12 августа.

Канон апостолам Силе и Силуану и иже с ними

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Апо́столи святи́и, моли́те ми́лостиваго Бо́га, да прегреше́ний оставле́ние пода́ст душа́м на́шим.

Кано́н, гла́с 2.

Пе́снь 1.

Ирмос: Непроходи́мое волня́щееся мо́ре Бо́жиим Свои́м веле́нием изсуши́вшему и пешеше́ствовати сквозе́ е́ изра́ильтеския лю́ди наста́вльшему, Го́сподеви пои́м, сла́вно бо просла́вися.

Припев: Святи́и апо́столи, моли́те Бо́га о нас.

Предстоя́ще престо́лу Боже́ственному всегда́, сия́нием же просвеща́еми незаходи́мым, святи́и, просвеще́ние духо́вно все́м испроси́те от Отца́ све́тов низпосла́ти на́м, ве́рно ва́с почита́ющим.

Припев: Святи́и апо́столи, моли́те Бо́га о нас.

Возсия́вшаго пра́вды Со́лнца, сла́внии, узре́вше от Де́вы Богоотрокови́цы, прилепи́стеся Ему́, Боже́ственным прича́стием све́т бы́вше, и отгна́сте пре́лести мра́к ве́сь.

Припев: Святи́и апо́столи, моли́те Бо́га о нас.

Зако́н Боже́ственный на язы́це нося́ще, всю́ зе́млю проидо́сте, беззако́ние ея́ отъе́млюще, му́дрии Криске́нте и Андрони́че, Си́ло и Силуа́не, и всева́юще сло́во спаси́тельное.

Сла́ва Отцу́ и Сы́ну и Свято́му Ду́ху:

Похва́лим Епене́та сла́внаго, карфаге́нов похвалу́ боже́ственну бы́вшу, и Сло́ва ученика́, и исцеле́ний исто́чника, и вели́ка пропове́дника су́щим па́че ума́, и ве́ры утвержде́ние.

И ны́не и при́сно и во ве́ки веко́в. Ами́нь.

Богоро́дичен: Препе́таго Бо́га неизрече́нно породила́ еси́, в пло́ть от Тебе́ обле́кшася за бла́гость, Препе́тая Чи́стая. Те́мже благода́рными гла́сы песносло́вим Тя́ и ублажа́ем, я́коже дре́вле прорекла́ еси́.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Святи́и апо́столи, моли́те Бо́га о нас.

Пропове́давше воплоще́ние Влады́чне и разруши́вше соу́з зло́бы, и́же дре́вле свя́занныя неве́рием, му́дрии, разреши́сте, великопропове́дницы, и к Бо́гу приведо́сте ве́рою.

Припев: Святи́и апо́столи, моли́те Бо́га о нас.

Свети́льницы незаходи́маго светоли́тия бы́вше, тму́ безбо́жия отгна́сте, показу́юще челове́ком позна́ния све́т, прехва́льнии, сего́ ра́ди всегда́ блажи́ми есте́.

Сла́ва Отцу́ и Сы́ну и Свято́му Ду́ху:

Во всю́ зе́млю изы́де, я́коже пое́т Дави́д, апо́стольское боже́ственное веща́ние, уча́щее страсте́м Спа́совым и воскресе́нию, и́мже воста́хом от гробо́в вси́ су́етства.

И ны́не и при́сно и во ве́ки веко́в. Ами́нь.

Богоро́дичен: Обре́т Тя́, Ангелов чисте́йшую, вни́де во утро́бу Твою́ святу́ю Све́т сы́й непристу́пен, Богоро́дице, и яви́ся Челове́к, из Тебе́ воплоща́емь, во двою́ естеству́ познава́емь.

Седа́лен, гла́с 3.

Боже́ственное у́глие, Уте́шителя теплото́ю разжже́ни, прехва́льнии бы́вше апо́столи, безбо́жия мра́к разори́сте и ве́рныя свяще́нно согре́ясте. Те́мже дне́сь па́мять ва́шу чту́ще, про́сим прия́ти ве́лию ми́лость.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва, еди́на Пречи́стая Ма́ти Де́во, чистото́ю Ангелы превозше́дшая, па́че все́х мене́, пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Святи́и апо́столи, моли́те Бо́га о нас.

Кре́постию вся́ Сотво́ршаго проше́дше вселе́нную, я́коже крила́тии, спасо́сте су́щия, в пучи́не лю́тых, богоно́снии, бе́дствующия, и к ти́хому приста́нищу наста́висте.

Припев: Святи́и апо́столи, моли́те Бо́га о нас.

Утвержда́я разсла́бленныя, сла́вне, мы́сли сло́вом, Си́ло, с Па́влом пропове́дником проше́д ты́ ве́сь ми́р, мно́гими напа́стьми облива́емь и ве́рным спа́с явля́яся.

Припев: Святи́и апо́столи, моли́те Бо́га о нас.

