Каноны. 21 апреля.

Канон святителю Нифонту, епископу Новгородскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Яко сы́й нра́вом правосла́вных Восто́чныя Це́ркве преда́ний и́стинный защи́тник, сподо́бился еси́ вели́каго во отце́х Феодо́сия ви́дети по сме́рти, я́ко жи́ва, возвеща́юща тебе́ Ца́рствия небе́снаго насле́дие, его́же неизрече́нных добро́т ны́не с ни́м неразлу́чно наслажда́яся, моли́ и о на́с, ча́дех свои́х, Ни́фонте прехва́льне.

Кано́н святи́телю, гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святителю отче Нифонте, моли́ Бо́га о нас.

Твоя́ десни́ца, Христе́ мо́й, да наста́вит мя́ в дне́шний де́нь пе́ти па́мять уго́дника Твоего́, стира́я запина́ющия ми́ враги́ и пу́ть, страстьми́ обветша́вший, во утро́бе мое́й обновля́я.

Припев: Святителю отче Нифонте, моли́ Бо́га о нас.

Благода́ть Паракли́та Твоего́ посла́в, Христе́, рабу́ Твоему́, призва́л еси́ в сле́д Тебе́ тещи́: и́же а́бие отве́ржеся ми́ра и возлюби́ зако́н Тво́й, пу́ть в любви́ Твое́й обновля́ющ.

Припев: Святителю отче Нифонте, моли́ Бо́га о нас.

Твое́ю мы́шцею наста́влен преподо́бный Тво́й, Го́споди, прии́де к безбу́рному приста́нищу в пречестну́ю Ма́тере Твоея́ Пече́рскую оби́тель, и бы́сть и́нок, и́ночествуя доброде́тельными нра́вы.

Сла́ва Отцу́ и Сы́ну и Свято́му Ду́ху:

Просия́ дале́че доброде́тель твоя́, о́тче, ю́же ви́дяще, мно́зи велича́ху тя́, и прославля́ху Небе́снаго Отца́, да́вшаго тебе́ благода́ть сицеву́ю, ея́же и мы́ да не лиши́мся твои́ми, о́тче, исправле́нии.

И ны́не и при́сно и во ве́ки веко́в. Ами́нь.

Богородичен: Бу́ди ми́ руководи́тельница, Богоневе́стная Де́во, руководя́щи на спасе́нную стезю́, и ду́шу мою́, страстьми́ обветша́вшую, обновля́ющи, Мари́е, Твои́ми щедро́тами.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святителю отче Нифонте, моли́ Бо́га о нас.

Еди́н пу́ть пра́в ви́дя ве́рный ра́б Тво́й, е́же прия́ти в жи́зни се́й Кре́ст Тво́й и Тебе́, Влады́це своему́, после́довати, а́бие к Тому́ спе́шно поте́кл, те́м ны́не неизрече́нныя сла́вы Твоея́ насыща́ется, Человеколю́бче.

Припев: Святителю отче Нифонте, моли́ Бо́га о нас.

Еди́ному Бо́гу от чи́стаго се́рдца моли́твы твоя́ непреста́нно возсыла́я, немощна́го врага́ ко́зни разруши́л еси́, уби́в того́ копие́м ве́ры, те́м прия́л еси́, святи́телю, вене́ц сла́вы от Христа́ Человеколю́бца.

Припев: Святителю отче Нифонте, моли́ Бо́га о нас.

Бде́нием и посто́м горе́ возлете́в, не изводи́л еси́ ума́ своего́ до́лу к скоротеку́щим и сицевы́м дея́нием стяжа́л еси́ ви́дение Бо́жия сла́вы, ю́же и на́м улучи́ти моли́ Иису́са Человеколю́бца.

Сла́ва Отцу́ и Сы́ну и Свято́му Ду́ху:

Та́ко просвети́ся житие́ твое́ пред челове́ки, я́ко ви́девше доброде́тели твоя́, о́тче, избра́ша тя́ на престо́л архиере́йский Новугра́ду, ему́же и бы́л еси́ па́стырь, Пастыренача́льнику приводя́ своя́ о́вцы, Иису́су Человеколю́бцу.

И ны́не и при́сно и во ве́ки веко́в. Ами́нь.

