Шрифт

11 августа.

Канон Рождеству великого святителя и чудотворца Николая Мирликийского

Рождество́ вели́каго святи́теля и чудотво́рца Никола́я
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Чу́дное и сла́вное рождество́ твое́, святи́телю Нико́лае, Це́рковь дне́сь правосла́вных све́тло пра́зднует, и́бо стоя́нием ногу́ твое́ю яви́ тя́ Госпо́дь и произвести́ бо бы́ти свети́льника и учи́теля Мѵ́ряном, ве́сь ми́р обогаща́юща и просвеща́юща чудесы́, те́м вопие́м ти́: моли́ Христа́ Бо́га спасти́ся душа́м на́шим.

Ин тропа́рь, гла́с 2:

Дне́сь возсия́ на́м, я́ко со́лнце, торжество́ твое́, о́тче Нико́лае, и́бо в рождестве́ твое́м ди́вным стоя́нием но́г твои́х, Ангелы возвесели́л еси́ и челове́ки удиви́л еси́, проти́вныя же устраши́л еси́. Те́мже ны́не и Христо́ва Це́рковь украша́ется я́ко неве́ста, и высо́ким гла́сом вопие́т: ве́село уясни́ся моя́ добро́та прекра́сно, прииди́те, ве́рнии, возвесели́теся и подыми́те спасе́ние ва́ше и душе́вное нетле́ние, в беда́х — ско́раго помо́щника, в ско́рбех — посети́теля, в мо́ри обурева́емии — ти́хое приста́нище, а́лчущии — пита́теля, слепи́и — вождя́, ни́щии — бога́тство, ста́рцы — же́зл, ю́нии — наказа́теля и чистоте́ учи́теля, и вси́ притека́ющии с ве́рою прие́млют исцеле́ние душа́м и те́лом.

Кано́н вели́кому святи́телю и вселе́нскому чудотво́рцу Никола́ю гла́с 3.

Пе́снь 1.

Ирмос: Ди́вно, сла́вно творя́й чудеса́ Ты́ еси́, Бо́же, бе́здну оземлени́вый, и колесни́цы потопи́вый, и лю́ди спасы́й, пою́щия Тебе́, я́ко Царю́ на́шему и Бо́гу.

Припев: Святи́телю о́тче Нико́лае, моли́ Бо́га о нас.

Ди́вен и сла́вен еси́, Го́споди, творя́й чудеса́, раздели́вый мо́ре, и во́ду из ка́мене источи́вый жа́ждущим лю́дем. Напои́ у́бо, Бла́же, и мене́ росо́ю Твоея́ благода́ти, да возмогу́ воспе́ти уго́дника Твоего́ пресла́вное рождество́.

Припев: Святи́телю о́тче Нико́лае, моли́ Бо́га о нас.

Ди́вное и сла́вное рождество́ твое́, свя́те Нико́лае, от любве́ душе́вныя хощу́ похвали́ти, но недоуме́нием содержи́мь, бою́ся трепе́ща, зане́ ве́м, я́ко не красна́ похвала́ во усте́х гре́шников. Но оба́че дерза́я на благоутро́бие твое́, сла́влю свято́е твое́ рождество́.

Припев: Святи́телю о́тче Нико́лае, моли́ Бо́га о нас.

Ди́вна вои́стину и сла́вна, святи́телю, па́мять рождества́ твоего́, я́ко звезда́ у́тренняя посреди́ о́блак, и я́ко со́лнце сия́я на Це́рковь Вы́шняго, и я́ко дуга́ на о́блацех сла́вы, та́ко сия́ет хвала́ твоя́ на тве́рди церко́вней, о́тче Нико́лае.

Сла́ва Отцу́ и Сы́ну и Свято́му Ду́ху:

Ди́внаго и пресла́внаго святи́теля на пресла́вное рождество́, христоимени́тии, сте́кшеся, усе́рдно собери́теся и сла́ву Го́сподеви воздади́те, я́ко дарова́ на́м такова́ па́стыря и учи́теля неле́стна, и путеводи́теля, и от бе́д свободи́теля, еретико́м же посрами́теля.

