11 августа.
Канон мученице Серафиме Римской
![мученице Серафиме Римской мученице Серафиме Римской](img_i/091.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Неве́сто Христо́ва возлю́бленная, Серафи́мо,/ насле́днице Ца́рствия Небе́снаго,/ до́бре за Го́спода пострада́вшая/ и кро́вию твое́ю обагре́нная/ и, а́ки ца́рскою багряни́цею, украше́нная,/ помина́й нас, соверша́ющих святу́ю па́мять твою́.
Кано́н, гла́с 8.
Пе́снь 1.
Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Припев: Святая му́ченице Серафи́мо, моли́ Бо́га о нас.
Вся кра́сная ми́ра сего́ возненави́девши, Серафи́мо,/ па́че же Го́спода возлюби́вши, за Него́ страда́ти изво́ли;/ Того́ моли́ спасти́ся душа́м на́шим.
Припев: Святая му́ченице Серафи́мо, моли́ Бо́га о нас.
Егда́ наста́ стра́шный день гоне́ния,/ ты, Серафи́мо,/ не убоя́вшися, дерзнове́нно Го́спода испове́да,/ серафи́мскою любо́вию Того́ возлюби́вши.
Сла́ва Отцу́ и Сы́ну и Свято́му Ду́ху:
Благода́тию Бо́жиею, Серафи́мо, в тебе́ сия́ющею,/ блаже́нную Сави́ну и и́же с не́ю/ ко Христу́ привела́ еси́ уче́нии твои́ми.
И ны́не и при́сно и во ве́ки веко́в. Ами́нь.
Богоро́дичен: Предста́тельнице на́ша те́плая и Моли́твеннице к Сы́ну Твоему́,/ призыва́ющих Тя на по́мощь вско́ре заступи́ и спаси́.
Пе́снь 3.
Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Припев: Святая му́ченице Серафи́мо, моли́ Бо́га о нас.
Егда́ нечести́вый иге́мон Вири́лл посла́ слуги́ своя́ привести́ тя на суди́ще,/ тогда́ блаже́нная Сави́на возбраня́ше им,/ и, а́ки чи́стую голуби́цу, храня́ше тя.
Припев: Святая му́ченице Серафи́мо, моли́ Бо́га о нас.
Ты, свята́я неве́сто Христо́ва Серафи́мо,/ вели́кия ре́вности испо́лнилася еси́ ко Христу́/ и, не убоя́вшися нечести́вых слуг иге́мона, но после́довавши им,/ блаже́нную Сави́ну увеща́ше то́кмо моли́ти Го́спода о тебе́.
Сла́ва Отцу́ и Сы́ну и Свято́му Ду́ху:
Ты, Серафи́мо, глаго́лаше:/ аз же упова́ю на Го́спода Иису́са Христа́ и ве́рую,/ а́ще и недосто́йна и грешна́ есмь,/ но да предста́нет мне Иису́с Христо́с и укрепи́т мя бы́ти рабо́ю Его́.
И ны́не и при́сно и во ве́ки веко́в. Ами́нь.
Богоро́дичен: Несть нам ины́я наде́жды по Бо́зе,/ то́кмо Ты, еди́на на́ша Засту́пнице и Помо́щнице,/ спаси́ нас, упова́ющих на Тя.
Седа́лен, гла́с 4.
Вмести́лище Свята́го Ду́ха яви́лася еси́, свята́я му́ченице Серафи́мо,/ себе́ Бо́гу в же́ртву прине́сши,/ и дом Святы́я Тро́ицы сподо́билася еси́ бы́ти;/ моли́ спасти́ся душа́м на́шим.
Пе́снь 4.
Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Припев: Святая му́ченице Серафи́мо, моли́ Бо́га о нас.
Блаже́нная Сави́на, не вверя́ющи рука́м слуг нечести́вых тебе́, святы́я деви́цы,/ сама́ с тобо́ю ку́пно по́йде к иге́мону,/ хотя́щи изба́вити тя, Серафи́мо.
Припев: Святая му́ченице Серафи́мо, моли́ Бо́га о нас.
Егда́ иге́мон устыде́ся сена́торскаго благоро́дства Сави́ны,/ тогда́ отпусти́ти тя повеле́ в дом ея́,/ но по трие́х днех па́ки посла́ слуг, да предста́вят тя на суди́ще, Серафи́мо.
Сла́ва Отцу́ и Сы́ну и Свято́му Ду́ху:
Втори́цею блаже́нная Сави́на после́дова тебе́, Серафи́мо,/ но егда́ ви́де, я́ко от рук нечести́вых изъя́ти тя не возмо́же,/ а́бие оты́де в дом свой, рыда́ющи.
И ны́не и при́сно и во ве́ки веко́в. Ами́нь.
