Каноны. 4 апреля.

Канон священномученику Василию, пресвитеру Анкирскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

И нpа́вом пpича́стник,/ и пpесто́лом наме́стник апо́столом быв,/ дея́ние обpе́л еси́, Богодухнове́нне,/ в виде́ния восхо́д,/ сего́ pа́ди сло́во и́стины испpавля́я,/ и ве́pы pа́ди постpада́л еси́ да́же до кpо́ве,/ священному́чениче Васи́лие,/ моли́ Хpиста́ Бо́га// спасти́ся душа́м на́шим.

Кано́н. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Священномучениче Василие, моли́ Бо́га о нас.

Твоего́ ца́рствия сла́ву, Всецарю́, сла́вный Васи́лий возлюби́в, кре́пко на земли́ пострада́, и́мже Ца́рства небе́снаго на́с сподо́би.

Припев: Священномучениче Василие, моли́ Бо́га о нас.

Достохва́льное житие́ и чи́стое жи́тельство, сла́вне, по́двигов стезя́ насле́дника показа́ша Бо́гу и граждани́на небе́сна тя́ соде́лаша.

Припев: Священномучениче Василие, моли́ Бо́га о нас.

Повину́вся Го́споду, благи́м житие́м, прему́дре, повину́л еси́ врага́ и нога́ми попра́л еси́ сего́, све́тло воева́в на него́, му́чениче Васи́лие.

Сла́ва Отцу́ и Сы́ну и Свято́му Ду́ху:

Крове́й тече́ньми, мы́сленнаго фарао́на погрузи́л еси́ всево́инство я́ко вои́стинну и к земли́ восте́кл еси́, му́дре, иде́же о́блак страда́льцев при́сно весели́тся.

И ны́не и при́сно и во ве́ки веко́в. Ами́нь.

Богородичен: Отцу́ Сы́й Единоро́ден, восхоте́в, всели́ся во Твою́ пречи́стую утро́бу и Челове́к бы́сть, Чи́стая, за бла́гость спасти́ хотя́ челове́ки.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Священномучениче Василие, моли́ Бо́га о нас.

Возвы́сився, я́коже а́гня, на дре́ве, всеблаже́нне, строга́ния терпя́ мы́слию тве́рдою и низлага́я врага́ возноше́ния си́лою Боже́ственнаго Ду́ха.

Припев: Священномучениче Василие, моли́ Бо́га о нас.

Язв, му́чениче, добро́тами красне́йший яви́лся еси́ душе́ю и те́лом, мы́слию чи́стою благода́рственныя гла́сы воспуща́я Подвигополо́жнику твоему́.

Припев: Священномучениче Василие, моли́ Бо́га о нас.

Вели́ко зва́ние ища́ велему́дренным нра́вом, вели́кия по́двиги претерпе́л еси́, му́дре, и вельми́ при́сно взима́ющегося, му́чениче, смири́л еси́.

Сла́ва Отцу́ и Сы́ну и Свято́му Ду́ху:

Боже́ственных храни́тель бы́в повеле́ний, богому́дре, в темни́це затворя́емь, ве́рным отверза́я уче́ния пу́ть, в широту́ ра́зума вводя́щий.

И ны́не и при́сно и во ве́ки веко́в. Ами́нь.

Богородичен: Разуме́в издале́ча Твое́ зача́тие Иса́ия Ду́хом, Отрокови́це, уясни́ сие́, вопия́: се́ во утро́бе Де́ва Бо́га зачне́т.

Седа́лен, гла́с 3.

Красота́ бы́л еси́ Це́ркве, и держа́ва благоче́стия, и потреби́тель нече́стия, Васи́лие, и, претерпе́в му́ки, я́ко безпло́тен, со безпло́тными совокупи́лся еси́, ра́дуяся, му́чениче сла́вне, Христа́ Бо́га моли́ дарова́ти душа́м на́шим ве́лию ми́лость.

Сла́ва, и ны́не, Богородичен:

Боже́ственнаго естества́ не отлу́чься, пло́ть бы́в во чре́ве Твое́м, но Бо́г вочелове́чься и пребы́сть, Иже по рождестве́ Ма́терь Тя́ Де́ву я́ко пре́жде рождества́ сохрани́в Всенепоро́чну, еди́н Госпо́дь, Того́ приле́жно моли́ дарова́ти на́м ве́лию ми́лость.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Священномучениче Василие, моли́ Бо́га о нас.

Ви́дев облиста́емо твое́ боже́ственное лице́ заре́ю духо́вною, злочести́вый, му́чениче, дивля́шеся и я́ко тмы́ служи́тель нечу́вственно объюродева́ше.

Припев: Священномучениче Василие, моли́ Бо́га о нас.