И ны́не и при́сно и во ве́ки веко́в. Ами́нь.

Богоро́дичен: Ди́вна и преесте́ственна та́йна рождества́ Твоего́, Богоро́дице! Ки́й бо слу́х слы́ша не удиви́тся богорожде́нию Твоему́, я́ко во утро́бе Свое́й Созда́теля все́х нете́сно вмести́ла еси́, и па́ки Де́ва пребыла́ еси́?

Пе́снь 3.

Ирмос: Непло́дная душе́ и безча́дная, стяжи́ пло́д благосла́вный, веселя́щися, возопи́й: утверди́хся Тобо́ю, Бо́же, не́сть свя́т, не́сть пра́веден, па́че Тебе́, Го́споди.

Припев: Святи́телю о́тче Нико́лае, моли́ Бо́га о нас.

Непло́дну и́мам ду́шу а́з окая́нный, ка́ко тя́ могу́ похвали́ти, святи́телю? Вои́стину ты́, о́тче, пло́д благохва́льный, ду́шу мою́ плодоно́сну покажи́, да возмогу́ воспе́ти свято́е твое́ рождество́.

Припев: Святи́телю о́тче Нико́лае, моли́ Бо́га о нас.

Непло́дна бы́ста роди́теля твоя́ по рождестве́ твое́м, святи́телю Нико́лае. Естеству́ у́бо пове́дающу, я́ко не мо́гут друга́го такова́ роди́ти, доброде́тельми же я́ко Авраа́м пло́дна и ве́рна бы́ста, того́ ра́ди и мзду́ о ве́ре свое́й от Бо́га тебе́ прия́ста.

Сла́ва Отцу́ и Сы́ну и Свято́му Ду́ху:

Непло́дных чре́сл честно́е прозябе́ние, святи́телю, слы́ша, кто́ не удиви́тся, ро́ждшуся бо тебе́, свя́те? Вои́стину ди́вная о тебе́ яви́ Госпо́дь: тре́м бо часо́м неукло́нно тебе́ стоя́щу на земли́, иде́же хотя́ше омы́тися, чу́дне Нико́лае.

И ны́не и при́сно и во ве́ки веко́в. Ами́нь.

Богоро́дичен: Непло́дных ложе́сн рожде́ние, Пресвята́я Влады́чице, но ро́ждьши на́м Христа́, Плода́ Безсме́ртнаго, пита́ющаго вся́ко созда́ние и смотря́щаго всю́ тва́рь, Богороди́тельнице.

Седа́лен по 3-й пе́сни, гла́с 5:

О, блаже́нная версто́ и благослове́нное супру́жество прекра́снаго душе́ю Феофа́на и боголюби́выя Но́нны! Боже́ственным бо жела́нием совоку́плени бы́ста, и израсти́вша на́м прекра́снаго плода́, чу́днаго Никола́я, не то́кмо бо я́ко цве́т шипка́, или́ кри́на при исхожде́нии воды́, или́ сте́бло Лива́ново во дни́ жа́твы, но и́стиннаго плода́ реку́, отца́ си́рым и вдови́цам засту́пника, бога́тство ни́щим и боля́щим здра́вие и утеше́ние, и су́щим в бога́тстве окормле́ние, ста́рости подпо́р и ю́ности обучи́теля, благоче́стия окорми́теля, еретико́м же и бесо́м губи́теля. К нему́же мы́ ны́не возопие́м: о́тче святи́телю Нико́лае, моли́ спасти́ся пою́щим тя́.[Два́жды.]

Сла́ва, и ны́не, Богоро́дичен:

Блаже́нна ложесна́ твоя́, Богороди́тельнице Де́во, я́ко ши́рши небе́с я́вльшася, сло́вом бо Соста́вльшаго тва́рь во утро́бе Свое́й безсе́менно име́ла еси́, и во объя́тиих Свои́х нетру́дно носи́ла еси́, те́м мо́лим Тя́, Всеблаже́нная, е́же моли́ти от Тебе́ рожде́ннаго Христа́, Бо́га на́шего, во е́же спасти́ся пою́щим Тя́.

