13 августа.

Канон праведному Евдокиму Каппадокийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свята́го, гла́с 4:

От земли́ воззва́вый тя́ к небе́сным селе́нием соблюда́ет и по сме́рти невреди́мо те́ло твое́, свя́те Евдоки́ме: ты́ бо в целому́дрии и чи́стом жи́тельстве, блаже́нне, жи́тельствовал еси́, не оскверни́в пло́ти. Те́мже со дерзнове́нием моли́ Христа́ Бо́га спасти́ся на́м.

Кано́н свята́го, гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Блаже́нне отче Евдоки́ме, моли́ Бо́га о нас.

Высоко́ житие́ име́я и восхожде́нии боже́ственными ве́сь све́тел бы́в, просвеще́ние ми́ испроси́, восхваля́ющему честны́я твоя́ по́двиги, и́миже до́бре пожи́в, получи́л еси́, Евдоки́ме, и́хже наде́ялся еси́.

Припев: Блаже́нне отче Евдоки́ме, моли́ Бо́га о нас.

Мирово́нная любя́ уче́ния и во чте́нии Свяще́нных Писа́ний упражня́яся, сласте́й уклони́лся еси́, всеблаже́нне, смра́дных и безче́стных и облагово́нился еси́, боже́ственными дарова́нии украша́емь.

Сла́ва Отцу́ и Сы́ну и Свято́му Ду́ху:

Дрема́ние о́чию от души́, блаже́нне, отгна́л еси́, бдя́ и Бо́гу приединя́яся, всено́щными стоя́нии, непрекло́нен ну́ждами естества́, те́мже ко дню́ невече́рнему дости́гл еси́.

И ны́не и при́сно и во ве́ки веко́в. Ами́нь.

Богоро́дичен: Яко черто́г одушевле́н Бо́жий и кади́льницу мы́сленнаго и светоно́снаго у́гля, при́сно благода́тную ублажа́ем Богоро́дицу, зову́ще: ра́дуйся, Хода́таице спаси́тельнаго воскресе́ния.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Блаже́нне отче Евдоки́ме, моли́ Бо́га о нас.

Глаго́лом живото́чным внима́я, испи́л еси́ во́ду спасе́ния, возгнуша́вся го́рькаго греха́, и, поя́, глаго́лал еси́ Бо́гу, Евдоки́ме: я́ко не́сть свя́т, па́че Тебе́, Го́споди.

Припев: Блаже́нне отче Евдоки́ме, моли́ Бо́га о нас.

Ми́лование стяжа́л еси́ христоподража́тельное, разда́л еси́ бога́тство тре́бующим, небе́сное же бога́тство, хода́тайствующее тебе́, получи́л еси́, вопия́, Евдоки́ме: я́ко не́сть свя́т, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Присво́ився Зижди́телю любо́вию боже́ственною, прия́л еси́ небе́сное насле́дие, и дре́ва живо́тнаго прича́стник еси́, обще́нием обожа́емь, и, поя́, сла́вне, глаго́лал еси́: я́ко не́сть свя́т, па́че Тебе́, Го́споди.

И ны́не и при́сно и во ве́ки веко́в. Ами́нь.

Богоро́дичен: Су́щи Ангел честне́йши, Зижди́теля Ангелов во утро́бе носи́ла еси́ и родила́ еси́ неизрече́нно. Ему́же вси́ пое́м: Ты́ еси́ Бо́г на́ш, и не́сть свя́т, па́че Тебе́, Го́споди.

Седа́лен свята́го, гла́с 4:

Благоволи́в благи́ми дея́нии, искуси́лся еси́, я́ко зла́то в пещи́, напа́стьми, Евдоки́ме сла́вне, те́мже и по сме́рти источа́еши бога́тно чудеса́, я́ко во́ды, и неду́ги уставля́еши, о на́с при́сно моля́ся, я́ко да согреше́ний проще́ние прии́мем.

Пе́снь 4.

Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.

Припев: Блаже́нне отче Евдоки́ме, моли́ Бо́га о нас.

Уче́ния оте́ческая храня́ невреди́мо, правосла́вным мудрова́нием, ты́ от младе́нства име́л еси́ житие́ нескве́рное и ми́лостивен нра́в, досточу́дне.

Припев: Блаже́нне отче Евдоки́ме, моли́ Бо́га о нас.

Ни молва́ мирска́я, ни вла́сти держа́ние, ни сла́ва вре́менная твоего́ к Бо́гу жела́ния преврати́, Евдоки́ме, но благоволи́л еси́ вои́стинну боже́ственным дея́нием.

Припев: Блаже́нне отче Евдоки́ме, моли́ Бо́га о нас.

Возвыша́емь боже́ственными поуче́нии всегда́, врага́ смири́л еси́, исцеле́ний де́йство прия́л еси́, Евдоки́ме, судо́м пра́ведным вся́ Управля́ющаго.

