11 августа.
Канон мученику Каллинику
![Свята́го му́ченика Каллини́ка Свята́го му́ченика Каллини́ка](img_i/031.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Му́ченик Тво́й, Го́споди, Каллини́к во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.
Кано́н, гла́с 4.
Пе́снь 1.
Ирмос: Колесни́цы фарао́новы и си́лу его́ вве́рже в мо́ре Кре́пкий во бра́нех; воспое́м пе́снь но́вую, я́ко просла́вися.
Припев: Святы́й му́чениче Каллини́че, моли́ Бо́га о нас.
На колесни́цу мы́сленную все́д, я́ко вои́стинну триста́ты потопи́л еси́ мы́сленнаго Еги́пта во струя́х кро́ви твоея́, му́чеников похвало́ Каллини́че.
Припев: Святы́й му́чениче Каллини́че, моли́ Бо́га о нас.
Боже́ственною оде́ждею оде́явся, му́дре, оде́жды земны́я совле́клся еси́, преблаже́нне, и к по́двигу поте́кл еси́, и врага́ посрами́л еси́.
Сла́ва Отцу́ и Сы́ну и Свято́му Ду́ху:
Разори́в вра́жия многоплете́нныя ко́зни у́зами страда́ний твои́х, неде́йственна сего́ пове́ргл еси́ на зе́млю, Каллини́че, и нога́ми твои́ми попра́л еси́.
И ны́не и при́сно и во ве́ки веко́в. Ами́нь.
Богоро́дичен: Еже проро́ческий прови́де ли́к, я́ко две́рь небе́сную и неопали́мую купину́, Тя́, Де́во Ма́ти Чи́стая, Бо́га ро́ждшую, позна́хом.
Пе́снь 3.
Ирмос: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́: я́ко не́сть свя́т, я́ко Ты́, Бо́же на́ш.
Припев: Святы́й му́чениче Каллини́че, моли́ Бо́га о нас.
Христо́вою любо́вию уязвля́емь, му́ченик взыва́ше, в по́двизех претерпева́я: во благово́ние теку́ мѵ́ра, после́дуя стра́сти Твое́й страда́нием кро́ве.
Припев: Святы́й му́чениче Каллини́че, моли́ Бо́га о нас.
Без наве́та соблю́лся еси́ от стре́л змии́ных: твою́ бо пя́ту мудре́ц в ра́нах прете́р, главу́ свою́ сокруши́, Каллини́че, во страда́ниих твои́х.
Сла́ва Отцу́ и Сы́ну и Свято́му Ду́ху:
Посе́к пре́лести те́рние мече́м духо́вным, Христо́вы ве́ры неле́стно пло́д прине́сл еси́, всеблаже́нне, стори́чный боле́зней твои́х Влады́це твоему́.
И ны́не и при́сно и во ве́ки веко́в. Ами́нь.
Богоро́дичен: Несказа́нна Рождества́ рожде́ния Ты́ еди́на Ма́ти была́ еси́, во утро́бе Твое́й заче́нши Иже пре́жде Тебе́ Бо́га Сло́ва, и млеко́м пита́ла еси́, Пречи́стая, я́ко Младе́нца, Безнача́льнаго.
Седа́лен, гла́с 3.
Ре́вность боже́ственную в души́ твое́й име́я, сла́вне, беззако́ннующия всу́е терпели́вно обличи́л еси́ и, прибли́жився му́кам, проше́л еси́ тво́й по́двиг до́блим умо́м, му́чениче Каллини́че. Христа́ Бо́га моли́ дарова́ти на́м ве́лию ми́лость.
Сла́ва, и ны́не, Богоро́дичен:
Боже́ственнаго естества́ не отлу́чся, пло́ть бы́в во чре́ве Твое́м, но Бо́г вочелове́чся и пребы́сть, Иже по рождестве́ Ма́терь Тя́ Де́ву, я́ко пре́жде рождества́, сохрани́в Всенепоро́чну, еди́н Госпо́дь, Того́ приле́жно моли́ дарова́ти на́м ве́лию ми́лость.
Пе́снь 4.
Ирмос: Услы́шах, Бо́же, слу́х Тво́й и убоя́хся, разуме́х дела́ Твоя́ и ужасо́хся, Го́споди, я́ко Твоего́ хвале́ния испо́лнь земля́.
Припев: Святы́й му́чениче Каллини́че, моли́ Бо́га о нас.
Омыва́яся в струя́х твои́х крове́й, преблаже́нне, яви́лся еси́ чисте́йший ду́хом и в наслажде́ние дости́гл еси́ безпло́тных, му́чениче Каллини́че.
Припев: Святы́й му́чениче Каллини́че, моли́ Бо́га о нас.