Пе́снь 4.

Ирмос: Покры́ла е́сть небеса́ доброде́тель Твоя́, Христе́, из Киво́та бо проше́д святы́ни, Твоея́ Нетле́нныя Ма́тере, в хра́ме Сла́вы Твоея́ яви́лся еси́, я́ко Младе́нец руконоси́мь, и испо́лнишася вся́ Твоего́ хвале́ния.

Припев: Святи́телю о́тче Нико́лае, моли́ Бо́га о нас.

Покры́ла е́сть я́ко о́блак любы́ твоя́ и благода́ть твоя́, ю́же и́маши от Бо́га, святи́телю Нико́лае, все́х призыва́ющих и́мя твое́ свято́е, всю́ду бо неоску́дно подава́еши и коего́ждо проше́ния исполня́еши. Прииди́ и ны́не посреди́ на́с неви́димо и посети́ на́с, озло́бленных грехми́, любо́вию пра́зднующих пречестно́е твое́ рождество́.

Припев: Святи́телю о́тче Нико́лае, моли́ Бо́га о нас.

Пра́зднуется и украша́ется рождество́м твои́м, святи́телю, я́ко мони́сты Це́рковь Христо́ва, и неве́стски све́тло одева́ется и красу́ется, веселя́ся и вопия́ ра́достно, глаго́ля: прииди́те и ви́дите жела́емаго мно́ю небе́снаго граждани́на и служи́теля Христо́ва, дне́сь ро́ждшася от благове́рну роди́телю.

Припев: Святи́телю о́тче Нико́лае, моли́ Бо́га о нас.

Па́мять рождества́ твоего́, о́тче святи́телю, все́м челове́ком бы́сть весе́лие. Покры́й на́с, о́тче всече́стне, призыва́ющих тя́ с ве́рою и пра́зднующих че́стно торжество́ пра́здника твоего́, святи́телю Нико́лае.

Сла́ва Отцу́ и Сы́ну и Свято́му Ду́ху:

Похваля́ему бо пра́веднику возвеселя́тся лю́дие, я́коже рече́ писа́ние. Дне́сь ны́не мы́, гре́шнии, в рождестве́ твое́м, о́тче Нико́лае, ра́дуемся и весели́мся духо́вне, Христа́ сла́вяще, и́же тебе́ такову́ю благода́ть дарова́вшаго, я́ко Того́ хвале́ния испо́лнь земля́.

И ны́не и при́сно и во ве́ки веко́в. Ами́нь.

Богоро́дичен: Пресвята́я Богоневе́сто, ро́ждшая Христа́, Прави́теля и Соде́теля все́м, немощству́ющую ду́шу мою́ исцели́ и наста́ви мя́ на дея́ния блага́я, да всегда́ сла́влю Тя́ Преблагослове́нную.

Пе́снь 5

Ирмос: На земли́ Неви́димый яви́лся еси́ и челове́ком во́лею сожи́л еси́, Непостижи́мый, и, к Тебе́ у́тренююще, воспева́ем Тя́, Человеколю́бче.

Припев: Святи́телю о́тче Нико́лае, моли́ Бо́га о нас.

На земли́, о́тче святи́телю, яви́ся ве́рным твое́ свято́е рождество́, вои́стину любе́зное торжество́, я́коже бо лива́н в кади́льнице или́ я́ко ма́слина износя́щи пло́д, та́ко на́м па́мять рождества́ твоего́, о́тче милосе́рде Нико́лае.

Припев: Святи́телю о́тче Нико́лае, моли́ Бо́га о нас.

На земли́ дне́сь ны́не, святи́телю, позна́н бы́сть, и я́ко от Бо́га позна́н бы́л еси́: просла́ви бо тя́ Госпо́дь в рождестве́ твое́м, и́бо стоя́нием честны́х но́г твои́х, явля́я хотя́щее бы́ти на тебе́ дарова́ние.

