Шрифт

10 августа.

Канон Богоматери в честь иконы Ея Зографския-Предвозвестительницы

Богома́тери в че́сть ико́ны Ея́ Зогра́фския-Предвозвести́тельницы

Тропа́рь, гла́с 2:

Яко до́ждь на руно́, Сло́во Бо́жие в пречи́стую утро́бу Твою́ сни́де, и Ма́терь Тя́ Своего́ неизрече́ннаго воплоще́ния показа́, те́мже и о́бразу Твоему́ свято́му подаде́ благода́ть чудоде́йствий. Сего́ ра́ди вопие́м Ти́: избавля́й на́с, Влады́чице, от все́х бе́д, и спаси́ ду́ши на́ша, я́ко Милосе́рда.

Кано́н Пресвяте́й Богоро́дице, гла́с 8.

Пе́снь 1.

Ирмо́с: Проро́чески Богови́дец Богоро́дицы о́браз зря́й, немо́кренными нога́ми Чермну́ю про́йде пучи́ну и, игра́я, вопия́ше: пои́м побе́дную пе́снь Го́сподеви, я́ко просла́вися.

Пе́снь сию́ принося́щу Ти́, Влады́чице, отве́рзи ми́ уста́ и умудри́ у́м, я́ко да воспою́ Тебе́ разу́мно, по достоя́нию Твои́х вели́ких благодея́ний.

Аще бы словеса́ на́ша умно́жилися па́че песка́ морска́го и мно́жества зве́зднаго, оба́че не довле́ют восхвали́ти Тя́, Влады́чице, ра́вно дарова́нию чу́дных Твои́х на́м благодея́ний.

Хо́лми взыгра́йте и удо́лия сликовству́йте на́м в прославле́нии чу́дныя ико́ны Богома́тере, я́ко Тоя́ ра́ди вся́ блага́я на на́с излива́ются и печа́ли на́ша утоля́ются.

Окри́н, по́лн Боже́ственных дарова́ний, ико́на Твоя́, Влады́чице, яви́ся, я́ко от ороше́ния руно́внаго изли́вающь на́м вся́ благопотре́бная жи́зни вре́менней, па́че же и ве́чней.

Пе́снь 3.

Ирмо́с: Утвержде́ние мое́, Спа́се, еси́, прибе́жище мое́ и си́ла, поколеба́вшееся се́рдце мое́ утверди́ в стра́се Твое́м, я́ко не́сть свя́т, я́коже Ты́, Бо́г на́ш.

Мно́гая Твоя́ на́м благодея́ния воспе́ти от любве́ усе́рдствующе, не возмога́ем, оба́че Ты́, Влады́чице, я́коже Сы́н Тво́й две́ ле́пты вдови́цы, убо́гое сие́ приими́ пе́ние, и возда́ждь на́м ми́лости Твоя́.

Ико́на Твоя́, Богома́ти, исто́чник благодея́ний на́м показа́ся, тоя́ бо ра́ди оби́тель сия́ от о́гненнаго сожже́ния спасе́ся. Сего́ ра́ди благода́рно вопие́м: не́сть на́м ина́го в беда́х избавле́ния, па́че Тебе́, Влады́чице.

Язы́к челове́чь не мо́жет изрещи́ та́йну присноде́вства Твоего́, Пречи́стая: я́коже бо я́блоко от дре́ва, та́ко Христо́с от ложе́сн Твои́х произы́де, и де́вство Твое́ рожде́нием Свои́м запечатле́. Те́мже у́бо и ико́ну Твою́ прича́стну благода́ти сотвори́, то́ю на́м по́мощь Свою́ явля́я.

Иоа́нн Предте́ча взыгра́ся во чре́ве ма́терне прише́ствию Твоему́, Влады́чице, ра́дуяся. Мы́ же, гре́шнии, ико́ну Твою́ и держи́маго Тобо́ю Богомладе́нца Иису́са зря́ще, ликовству́ем. Его́же не преста́й моли́ти е́же спасти́ся на́м.

Седа́лен, гла́с 4. Подо́бен: Удиви́ся Ио́сиф.

