восхожде́нии.

Сла́ва Отцу́ и Сы́ну и Свято́му Ду́ху:

В пресве́тел всели́лася еси́ черто́г и во хра́м, о Макри́но, небе́сный, иде́же, де́во, пребыва́еши со святи́тели, сро́дники твои́ми. Моли́ со дерзнове́нием Го́спода вся́ спасти́, пою́щия тя́.

И ны́не и при́сно и во ве́ки веко́в. Ами́нь.

Богоро́дичен: Красе́н добро́тою Пло́д и све́тел па́че все́х чре́ва Твоего́: Ты́ бо, Де́во Богоро́дице, Бо́га воплоще́нна родила́ еси́, я́вльшася, за е́же спасти́ челове́ка. Те́мже Тя́ вси́ велича́ем.

Молитва

О свята́я, Макри́но. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.