Сла́ва Отцу́ и Сы́ну и Свято́му Ду́ху:

На земли́ ны́не Це́рковь правосла́вных весели́тся, святи́телю Нико́лае, и лику́ет с ча́ды свои́ми в па́мяти рождества́ твоего́, милосе́рде, и, вопия́, глаго́лет: уясни́ся ны́не добро́та прекра́сно и никогда́ же уга́снет.

И ны́не и при́сно и во ве́ки веко́в. Ами́нь.

Богоро́дичен: На зе́млю во чре́во Твое́, Чи́стая, я́ко до́ждь на руно́ сни́де Госпо́дь и Бо́г на́ш, и от Твои́х пречи́стых деви́ческих крове́й пло́ть прие́мь и чудоде́йствова, и пострада́, и взы́де на небеса́, с Собо́ю возвыша́я пра́отца.

Пе́снь 6.

Ирмос: Глубина́ страсте́й воста́ на мя́ и бу́ря проти́вных ве́тров, но́, предвари́в, мя Ты́ спаси́, Спа́се, и изба́ви от тли́, я́ко спа́сл еси́ от зве́ря проро́ка.

Припев: Святи́телю о́тче Нико́лае, моли́ Бо́га о нас.

Глубина́ страсте́й воста́ на ны́ и бу́ря проти́вных ве́тров, но́, предвари́в на́с, о́тче святи́телю, и разори́ сопротиволежа́щий на на́с сове́т лука́ваго, и лука́вых челове́к стремле́ния, хва́лящихся о зло́бе свое́й, спаси́ ны от ни́х, милосе́рде Николае.

Припев: Святи́телю о́тче Нико́лае, моли́ Бо́га о нас.

Глубине́ бога́тства Бо́жия диви́тися су́ть до́лжно, дела́ же Бо́жии сла́вити зело́ е́сть ле́по, па́мяти же святы́х чти́ти велми́ е́сть поле́зно. Почти́м у́бо и мы́, бра́тие, и возлю́бим возлю́бленнаго Бо́гом святи́теля Никола́я, ка́ко во святе́м младе́нстве его́ ди́вная о не́м показа́ Бо́г. Пита́ше бо ся́, но не та́ко, я́коже обы́чай де́тем: в сре́ду же и пято́к еди́ною каса́шеся, и то́ к ве́черу, от ле́ваго же сосца́ отню́д не сса́ше, прозна́менуя десно́е жития́ его́.

Сла́ва Отцу́ и Сы́ну и Свято́му Ду́ху:

Глубино́ю му́дрости помышля́яй о все́х Госпо́дь, пре́жде проти́вных ве́тров тишину́ уготовля́ет, на Ариев у́бо пле́вел о́гнь вжига́ет, сего́ ди́внаго реку́ и пресла́внаго святи́теля Никола́я рождество́ явля́ет, по рече́нному от апо́стола Па́вла: его́же предуве́де Бо́г, сего́ и предъизбра́, и оправда́, и просла́ви.

И ны́не и при́сно и во ве́ки веко́в. Ами́нь.

Богоро́дичен: Глубине́ та́инства богорожде́ния Твоего́, кто́ не удиви́тся, Пресвята́я Де́во, Влады́чице? Веко́в бо Творе́ц всели́ся в Тя́ и пло́ть от Тебе́ прии́м у́мну и слове́сну, вся́ челове́ки обожи́.

Конда́к, гла́с 3.

В Мирех ро́ждься, свя́те Нико́лае, от благоро́дна ко́рене, я́ко благопло́дна ве́твь прозя́бл еси́, испо́лнь бо бы́х боже́ственных даро́в, я́ко со́лнце заря́ми ве́сь ми́р чудесы́ просвети́л еси́, сего́ ра́ди прославля́ем тя́, я́ко ученика́ и таи́нника Бо́жия благода́ти.