Богородичен: Пастыренача́льника Ма́ти Чи́стая су́щи, заблу́ждшее мя́ овча́ на пу́ть пра́вый наста́ви и упра́ви живо́т мо́й, да, Тобо́ю упра́влен, сподо́блюся насы́титися сла́вы Иису́са Человеколю́бца.

Седа́лен, гла́с 4:

Ре́вностию зело́ о Правосла́вии подвиза́яся, умножа́л еси́ в па́стве твое́й сла́ву Бо́жию, и ны́не у́бо прославля́яся иде́же гла́с пра́зднующих непреста́нно; моли́ о чту́щих па́мять твою́, Ни́фонте, о́тче свяще́ннейший.

Сла́ва, и ны́не, Богородичен:

Яко ро́ждшая сла́вы Го́спода, шу́ияго на́с безсла́внаго стоя́ния свобо́ждши, прича́стники сла́вы святы́х бы́ти сподо́би и просла́ви чту́щих Рождество́ Твое́, Чи́стая.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святителю отче Нифонте, моли́ Бо́га о нас.

Горо́ю высокоу́мия ходя́щих смири́л еси́, блаже́нне, не да́в междоусо́бныя бра́ни сотвори́ти, но благослови́л еси́ ми́ром, приве́д те́х ко спасе́нию и любви́ обновле́нию.

Припев: Святителю отче Нифонте, моли́ Бо́га о нас.

Словесе́м апо́стольским после́дуя, благовре́менно и безвре́менно настоя́л еси́, о́тче, все́ю си́лою завещава́я свои́м овца́м не удаля́тися от за́поведей Госпо́дних и от пра́вильных Це́ркве Его́ преда́ний, я́ко та су́ть на спасе́ние на́ше и обновле́ние.

Припев: Святителю отче Нифонте, моли́ Бо́га о нас.

Де́рзость твою́, святи́телю, кто́ испове́сть? Глаго́лал бо еси́ о свиде́ниих Госпо́дних пред цари́, не стыдя́ся диади́мы, те́м бы́л еси́ вторы́й Предте́ча, облича́я дея́ния беззако́нныя.

Сла́ва Отцу́ и Сы́ну и Свято́му Ду́ху:

Те́ло свое́ не Христу́, но блуже́нию беззако́нным бра́ком предаю́щих князе́й дерзнове́нно обличи́л еси́, апо́стольски повелева́я Це́ркви свое́й и всему́ кли́ру сицевы́х, безчи́нно ходя́щих, отмета́тися.

И ны́не и при́сно и во ве́ки веко́в. Ами́нь.

Богородичен: Беззако́ннующа мя́ испра́ви и разсвире́певшия во мне́ стра́сти смири́, Богоро́дице, да Тобо́ю те́х свобо́дь бы́в, обря́щу отра́ду, Ты́ бо еси́ еди́на все́х на́с спасе́ние и обновле́ние.

Пе́снь 5

Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Припев: Святителю отче Нифонте, моли́ Бо́га о нас.

Втора́го тя́ Фео́дора Студи́йскаго пое́т Це́рковь Росси́йская, блаже́нне, де́рзости ра́ди и испове́дания и призыва́ет к духо́вному весе́лию любо́вию, о́тче, хва́лящих тя́.

Припев: Святителю отче Нифонте, моли́ Бо́га о нас.

Ты́ непра́вильно ходя́щим сопротивоста́л еси́, преподо́бне, ника́коже соизволя́я без благослове́ния вселе́нскаго Константи́ня гра́да патриа́рха произвести́ на престо́л архиере́я и нече́стно да́ти во́лка в па́стыря овца́м, благоче́стно Христа́ сла́вящим.

Припев: Святителю отче Нифонте, моли́ Бо́га о нас.

Че́сти досто́ин еси́, свя́те, я́ко на че́сть святи́тельства главо́ю Кли́мента свята́го возводя́щим не соизво́лил еси́, па́че же обличи́в, с человекоуго́дники си́х собо́р осуди́л еси́.

Сла́ва Отцу́ и Сы́ну и Свято́му Ду́ху:

Истинный сы́н Восто́чнаго Вселе́нскаго престо́ла су́щи, сыно́м Росси́йским не соизволя́л еси́ от пе́рвенства своего́ отстава́ти, но достове́рно испове́дал еси́ то испе́рва рукописа́нием утвержде́но бы́ти, да изволе́нием приро́днаго па́стыря своего́, Константи́ня гра́да патриа́рха, все́ твори́мо бу́дет.