Ве́лиими благода́тьми украша́емь, ше́ствовал еси́ от восто́ка до за́пада, я́коже заря́, с Па́влом, Си́ло прему́дре, светоза́рная со́лнцу су́щи, язы́ков сердца́ просвети́сте.

Сла́ва Отцу́ и Сы́ну и Свято́му Ду́ху:

Да восхва́лится Криске́нт и Андрони́к, и с Си́лою да возвели́чится Силуа́н дне́сь, Епене́т же да похва́лится, Христо́ва виногра́да су́ще гро́здие, сла́дость иска́пающе спаси́тельную.

И ны́не и при́сно и во ве́ки веко́в. Ами́нь.

Богоро́дичен: Чуде́с преиму́щее бы́сть е́же в Тебе́ бы́вшее чу́до: зако́нов бо кроме́ есте́ственных Законода́вца Христа́ ражда́еши, преступле́ние первозда́нных реша́ща, Всенепоро́чная.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Святи́и апо́столи, моли́те Бо́га о нас.

Взя́тся Твои́х учени́к превы́ше небе́с великоле́пие, пропове́дающих на земли́ Твое́ сла́вное прише́ствие, и стра́сти, и воскресе́ние, Сло́ве Бо́жий, Иису́се Преблаги́й.

Припев: Святи́и апо́столи, моли́те Бо́га о нас.

Проза́рнаго и пресве́тлаго сосу́да Уте́шителева, заблу́ждших наставле́ние, Селу́ня пресла́вную похвалу́, апо́столов удобре́ние, ны́не Силуа́на му́драго восхва́лим.

Сла́ва Отцу́ и Сы́ну и Свято́му Ду́ху:

Укре́плься тезоимени́тно Сло́ва посо́бием, прему́дре Андрони́че, прохо́диши, утвержда́я осла́бленая сердца́ искуше́ньми бори́теля и наставля́я в Бо́жие позна́ние.

И ны́не и при́сно и во ве́ки веко́в. Ами́нь.

Богоро́дичен: Тя́ Дави́д преднаписа́ го́ру усыре́нну, го́ру Бо́га на́шего, го́ру ту́чну: в Тебе́ бо, Отрокови́це, позна́шася Сего́ ше́ствия, пло́тию обнища́вшаго и к пе́рвому на́с блаже́нству возве́дшаго.

Пе́снь 6.

Ирмос: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́.

Припев: Святи́и апо́столи, моли́те Бо́га о нас.

Возводи́ми ко Го́споду чи́стыми манове́нии, прекло́ньшияся до́лу в поги́бельныя я́мы, привлеко́сте, му́дрии, к высоте́ небе́сней высо́каго виде́ния и дея́ния.

Припев: Святи́и апо́столи, моли́те Бо́га о нас.

Еди́ницу у́бо Существо́м, Ли́цы же Тро́ицу, богоблаже́ннии, в конце́х пропове́давше, многобо́жную мглу́ до конца́ разори́сте и свети́льницы душа́м яви́стеся.

Сла́ва Отцу́ и Сы́ну и Свято́му Ду́ху:

Вжили́в тво́й Христо́с по́мысл, Криске́нте прему́дре, пома́занием ра́дования, Халкидо́на первопа́стыря, я́ко сего́ ученика́ благоче́стно показа́, заблужде́нным стезю́ показу́ющаго.

И ны́не и при́сно и во ве́ки веко́в. Ами́нь.

Богоро́дичен: Красну́ Тя́ добро́тою Творе́ц обре́т, в Тя́ всели́ся и красе́н па́че все́х сыно́в земноро́дных яви́ся, воплоща́емь, Пресвята́я Де́во Всепе́тая.

Конда́к, гла́с 4.

Ло́зие яви́стеся Христо́ва виногра́да, гро́здие принося́ще, му́дрии, в доброде́телех, вино́ на́м спасе́ния источа́юще, е́же прие́млюще, весе́лия исполня́емся, пра́зднующе всечестну́ю ва́шу па́мять, в ню́же моли́теся о оставле́нии грехо́в на́ших, Госпо́дни апо́столи.

Пе́снь 7.

Ирмос: Вети́и яви́шася о́троцы любомудре́йшии дре́вле, от богоприя́тныя бо души́, богосло́вяще устна́ми, поя́ху: Пребоже́ственный отце́в и на́ш Бо́же, благослове́н еси́.

Припев: Святи́и апо́столи, моли́те Бо́га о нас.

Сосу́ды, вмести́вшия всю́ Уте́шителеву благода́ть, и прия́телища пре́лестей бы́вших погуби́вшия, и прия́тны Бо́гу сотвори́вшия, Си́лу и Силуа́на воспое́м согла́сно.

Припев: Святи́и апо́столи, моли́те Бо́га о нас.

Не́сть дово́лен кто́ похвали́ти Епене́та чу́днаго, сообрази́ бо ся Христу́, Его́ ра́ди подъе́мь стра́сти, Ца́рствия же причасти́ся Его́, до́бре подвиза́вся.