Ин конда́к, гла́с 3:

Яко звезда́ пресве́тлая просия́л еси́, блаже́нне Нико́лае: посреди́ Лики́и гра́да от пра́веднику роди́лся еси́, о́тче, и в честне́м рождестве́ твое́м чу́дна и сла́вна тя́ показа́ Госпо́дь, и во святе́м младе́нстве твое́м ди́вная явле́на бы́ша о тебе́. Тро́ицу бо пропове́дал еси́ тре́х часо́в стоя́нием честны́х но́г твои́х на земли́ в ча́с рожде́ния твоего́; и от сосца́ десна́го пита́шеся, от ле́ваго же ника́коже; в сре́ду же и в пято́к еди́ною, и то́ во вре́мя вече́рнее, и оттого́, о́тче, позна́н бы́л еси́ воздержа́ния неле́стное пра́вило, и я́ко и́маши бы́ти ве́лий таи́нник Бо́жия благода́ти.

Икос:

Прииди́те ны́не с на́ми, бра́тие, и ку́пно духо́вне возвесели́мся во святе́м торжестве́ богоно́снаго отца́ на́шего святи́теля Никола́я, и просла́вим пресла́вно ро́ждшагося, и от утро́бы освяще́ннаго, и Боже́ственнаго Ду́ха прии́мшаго, и Святу́ю Тро́ицу в ча́с рожде́ния своего́ стоя́нием но́г свои́х пропове́давшаго, и все́х челове́к уди́вльшаго, и, хва́ляще свято́е и чу́дное рождество́ его́, любо́вию и пра́востию серде́чною благода́рная к нему́ си́це рце́м: ра́дуйся, от ма́терних ложе́сн Бо́гу возложе́нная и от Него́ усвое́нная и освяще́нная главо́, сокруши́вый прокля́тому сатане́ главу́; ра́дуйся, предъизбра́нный и освяще́нный сосу́де и Бо́гу возложе́нный и возлю́бленный; ра́дуйся, царе́м правове́рным по́моще и окормле́ние, и на враги́ побе́да и одоле́ние, и правосла́вию утвержде́ние; ра́дуйся, в Ду́ха Свята́го облече́нный и на благодея́ние благочести́вым пода́нный; ра́дуйся, нечести́вых потреби́телю и на стра́х и́х явле́нный; ра́дуйся, бесо́м прогони́телю и еретико́м обличи́телю; ра́дуйся, я́ко во святе́м рождестве́ твое́м ди́вен все́м позна́нный, я́ко и́маши бы́ти вели́кий таи́нник Бо́жия благода́ти.

Пе́снь 7.

Ирмос: Трие́ о́троцы в пещи́, Тро́ицу прообрази́вше, преще́ние о́гненное попра́ша и, пою́ще, вопия́ху: благослове́н еси́, Бо́же оте́ц на́ших.

Припев: Святи́телю о́тче Нико́лае, моли́ Бо́га о нас.

От Тро́ицы Бо́га пропове́дал еси́, чу́дне Нико́лае, те́мже и по́чести от Него́ вене́ц прия́л еси́, блаже́нне, и ны́не в торжестве́ твое́м усе́рдно призыва́ющих тя́, не забу́ди на́с, ра́б свои́х, но свы́ше назира́й, тя́ бо и́мамы кре́пка моли́твенника.

Припев: Святи́телю о́тче Нико́лае, моли́ Бо́га о нас.

Скрижа́ль в се́рдцы свое́м от младе́нства, о́тче Нико́лае, стяжа́в ди́вных доброде́телей, напи́санну безсме́ртным пречи́стым пе́рстом Христа́ Бо́га на́шего; моли́ Его́ о на́с, во е́же написа́нным на́м бы́ти в кни́зе живо́тней, святи́телю о́тче Нико́лае, досточу́дне.

Сла́ва Отцу́ и Сы́ну и Свято́му Ду́ху:

Во святе́м рождестве́ твое́м, святи́телю о́тче, Бо́гом позна́н бы́л еси́ и Бо́га позна́л еси́, и ве́сь бы́сть Бо́жие жили́ще, ве́сь яви́ся орга́н духо́вный, возглаша́ющь вся́ку доброде́тель богодохнове́нных пе́ний спасе́ния сказа́ния и добро́ту явля́я небе́снаго Ца́рствия, святи́телю Нико́лае.