Прему́дростию лу́чшею удобря́емь, мудрецы́ е́ллинския богонача́льною си́лою обуи́л еси́ и, пострада́в терпели́вно, побе́ды вене́ц восприя́л еси́.

Припев: Священномучениче Василие, моли́ Бо́га о нас.

Просте́рта и всю́ду изчленя́ема, укрепля́ше тя́ Сло́во, Иже на Кресте́ простре́ся, Васи́лие, и стра́стию ве́рным дарова́в безстра́стие.

Сла́ва Отцу́ и Сы́ну и Свято́му Ду́ху:

Не жру́ де́моном, ни устраша́юся сме́рти, ни му́к ви́да, — свяще́нный взыва́ше Васи́лий, — Еди́наго Бо́га испове́дую, в Тро́ице познава́емаго.

И ны́не и при́сно и во ве́ки веко́в. Ами́нь.

Богородичен: Пою́ Тя́, Влады́чице, многопе́тую, благословлю́ Тя, Де́во, Ея́же ра́ди челове́цы вси́ благослови́хомся и кля́твы дре́вния вои́стинну изба́вихомся.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Священномучениче Василие, моли́ Бо́га о нас.

Желе́за тя́жестию сля́чен бы́в, я́коже легча́йшее и́го Госпо́дне носи́ти изво́лив, на Творца́ вы́ю свере́пствовавшаго, врага́ го́рдаго, му́чениче, смири́л еси́.

Припев: Священномучениче Василие, моли́ Бо́га о нас.

С весе́лием желе́зными, му́чениче, обложе́н у́зами, ме́ста от ме́ст прете́кл еси́, си́ми, я́коже мони́сты, красу́яся, Васи́лие, и веселя́ Подвигополо́жника твоего́.

Припев: Священномучениче Василие, моли́ Бо́га о нас.

Кро́вными тече́нии са́м себе́, му́чениче, обагри́л еси́ вои́стинну ца́рскую оде́жду, сла́вне, побе́ды же венце́м обложе́н, Христу́ сца́рствуеши, ра́дуяся, Васи́лие.

Сла́ва Отцу́ и Сы́ну и Свято́му Ду́ху:

Утве́рждься благода́тию креста́, претерпе́л еси́ дале́кий и лю́тый пу́ть, бе́дно гони́мь, поя́: на стези́ свиде́тельств твои́х, красу́яся и ра́дуяся, Сло́ве, пойду́.

И ны́не и при́сно и во ве́ки веко́в. Ами́нь.

Богородичен: Превы́шшую херуви́м, высоча́йшую небе́с, лу́чшую тва́ри, му́дрых му́чеников огражде́ние, еди́ну Богоро́дицу пе́сньми почти́м.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Священномучениче Василие, моли́ Бо́га о нас.

Возвы́сився страстьми́ твои́ми и низве́рг еси́ врага́, великому́чениче сла́вне, и к Бо́гу преста́вился еси́, победи́тельным венча́вся венце́м при конце́ страда́ний, достохва́льне.

Припев: Священномучениче Василие, моли́ Бо́га о нас.

На Кресте́ Просте́ршему дла́ни тебе́ ра́ди, му́чениче му́дре, подо́бяся, воздви́жен бы́в на дре́во, терпели́вно строга́ния претерпе́л еси́, уязвля́я льсти́ваго твои́ми я́звами.

Сла́ва Отцу́ и Сы́ну и Свято́му Ду́ху:

Связа́л еси́ безпло́тныя враги́, вя́жемь за Христа́, Васи́лие, отреши́вся же, сла́вне, от пло́ти, до конца́ разруши́л еси́ те́х злоде́йства Боже́ственною благода́тию.

И ны́не и при́сно и во ве́ки веко́в. Ами́нь.

Богородичен: Пою́ Тя, Всепе́тая, Юже пою́т во́инства небе́сных чино́в, и молю́ Тя: стра́сти души́ моея́ исцели́, Чи́стая, и огня́ ве́чнаго свободи́.

Конда́к, гла́с 8.

Зако́нно тече́ние соверши́в и ве́ру соблю́л еси́, священному́чениче Васи́лие, сего́ ра́ди муче́ния венце́в сподо́бился еси́ и Це́ркве сто́лп непоколеби́мь яви́лся еси́, Сы́на, Отцу́ Собезнача́льна и Ду́ху испове́дав, Тро́ицу Неразде́льную, Юже моли́ изба́витися от бе́д чту́щим Тя́, да зове́м ти́: ра́дуйся, Васи́лие богому́дре.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Священномучениче Василие, моли́ Бо́га о нас.

Просвеще́нием Боже́ственныя благода́ти сия́я, тму́ му́к проше́л еси́, дне́ прича́стник бы́в, му́дре, невече́рняго и вопия́: благослове́н еси́, Бо́же оте́ц на́ших.