И ны́не и при́сно и во ве́ки веко́в. Ами́нь.

Богородичен: Благослове́нием ро́д челове́ческий Венча́вшая, благослове́ния избра́нных на́с сподо́би и сла́ву Сладча́йшаго Сы́на Твоего́ зре́ти да́ждь правове́рно хва́лящим Тя́.

Пе́снь 6.

Ирмос: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния, спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

Припев: Святителю отче Нифонте, моли́ Бо́га о нас.

Обы́де тя́ зло́бою архиере́й, ненави́дяй пра́вды, не сообща́лся бо еси́ ему́, я́ко непра́ведно престо́л похи́тившу, но ты́, о́тче, не устраши́лся еси́ того́, име́яй наде́жду на Бо́га, Иже е́сть кре́пость немощны́х и исправле́ние.

Припев: Святителю отче Нифонте, моли́ Бо́га о нас.

Удержа́ти тя́, блаже́нне, не удержа́ннаго, покуша́яся, архиере́й, наусти́ кня́зя в заточе́ние тя́ посла́ти и удержа́ самаго́, язы́ка же твоего́ не удержа́, обличи́л бо еси́ того́, я́ко незако́нно престо́л похи́тивша.

Припев: Святителю отче Нифонте, моли́ Бо́га о нас.

Словеса́ твоя́ бы́ша ме́чь беззако́нным, и́мже посе́кл еси́ те́х неи́стовство, сего́ ра́ди и ненави́дяху тя́ и престо́ла отлучи́ша, но ты́ не малоду́шествовал еси́, о́тче, блаже́нства изгна́нных пра́вды ра́ди наде́яся.

Сла́ва Отцу́ и Сы́ну и Свято́му Ду́ху:

Обличе́ние твое́, святи́телю Ни́фонте, я́зва бы́сть нечести́вым, снеда́ше бо и́х я́ко законопресту́пных, и распыха́хуся сердцы́, скреже́щуще зубы́ зве́рски, хотя́ще тя́ растерза́ти.

И ны́не и при́сно и во ве́ки веко́в. Ами́нь.

Богородичен: Обыдо́ша на́с мы́сленнии зве́ри, скреже́щуще зубы́, и ра́дуются о поги́бели на́шей, но Ты́, я́ко си́льна в кре́пости, Де́во, сокруши́ и́м че́люсти и на́с испра́ви проти́ву те́м ста́ти, Ты́ бо еси́ кре́пость немощны́м и исправле́ние.

Конда́к, гла́с 5:

Ре́вности дре́вних оте́ц в тве́рдом и́стинных догма́т хране́нии подо́бяся, крепкоу́мне Ни́фонте, не восхоте́л еси́ восхи́тившему самово́льне престо́л митропо́лии Кли́му сослужи́тель бы́ти, избра́нному же на се́ от все́х, поко́рся, священноле́пне с ни́м служи́л еси́ и, жи́знь свою́ сконча́в, обре́л еси́ безконе́чное Ца́рство Христо́во.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святителю отче Нифонте, моли́ Бо́га о нас.

Ты́, о́тче блаже́ннейший, в оби́тели многочуде́сней, я́ко в Черто́зе небе́сном живы́й, ра́дуяся, благода́рственная воздава́л еси́ все́х Цари́це и Сладча́йшему Сы́ну Ея́, поя́: отце́в Бо́же, благослове́н еси́.

Припев: Святителю отче Нифонте, моли́ Бо́га о нас.

Дерзнове́нно ста́в, преподо́бне, Правосла́вия ра́ди, лиши́лся еси́ от законопресту́пных престо́ла своего́, но престо́л тебе́ гото́вяшеся во огра́де небе́сной, я́ко и́стинному свиде́телю пра́вды.

Припев: Святителю отче Нифонте, моли́ Бо́га о нас.

