1 августа.

Канон преподобному Дию, игумену Константинопольскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бнаго, гла́с 1:

Пусты́нный жи́тель, и в телеси́ Ангел, и чудотво́рец яви́лся еси́, богоно́се о́тче на́ш Ди́е: посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою притека́ющих ти́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н преподо́бнаго, творе́ние Ио́сифово, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Преподо́бне о́тче Ди́е, моли́ Бо́га о нас.

Вы́ну к Бо́гу манове́ньми удобря́емь, тво́й кре́ст восприя́л еси́ и Христу́ после́довал еси́, пло́ти твоея́ мудрова́ние, Ди́е, умертви́в воздержа́нием.

Припев: Преподо́бне о́тче Ди́е, моли́ Бо́га о нас.

Утреневал еси́ к сла́ве незаходи́маго Со́лнца, преподо́бне, всесве́тла бы́л еси́ звезда́ и ве́рныя просвети́л еси́, доброде́телей, блаже́нне, и чуде́с твои́х све́тлостию.

Сла́ва Отцу́ и Сы́ну и Свято́му Ду́ху:

Устрани́л еси́ по́мысл тво́й, прему́дре, су́щих в ми́ре кра́сных, преми́рныя сла́вы рачи́тель и́стинен бы́л еси́, с пло́тию безпло́тнаго победи́в Боже́ственною благода́тию.

И ны́не и при́сно и во ве́ки веко́в. Ами́нь.

Богоро́дичен: Со́лнца мы́сленнаго, Всенепоро́чная, селе́ние была́ еси́, Боже́ственными светлостьми́ на́с благоче́стно озари́вшаго и мглу́ отгна́вша неразу́мия, Присноде́во.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Преподо́бне о́тче Ди́е, моли́ Бо́га о нас.

Боже́ственными блиста́яся сия́нии, свети́льник бы́л еси́, наставля́я ве́рою к тебе́ приходя́щия, блаже́нне.

Припев: Преподо́бне о́тче Ди́е, моли́ Бо́га о нас.

Наста́вил еси́ к жи́зни после́дующия до́бре, преподо́бне, плотски́я бо стра́сти Боже́ственною си́лою умертви́л еси́.

Сла́ва Отцу́ и Сы́ну и Свято́му Ду́ху:

Совокупи́лся еси́ боголе́пно с небе́сными, на земли́ бо житие́ Ангельское пожи́л еси́, Ди́е богоно́се, о́тче на́ш.

И ны́не и при́сно и во ве́ки веко́в. Ами́нь.

Богоро́дичен: Всели́ся в Тя́ Живы́й на небесе́х, Чи́стая, Его́же приле́жно моли́ спасти́ ду́ши пою́щих Тя́.

Седа́лен  преподо́бнаго, гла́с 8.

Бо́гу от младе́нства возложе́н бы́в и Тому́ да́же до конца́ благоугожда́я, о́тче на́ш преподо́бне, дарова́ния улучи́л еси́ и де́монов мно́жество отгна́л еси́ благода́тию, в Госпо́дню похвалу́ оби́тель созда́л еси́. Те́мже пресла́вно и ме́ртвыя сподо́бился еси́ воздви́гнути, прехва́льне, несумне́нною моли́твою твое́ю. Сего́ ра́ди вопие́м ти́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Слава и Ныне КрестоБогоро́дичен:

Агнца, и Па́стыря, и Изба́вителя Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Преподо́бне о́тче Ди́е, моли́ Бо́га о нас.

Ду́ха невеще́ственною свеще́ю у́м тво́й просвеща́я, плотску́ю пре́лесть со́н вмени́л еси́, вы́шняго тя́ ча́юща гра́да, богоно́се, смотря́я.

Припев: Преподо́бне о́тче Ди́е, моли́ Бо́га о нас.

Яко о́блак, до́ждь нося́щий, Ца́рскому гра́ду я́влься, напои́л еси́ сего́ напое́нии Свята́го Ду́ха, душа́м попече́ние воздви́гл еси́ прекра́сно.

Сла́ва Отцу́ и Сы́ну и Свято́му Ду́ху:

Умертви́вся греху́ воздержа́нием, ме́ртвым живо́т дарова́л еси́ Боже́ственным посо́бием, во́ду же источи́л еси́ на́м умиле́ния, преподо́бне, творя́щим па́мять твою́.

И ны́не и при́сно и во ве́ки веко́в. Ами́нь.

Богоро́дичен: Светоно́сен Тя́ све́щник, Боже́ственное сия́ние во утро́бе носи́вшую, позна́хом, Де́во. Те́мже мо́лимся Тебе́: све́том Твои́м озари́ все́х ду́ши, пою́щих Тя́.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Преподо́бне о́тче Ди́е, моли́ Бо́га о нас.

На горе́ свяще́нней жития́ стоя́, восхожде́нием се́рдца разори́л еси́ стра́сти и Бо́гу прибли́жился еси́.

Припев: Преподо́бне о́тче Ди́е, моли́ Бо́га о нас.

Же́зл я́коже Ааро́нов, странноле́пным прозябе́нием бы́л еси́, богоно́се, чи́сто Влады́це и Боже́ственно свяще́ние.

Сла́ва Отцу́ и Сы́ну и Свято́му Ду́ху:

О, Боже́ственных даро́в, от Бо́га дарова́нных тебе́! Моты́кою бо моли́тв твои́х во́ду жи́ву от боко́в землены́х, о́тче, изве́л еси́.

И ны́не и при́сно и во ве́ки веко́в. Ами́нь.