Богоро́дичен: Ты моя́ ра́дость и наде́жда в го́рести мое́й,/ Ты прибе́жище и весе́лие души́ моея́,/ спаси́ мя, Влады́чице, моли́твами Твои́ми.
Пе́снь 5
Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Припев: Святая му́ченице Серафи́мо, моли́ Бо́га о нас.
Предста́ свята́я а́гница Христова на суде́ нечести́ваго иге́мона,/ све́том благода́ти Христо́вы озаря́ема,/ и егда́ повеле́ иге́мон принести́ же́ртвы ло́жным бого́м,/ тогда́ дерзнове́нно Го́спода испове́да/ и Тому́ в же́ртву принесе́ся.
Припев: Святая му́ченице Серафи́мо, моли́ Бо́га о нас.
Ты глаго́лаше, Серафи́мо:/ Бо́гу моему́ есть уго́дная же́ртва,/ да саму́ себе́ непоро́чну соблюду́ в чистоте́ де́вства моего́/ и ины́х к тому́ же приведу́ по́мощию Его́ всеси́льною.
Сла́ва Отцу́ и Сы́ну и Свято́му Ду́ху:
Ублажи́м, ве́рнии, неве́сту Христо́ву, прекра́сную Серафи́му,/ красоты́ ю́ности не пощади́вшую и на му́ки дерзну́вшую любве́ ра́ди Христо́вы,/ безче́стие, бие́ние, ра́ны и смерть претерпе́вшую.
И ны́не и при́сно и во ве́ки веко́в. Ами́нь.
Богоро́дичен: Ма́ти пресла́дкаго Све́та моего́, Го́спода,/ не посрами́ мя, всю наде́жду на Тя возлага́ющу,/ спаси́ мя, Пречи́стая, моли́твами Твои́ми.
Пе́снь 6.
Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Припев: Святая му́ченице Серафи́мо, моли́ Бо́га о нас.
Ничто́же тя услади́ти возмо́же, неве́сто Христо́ва, от ми́ра сего́,/ то́кмо еди́на любы́ ко Го́споду распаля́ше се́рдце твое́,/ и, я́ко а́гница на па́жить, ско́ро тече́ на муче́ние,/ во е́же а́бие узре́ти Возлю́бленнаго Жениха́ Христа́,/ Его́же все́ю душе́ю возлюби́ла еси́/ и Его́же ра́ди муче́ния претерпе́.
Припев: Святая му́ченице Серафи́мо, моли́ Бо́га о нас.
Любо́вию к Бо́гу разжиза́ющися, небе́сным серафи́мом уподо́билася еси́,/ тоя́ любве́ и нам сподо́битися моли́,/ почита́ющим и лю́бящим тя, Серафи́мо.
Сла́ва Отцу́ и Сы́ну и Свято́му Ду́ху:
Ты, по словеси́ твоему́, вои́стинну це́рковь Бо́жия яви́лася еси́/ и вмести́лище Ду́ха Свята́го, Серафи́мо,/ я́ко не пощади́ пло́ти твоея́ и муче́ния претерпе́.
И ны́не и при́сно и во ве́ки веко́в. Ами́нь.
Богоро́дичен: Бу́ди мне тве́рдый щит в ско́рби мое́й,/ егда́ бу́ря злых челове́к возста́нет на мя,/ тогда́ Сама́ укрепи́ мя и на тве́рдем ка́мени ве́ры поста́ви но́зе мои́.
Конда́к, глас 2:
Серафи́мскою любо́вию Го́спода возлюби́ла еси́,/ свята́я де́во Серафи́мо,/ и всю себе́ за Го́спода на муче́ние предаде́,/ до́ндеже дости́гла еси́ Ца́рствия Небе́снаго.
И́кос:
Пренебреже́ мирску́ю суету́, свята́я му́ченице Серафи́мо,/ Еди́наго то́кмо иму́щи пред очи́ма твои́ма, Нетле́ннаго Жениха́ Твоего́,/ все жела́ние твое́ бысть Еди́н Госпо́дь,/ к Нему́же все́ю душе́ю устреми́ся,/ и предста́ с неизрече́нною ра́достию Престо́лу Влады́чню,/ и лице́м к лицу́ узре́, Его́же возлюби́ла еси́,/ тогда́ вои́стинну дости́гла еси́ Ца́рствия Небе́снаго.
Пе́снь 7.
Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Припев: Святая му́ченице Серафи́мо, моли́ Бо́га о нас.
Егда́ по повеле́нию иге́мона/ безсту́дным еги́петским ю́ношам на оскверне́ние отдана́ бысть, Серафи́мо,/ тогда́ призыва́нием И́мене Госпо́дня сих студа́ и ослепле́ния испо́лни,/ сама́ же воспева́ше Христу́:/ оте́ц на́ших Бо́же, благослове́н еси́.