Боже́ственными заря́ми просвети́ пою́щия Тя́, и умы́ утверди́, Де́во Всенепоро́чная, кре́пкая, всего́ми́ра, Засту́пнице, да благодея́ния Твоя́ прославля́юще, вопие́м Ти́, Препе́тая: не преста́й, моли́твами Твои́ми спаса́ти рабы́ Твоя́ от вся́ких бедъ́, еди́на Благослове́нная.

Сла́ва, и ны́не, гла́с 6. Подо́бен:

Влады́чице Пречи́стая, ви́ждь на́ших я́зв боле́зни, и исцели́ ны́, неду́гующия душа́ми и телесы́, да покланя́ющеся свято́му о́бразу Твоему́, прославля́ем Тя́, Усе́рдную Засту́пницу ро́да христиа́нскаго.

Пе́снь 4.

Ирмо́с: Услы́шах, Го́споди, слу́х Тво́й и убоя́хся, я́ко неизрече́нным Сове́том, Бо́г сы́й Присносу́щный, от Де́вы проше́л еси́, вопло́щся. Сла́ва снизхожде́нию Твоему́, Христе́, сла́ва си́ле Твое́й.

Егда́ отцы́ на́ши моле́бная пе́ния пред честно́ю ико́ною Твое́ю, Богома́ти, те́пле вознесо́ша, тогда́ возже́гшийся пла́мень а́бие угасе́, и оби́тель сия́ от ги́бели изба́вися, прославля́ющи Тя́, Влады́чице.

Ра́дость ве́лия бы́сть тогда́ все́м и́ноком оби́тели сея́, я́ко кро́в, жили́ще и́х оби́тель, невреди́м от пла́мени сохрани́ся. Сего́ ра́ди единогла́сно уста́виша сие́ пра́зднество в че́сть чу́дныя ико́ны Твоея́, Влады́чице, да не забве́нна бу́дут благодея́ния Твоя́.

Обы́чно Тебе́, Де́во, пра́зднество сие́ сотворя́ем, почита́юще ико́ну Твою́ святу́ю, е́юже оби́тель страстоте́рпца Гео́ргия украси́ла еси́. С ни́м же моли́ся о на́с к Сы́ну Твоему́ и Бо́гу на́шему.

Мно́жеством Твои́х на́м благодея́ний понужда́еми, благода́рно Тебе́ вопие́м: ра́дуйся, Пречи́стая Ма́ти Бо́жия, прибе́жище на́ше, покро́в и весе́лие.

Пе́снь 5

Ирмо́с: Утренюет ду́х мо́й к Тебе́, Бо́же, зане́ све́т повеле́ния прише́ствия Твоего́, и́миже у́бо озари́ у́м на́ш, Влады́ко, и наста́ви на стезю́ жи́зни.

Одержи́мии мра́ком страсте́й, к Твое́й пресве́тлаго зра́ка ико́не припа́даем, гре́шнии: Ты́, Пречи́стая, луча́ми благода́ти у́м на́ш озари́, да во све́те за́поведей Сы́на Твоего́ всегда́ ше́ствуем, прославля́юще Тя́, Богома́терь.

Ны́не свяще́нная оби́тель Зогра́фская све́тло торжеству́ет, пра́зднующи па́мять бы́вшаго чудесе́ избавле́ния своего́ от губи́тельства пожа́рищнаго, и Тебе́, Влады́чице, я́ко Засту́пнице свое́й пе́сни хвале́бныя воспева́ют, ра́дующеся.

Ангелов Цари́це и всея́ тва́ри Влады́чице, приими́ сия́ на́ша ма́лыя хвалы́, и не лиши́ на́с ми́лости Твоея́ в жи́зни се́й и в гряду́щем животе́, да Тя́ непреста́нно велича́ем и ублажа́ем.

Хотя́щим иногда́ злове́рным лати́ном е́ресь свою́ на Афо́не утверди́ти, Ты́, Богома́ти, чрез чу́дную Твою́ ико́ну наше́ствие те́х предвозвести́ла еси́, я́ко Засту́пница на́ша при́сная.

Пе́снь 6.

Ирмо́с: Превзыдо́ша главу́ мою́ беззако́ния моя́, я́ко тя́жкое бре́мя на мя́ обремени́вшаяся, во отча́яния глубины́ низвлача́т мя́, но пре́жде да́же погрязну́ти ми́, Го́споди, спаси́ мя́.