Ви́дя Пастыренача́льник о́вцы твоя́, укосне́нием твои́м смяте́нны, па́ки тя́ па́стыря и́м подае́т, и́бо зло́ творя́й пра́ведным судо́м Бо́жиим са́м зло́ сугу́бо прия́т и отлучи́вый тя́ престо́ла са́м отпаде́ престо́ла.

Сла́ва Отцу́ и Сы́ну и Свято́му Ду́ху:

Христолюби́вый кня́зь Гео́ргий, Изясла́ва пра́ведно с престо́ла княже́ния изгна́в, со мно́гою че́стию отпусти́ тя на престо́л тво́й, на не́мже узре́вше тя́, о́вцы твоя́, преподо́бне, с ра́достию воспе́ша: отце́в Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Пра́ведно низпа́дший ро́д челове́ческий от Бо́жия благода́ти возста́вила еси́ пречи́стым Рождество́м Твои́м, Богома́ти, сего́ ра́ди ра́достно пое́т Ти́ во вся́ ро́ды, Благослове́нная.

Пе́снь 8.

Ирмос: В пещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки.

Припев: Святителю отче Нифонте, моли́ Бо́га о нас.

В пещи́ искуше́ний и в пла́мени ласка́ния законопресту́пных егда́ тебе́ неопали́вшася слы́ша вселе́нский Константи́ня гра́да патриа́рх, ублажи́ му́жество твое́, о́тче, и причте́ тя к дре́вним испове́дником, с ни́миже ны́не пое́ши Го́спода во ве́ки.

Припев: Святителю отче Нифонте, моли́ Бо́га о нас.

Ви́дя твое́ дерзнове́ние, в кни́зе живы́х напи́сано, патриа́рх Константи́ня гра́да присла́ и свое́ к тебе́ напи́санное посла́ние, в не́мже ублажа́ше твою́ о Правосла́вии ре́вность, ю́же помина́юще, и сы́нове росси́йстии превозно́сят Го́спода во ве́ки.

Припев: Святителю отче Нифонте, моли́ Бо́га о нас.

Сугу́бым жела́нием распала́емь, святи́телю, спе́шно прише́л еси́ в гра́д Ки́ев, жела́я Богома́тери в оби́тели Пече́рской и преподо́бным отце́м поклони́тися, та́кожде от гряду́щаго архиере́я благослове́ние прия́ти. Те́мже ди́вно виде́ние ви́дети сподо́бился еси́, я́ко святы́й Феодо́сий глаго́ла тебе́: отсе́ле бу́деши с на́ми неразлу́чно, сла́вя и поя́ Го́спода во ве́ки.

Сла́ва Отцу́ и Сы́ну и Свято́му Ду́ху:

Яко птене́ц, любя́ гнездо́, на хо́лме Пече́рском от Чи́стыя Голуби́цы созда́нное, любе́зно жела́л еси́ в не́м жи́ти неисхо́дно, а́ще же и привлече́ тя жела́ние сицево́е, но Бо́жий Про́мысл угото́вяше отше́ствие твое́ от вре́менных к ве́чным.

И ны́не и при́сно и во ве́ки веко́в. Ами́нь.

Богородичен: Птене́ц е́смь, в Твое́й огра́де, Влады́чице моя́, рожде́нный, но низпадо́х, уловле́н бесо́вскими прило́ги, оба́че молю́ся: приведи́ мя́ па́ки во о́ну, да иде́же нача́ло, та́мо и кончи́ну прииму́ благу́ю и со святы́ми отцы́ превозношу́ си́лу Твою́ во ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святителю отче Нифонте, моли́ Бо́га о нас.

Образом чу́днаго виде́ния извести́ тебе́, свя́те, все́х Влады́ка, яко и́маши по труде́х в поко́йная отыти́ места́, иде́же сла́вят немо́лчно Тро́ицу Пресвяту́ю Ангельския си́лы, Юже и мы́ с ни́ми велича́ем.

Припев: Святителю отче Нифонте, моли́ Бо́га о нас.

В то́нок со́н низве́дся, возмне́лся еси́, о́тче, в це́ркви Пече́рской стоя́щи, простира́ти к Пречи́стей Богоро́дице мольбу́, да ви́диши лице́ блаже́ннаго Феодо́сия, и бы́сть, я́коже восхоте́л еси́.

Припев: Святителю отче Нифонте, моли́ Бо́га о нас.