Сла́ва Отцу́ и Сы́ну и Свято́му Ду́ху:

Пе́т бу́ди, Кри́ск, пе́сньми боже́ственными, сокрове́нныя пути́ Христо́вы показа́вый, и осуди́вый пло́тию свое́ю осужде́нный гре́х, и мно́ги неосужде́нны показа́вый.

И ны́не и при́сно и во ве́ки веко́в. Ами́нь.

Богоро́дичен: Разреши́ плени́цы прегреше́ний мои́х хода́тайством Твои́м, Чи́стая, и любви́ соверше́нней Блага́го Сы́на Твоего́ привяжи́ удаля́ющася всегда́ от Него́ сластьми́ безме́стными.

Пе́снь 8.

Ирмос: Веле́нию мучи́телеву преподо́бнии трие́ о́троцы не повину́вшеся, в пе́щь вве́ржени, Бо́га испове́даху, пою́ще: благослови́те, дела́ Госпо́дня, Го́спода.

Припев: Святи́и апо́столи, моли́те Бо́га о нас.

Не да́ша сна́ очи́ма бо́дрии Сло́ва служи́тели, до́ндеже сна́ тя́жкаго ве́рныя ле́сти изба́виша и све́та и дне́ сы́ны показа́ша.

Припев: Святи́и апо́столи, моли́те Бо́га о нас.

Бы́вше колесни́ца Бо́жия, стяжа́сте Того́, веду́ща к небе́сному ше́ствию ва́с, апо́столи сла́внии, и ору́жия вся́ пре́лести сокруша́юща.

Сла́ва Отцу́ и Сы́ну и Свято́му Ду́ху:

Прему́дрый Си́ла, я́ко Христо́в служи́тель, досто́йно да похва́лится, и с ни́м да просла́вится ве́рно Кри́ск и Андрони́к, свети́льницы, вся́ язы́ки просвети́вшия.

И ны́не и при́сно и во ве́ки веко́в. Ами́нь.

Тро́ичен: Воспои́м Живонача́льную Тро́ицу, Ипоста́сьми устро́енную, разумева́емую же Естество́м Еди́ным, и, пою́ще, рце́м: благослови́те, вся́ дела́ Госпо́дня, Го́спода.

Песнь 9

Ирмос: Яже пре́жде со́лнца Свети́льника Бо́га возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

Припев: Святи́и апо́столи, моли́те Бо́га о нас.

Вра́чеве ду́ш же и теле́с бы́сте спаси́тельнии, духо́вными лечба́ми очища́ете неду́жныя и здра́вие показу́ете сугу́бо, богосия́ннии апо́столи, те́мже досто́йно блажи́ми есте́.

Припев: Святи́и апо́столи, моли́те Бо́га о нас.

Яви́стеся, теплото́ю Ду́ха вже́гшеся, я́ко у́глие, и ле́д пре́лести растопи́сте, и сердца́ поме́рзшая ве́рою согре́ясте, и к весне́, прему́дрии, спаси́тельней наста́висте.

Припев: Святи́и апо́столи, моли́те Бо́га о нас.

Соста́вим ли́к в дому́ Бо́га на́шего, сла́вяще Силуа́на и Си́лу, и Андрони́ка, и вели́каго Епене́та, и Криске́нта всему́драго, я́ко и́стины пропове́дники и моли́твенники на́ша су́щия.

Сла́ва Отцу́ и Сы́ну и Свято́му Ду́ху:

Свя́та и полна́ дарова́ний Боже́ственнаго Ду́ха свяще́нная вои́стинну и достохва́льная ва́ша па́мять, богоде́тельными заря́ми осия́ющи благочести́вых исполне́ние, пе́ти ва́с, му́дрии, повелева́ет.

И ны́не и при́сно и во ве́ки веко́в. Ами́нь.

Богоро́дичен: Пощади́ мя́, хотя́й во сла́ве па́ки приити́ Божества́ суди́ти вселе́нней, Всеси́льне, мольба́ми Неискусобра́чныя, Влады́ко, ро́ждшия Тя́, и да не во о́гнь по́слеши мя́, осужде́на прегреше́ньми.

Молитва

Святии сла́внии и всехва́льнии апо́столи Христо́вы Силуа́не, Си́ло, Андрони́че, Епене́те и Криске́нте, мо́лим вас с ве́рою и любо́вию: умоли́те Христа́ Го́спода претвори́ти ду́ши на́ша из грехолюби́вых в боголюби́выя; сохрани́те и соблюди́те нас моли́твами твои́ми от искуше́ний диа́вольских и паде́ний грехо́вных, и испроси́те нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же вы ны́не водворя́етеся и весели́теся. Ей, апо́столи Спа́совы! Не посрами́те нас, кре́пце на вас упова́ющих, но бу́дите нам помо́щницы и покрови́тели во всем житии́ на́шем и помози́те нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.