Ангелы чти́ма и по возду́ху и́ми носи́ма бы́сть ико́на Твоя́, Влады́чице, сего́ ра́ди и мы́ благогове́йно то́й покланя́емся, и пред не́ю ве́село Ти́ взыва́ем: ра́дуйся, Пречи́стая Де́во, Неве́сто неневе́стная.

Пе́снь хвалы́ воспе́ Тебе́ чу́дный о́ный ста́рец, и́же узре́ ико́ну Твою́, Влады́чице, из ке́ллии его́ на врата́ монасты́рская Ангелы принесе́нную. Те́мже и мы́ с ни́м вопие́м Ти́: ра́дуйся, Неве́сто неневе́стная.

Ездяй на херуви́мех и пева́емый от серафи́м Госпо́дь, повеле́ Ангелом Свои́м ико́ну Твою́, Богома́ти, незри́мо носи́ти, да ве́дяще сие́, вси́ вопию́т Ти́: ра́дуйся, Ангелы чти́мая и серафи́мы воспева́емая Цари́це.

Ны́нешнее пра́зднество в че́сть ико́ны Твоея́ соверша́юще, вопие́м Ти́, Влады́чице: я́коже доны́не оби́тель сию́ и все́х на́с, зде́ живу́щих, спаса́ла еси́ от все́х бе́д, та́ко и в бу́дущая времена́ сохраня́й от все́х зо́л, да в ми́ре и благоче́стии житие́ на́ше сконча́ем.

Конда́к, гла́с 8. Подо́бен: Взбра́нной Воево́де.

Аще и огню́ подлежа́ше по естеству́, ико́на Твоя́, Влады́чице, но си́ла Твоя́ благода́тная с то́ю су́щи, си́лу о́гненную препобеди́. Те́мже и ны́не си́лу о́гненную е́ю угаса́еши, и жили́ща на́ша от вся́каго вре́да сохраня́еши, сего́ ра́ди хвале́бно Ти́ взыва́ем: ра́дуйся, Де́во, христиа́н похвало́, и и́ноков преди́вное заступле́ние.

Икос:

По́стников Зогра́фских сосло́вие, в беде́ су́ще от внеза́пнаго оби́тели и́х возжже́ния, пред свято́ю Твое́ю ико́ною те́пле возопи́ша. О, Влады́чице, я́же иногда́ наше́ствие лати́нское предвозвести́ла еси́, и а́бие моле́ние и́ноков услы́шала еси́, лю́тость о́гненную незри́мо угаси́ла еси́. Ты́ и дне́сь и в гряду́щия времена́, предста́тельством Твои́м к ро́ждшемуся из Тебе́ Христу́, Бо́гу на́шему, от все́х зо́л на́с сохраня́й, и о́гнь страсте́й грехо́вных от на́с отгоня́й, я́ко христиа́н похвала́, и и́ноков преди́вное заступле́ние.

Пе́снь 7.

Ирмо́с: Подража́тели трие́х Твои́х, Го́споди, отроко́в сотвори́ ны́, сопротивля́ющияся греху́, и о́гнь страсте́й, благода́тию Твое́ю, попира́ющия, и пою́щия: благослове́н еси́, Бо́же оте́ц на́ших.

Исра́ильския иногда́ о́троки, в пещи́ пла́мене о́гненнаго, спасо́шася Богоче́стия ра́ди, и́же и прообрази́ша собо́ю та́йну Бо́жия к на́м Тобо́ю, Богома́ти, снизхожде́ния. Юже воспева́юще, и Твоя́ на́м благодея́ния прославля́юще, зове́м: благослове́н Бо́г оте́ц на́ших.

Еди́на еси́ Ты́ по Бо́зе вели́чие на́ше и похвала́, Де́во Богоневе́стная; Тобо́ю бо от бе́д спаса́емся, и к Тебе́ прибега́ем, и приле́жно мо́лимся: изба́ви, Влады́чице, рабы́ Твоя́ ве́чнаго муче́ния, воспева́ющия Твоя́ чудеса́.

Богоро́дице Присноде́во, ка́ко Тя́, раби́ Твои́, по достоя́нию восхва́лим? Яко о́бразом Твои́м честны́м оби́тель сию́ прославля́еши, и вся́ блага́я и поле́зная к житию́ на́шему промысли́тельне нетру́дно подае́ши.

