Канон Семи мученикам Маккавеям: Авиму, Антонину, Гурию, Елеазару, Евсевону, Алиму и Маркеллу, матери их Соломонии и учителю их Елеазару

Тропа́рь, глас 1:

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Канон мучеников глас 8

Песнь 1

Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Избави́телю и Бо́гу на́шему пои́м.

Припев: Святии мученицы Маккавеи, молите Бога о нас.

Лик седмочи́сленных страда́лец, я́влься еди́ным нра́вом в лю́тых,/ по утвержде́нию оте́ческаго зако́на, умре́ти не отреко́шася.

Припев: Святии мученицы Маккавеи, молите Бога о нас.

Сла́ву презре́вше, я́же на земли́, жела́нием Боже́ственнаго Ца́рствия,/ вся́ку боле́знь претерпе́ша Боже́ственнии Маккаве́и,/ те́мже досто́йно ны́не чту́тся.

Сла́ва Отцу́ и Сы́ну и Свято́му Ду́ху:

Зако́на храни́телие Моисе́ева, вои́стинну до́блии Маккаве́и,/ бра́тия друг со дру́гом яви́шася,/ внегда́ попра́ти им Антио́хово безбо́жие.

И ны́не и при́сно и во ве́ки веко́в. Ами́нь.

Богоро́дичен: Чи́ни Тя А́нгел и челове́к, Безневе́стная Ма́ти, восхваля́ют непреста́нно:/ Зижди́теля бо всех, я́ко Младе́нца, на руку́ Твое́ю понесла́ еси́.

Песнь 3

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты ме́не утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Припев: Святии мученицы Маккавеи, молите Бога о нас.

По оте́ческим ходя́ще исправле́нием зако́нным,/ блаже́ннии Христо́вы страда́льцы,/ жизнь нестаре́емую ва́шими стяжа́сте кровьми́, прехва́льнии.

Припев: Святии мученицы Маккавеи, молите Бога о нас.

Ни огнь, ни меч преврати́т когда возмо́же/ до́блесть нра́ва, Бла́женнии, ва́шу, я́же в ве́ре,/ в не́йже упраздни́сте мучи́телей шата́ния.

Сла́ва Отцу́ и Сы́ну и Свято́му Ду́ху:

Му́ки претерпе́ша за Христа́ Бо́га прехва́льнии му́ченицы/ и свы́ше прия́ша побе́ды по́чести,/ непреста́нно моля́щеся спасти́ ду́ши на́ша.

И ны́не и при́сно и во ве́ки веко́в. Ами́нь.

Богоро́дичен: Де́вою родила́ еси́, Неискусобра́чная,/ и Де́вою пребыла́ еси́ Ма́ти Безневе́стная, Богоро́дице Мари́е,/ Христа́ Бо́га на́шего моли́ спасти́ся нам.

Седа́лен святых, глас 8.

Благоче́стно наказа́вшеся, о́троцы му́дрии, му́ченически,/ мучи́телей преще́ния му́жески посрами́сте,/ я́ко зако́на побо́рницы и отцу́ послу́шницы бы́сте, святи́и,/ с ма́терию Богому́дрою усе́рдно пострада́сте./ Те́мже и сме́ртию живот иску́пльше вои́стинну Небе́сный,/ ве́чно ра́дуетеся, Маккаве́и крепкоду́шнии,/ моли́те Христа́ Бо́га согреше́ний оставле́ние дарова́ти/ чту́щим любо́вию святу́ю па́мять ва́шу.

Песнь 4

Ирмос: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Припев: Святии мученицы Маккавеи, молите Бога о нас.

Зако́н, Блаже́ннии, написа́вше, я́коже дре́вле Моисе́й,/ во свои́х скрижа́лех по́мысла не преступи́сте се́го да́же до сме́рти,/ но тве́рдо подвиза́стеся.

Припев: Святии мученицы Маккавеи, молите Бога о нас.

Зако́нныя Бо́гу принося́ще же́ртвы и моисе́йскому ревну́юще житию́,/ преоби́деша вся́ко законоположе́ние мучи́тельское,/ страстоте́рпцы Христо́вы.

