Каноны. 3 апреля.

Канон преподобному исповеднику Иакову епископу Катанскому (Сицилийскому).

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Иакове, дух твой.

Кано́н. Гла́с 2.

Пе́снь 1.

Ирмос: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподобне отче Иакове, моли́ Бо́га о нас.

Просвеще́ние Тро́ическое, Иа́кове, в ду́шу прие́м, ми́ра оста́вил еси́ те́мную пре́лесть и преми́рную сла́ву получи́л еси́.

Припев: Преподобне отче Иакове, моли́ Бо́га о нас.

Ты́, кре́ст на ра́мо взе́м, Распе́ншемуся, преподо́бне, после́довал еси́ и, мона́шествовав прему́дре, стра́сти воздержа́нием, о́тче, изсуши́л еси́.

Сла́ва Отцу́ и Сы́ну и Свято́му Ду́ху:

Вмести́телен дарова́ний Ду́ха от млады́х ногте́й твои́х сосу́д бы́л еси́ и Вы́шняго граждани́н Сио́на и насле́дник, блаже́нне Иа́кове.

И ны́не и при́сно и во ве́ки веко́в. Ами́нь.

Богородичен: Еди́на Бо́га, все́ми су́ща невмести́ма, Тебе́ вме́стна бы́вша за бла́гость, родила́ еси́, Отрокови́це, Его́же моли́ спасти́ воспева́ющия Тя́.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Преподобне отче Иакове, моли́ Бо́га о нас.

Житие́ твое́ красно́, сло́во со́лию любве́, богому́дре, растворе́но, се́рдце благоумиле́нно: сего́ ра́ди тя́ ве́рою ублажа́ем.

Припев: Преподобне отче Иакове, моли́ Бо́га о нас.

Христа́, на́с ра́ди я́вльшагося пло́тию, Боже́ственный почита́я о́браз, гоне́ния, о́тче, претерпе́л еси́, и беды́, и ско́рби, всеблаже́нне.

Сла́ва Отцу́ и Сы́ну и Свято́му Ду́ху:

Яко же́ртву чи́сту, тебе́ сама́го прине́сл еси́ Го́сподеви умерщвле́нием греха́ и же́ртвы безкро́вны Тому́, я́ко святи́тель зако́нен, прине́сл еси́.

И ны́не и при́сно и во ве́ки веко́в. Ами́нь.

Богородичен: Зла́ту я́ко вои́стинну кади́льницу, и ста́мну ма́нны, и Боже́ственную го́ру, и пала́ту прекра́снейшую Бо́жию Тя́, Де́во, имену́ем.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Преподобне отче Иакове, моли́ Бо́га о нас.

Всено́щными мольба́ми сла́сти теле́сныя умертви́в, безстра́стия яви́лся еси́ свети́льник неусы́пный, преподо́бне.

Припев: Преподобне отче Иакове, моли́ Бо́га о нас.

Сле́з тече́ньми всегда́ омыва́яся, преблаже́нне, чи́сто прия́телище яви́лся еси́ Свята́го Ду́ха.

Сла́ва Отцу́ и Сы́ну и Свято́му Ду́ху:

Смире́н же, и кро́ток, и сострада́телен, и незло́бив, и целому́др святи́тель, преподо́бне, бы́л еси́.

И ны́не и при́сно и во ве́ки веко́в. Ами́нь.

Богородичен: Неискусобра́чная Влады́чице, Яже Бо́га во чре́ве заче́нши, напа́стей и печа́лей вся́ изба́ви.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Преподобне отче Иакове, моли́ Бо́га о нас.

Сла́вы жела́ний вои́стинну, е́же в челове́цех высо́каго, преподо́бне, прея́вственно, о́тче, возгнуша́лся еси́ и бы́л еси́ свети́льник, смиренному́дрия сия́я све́тлостию.

Припев: Преподобне отче Иакове, моли́ Бо́га о нас.

Воздержа́нием мно́гим и во бде́нии приле́жнем, преподо́бне, в моли́тве и в злострада́нии взыска́л еси́ Бо́га, тя́ к Вы́шним оби́телем преложи́вшаго.

Сла́ва Отцу́ и Сы́ну и Свято́му Ду́ху:

Упражня́я себе́ всено́щными моли́твами, стоя́л еси́, душе́вным о́ком Боже́ственныя прие́мля зари́, о́тче святи́телю богому́дре Иа́кове.

И ны́не и при́сно и во ве́ки веко́в. Ами́нь.

Богородичен: Уязви́вшееся прило́ги лука́ваго, Пречи́стая, я́ко сострада́тельна, уврачи́ се́рдце мое́, Су́щаго, на Кресте́ пло́тию уя́звленнаго, неизрече́нно ро́ждшая.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Преподобне отче Иакове, моли́ Бо́га о нас.

То́ки сле́з твои́х, преподо́бне, мо́ре лю́тых страсте́й изсуши́ша и та́мошнее утеше́ние честне́й твое́й души́ исхода́таиша.

Припев: Преподобне отче Иакове, моли́ Бо́га о нас.

Незло́бив, кро́ток, це́л, преподо́бен, сла́док, смиренному́др, и ти́х, и просвеще́ния испо́лнен, пресла́вне о́тче, бы́л еси́.

Сла́ва Отцу́ и Сы́ну и Свято́му Ду́ху:

С Боже́ственными па́стыри па́мять твоя́, о́тче, спросла́вися, я́коже па́стыря до́браго, па́стырю му́дре Иа́кове, я́ко преподо́бне ста́до упа́сл еси́.