И ны́не и при́сно и во ве́ки веко́в. Ами́нь.

Богоро́дичен: С Бо́гом Засту́пницу Тя́ стяжа́хом, Ты́ бо Бо́жия Ма́ти бы́сть Творца́ и Соде́теля. И на́ше воображе́ние прие́мша Всенепоро́чная, и сие́ спа́сша от тли́ и сме́рти и сла́вою боже́ственною просла́вльшаго.

Пе́снь 8.

Ирмос: Ангельми немо́лчно в вы́шних сла́вимаго Бо́га, небеса́ небе́с, земля́, и го́ры, и хо́лми, и глубина́, и ве́сь ро́д челове́ческий, пе́сньми Того́, я́ко Созда́теля и Изба́вителя, благослови́те и превозноси́те во вся́ ве́ки.

Припев: Святи́телю о́тче Нико́лае, моли́ Бо́га о нас.

Ангели дивя́тся, ви́дяще пресла́вная в ча́с рожде́ния твоего́, о́тче Нико́лае; челове́цы же ра́дуются, прие́млюще тя́ я́ко своего́ благоде́теля и к Бо́гу моли́твенника неукло́нна, все́м бо яви́лся еси́ ра́дость спасе́ния, милосе́рде Нико́лае.

Припев: Святи́телю о́тче Нико́лае, моли́ Бо́га о нас.

Кто́ не почуди́тся или́ кто́ не просла́вит и́мене твоего́, о́тче святи́телю, слы́ша на тебе́ вы́ше зако́на есте́ственнаго бы́вшая зна́мения в рождестве́ твое́м? И те́м яви́ тя Госпо́дь свети́льника всему́ ми́ру; во святе́м же младе́нстве твое́м у ма́терних сосе́ц показа́ тя изря́дна и иску́сна; те́м вои́стинну воздержа́нию неле́стный учи́тель яви́лся еси́, свя́тителю Нико́лае.

Сла́ва Отцу́ и Сы́ну и Свято́му Ду́ху:

Вторы́й Предте́ча на земли́ яви́лся еси́ на обличе́ние беззако́ния, о́тче Нико́лае: о́в бо обличи́ Ирода беззако́нновавшаго, ты́ же, о́тче, вся́ е́реси дале́че от Це́ркве отгна́л еси́ и вся́ собла́зны и беззако́ния, я́ко хвра́стия, огне́м ре́вности своея́ попали́л еси́, ве́рных же утверди́л еси́, милосе́рде Нико́лае.

И ны́не и при́сно и во ве́ки веко́в. Ами́нь.

Богоро́дичен: Дивлю́ся, Свята́я Богоневе́сто, Влады́чице, та́инству богорожде́ния Твоего́: все́х бо Соде́тель в Тя́ всели́ся, и все́ челове́ческое естество́ на небеса́ вознесе́; прибега́ющих под кро́в Тво́й приими́ и спаси́ ны, Богоблагода́тная Влады́чице.

Песнь 9

Ирмос: Благослове́н Госпо́дь, Бо́г Изра́илев, воздви́гнувый ро́г спасе́ния на́м в дому́ Дави́да, о́трока Своего́, милосе́рдия ра́ди ми́лости, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Святи́телю о́тче Нико́лае, моли́ Бо́га о нас.

Благослове́н еси́ Бо́же о все́х, я́же твори́ши, иде́же бо хо́щеши, та́мо побежда́ется естества́ чи́н, я́коже и ны́не в рождестве́ святи́теля Твоего́ вы́ше зако́на есте́ственнаго ве́рным твои́м ди́вная и пречу́дная яви́л еси́; того́ моли́твами, Христе́, напра́ви на пу́ть ми́ра.

Припев: Святи́телю о́тче Нико́лае, моли́ Бо́га о нас.

Благослове́нна тя́ Бо́гом, все́м, о́тче Нико́лае, благослови́ у́бо и мене́, пою́щаго свято́е рождество́ твое́, и рука́ми по́мощи простри́, и приведи́ к ти́хому приста́нищу покая́ния, я́ко да всегда́ сла́влю тя́, о́тче Нико́лае.