Припев: Святии мученицы Маккавеи, молите Бога о нас.

Я́коже ка́мень во́лненное стоя́ние,/ си́це мно́ги му́ки, страда́льцы,/ му́жеским умо́м, Маккаве́и, да́же до сме́рти претерпе́сте.

Сла́ва Отцу́ и Сы́ну и Свято́му Ду́ху:

Тро́ичен: Безнача́льная Тро́ице, Еди́нице покланя́емая,/ сопресто́льная Еди́нице, Тро́ице воспева́емая,/ му́ченик мольба́ми изба́ви нас от бед и напа́стей, воспева́ющих Тя.

И ны́не и при́сно и во ве́ки веко́в. Ами́нь.

Богоро́дичен: Ра́дуйся от нас, Святая Богоро́дице./ Ра́дуйся, ра́дость ро́ждшая ми́рови./ Ра́дуйся, еди́на заступле́ние челове́ком,/ Благослове́нная Богоро́дице Чи́стая.

Песнь 5

Ирмос: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Припев: Святии мученицы Маккавеи, молите Бога о нас.

Я́коже отече́ский зако́н не разо́рших, святи́и му́ченицы,/ венцы́ пра́ведными Христо́с вас Сам венча́.

Припев: Святии мученицы Маккавеи, молите Бога о нас.

Елеаза́ру равноста́тни в ра́зуме я́вльшеся, блаже́ннии де́ти,/ и принесо́стеся со о́нем Христу́, духо́вное всесожже́ние.

Сла́ва Отцу́ и Сы́ну и Свято́му Ду́ху:

И́же святы́ми свобожда́яй от ле́сти вся́ческая,/ спаси́ нас, Го́споди, тех моли́твами, я́ко Благоутро́бен.

И ны́не и при́сно и во ве́ки веко́в. Ами́нь.

Богоро́дичен: Херуви́мов явльши́ся честне́йши, Де́во Всепе́тая,/ моли́ся Сы́ну Твоему́ спасти́ ду́ши пою́щих Тя.

Песнь 6

Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Припев: Святии мученицы Маккавеи, молите Бога о нас.

Ри́зою себе му́ченическою одея́вше, святи́и,/ сию́ труды́ страда́ния ва́шего́ испестри́сте.

Припев: Святии мученицы Маккавеи, молите Бога о нас.

Жела́юще бы́ти со Христо́м, всесла́внии му́ченицы,/ тече́ние страда́ния неукло́нным по́мыслом преидо́сте.

Сла́ва Отцу́ и Сы́ну и Свято́му Ду́ху:

Зако́н, и́же предаде́ Моисе́й, храня́ще, святи́и, зако́нно пострада́ша,/ посра́мльше Антио́ха мучи́теля.

И ны́не и при́сно и во ве́ки веко́в. Ами́нь.

Богоро́дичен: Еди́на сло́вом пло́тию Сло́ва ро́ждшая,/ изба́ви, мо́лимся, от сете́й врага́ ду́ши на́ша.

Конда́к святы́х, глас 2.

Прему́дрости Бо́жия столпи́ седмочи́сленнии/ и Боже́ственнаго Све́та свети́льницы седмосве́щнии,/ Маккаве́и всему́дрии,/ пре́жде му́чеников преве́лии му́ченицы,/ с ни́миже всех Бо́гу моли́теся/ спасти́ся почита́ющим вас.

И́кос:

Хвали́ те́пле, Сио́не, Бо́га твоего́,/ я́ко укрепи́л есть сей вереи́ врат твои́х и сыны́ тво́я благослови́./ Си́и бо, я́ко во́инство непобеди́мое,/ ополче́ние вои́стинну до́блественно и крепкому́дренно,/ про́тиву кова́рством злочести́вых богому́дренно ста́ша,/ вку́пе побе́ды венцы́ Небе́снаго Сио́на прие́млют/ и Бо́жественному престо́лу предстоя́т, о всех непреста́нно моля́щеся./ Проси́те спасти́ся пою́щим вас.