И ны́не и при́сно и во ве́ки веко́в. Ами́нь.

Богородичен: Во́лею вся́ соде́лавый во утро́бу, восхоте́в, неискусобра́чную всели́ся, тле́нием неду́говавшия нетле́нием почти́в, я́ко Милосе́рд.

Седа́лен, гла́с 4.

Христу́ после́довал еси́, ми́р оста́вив и пло́ть покори́в воздержа́нием я́ве, преблаже́нне Иа́кове, отню́дуже свяще́нства пома́зание свято́е име́л еси́, ны́не же к невеще́ственным преста́вился еси́ лико́м, моля́ о все́х на́с, восхваля́ющих тя́.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Преподобне отче Иакове, моли́ Бо́га о нас.

Мно́гая гоне́ния и неосла́бная искуше́ния претерпе́л еси́, иконобо́рцы побежда́я, правосла́вием сия́я, вся́ зря́щия просвеща́я и взыва́я, Иа́кове: благослове́н еси́, Бо́же оте́ц на́ших.

Припев: Преподобне отче Иакове, моли́ Бо́га о нас.

Христо́во стра́шное прише́ствие помышля́я, во умиле́нии все́ житие́ сконча́л еси́, до́ндеже обре́л еси́, блаже́нне, очище́ние прегреше́ний соверше́нное и ве́чное утеше́ние, просвеще́ние и́стинное и сла́ву неизрече́нную.

Сла́ва Отцу́ и Сы́ну и Свято́му Ду́ху:

Па́стыря Христа́ в кро́тости души́ яви́лся еси́ а́гня и, Си́м наставля́емь, па́стырь ове́ц в Ду́се, о́тче, слове́сных позна́лся еси́, с ни́ми поя́ всегда́: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Де́во сла́вная, Неискусобра́чная Чи́стая, Благослове́нная, па́дающих исправле́ние, согреша́ющих избавле́ние, спаси́ мя, блу́днаго, спаси́, Сы́ну Твоему́ зову́ща: благослове́н еси́, Бо́же оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Преподобне отче Иакове, моли́ Бо́га о нас.

Чисте́йший тво́й у́м, чистото́ю боже́ственною просвеще́н, бесо́вския тмы́ и мглы́ страсте́й разу́мно уклони́ся, преподо́бне, зовы́й: по́йте, вся́ дела́, Го́спода и превозноси́те во вся́ ве́ки.

Припев: Преподобне отче Иакове, моли́ Бо́га о нас.

Разжже́нныя врага́ стре́лы угаси́л еси́, му́дре, одожде́ньми непреста́нных сле́з и, разжже́гся Христо́вою любо́вию, всеблаже́нне, попали́л еси́ вещенеи́стовное сласте́й те́рние.

Сла́ва Отцу́ и Сы́ну и Свято́му Ду́ху:

Сие́ ста́до, прему́дре, е́же собра́л еси́ твои́ми уче́нии, и ве́рою соверша́ющия свяще́нную, и честну́ю, и по́лну све́та боже́ственную па́мять твою́ сохрани́ моли́твами твои́ми от искуше́ний и бе́д.

И ны́не и при́сно и во ве́ки веко́в. Ами́нь.

Богородичен: Живы́й су́щи исто́чник, Яже во́ду жи́зни ро́ждшая, ду́шу мою́, иста́явшую грехо́вным пла́менем, Де́во Богоро́дице, напо́й, да Тя́ сла́влю во вся́ ве́ки.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Преподобне отче Иакове, моли́ Бо́га о нас.

По мно́гих труде́х и боле́знех безчи́сленных, по́тех же и ско́рбех вои́стинну, в приста́нищи почи́л еси́, небе́сное нося́ бога́тство Боже́ственных доброде́телей, свяще́ннейше о́тче, преподо́бных удобре́ние.

Припев: Преподобне отче Иакове, моли́ Бо́га о нас.

Разсужде́ния свети́льник, чу́вствия престо́л, незло́бив, кро́ток, и ми́лостив, и благоумиле́н бы́л еси́, рыда́яй же и омыва́я о́др, я́коже рече́ Дави́д, с ни́мже вся́, ве́рою чту́щия тя́, помина́й.

Припев: Преподобне отче Иакове, моли́ Бо́га о нас.

Яко дневну́ю звезду́, я́ко Ду́ха хра́м, я́ко ши́пок благово́ния та́инственнаго, о́тче, сы́й испо́лнен, я́ко высокове́твенно дре́во, я́ко сла́вы ве́чныя о́бщника и я́ко му́дра святи́теля чти́м тя́, Иа́кове.

Сла́ва Отцу́ и Сы́ну и Свято́му Ду́ху:

Сле́зныя пото́ки, в зе́млю се́рдца посыла́емы бога́тно, вои́стинну кла́с возрасти́ша зре́л, ду́ши пита́ющ ве́рою чту́щия тя́ при́сно, святи́телю богому́дре, о́тче на́ш Иа́кове.

И ны́не и при́сно и во ве́ки веко́в. Ами́нь.

Богородичен: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ни я́ростию Твое́ю обличи́ мене́, — мо́лит Тя́ Де́ва, ро́ждшая Тя́, Христе́, Ангел мно́жества и с преподо́бными му́ченики.

Молитва

О свяще́нная главо́, преподо́бне о́тче, преблаже́нне а́вво Иа́кове, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.