Каноны. 20 апреля.

Канон преподобному Георгию, епископа Мелитинскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Георгие, дух твой.

Кано́н, гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Припев: Преподобне отче Георгие, моли́ Бо́га о нас.

Зарю́ благоутро́бия мне́, Христе́, испо́лньшемуся прегреше́ний и грехи́ лю́тыми, возсия́й, Ще́дре, и мра́к отжени́ моего́ ослепле́ния мольба́ми Твоего́ иера́рха.

Припев: Преподобне отче Георгие, моли́ Бо́га о нас.

Всю́ возде́лал еси́, му́дре, боле́зньми и по́ты твои́ми воздержа́ния зе́млю и, се́я в се́рдцы пшени́цу Ду́ха, кла́с безстра́стия прине́сл еси́, Гео́ргие блаже́нне.

Сла́ва Отцу́ и Сы́ну и Свято́му Ду́ху:

На ра́мена кре́ст тво́й взе́м, и земны́я красоты́ мироде́ржцу тмы́ отве́ргл еси́, Христу́ после́довав, и сокро́вище стяжа́л еси́ невеще́ственнаго Ца́рствия Его́.

И ны́не и при́сно и во ве́ки веко́в. Ами́нь.

Богородичен: Ору́жие и приста́нище тве́рдое, и сте́ну, и кре́пость, и Боже́ственное основа́ние, и мо́ст, и покро́в, Твое́, Богоневе́сто, иму́ще предста́тельство, от бе́д избавля́емся все́х.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди.

Припев: Преподобне отче Георгие, моли́ Бо́га о нас.

На высоту́ вше́д, блаже́нне, доброде́телей, и во глубины́ ду́ха досто́йно воззре́в, и виде́ния прия́телище бы́в, преподо́бне, водворя́ешися со Ангельскими ли́ки.

Припев: Преподобне отче Георгие, моли́ Бо́га о нас.

Обнища́в ду́хом, обогати́лся еси́, му́дре, Ца́рством невеще́ственным, в не́мже ста́ду твоему́ сокро́вища ве́чная ве́рно предугото́вал еси́, те́мже тя́ ублажа́ем.

Сла́ва Отцу́ и Сы́ну и Свято́му Ду́ху:

Простото́ю, преподо́бне, и кро́тостию душе́вною уподо́бился еси́ нра́вы твои́ми и исправле́ньми Иа́кову и показа́лся еси́ чистото́ю ду́ха Изра́иль, у́м, зря́й Бо́га.

И ны́не и при́сно и во ве́ки веко́в. Ами́нь.

Богородичен: Безо́тча родила́ еси́, безма́терня пре́жде Тебе́, и я́ко Младе́нца дои́ла еси́, Пита́ющаго вся́, Его́же моли́ спасти́ся ве́рно пою́щим Тя́ госпо́дственно, Богоро́дицу Чи́стую.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Преподобне отче Георгие, моли́ Бо́га о нас.

Ты́ душе́вный кора́бль спа́сл еси́ от страсте́й ве́щнаго треволне́ния, во приста́нище устреми́лся еси́ и тишину́ воздержа́ния, о́тче преподо́бне.

Припев: Преподобне отче Георгие, моли́ Бо́га о нас.

Ангелови́ден ра́зум стяжа́в, Тро́ическое от Ангел песнопе́ние послу́шал еси́, бы́в во изступле́нии смы́сла твоего́, прехва́льне.

Сла́ва Отцу́ и Сы́ну и Свято́му Ду́ху:

Ты́, мы́сленною пра́щею вооружи́вся, я́коже ино́го Голиа́фа, кня́зя тмы́, гордя́щася, низложи́л еси́, иера́рше, Дави́дски и боже́ственною ве́рою твое́ю.

И ны́не и при́сно и во ве́ки веко́в. Ами́нь.

Богородичен: Наде́жда и предста́тельство ми́ра, Богоро́дице, моли́ из Тебе́ Воплоще́ннаго о рабе́х Твои́х, Тя́ бо свято́е очисти́лище стяжа́вше, от греха́ избавля́емся.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Преподобне отче Георгие, моли́ Бо́га о нас.

Тя́, я́ко чистоты́ сто́лп и целому́дрия клю́чь, приснопа́мятне, ве́дуще вси́, да улучи́м у́бо ми́лость моли́твами твои́ми.

Припев: Преподобне отче Георгие, моли́ Бо́га о нас.

Богови́дным прозре́нием во свяще́нный оде́ялся еси́ чи́н, Непоро́чней Де́ве я́ко непоро́чна тя́ в сие́ призва́вшей.

Сла́ва Отцу́ и Сы́ну и Свято́му Ду́ху:

Ми́лости щедро́тство всажде́но име́я и всегда́ соживу́що, бы́л еси́ ни́щим бога́тныя пи́щи де́лателище.

И ны́не и при́сно и во ве́ки веко́в. Ами́нь.

Богородичен: Небе́снаго Влады́ку во утро́бе заче́нши, Всенепоро́чная, была́ еси́ вы́шши небе́с и всея́ тва́ри.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Преподобне отче Георгие, моли́ Бо́га о нас.

Ду́х Всесвяты́й в тебе́ обре́т селе́ние, духо́в лука́вых отгна́в легео́ны моли́твами твои́ми.