Сла́ва Отцу́ и Сы́ну и Свято́му Ду́ху:

Иска́пающи сла́дость ра́ка моще́й твои́х бога́тых исцеле́ний, стра́сти отгоня́ет, Евдоки́ме, ве́рою чту́щих тя́ и попаля́ет бесо́в вся́ полки́.

И ны́не и при́сно и во ве́ки веко́в. Ами́нь.

Богоро́дичен: Всепе́тая, во́инствы го́рними пева́емаго Бо́га родила́ еси́, Челове́ка вои́стинну бы́вша, Его́же о рабе́х Твои́х моля́щи не преста́й, Присноде́во.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Блаже́нне отче Евдоки́ме, моли́ Бо́га о нас.

Заре́ю чи́сто Святы́я Тро́ицы просвеще́н, зако́ном же Сея́ огражде́н, но́щь жития́ непреткнове́нно премину́л еси́, виде́нии боже́ственными окриля́емь, блаже́нне, и в боже́ственную жи́знь всели́лся еси́.

Припев: Блаже́нне отче Евдоки́ме, моли́ Бо́га о нас.

Ны́не на тебе́ чу́до ве́лие зри́тся и у́жаса испо́лнено: ка́ко по погребе́нии вои́стинну мно́го ле́т соблюде́ся неруши́мо, блаже́нне, твое́ те́ло, во гро́бе лежа́щее, судьба́ми, и́миже ве́сть Са́м, прославля́яй тя́.

Сла́ва Отцу́ и Сы́ну и Свято́му Ду́ху:

Бла́гоже твоему́ к Бо́гу дерзнове́нию, бла́гоже жела́нию, е́же в се́рдцы к Нему́ име́л еси́: бла́го пожи́в тезоиме́нно, просия́л еси́ пресла́вно боже́ственными светлостьми́ и уясни́л еси́ ве́рных совокупле́ния.

И ны́не и при́сно и во ве́ки веко́в. Ами́нь.

Богоро́дичен: О на́с из Тебе́ Воплоще́ннаго, Де́во Ма́ти, всегда́ моли́, благоче́стно Тя́ блажа́щих, изба́витися бе́д, и душетле́нных страсте́й и печа́лей, и ве́чнующаго пла́мене муче́ния.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Блаже́нне отче Евдоки́ме, моли́ Бо́га о нас.

Тече́ния сла́дкая иска́паху, блаже́нне, по́тове твои́ и ра́дования, исцеле́ний сия́ние во хвалу́ Христа́ Бо́га на́шего.

Припев: Блаже́нне отче Евдоки́ме, моли́ Бо́га о нас.

Во дво́рех Бо́жиих процве́л еси́, виногра́д многопло́ден прозябы́й, и доброде́телей гро́здие де́лателю душа́м оби́льно пода́в.

Сла́ва Отцу́ и Сы́ну и Свято́му Ду́ху:

Ца́рства Бо́жия возжеле́л еси́ и, над страстьми́ ца́рствовав, Евдоки́ме, по благоволе́нию лу́чшему ра́дость пра́ведных получи́л еси́.

И ны́не и при́сно и во ве́ки веко́в. Ами́нь.

Богоро́дичен: Избра́нна Бо́гу бы́вши, я́ко кра́сное село́ и простра́нное, Сему́, Де́во, была́ еси́ и черто́г, и све́щник, и трапе́за.

Конда́к, гла́с 2:

Вы́шних жела́я, с вы́шними совокупля́яся, и колесни́цу о́гненную, боже́ственными восхожде́ньми доброде́телей, соверши́л еси́ ду́шу, преблаже́нне Евдоки́ме, на земли́ пожи́в, я́ко безпло́тен, Зижди́телю все́х благоугоди́л еси́.

Икос:

Житие́ сугу́бо показа́л еси́ пра́вою, блаже́нне, ве́рою, во обое́м Бо́гу благоугоди́в, Евдоки́ме. Те́мже обре́л еси́ небе́снаго Ца́рствия насле́дие и, со святы́ми ны́не живы́й, Влады́це все́х предстои́ши; твое́ же те́ло скве́рны соблю́л еси́ кроме́ и неруши́мое любо́вию чту́щим тя́ оста́вил еси́: чи́сто бо пожи́в, сла́вне, Зижди́телю все́х благоугоди́л еси́.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Блаже́нне отче Евдоки́ме, моли́ Бо́га о нас.

Кре́постию вжили́вся Живода́вца, пло́ти удержа́л еси́ жела́ния, пребога́те, и у́м впери́л еси́ к небе́сным, поя́ кре́пко: сы́й благослове́н Бо́г и препросла́влен.

Припев: Блаже́нне отче Евдоки́ме, моли́ Бо́га о нас.

Са́м ся́ неблагоро́ден сотво́рь, благоро́дны нра́вы стяжа́в ума́ це́лостию, поуче́нием же упражня́яся богодохнове́нных писа́ний, все́ твое́ жела́ние на Бо́га Всеви́дца, блаже́нне, возложи́л еси́.