Богоро́дичен: Ни Ангельский у́м, ни челове́ческий мо́жет, Всенепоро́чная, сказа́ти стра́шнаго рождества́ глубину́ недове́домую.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Преподо́бне о́тче Ди́е, моли́ Бо́га о нас.

Возвы́сил еси́ к Бо́гу серде́чное жела́ние, и смири́л еси́ стра́сти, и свире́пство де́монов низложи́л еси́, богоно́се, мона́шествующих недви́жимое основа́ние.

Припев: Преподо́бне о́тче Ди́е, моли́ Бо́га о нас.

Ура́нил еси́ воздержа́нием ра́нами, о́тче, Еги́пет, страстны́я свободи́л еси́ его́ рабо́ты, мно́жество неспряже́ных и супру́жных, благоче́стно после́дующих ти́, преподо́бне.

Сла́ва Отцу́ и Сы́ну и Свято́му Ду́ху:

Бога́т доброде́тельми и чуде́с све́тлостию бы́в испо́лнен, преста́вился еси́ к вы́шнему гра́ду, Ди́е богому́дре, и мо́лишися изба́витися от бе́д ста́ду твоему́.

И ны́не и при́сно и во ве́ки веко́в. Ами́нь.

Богоро́дичен: Умертви́ души́ моея́ стра́сти, Всенепоро́чная, Жи́знь все́х неизрече́нным сло́вом ро́ждши, и у́м мо́й смуща́емый, Отрокови́це, умири́.

Конда́к преподо́бнаго, гла́с 2. Подо́бен: Тве́рдыя.

Чистото́ю души́ боже́ственне вооружи́вся, непреста́нную моли́тву, я́ко копие́, прии́м держа́вно, разсе́кл еси́ де́монов полки́, чудотво́рче, о́тче на́ш Ди́е, моли́ непреста́нно о все́х на́с.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Преподо́бне о́тче Ди́е, моли́ Бо́га о нас.

Оби́тель Тро́ице твое́ се́рдце сотвори́л еси́, те́мже мона́шествующим воздви́гл еси́ благопотре́бно, богоно́се, попече́ние, — благослове́н еси́, — зовы́й, — в хра́ме сла́вы Твоея́, Го́споди.

Припев: Преподо́бне о́тче Ди́е, моли́ Бо́га о нас.

Обыстри́в тво́й исто́чник чуде́сный, о́тче богому́дре, во́ду спасе́ния источи́л еси́ ве́рно творя́щим твое́ успе́ние, Ди́е чу́дне, мона́шествующих свети́ло пресве́тлое.

Сла́ва Отцу́ и Сы́ну и Свято́му Ду́ху:

Украси́в доброде́тельми твое́ житие́, бы́л еси́ ве́сь светоза́рен и сто́лп светови́ден, пою́щим наста́вник: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богоро́дичен: Святе́йшу Тя́ херуви́м соде́ла, Отрокови́це, Бо́г Святы́й я́ве, освяща́я пою́щия: благослове́нна Ты́ в жена́х, Пренепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Преподо́бне о́тче Ди́е, моли́ Бо́га о нас.

Жезла́ твоего́ прозябе́нием Бо́г твою́ плодоно́сну ду́шу явля́ше, прему́дре, насажда́ющую плодови́ты и слове́сны са́ды Боже́ственным манове́нием, в раи́ пи́щи мона́хов мно́жество, вопию́щих: вся́ дела́, благослови́те, Госпо́дня, Го́спода.

Припев: Преподо́бне о́тче Ди́е, моли́ Бо́га о нас.

Ум тво́й, Боже́ственными добро́тами облиста́емь, красе́н пребы́сть. И ны́не после́днее дости́гл еси́ до́брых, я́ко чи́ст, прича́стием обожа́емь при́сно и поя́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Да тя́ гла́сы ра́достными, торжеству́юще, Ди́е, почита́ем, спаса́й ста́до твое́ всегда́, твою́ па́мять пра́зднующее, и наста́ви к жи́зненным вхо́дом пою́щия: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Яви́лася еси́ ши́рши небе́с, Бо́га вме́щши, Мари́е Пречи́стая, Его́же моли́ спасти́ мя от страсте́й содержа́щих и бу́дущаго стра́шнаго осужде́ния изба́вити мя́, вопию́щаго: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Преподо́бне о́тче Ди́е, моли́ Бо́га о нас.

Тя́ доброде́телей благозра́чием, о́тче, я́ко Ангела, я́вльшася и к небесе́м возлете́вша, позлаще́не иму́ща криле́, ра́достно почита́ем и благоче́стно похваля́ем.

Припев: Преподо́бне о́тче Ди́е, моли́ Бо́га о нас.

Якоже со́лнце многосве́тло, от восто́ка возсия́в, Ди́е, всю́ду зарю́ доброде́телей и чуде́с твои́х бога́тно просте́рл еси́, просвеща́я ми́ра концы́.

Сла́ва Отцу́ и Сы́ну и Свято́му Ду́ху:

К Све́ту незаходи́мому, о́тче, светови́ден бы́в доброде́телей светозаре́нием, преше́л еси́, ра́дуяся, и всели́лся еси́, иде́же преподо́бных ду́си. О ста́де твое́м моли́ся.

И ны́не и при́сно и во ве́ки веко́в. Ами́нь.

Богоро́дичен: Пощади́ мя, Христе́, егда́ прии́деши суди́ти ми́ру со сла́вою, име́я моля́щую Тя́, Сло́ве, Богоро́дицу Присноде́ву, и Ангельския чи́ны, и преподо́бных совокупле́ния.

Молитва

О свяще́нная главо́, преподо́бне о́тче, преблаже́нне а́вво Ди́е, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.