Припев: Преподобне отче Георгие, моли́ Бо́га о нас.

Тишины́ яви́лся еси́ река́ и струя́ кро́тости, от ни́хже напая́емся пото́ка сла́дости, преподо́бне о́тче.

Сла́ва Отцу́ и Сы́ну и Свято́му Ду́ху:

Умертви́в плотски́я сла́сти, ду́хом ожи́л еси́, и мене́ же, страстьми́ па́дшаго, возста́ви, сла́вне.

И ны́не и при́сно и во ве́ки веко́в. Ами́нь.

Богородичен: Сло́во во утро́бе, Иже от Отца́ безле́тно возсия́вша, в ле́то зачала́ еси́ Бо́га Сло́ва па́че сло́ва, Присноде́во.

Седа́лен, гла́с 8.

Смире́ния высото́ю све́тел бы́в, возноше́ния вра́жия до конца́ потреби́л еси́, хра́брствовав све́тло; ми́лостив же бы́в, о́тче преподо́бне, оби́льным подая́нием а́лчущия удовли́л еси́. Те́мже нестаре́ющуюся по сме́рти насле́довал еси́ пи́щу, ра́дуяся во ве́ки, Гео́ргие иера́рше блаже́нне. Моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Пе́снь 7.

Ирмос: Отроки ороси́вый в пещи́ и Де́ву сохрани́вый, ро́ждшую Тя́, по рождестве́, благослове́н еси́, Бо́же оте́ц на́ших.

Припев: Преподобне отче Георгие, моли́ Бо́га о нас.

Осия́нием Ду́ха Боже́ственнаго, е́же отсю́ду проразуме́л еси́ к лу́чшим преставле́ние твое́, и ны́не лику́еши, преподо́бне, во о́нех оби́телех.

Припев: Преподобне отче Георгие, моли́ Бо́га о нас.

Яко звезде́, я́вльшуся тебе́, житие́м и заре́ю боже́ственною чу́вствы просвеще́нну, преставле́ние, преподо́бне, твое́ звезда́ провозвести́.

Сла́ва Отцу́ и Сы́ну и Свято́му Ду́ху:

В черто́г Вы́шняго Ца́рствия, оде́ян, вше́л еси́ досто́йно и восклони́вся с Женихо́м, преподо́бне, на трапе́зе невеще́ственныя сла́дости.

И ны́не и при́сно и во ве́ки веко́в. Ами́нь.

Богородичен: Небе́сныя Тя́ си́лы, я́ко Ма́терь Жи́зни все́х, по до́лгу дорино́сят и воспева́ют, Влады́чице, я́ко Предста́тельство ду́ш на́ших.

Пе́снь 8.

Ирмос: Богоглаго́ливии о́троцы, в пещи́ со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Преподобне отче Георгие, моли́ Бо́га о нас.

Богоуправля́емое име́я се́рдце, страсте́й мои́х мра́чную, о́тче, отжени́ бу́рю и ко приста́нищу тишины́ твоея́ наста́ви.

Припев: Преподобне отче Георгие, моли́ Бо́га о нас.

Насажде́н при боже́ственных исхо́дищах любве́ во́д, дре́во жи́зни возрасти́ и плоды́ благоче́стия во вре́мя отда́л еси́.

Сла́ва Отцу́ и Сы́ну и Свято́му Ду́ху:

Яко вра́чь неисце́льных неду́гов и отгони́тель нечи́стых духо́в, блаже́нне Гео́ргие, и моего́ греха́ неду́г уврачи́.

И ны́не и при́сно и во ве́ки веко́в. Ами́нь.

Богородичен: Кто́ изрече́т Боже́ственное рождество́ Твое́, Богороди́тельнице Мари́е? Вся́ко бо естество́ диви́тся земноро́дных и Ангел, и Тя́ ублажа́ют.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Преподобне отче Георгие, моли́ Бо́га о нас.

Твои́х сле́з исто́чники безстра́стия возде́лал еси́, преподо́бне, ра́й непоро́чно и многооби́лен пло́д изно́сиши, пита́я доброде́тельми боже́ственное ста́до.

Припев: Преподобне отче Георгие, моли́ Бо́га о нас.

Ты́ чи́сто Бо́гу прине́сл еси́ служе́ние и, ве́ры, преподо́бне, тече́ние соверши́в, ны́не прия́л еси́ вене́ц пра́вды из руки́ Христа́ Подвигополо́жника.

Сла́ва Отцу́ и Сы́ну и Свято́му Ду́ху:

Дне́сь игра́ет и лику́ет ве́рных мно́жество, мона́хов стада́, свяще́нников собо́ри: тя́ бо вси́ о́браз спасе́ния обрето́ша, и пра́вилу изображе́ние.

И ны́не и при́сно и во ве́ки веко́в. Ами́нь.

Богородичен: Богому́жно Твое́ рождество́, Всенепоро́чная Отрокови́це, я́ко Бо́га су́ща и Зижди́теля веко́в моля́щи не оскудева́й непреста́нно, спасти́ ду́ши воспева́ющих Тя́.

Молитва

О свяще́нная главо́, преподо́бне о́тче, преблаже́нне а́вво Георгие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.