Припев: Святая му́ченице Серафи́мо, моли́ Бо́га о нас.
Егда́ ви́де ско́рую по́мощь от Го́спода, Серафи́мо,/ тогда́ возде́ ру́це твои́, Тому́ пою́щи:/ оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Мо́лим тя, де́во свята́я Серафи́мо,/ и ны́не у Престо́ла Влады́чня воздви́гни ру́це твои́ за нас,/ соверша́ющих па́мять твою́, прося́щих твоея́ по́мощи и пою́щих:/ оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богоро́дичен: Укрепи́ мя, Влады́чице и Ма́ти Пресладкаго Све́та моего́, Го́спода,/ и научи́ мя взыва́ти Сы́ну Твоему́:/ оте́ц на́ших Бо́же, благослове́н еси́.
Пе́снь 8.
Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Припев: Святая му́ченице Серафи́мо, моли́ Бо́га о нас.
Повеле́ иге́мон те́ло твое́ свеща́ми опаля́ти, Серафи́мо,/ но а́бие све́щи угасо́ша, опаля́ющии тя са́ми на зе́млю падо́ша,/ ты же воспела еси́, зову́щи:/ Го́спода по́йте, дела́, и превозноси́те во вся ве́ки.
Припев: Святая му́ченице Серафи́мо, моли́ Бо́га о нас.
Егда́ па́лицами бие́на бысть, Серафи́мо,/ тогда́ трус ве́лий земли́ сотвори́ся, но нечести́вии не позна́ша си́лы Бо́жия,/ мы же, удивля́ющеся чудеси́, зове́м:/ Го́спода по́йте, дела́, и превозноси́те во вся ве́ки.
Сла́ва Отцу́ и Сы́ну и Свято́му Ду́ху:
Го́спода в по́мощь призыва́ше, Серафи́мо,/ и вся ко́зни вра́жия победи́ла еси, пою́щи:/ Го́спода по́йте, дела́, и превозноси́те во вся ве́ки.
И ны́не и при́сно и во ве́ки веко́в. Ами́нь.
Богоро́дичен: Богоро́дице, А́нгелов ра́досте и челове́ков спасе́ние,/ обурева́емую мя лю́тыми волна́ми жите́йских страсте́й спаси́ и научи́ пе́ти:/ Го́спода по́йте, дела́, и превозноси́те во вся ве́ки.
Песнь 9
Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Припев: Святая му́ченице Серафи́мо, моли́ Бо́га о нас.
Мече́м усе́чена бысть, му́ченице Серафи́мо, и, а́ки чи́стая голуби́ца, возлете́ла еси́ к Бо́гу,/ блаже́нная же Сави́на свято́е те́ло твое́, я́ко сокро́вище и маргари́ту дража́йшую,/ в свое́м гро́бе погребе́.
Припев: Святая му́ченице Серафи́мо, моли́ Бо́га о нас.
Страда́льческим ше́ствовавши путе́м, до́блественная му́ченице,/ претерпе́ бие́ния, опале́ния и вся́ческая муче́ния,/ и до конца́ сте́рла еси́ главу́ зми́еву,/ и победи́тельница яви́лася еси́ благода́тию Свята́го Ду́ха.
Сла́ва Отцу́ и Сы́ну и Свято́му Ду́ху:
Ны́не наслажда́ешися неизрече́нныя сла́вы Го́спода, свята́я му́ченице Серафи́мо,/ о нас Христа́ Бо́га моли́, соверша́ющих святу́ю па́мять твою́/ и ублажа́ющих страда́ния Твоя́.
И ны́не и при́сно и во ве́ки веко́в. Ами́нь.
Богоро́дичен: Простри́ ру́ку по́мощи изнемога́ющей души́ мое́й, Влады́чице моя́ Пресла́дкая,/ и не посрами́ наде́жды моея́, ю́же на Тя возлага́ю,/ но ми́рною стезе́ю под кро́вом Твои́м приведи́ мя к Сы́ну Твоему́/ и пресла́дкому Све́ту моему́.
Свети́лен:
Уневе́стившися Христу́, Жениху́ твоему́, вслед Его́ тече́, му́ченице Серафи́мо,/ и скороше́ственною стезе́ю возлете́ла еси́ в черто́ги Небе́сныя,/ иде́же ли́цы му́ченик и святы́х А́нгелов ра́достно срето́ша тя.
Сла́ва, и ны́не, Богоро́дичен:
Тя, Ма́терь Бо́жию, немо́лчными хвала́ми ублажа́ем и мо́лим Тя:/ спаса́й нас моли́твами Твои́ми/ и приведи́ к ти́хому Приста́нищу Сы́на Твоего́.
Молитва
О свята́я, му́ченице Серафи́мо. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![мученице Серафиме Римской мученице Серафиме Римской](img_b/091.jpg)