По жела́нию твоему́, в виде́нии не́кто от бра́тий, пое́мь, преподо́бне, приведе́ тя ко блаже́нному Феодо́сию, его́же ра́достне узре́в, я́лся еси́ за но́зе и благослове́ния сподо́бился еси́. Жела́нием сего́ и мы́ одержи́ми, Тро́ицу Пресвяту́ю велича́ем.

Сла́ва Отцу́ и Сы́ну и Свято́му Ду́ху:

О, сла́дкаго гла́са! О, до́браго целова́ния отца́ на́шего! Рече́ бо: отсе́ле бу́деши с на́ми, и показа́ ти́ сви́ток, в не́мже бе́ напи́сано: се́ а́з и де́ти мои́. Се́й гла́с и мы́ да услы́шим, мо́лимся Бо́жией Ма́тери, и при́сно Сию́ с тобо́ю, о́тче, велича́ем.

И ны́не и при́сно и во ве́ки веко́в. Ами́нь.

Богородичен: Ра́дуйся, сви́тче, Пресвята́я Де́во, в Тебе́ бо написа́ся пе́рстом Бо́жиим Предве́чное Сло́во. Ты́ же на́с напиши́ во сви́тце с рабы́ Твои́ми, вы́ну бо о се́м Тебе́ мо́лимся и пе́сньми Тя́ велича́ем.

Свети́лен:

Ангельски на земли́ пожи́в, Ангелом сожи́тель яви́лся еси́, преста́вився бо от ни́жних, к вы́шним отше́л еси́, иде́же предстоя́ Влады́це все́х Бо́гу, моли́ о чту́щих па́мять твою́, Ни́фонте блаже́нне.

Сла́ва, и ны́не, Богородичен:

Вы́шних чинонача́лий превы́шшая су́щи, на́с, ни́жних, не отступа́й, но при́сно с на́ми бу́ди, свобожда́ющи от вся́ких наве́тов, Твою́ бо кре́пкую о на́с по́мощь ви́дяще, никто́же воста́нет на ны́.

Стихи́ры, гла́с 4:

В благонаро́читый де́нь па́мяти богоно́снаго отца́ / прииди́те, христоимени́тии лю́дие, ра́достно взыгра́ем, / пе́сни похва́льныя принося́ще, / и, сла́достию духо́вною учрежда́ющеся, / любо́вию возопии́м: / Ни́фонте, о́тче свяще́ннейший, / моли́ся Христу́ Бо́гу / о спасе́нии ду́ш на́ших.

Плодоно́сим ти́, о́тче преподо́бне, / в дне́шний де́нь любо́вию пе́сненныя да́ры, / помина́юще исправле́ния твои́х доброде́телей, / и мо́лимся Христу́ Бо́гу, / я́ко да, вре́дных помышле́ний избежа́вше, / испра́вим жи́знь на́шу в благи́х дея́ниих / и небе́сныя по́чести не лиши́мся / моли́твами твои́ми.

Кто́ по достоя́нию восхвали́ти возмо́жет / святы́я Твоя́, Христе́ Бо́же? / Яко, любо́вию Твое́ю уязви́вшеся, / вся́ земна́я презре́ша, / и, во пло́ти су́ще, безпло́тнаго врага́ победи́ша, / и ны́не с безпло́тными на небеси́ веселя́тся, / и́хже ликостоя́ния и на́с сподо́би / святи́теля Твоего́ моли́твами.

Сла́ва и ныне, гла́с 6:

Святи́телем удобре́ние и отце́в сла́ву, исто́чника чуде́с и ве́рных ско́раго посо́бника, дне́сь, празднолю́бнии лю́дие, в пречестны́й хра́м соше́дшеся, хвала́ми воспое́м, глаго́люще: ра́дуйся, подви́жниче до́брый; ра́дуйся, бо́дрый па́стырю слове́сных ове́ц; ра́дуйся, мы́сленнаго во́лка от ста́да твоего́ жезло́м ве́ры отгна́вый и всеце́ло е́ к Пастыренача́льнику твоему́ приведы́й, Ему́же при́сно и о на́с моли́ся, я́ко да сохрани́мся от все́х враго́в невреди́ми и бу́дем насле́дницы жи́зни ве́чныя.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Нифонте, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.