Очи́ма на́шима зря́ще ико́ну Твою́, Богома́ти, умы́ свои́ми к Тебе́, Госпоже́ на́шей, на небеси́ Сы́ну Твоему́ и Бо́гу на́шему предстоя́щей, возно́симся и моля́щуюся Ему́ о на́с благогове́йно созерца́ем.

Пе́снь 8.

Ирмо́с: От Отца́ пре́жде ве́к Рожде́ннаго и от Ма́тере в после́дняя Воплоще́ннаго, свяще́нницы, благослови́те, лю́дие, превозноси́те во вся́ ве́ки.

Горе́ пою́т Тя́ Ангельския си́лы, до́ле же превозно́сит челове́ческий ро́д, и вся́ тва́рь благосло́вит Тя́, Пречи́стая Богоро́дице Де́во. Приими́ у́бо и от на́с, недосто́йных, приноси́мое Тебе́ сие́ моле́ние.

Облаче дождя́ мы́сленнаго, Пречи́стая Де́во, ороси́ ны, пали́мыя зно́ем безме́рных искуше́ний, да не сожже́мся, я́ко хвра́стие удобосожига́емое, но да яви́мся, я́коже зла́то очище́но, досто́йны черто́гом небе́сным.

Ми́лости пучи́на, Ма́ти Бо́жия, к Тебе́ притека́ющия и о́бразу Твоему́ чудотво́рному покланя́ющияся, изба́ви от бе́д и скорбе́й, да досто́йно хва́лим и́мя Твое́, препе́тое и превозноси́мое во ве́ки.

Аще и многогре́шни и бездерзнове́нни есмы́ недосто́йнии, за не иску́сно за́поведи Сы́на Твоего́ храни́м, и мно́гажды бла́гость Его́, творя́ще неподо́бная, преогорчева́ем. Но Ты́, Пречи́стая, бу́ди о на́с к Нему́ хода́таица и моле́бница, да Тебе́ ра́ди поми́лует на́с, превознося́щих Его́ во ве́ки.

Песнь 9

Ирмо́с: Воплоще́ния Бо́жия орга́н, Де́во, была́ еси́, пло́ти Сло́ва Бо́жия черто́г, соедине́ному бо существо́ма, сугу́бома же де́йствома и хоте́ньма показу́ема, Его́же пою́ще, Тя́, Богоро́дице, велича́ем.

Ту́чная гора́ и усыре́нная Ду́хом Святы́м, Пречи́стая Де́во, го́ру Афо́нскую и оби́тель сию́, я́ко насле́дие Твое́, спаса́й от все́х зо́л и сопроти́вных обстоя́ний, да вси́ подвиза́ющиися, я́ко Госпожу́ свою́, непреста́нно Тя́ ублажа́ют.

Его́же родила́ еси́, Христа́, на ико́не с Тобо́ю изображе́на я́ко Младе́нца, Того́, Пречи́стая, умоля́ти не преста́й о все́х, с любо́вию покланя́ющихся Твоему́ зра́ку, да и́миже ве́сть судьба́ми, спасе́т ду́ши на́ша.

Реку́ тя́ сла́дкую и пото́к насыще́ния, ма́нну небе́сную, изоби́лие и ми́лость приснотеку́щую стяжа́вше, Отрокови́це, пое́м Рождество́ Твое́ и чудеса́, ико́ною Твое́ю на́м явле́нныя.

Иже го́рними и до́льними облада́яй, То́й Сы́н Тво́й бы́сть послу́шный, те́мже моли́ся Ему́, Богома́ти, да и на́м, певце́м Твои́м, благода́ть послуша́ния пода́ст, я́ко кроме́ сего́ никто́же вни́дет в черто́г Боже́ственныя Его́ сла́вы и блаже́нства.

Свети́лен. Подо́бен: Жены́ услы́шите.

Ико́ну Твою́ всечестну́ю, в зало́г благоволе́ния Твоего́, ве́рным дарова́ла еси́, Влады́чице, от о́гненнаго запале́ния сего́ покрыва́ющи все́х, на Тя́ упова́ющих, о Ма́ти Царя́ Христа́ Бо́га, и на́м, гре́шным, Прибе́жище спасе́ния в неча́янных беда́х, и ве́чныя жи́зни Хода́таица.

Богома́тери в че́сть ико́ны Ея́ Зогра́фския-Предвозвести́тельницы