Сла́ва Отцу́ и Сы́ну и Свято́му Ду́ху:

Вы́шняго Ца́рства, вы́шняго же гра́да, Бо́жия рая́, пра́ведных наслажде́ния пи́щи нетле́нныя и бога́тства некра́домаго, Све́та невече́рняго сподо́бился еси́, блаже́нне Евдоки́ме.

И ны́не и при́сно и во ве́ки веко́в. Ами́нь.

Богоро́дичен: Его́же родила́ еси́, Влады́чице, при́сно моли́ от рабо́ты изба́вити мя́ страсте́й и осужде́ния, и стужа́ющаго ми́ лю́таго отча́яния, и от оскорбля́ющих мя́, Чи́стая, одержа́ния, Богора́доранная.

Пе́снь 8.

Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди, о́браз же Сия́ из огня́ изыма́ше, неопа́льно входя́щия. Юже пое́м, я́вльшуюся Тобо́ю конце́м дне́сь, и превозно́сим во вся́ ве́ки.

Припев: Блаже́нне отче Евдоки́ме, моли́ Бо́га о нас.

Огнь помышля́я стра́шный, пред престо́лом Христо́вым хотя́щ изы́ти, умиле́нием се́рдца те́плы излива́еши ка́пли сле́з, погаша́ющия тебе́ страсте́й пе́щь, Евдоки́ме богому́дре.

Припев: Блаже́нне отче Евдоки́ме, моли́ Бо́га о нас.

Все́ приложи́л еси́ к Бо́гу, му́дре, душе́вное о́ко и Тому́ прилепи́лся еси́, вопия́ псало́мски: Христе́ мо́й, ка́ла мя́ изба́ви и смертоно́сных страсте́й во ве́ки.

Припев: Блаже́нне отче Евдоки́ме, моли́ Бо́га о нас.

Терпе́нием пожда́тель и се́рдцем смире́н ты́ бы́л еси́, ми́лостив тре́бующим и, обы́чай принося́ бла́г и нра́вы доброде́тельны, всече́стне, в ни́хже до́бре пожи́в, чуде́с то́чиши благода́ть.

Сла́ва Отцу́ и Сы́ну и Свято́му Ду́ху:

Ра́зум име́я боже́ствен, испо́лнитель Влады́чних яви́лся еси́ слове́с, десны́я любя́ стези́, ле́вых я́ве уклоня́яся, я́ко благоу́мен и му́др. Те́мже тя́ почита́ем, богому́дре, во ве́ки.

И ны́не и при́сно и во ве́ки веко́в. Ами́нь.

Богоро́дичен: Ада́мов Соде́тель от крове́й Твои́х чи́стых зи́ждется и млеко́м пита́ется, Пита́яй вся́кое дыха́ние, Де́во Богоро́дице, те́мже я́ко Бо́жию Тя́ сла́вим Ма́терь.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Блаже́нне отче Евдоки́ме, моли́ Бо́га о нас.

Ви́дети жела́я сла́ву Бо́га на́шего, доброде́тельми богоразу́мия тебе́ удобри́л еси́ и свещено́сец во све́тлый черто́г вше́л еси́, со Ангелы живы́й, и ясне́е наслажда́ешися боговиде́ния.

Припев: Блаже́нне отче Евдоки́ме, моли́ Бо́га о нас.

Яко у́тро, я́ко со́лнце, возсия́ па́мять твоя́, су́щая во мра́це сердца́ просвеща́ющи: ты́ бо и све́та и дне́ вои́стинну сы́н яви́лся еси́, богому́дре Евдоки́ме. Сего́ ра́ди тя́ почита́ем.

Припев: Блаже́нне отче Евдоки́ме, моли́ Бо́га о нас.

Му́дростию украша́емь и ра́зумом просвеще́н, смире́нием се́рдца удобре́н, высото́ю жития́ сия́я, к мы́сленным преше́л еси́ дворо́м, иде́же на́с помяни́, почита́ющих тя́, Евдоки́ме.

Сла́ва Отцу́ и Сы́ну и Свято́му Ду́ху:

Де́нь пра́зднственный и по́льзы хода́тайственный честны́й тво́й соверша́ем, от земли́ преставле́ния: ты́ бо Госпо́день уго́дник и Того́ за́поведей де́латель яви́лся еси́ непосты́ден, досточу́дне Евдоки́ме.

И ны́не и при́сно и во ве́ки веко́в. Ами́нь.

Богоро́дичен: Све́та прия́телище утро́ба Твоя́ бы́сть, просве́щшаго ми́р, Богора́дованная, те́мже молю́ тя, окая́нный: све́тлы зари́ ми́ пода́ждь мольба́ми, Богоневе́сто, Евдоки́ма богому́драго.

Молитва

О, святы́й уго́дниче Бо́жий блаже́нне отче Евдоки́ме, по́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал еси́ Госпо́дь всем лю́бящим Его́; те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.