Ка́мень че́стен вои́стинну назда́лся еси́ Це́ркви, и хра́мы и́дольския стря́сл еси́, и на зе́млю низложи́л еси́ неукло́нным сопротивле́нием страда́ний твои́х.
Сла́ва Отцу́ и Сы́ну и Свято́му Ду́ху:
Смертоно́сная враго́в ласка́ния вои́стинну отри́нул еси́, му́чениче, словесы́ духо́вными и, душе́ю укрепля́емь, на пре́лесть поста́вил еси́ побе́ду.
И ны́не и при́сно и во ве́ки веко́в. Ами́нь.
Богоро́дичен: Ны́не Тя́ купину́, ю́же в Сина́и, пропису́я, Моисе́й вели́кий неопа́льну ви́дяше, Огнь во утро́бе нося́щу, Чи́стая.
Пе́снь 5
Ирмос: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.
Припев: Святы́й му́чениче Каллини́че, моли́ Бо́га о нас.
В ти́ну попо́лзся непостоя́нную, Го́споди, и во глубину́ грехо́в мои́х, и в бу́рю лю́тых мои́х дея́ний впа́д, зову́ Ти: Ты́ бу́ди ми́ Помо́щник.
Припев: Святы́й му́чениче Каллини́че, моли́ Бо́га о нас.
Стопа́ми пригвожде́н но́г, му́чениче, пе́л еси́: в пути́ свиде́ний Твои́х бога́тно наслади́хся, Влады́ко, терпя́ ра́ны, Страстополо́жниче, наде́ждею воздая́ний.
Сла́ва Отцу́ и Сы́ну и Свято́му Ду́ху:
Ми́лостию ты́ еле́я, до́бре ку́плю соде́лав муче́ния, свещу́ твою́ уясни́л еси́, преблаже́нне, те́мже ве́сь бы́л еси́ же́ртва непоро́чная, всесожже́ние прия́тно.
И ны́не и при́сно и во ве́ки веко́в. Ами́нь.
Богоро́дичен: Проро́ков пропове́дание, и апо́столов похвало́, и му́чеников удобре́ние, Ты́ еси́, Богоро́дице, Боже́ственное Сло́во нося́щи па́че сло́ва, Пречи́стая, е́же пре́жде ве́к из Отца́.
Пе́снь 6.
Ирмос: Бу́рею грехо́вною погружа́емь, я́ко во чре́ве ки́тове содержи́мь, с проро́ком зову́ Ти: возведи́ от тли́ живо́т мо́й, Го́споди, и спаси́ мя.
Припев: Святы́й му́чениче Каллини́че, моли́ Бо́га о нас.
Ста́да твоего́ огра́да невре́дна от звере́й соблюде́ся ересе́й: твои́х бо страда́ний держа́щи, сла́вне, тве́рду па́лицу, волко́в яви́ся отгони́тельница.
Припев: Святы́й му́чениче Каллини́че, моли́ Бо́га о нас.
Но́щь отбеже́ пре́лести страда́нием твои́м, и ве́ры добро́та возсия́, во испове́дании твое́м, пресла́вне, Тро́ицы побо́рниче, я́ко со́лнце, в конце́х.
Сла́ва Отцу́ и Сы́ну и Свято́му Ду́ху:
Яко ве́ры пропове́дник изве́стен, беззако́ннующему вопия́ше гото́во: что́ прети́ши иму́щему не умягче́ну душе́вную тве́рдость? стре́лы бо безбо́жных легки́.
И ны́не и при́сно и во ве́ки веко́в. Ами́нь.
Богоро́дичен: Пребыва́еши по рождестве́, Неискусобра́чная, я́ко пре́жде рождества́, Де́ва и Нетле́нная, и́бо е́же в Тебе́ та́инство, Богоневе́сто, па́че ума́ вся́каго и всего́ сло́ва познава́ется.
Конда́к, гла́с 2.
Го́рняя кра́сная досто́йно ны́не насле́довал еси́: Христо́вою бо зело́ любо́вию разже́гся, на о́гнь, Каллини́че, те́м му́жественно дерзну́л еси́, Ему́же и ны́не предстоя́, не преста́й моля́ о все́х на́с.
Пе́снь 7.
Ирмос: Огнь, паля́ в пещи́, истряса́шеся, о́троцы ороша́хуся и, пою́ще, глаго́лаху: благослове́н еси́, еди́н сы́й Бо́же оте́ц на́ших.
Припев: Святы́й му́чениче Каллини́че, моли́ Бо́га о нас.
Сла́сти мне́ хода́тайственна му́кам, су́ть страши́лища: ни бо о́гнь, ни ра́ны и́стиннаго Рачи́теля моего́, — му́ченик вопия́ше, — разлуча́т мя́.