Песнь 7

Ирмос: В нача́ле зе́млю основа́вый/ и Небеса́ слово́м утверди́вый,/ Благослове́н еси́ во ве́ки, Го́споди, Бо́же оте́ц на́ших.

Припев: Святии мученицы Маккавеи, молите Бога о нас.

Мученическими пострада́вше боле́зньми,/ мучи́тельских не устраши́стеся преще́ний, Христу́ вопию́ще:/ Благослове́н Бог оте́ц на́ших.

Припев: Святии мученицы Маккавеи, молите Бога о нас.

Мученическими пострада́вше боле́зньми,/ мучи́тельских не устраши́стеся преще́ний, Христу́ вопию́ще:/ Благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Терпе́ния пожда́вше боле́зней,/ вра́жия лю́тая победи́сте кова́рства, Христу́ вопию́ще:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: И́же во утро́бу Де́выя всели́выйся/ и Тоя́ ра́ди Ада́ма обно́вль,/ благослове́н Бог оте́ц на́ших.

Песнь 8

Ирмос: Безнача́льнаго Царя́ сла́вы,/Его́же трепе́щут Небе́сныя си́лы,/ по́йте, свяще́нницы,/ лю́дие, превозноси́те во вся ве́ки.

Припев: Святии мученицы Маккавеи, молите Бога о нас.

И́стины рачи́телие и зако́на изве́стнии храни́телие бы́вше, прехва́льнии му́ченицы,/ пое́те Христа́ во ве́ки.

Припев: Святии мученицы Маккавеи, молите Бога о нас.

Седмора́сленный плод свята́го ко́рене я́ко вои́стинну,/ седмь Маккаве́и, му́ченики Госпо́дни, почти́м досто́йно.

Припев: Святии мученицы Маккавеи, молите Бога о нас.

Зако́ну ревни́тели, единоду́шныя страда́льцы, ве́рнии,/ седм Маккаве́й с ро́ждшею их почти́м досто́йно.

Сла́ва Отцу́ и Сы́ну и Свято́му Ду́ху:

Тро́ичен: Тро́ице Нераздели́мая, Еди́нице,/ в Божестве́ сла́влю Еди́ну/ и в трие́х пою́ Тя ли́цех, Еди́ну си́лу.

И ны́не и при́сно и во ве́ки веко́в. Ами́нь.

Богоро́дичен: В после́дняя нас ра́ди от Де́вы воплоще́ннаго Бо́га,/ свяще́нницы, по́йте и превозноси́те Его́ во ве́ки.

Песнь 9

Ирмос: Велича́ем Тя, Ма́терь Бо́жию,/ и сла́вим Тя, Богоро́дице Де́во,/ я́ко Спа́са ро́ждшую душ на́ших.

Припев: Святии мученицы Маккавеи, молите Бога о нас.

Сокро́вище Боже́ственных дарова́нии вои́стинну показа́стеся,/ Бо́гатство неотъе́млемое, всехва́льнии му́ченицы.

Припев: Святии мученицы Маккавеи, молите Бога о нас.

Моли́твенницы до́блии к Зижди́телю всех су́ще,/ испроси́те невла́емую жизнь душа́м на́шим.

Припев: Святии мученицы Маккавеи, молите Бога о нас.

И́же Боже́ственною ре́вностию и тепло́ю души́ творя́щия ва́шу па́мять/ сохрани́те неснеда́емы от лука́ваго.

Сла́ва Отцу́ и Сы́ну и Свято́му Ду́ху:

Тро́ичен: С Сы́ном Отцу́ и Ду́ху пра́вому поклони́мся, со А́нгелы зову́ще:/ Сла́ва в Вы́шних Бо́гу.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, две́ре свята́я, Бо́гу отве́рстая, еди́ному Прему́дрому,/ Ю́же осени́ Дух Пресвяты́й.

Свети́лен

Чу́дныя воспое́м Маккаве́и, Елиаза́ра, о́троки и Соломони́ю:/ си́и бо низложи́ша шата́ния началозло́бнаго зми́я/ и, зако́на служи́телие бы́вше, венча́шася.

Молитва

Святи́и му́ченицы Маккавейстии! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.