Припев: Священномучениче Василие, моли́ Бо́га о нас.

Водруже́но на ка́мени Боже́ственнаго ра́зума, му́дре, се́рдце твое́, не поколеба́ся напа́стей ве́трами, страда́льче, вопию́щее все́х Изба́вителю: благослове́н еси́, Бо́же оте́ц на́ших.

Припев: Священномучениче Василие, моли́ Бо́га о нас.

Бу́йствуя, мучи́тель повелева́ет на реме́ние ре́зати тя́, сла́вне, и, я́ко безпло́тна, терпя́ща тя́ зря́, ника́коже разуме́ вопи́ти: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Яко зла́то, в пещи́ му́к просия́л еси́, жего́мь, и, изображе́ние страсте́й Боже́ственных бы́в, вопия́л еси́, Васи́лие му́дре: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Де́вство, по рождестве́ нетле́нно, Де́во, пребы́вшее, познава́ющи, из Тебе́ ро́ждшемуся па́че ума́ вопия́ла еси́ Спа́су и Бо́гу: благослове́н еси́, Бо́же оте́ц на́ших.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Священномучениче Василие, моли́ Бо́га о нас.

Весьма́ к Бо́гу простира́емь, теле́сныя боле́зни со́н вмени́л еси́, отню́дуже к жи́зни блаже́нней и неболе́зненней, му́чениче страстоте́рпче, ра́дуяся, преше́л еси́.

Припев: Священномучениче Василие, моли́ Бо́га о нас.

Вжили́вся любо́вию Вседержи́теля, растерза́ния пло́ти претерпе́л еси́ кре́пко и си́льнаго в зло́бе удавля́еши врага́ струя́ми крове́й твои́х, Васи́лие треблаже́нне.

Припев: Священномучениче Василие, моли́ Бо́га о нас.

Ца́рское украше́ние Це́ркве Христо́вы, страсте́й Спа́совых изображе́ние му́ченик тве́рдый, ве́рных утвержде́ние, пе́сньми да восхва́лится Васи́лий вели́кий.

Сла́ва Отцу́ и Сы́ну и Свято́му Ду́ху:

Преми́рную сла́ву и Све́т невече́рний, небе́сное Ца́рство, вене́ц неувяда́емый, безпеча́льную жи́знь и ра́дость неизглаго́ланную, му́чениче, по кончи́не обрести́ сподо́бился еси́.

И ны́не и при́сно и во ве́ки веко́в. Ами́нь.

Богородичен: Спасе́ния челове́ческий ро́д сподо́бися Тобо́ю, Пречи́стая Богора́дованная: еди́на бо на́м Спа́са родила́ еси́, Его́же превозно́сим во вся́ ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Священномучениче Василие, моли́ Бо́га о нас.

Ви́дети святы́х кра́сныя све́тлости, разреши́вся от пло́ти, сподо́бился еси́, пребога́те, и со Ангельскими совокупи́лся еси́ во́инствы, поя́ при́сно с ни́ми: Свя́т, Свя́т, Свя́т, Тро́ице вседе́тельная и всеси́льная.

Припев: Священномучениче Василие, моли́ Бо́га о нас.

Яко све́т, всеблаже́нне, я́ко вели́кое со́лнце на небеси́, Христо́вы Це́ркве ви́димь, страда́льческими светлолу́чными сия́нии и чудотворе́ний боже́ственными светлостьми́ все́х озаря́еши ду́ши, восхваля́ющих тя́.

Припев: Священномучениче Василие, моли́ Бо́га о нас.

Са́м ся страда́ний красота́ми всеблагосла́вно, богому́дре страстоте́рпче, украси́л еси́, и Христу́ кра́сному предстои́ши, венце́м пра́вды ны́не обложе́н, те́мже тя́ чти́м, ве́рнии, ра́дующеся.

Сла́ва Отцу́ и Сы́ну и Свято́му Ду́ху:

Земля́ боже́ственным погребе́нием освяти́ся свяще́ннаго и боже́ственнаго твоего́, Васи́лие, телесе́, пра́ведных взыгра́шася ду́си, посреди́ себе́ ду́х тво́й, блаже́нне, иму́ще, с ни́миже вся́ ны́ помяни́, помина́ющия тя́.

И ны́не и при́сно и во ве́ки веко́в. Ами́нь.

Богородичен: Стра́шен о́браз рождества́ Твоего́, Бо́г бо бе́, Де́во, вопло́щся, ражда́емый, Его́же моли́ стра́шныя му́ки вся́ ны́ изба́вити, ве́рою несомне́нною чту́щия Тя́, Ма́ти чи́стая и неискусобра́чная.

Молитва

О святы́й уго́дниче Бо́жий, священному́чениче Василие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.