Припев: Святы́й му́чениче Каллини́че, моли́ Бо́га о нас.
Вжиля́емь, сла́вне, посо́бием Христо́вым, на зе́млю сопротивоборца́, побори́в, низве́ргл еси́ и тезоимени́т яви́лся еси́ на мучи́теля добропобе́дник.
Сла́ва Отцу́ и Сы́ну и Свято́му Ду́ху:
Диа́вола посрами́л еси́, и Ангелы возвесели́л еси́ страда́нии твои́ми, сла́вне, и Христу́ взыва́л еси́: благослове́н еси́, еди́н сы́й Бо́же оте́ц на́ших.
И ны́не и при́сно и во ве́ки веко́в. Ами́нь.
Богоро́дичен: Разреши́ла еси́ рождество́м Твои́м, Де́во Пречи́стая, Евы прама́тере кля́тву: Ма́ти бо еси́ все́х Влады́ки, Яже все́м ра́дость исхода́таивши.
Пе́снь 8.
Ирмос: Вся́ческая, Влады́ко, прему́дростию Твое́ю соста́вил еси́, земли́ же па́ки утверди́л еси́, я́коже ве́си, дно́, основа́нием водрузи́вый на вода́х безме́рных. Те́м вси́ вопие́м, воспева́юще: благослови́те, дела́ Госпо́дня, непреста́нно Го́спода.
Припев: Святы́й му́чениче Каллини́че, моли́ Бо́га о нас.
Ра́дуйся, наслажде́ние страда́льцев и́стинных; ра́дуйся, удобре́ние ве́ры и украше́ние; ра́дуйся, пресве́тлый му́чеников светоно́сец, и́же ле́сть разори́в страда́нием твои́м и све́т просия́вый ми́рови, Каллини́че прему́дре.
Припев: Святы́й му́чениче Каллини́че, моли́ Бо́га о нас.
Мучи́тель посрами́ся по́двиги твоего́ противле́ния, побежде́ни бы́ша злоде́и ра́нами твои́ми, блаже́нне. Гвоздьми́ пя́ты твоя́ уязви́шася, пре́лесть же попали́ся вся́, и потреби́шася и́дольстии хра́ми, богому́дре, огне́м страда́ния твоего́.
Сла́ва Отцу́ и Сы́ну и Свято́му Ду́ху:
О чту́щих тя́ к Бо́гу твои́м дерзнове́нием, Каллини́че, прекло́нься, моли́ непреста́нно, ста́ду твоему́ предста́ни, изыма́я сие́ от разли́чных се́тей льсти́ваго, и утверди́ ве́рою: тобо́ю бо расте́т и крепи́тся.
И ны́не и при́сно и во ве́ки веко́в. Ами́нь.
Богоро́дичен: Ду́хом проро́цы Тя́, Де́ву, прообрази́ша: се́нь же, и трапе́зу, и ру́чку, и све́щник, и го́ру пресвяту́ю, и о́блак, и скрижа́ли, ковче́г же, и же́зл, и две́рь Боже́ственну, е́юже все́м челове́ком отве́рзеся дре́вний ра́й.
Песнь 9
Ирмос: Безсе́менное Рождество́ Твое́, Богоро́дице Чи́стая, Христа́ Бо́га на́шего, пе́сньми немо́лчными велича́ем.
Припев: Святы́й му́чениче Каллини́че, моли́ Бо́га о нас.
Истка́ся тебе́ свы́ше ри́за ве́ры, е́юже обнажи́л еси́ врага́ на суди́щи, му́чениче сла́вне.
Припев: Святы́й му́чениче Каллини́че, моли́ Бо́га о нас.
Непщева́ше мучи́тель прельсти́ти ласка́ньми му́ченика, но то́й в ве́ре утвержда́шеся.
Припев: Святы́й му́чениче Каллини́че, моли́ Бо́га о нас.
Чи́сто всесожже́ние и прия́тна же́ртва, Каллини́че сла́вне, огне́м по́двигов прине́слся еси́ Бо́гу.
Сла́ва Отцу́ и Сы́ну и Свято́му Ду́ху:
Красны́ но́ги твои́, страда́льче Каллини́че, гвоздьми́ пригвожде́ны и к пропове́данию боже́ственному иду́щи.
И ны́не и при́сно и во ве́ки веко́в. Ами́нь.
Богоро́дичен: Покро́в Тя́ стяжа́хом, и приста́нище, Чи́стая, и ору́жие, и забра́ло, и тве́рду наде́жду в беда́х при́сно.
Молитва
О святы́й уго́дниче Бо́жий, му́чениче Каллини́че! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Свята́го му́ченика Каллини́ка Свята́го му́ченика Каллини́ка](img_b/031.jpg)