Припев: Святи́телю о́тче Нико́лае, моли́ Бо́га о нас.

Аще и мно́го беззако́нновах а́з окая́нный, не отступа́ю наде́жди, покро́ва твоего́, о́тче Нико́лае, всегда́ прибега́ю и на тя́ наде́жду мою́ полага́ю. Те́м в ны́нешнем настоя́щем торжестве́, во святе́м твое́м рождестве́, ра́достно вопию́ ти: ты́ мя, о́тче, изба́ви от вся́кия ско́рби, и бе́д, и печа́лей, ели́ка бо хо́щеши и мо́жеши.

Сла́ва Отцу́ и Сы́ну и Свято́му Ду́ху:

Блаже́нне и богоно́се Нико́лае, ви́ждь тесноту́ души́ моея́, ка́ко вра́г мо́й подви́же на мя́ бра́нь на вся́к де́нь и не мо́жет истощи́ти ту́ла стре́л свои́х, но при́сно ураня́ет мя́ и почи́ти ми́ не дае́т. Аз же изнемого́х, но ты́, о́тче, сокруши́ ко́зни его́ моли́твами свои́ми, я́ко да прие́м по́мощь твою́ святу́ю, непреста́нно сла́влю тя́.

И ны́не и при́сно и во ве́ки веко́в. Ами́нь.

Богоро́дичен: Никто́же прибега́яй под кро́в наде́жды Твоея́, Пресвята́я Богоневе́сто, то́щ исхо́дит, но вся́к прося́й прие́млет ско́рую Твою́ по́мощь, ю́же и мне́ пода́ждь, Отрокови́це, пою́щему пресвято́е Твое́ Рождество́.

Свети́лен:

Вои́стину шле́м и ору́жие на диа́вола непобеди́мое, ты́ еси́, о́тче Нико́лае, от Бо́га явле́н еси́. Христиа́ном же поможе́ние и утвержде́ние, иера́рхом удобре́ние, в беда́х же притека́ющим к тебе́ ско́рая по́мощь и заступле́ние, святи́телю Госпо́день.

Моли́тва первая

О, всесвяты́й Нико́лае, уго́дниче преизря́дный Госпо́день, те́плый наш засту́пниче и везде́ в ско́рбех ско́рый помо́щниче! Помози́ ми, гре́шному и уны́лому, в настоя́щем сем житии, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га всея́ тва́ри Соде́теля, изба́вити мя воздушных мыта́рств и ве́чнаго муче́ния: да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно, и во ве́ки веко́в. Ами́нь.

Моли́тва вторая

О, всеблаги́й о́тче Нико́лае, па́стырю и учи́телю всех, ве́рою притека́ющих ко тво-ему́ заступлению и те́плою моли́твою тебе́ призыва́ющих! Ско́ро потщи́ся и изба́-ви Христо́во ста́до от волко́в губя́щих е; и вся́ку страну́ христианскую огради́ и сохрани́ святы́ми твои́ми моли́твами от мирска́го мяте́жа, тру́са, наше́ствия иноплеме́нников и междоусо́бныя бра́ни, от гла́да, пото́па, огня́, меча́ и внеза́пныя сме́рти. И я́коже поми́ловал еси́ трие́х муже́й, в темни́це седя́щих, и изба́вил еси́ их от царе́ва гнева и посече́ния ме́чнаго, та́ко поми́луй и мене́, умо́м, сло́вом и де́лом во тме грехо́в су́ща, и изба́ви мя гнева Бо́жия и ве́чныя ка́зни. Я́ко да твои́м хода́тайством и по́мощию, Свои́м же милосе́рдием и благода́тию, Христо́с Бог ти́хое и безгре́шное житие́ даст ми пожи́ти в веце сем, и изба́вит мя от шу́ияго стоя́ния, сподо́бит же десна́го со все́ми святы́ми во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Рождество́ вели́каго святи́теля и чудотво́рца Никола́я